1 Jon 5

Ghàhnà ti tum yə mbyî

1Nâbi nde we a wù bime na Jisòs mò we a ghɨ chwoka lema, mò wâ Fùyèn. À kòŋà nâbi nde Bì, ma wù hi boŋa kôŋà kəbi wan we a Bì kəta. 2Ghàhnà làhi khɨlî na ghɨ kôŋàlò wana Fùyènà a wu yu afa ghɨ kôŋà wûn, nê gha ghe a wù jîsà. 3Ghàhnà shìki fate kòŋà Fùyèn, ma ghɨ hi lêmà saktu wun tu. Yi ta wi hi tè lèm a saktu wun tu, 4beka nâbi wùni Wâ Fùyèn wù hì mô ma wù ti tum yə mbyî. A mô yi bimî ghàhnà ye yi nê na ghàhnà tum à yə mbyî. 5À mò hi tum a yə nde mbyî agha? À mò hi tum a yə kə we a wù bime na Jisòs mò Wâ Fùyèn.

6A mô Jisòs Klistù mu wûn a wù lo a nyə̂ ben a chyə̂ fyi mòlû, fî kpulò suh luŋ mù wûn. Wù tà fyi jə kə mòlû, wù kpû suh luŋ mù wûn. À mò Yohnà Yulena a ghɨ fôktè gha mɨ ghɨ̂n beka ghɨ mô hamok. 7À mò mwə̀ mù tât te mù fòktè: 8A mô Yohnà Yulena nì mòlû nì luŋû. Mwə̀ munâ mù tât chwùtè kə gha yì mòk. 9Ghàhnà bime a gha ghe a ghɨta time fôktè, jîsà, biyani ye a Yènfù jìsà yi chyâ yi wùtì beka yi Fùyènì, wu jîsà kum Wâ wûn. 10Nâbi nde we a wù bime ha Wâ Fùyèn khəlò gha mi yîn a wûn a yi təm. Nâbi nde we a wù faŋa hi bimî ha Yènfù lyè wûn ha wut à yì fə̂m beka wù tà bimi jə gha ye a fu jîsà kum Wâ wûn. 11Gha yina a Yènfù jìsà mô yìna na, fu fo chyəna ghe ghɨ bè mê wi ha ghàhnà, chyəna ghɨ̂n mô ha Wâ wûn. 12Wùt we a wù mò a kak à mòk ghê wan kəta chyəna ghe ghɨ bè mê wi, we wù bu a kak à mòk ghê Wâ Fùyèn kəta wi chyəna ghe ghɨ bè mê wi.

Chyəna ghe a ghɨ bè mê wi

13Mu nyàk gha ghɨ̂n ha ghàn ghe a ghàn bime ha Wâ Fùyèn shyəma ghàn hi khə na ghàn kətalò chyə ye a yi bè mê wi. 14Ghàhnà ki time a Yènfù ashyə̂ buf nâbi ghə wu lum afa a fu khɨŋa, ma ghàhnà hi khə hamok na fu nè ywolò ghàhnà. 15Ghàhnà shìki khə na fu ywolò ghàhnà, ma ghɨ nê buf nâbi ghə ha funfu, khə na fu nè folò ha ghàhnà.

16À ki yena nâbi nde wâ nè wûn wu nê be, a bu be ye yì mò hi jyàhè wûn ghê Yènfù, wu jəm ha wûn na Yènfù ni ma wâ nè wûn mu we hi chyə̂. Mu jìsà ghe a ghɨ nê be yi bu hi jyàhè ghɨna ghê Yènfù. Be yìlè làwû à yì nè wùt jyâhè ghê Yènfù, mu jìsà wi na ghàn jəm kum nki be mi yîn. 17Nâ gha a be à jɨ̀m mò be, biyani, be yìlè mô a bu ye à yì mò hi jyàhè wùt ghê Yènfù. 18Ghàhnà khə na wana Fùyènà wi hi tè nè yê kə nì be, beka Wâ Fùyèn tòknàlò nì ghɨna, ma deblì wi hi nè ngə̂k ha ghɨna nâ hakoh. 19Ghàhnà khə na ghàhnà mò wana Fùyènà, mbyî yì jɨ̀m mô a deblì sah à yì sâk. 20Ghàhnà khə kəbi na Wâ Fùyèn tì ben yiki ghàhnà shyəma ghɨ hi khə Yènfù, a fe fu mô hamok, ghàhnà chîntè mô kə ha shyə̀ à mòk ghàhnà nì funfu nì Wâ wûn Jisòs Klistù. Wu mô Fùyèn fe a fu mô hamok, fo chyə ye a yi bè mê wi. 21Kə ghàn bè hì kəta gha yile hi nì nì yèn mù tu fə̂m a mwəlà mâmù.

Currently Selected:

1 Jon 5: bmv

Highlight

Copy

Compare