1 Tèsàloniyàns 4

Chyənà ye a yì nè na Yènfù hi saŋlê

1Wana ne, à ni faŋ ghɨn shyəma mu jis à mihi ha ghàn. Ghàh ti yiki ghàn, ghàn ghɨ hì khə lum we a ghàn kəta hi tè chyə atɨ̂n hi tè nì na Yènfù hi saŋlê, a mô a gha ma ghàn hì nêlò. Ghàh chyate ghàn chin nâ haŋaŋ, a Bâba Jisòs a jyak na ghàn fê nê chya nâ ni. 2Ghàh ni chyate ni beka ghàn hì khə gha ghe a ghàh tì yike ghàn. Gha mɨ ghɨ̂n mô ma ghɨ lo ha Bâba ghàhnà Jisòs. 3Yènfù khɨŋa na ghàn hi chyə chyənà ye a fu khɨŋa, ma fu ni khɨŋa na, kə wùt ha ghàn nê chyə nì ywê wùt makə ghê lɨm à wùt nâ hakoh, 4fê kôŋà na nâbi wùni wùt wù lɨmà hi khə hi fate khɨte ywê wûn wu lum afa Yènfù kòŋà, ghɨta boŋa kôŋà. 5Wùt kəta wi hi tè nyàblì nì ywê wûn wu lum tu gha njyàsu wùnsu te ghɨt ghe a ghɨ khə wi gha ye a Yènfù khɨŋa na ghɨ hi nê. 6Mu jìsà na kə wùt ni gha yi be yile hi yikte wùt wù bimena wùlè a gha afân nâ hakoh. Ghàh hì mô ma ghɨ ti jis gha ghɨ̂n ha ghàn, ghàh ghɨ hì fê jîsà chîn nâ nì jyaka na, Bâba bè folò ngə̂k ha ghɨt ghe a ghɨ chyə chyənà yi be mi yina, 7beka Yènfù tà tì toŋa jə ghàhnà na ghàhnà fwo ben ma hi chînà chyə kə yi chyə̂ nì ywena makə nì lɨmànà. Fu tì bɨ̀li toŋa na ghàhnà fwo ben ma ghɨ hi chyə te ghɨt a wuna. 8À shìki tunhe nâbi nde gha ye a ghàh yike, ma wù hi tunhe Yènfù te fu fo Yohnà a Yulena ha ghàn, tunhe wi wùt.

9Mu yena na ghàh kəta wi hi tè fê nyàk yi gha ha ghàn kum lum we a ghàn kəta hi tè kòŋà ghɨt a bimena ghɨ le atɨ̂n. Nâ Yènfù nì ngɨŋ à wûn ti yiki lum we a ghàn kəta hi tè kòŋà ngɨŋ sanisu atɨ̂n. 10Ghàn hì mô ma ghàn ti chwûtì kôŋ mi yina ha wana ne ghana à jɨ̀m a yi lak yi Màsìdoniyà, ghàh chyate ghàn a wana ne ghaha na, ghàn hi kôŋà chyâ nâ ni. 11Ghàn momhi nâ nì jyaka ma lem na wùt ha ghàn bè shìkà wi njaŋi wu lùk. Kə ghàn hi lye ghɨta a ghâ. Ghàn hi fêtà nì wo wanu hi khɨte mwə̀ me a ghàn khɨŋa. Ghàn hi nê kə te ghàh ndùku jîsà na ghàn hi nê. 12Ghàn shìki nî ni ma ghɨt ghe a ghɨ bu ghɨt a bimena ma ghɨ hi ngumle ghàn, ma ghàn hi yə kə kum yukhà a ghana, ke wi wùt.

Yi bên yi Bâba

13Wana ne, ghàh khɨŋa na ghàn hi khə gha ye a yi mô hamok kum ghɨt ghe a ghɨ tì kpute. Ghàh ni khɨŋa na ghàn hi khə gha mi yina shyəma ghàn hi jyə̂ wi te ghɨt ale ghe a ghɨ kəta wi kwâktìnì na ghɨta bè lôtèlò a yi kpû. 14Ghàhnà bimelò na Jisòs tî kpû kahi lôtì a yi kpû, fê bime na Yènfù bè nêlò ma Jisòs lyi ghɨt ghe a ghɨ tì shihi kpû ma ghɨ ti bime ha wûn a mbyî, ma ghê ghɨna hi chîntè mô amok.

15Gha ye a ghàh yike ha ghàn ni mò kə yi gha ye a Bâba tì yike. Ghàhnà ghe a ghɨ baha mô bè yênà wi ashyə̂ ha ghɨt ghe a ghɨ kpute hi kwònà nì Bâba wu tuk afa a wù kaha bênà. 16À bè hì mô wu tuk afû, ma Bâba nâ nì ngɨŋ à wûn chwo ben a nyə̂, ma wù fo saki, ma anjèl à Fùyèn yi chik jis, ma ghɨta fê yu te ghɨ toŋa soŋ yi Fùyènì, ma ghɨt ghe a ghɨ tì shihi kpû samhe Klistù kaha loti a yi kpû ashyə̂. 17Yènfù bê lyi ghɨna nâ nì ghàhnà à jɨ̀m ghe a ghɨ baha chyə, ma ghɨ yê kwona nì Bâba a sù mbàk a nyə̂, ma ghàhnà nì wûn faŋ à kə amok a yû mù jɨ̀m. 18Kum ni, ghàn hi fôktè gha mɨ ghɨ̂n a ghàh nyàka ni hi nì na təm mù wana ne ghàhnà hi saŋlê.

Currently Selected:

1 Tèsàloniyàns 4: bmv

Highlight

Copy

Compare