1 Kòlitiyàns 14

Gha ale kum fo tu Yohnà Yule tu

1Ghàn hi khɨŋa lumtu kə yû mù jɨ̀m hi tè chwùtè kôŋì ha ghɨta. Ghàn hi nô hi khɨte fo te a Yohnà Yulena fo, nô nâ hanɨ̂ŋ hì tè khə hi fòktè tum à Fùyèn. 2Wùt we a wù jìsà jîs tu letu teka wù yiki, jìsà wi ha ghɨta, wù bɨlà jîsà ha Yènfù beka wù jìsà gha letena a Yohnà a jyak, wùt ywo khɨle wi gha ye a wù jìsà. 3Biyani ha wùt we a wù fòktè gha ma ghɨ lo ha Yènfù, jìsà ha ghɨta gâmtè na ghɨna ghəkna, ma hi kəta təm a ta, fê kəta yi saŋlî. 4Wùt we wù jìsà jîs tu letu gàmtè kə ngɨŋ à wûn, biyani we wù fòktè tum ma yi lo ha Yènfù, nâbi nde ywo khɨle gha ye a wù jìsà gâmtè ghɨt a bimena. 5Mu kòŋà na ghàn hi jîsà jîs tu lôtù biyani tòkà kôŋà na ghàn hi bɨlà fòktè gha ma ghɨ lo ha Yènfù, nâbi nde ywô. Wùt we wù fòktè gha ma ghɨ lo ha Yènfù chyâlò wùt we a wù jìsà kə jîs tu lôtù, a bu kə na wù shihi jìs, wùt hi mô hi tè fòktè banhi gha ghe a wù jìsà, shyəma ghɨt a bimena ghe a ghɨ mô a chìnti hi ləma nâ à jɨ̀m. 6Mu ki bên ha ghàn chîn, a wan a noma hì jîsà ha ghàn a jîs tu lôtù, ghàn ywo khɨle wi, mbè àtɨ̂n hì mô nâ ghə? A bu kə na mu ben nì gha te Yènfù chwùte banhe ha mu, makə mu ben hi nì na ghàn hi kəta tofu, makə mu ben hi fòktè tum à Fùyèn, makə hi yike ghàn nì gha yile.

7Yi mô kəbi yi ghəl te wò ki lyê a ndoŋ hì chìnà toŋa kə yi tôŋ makə wò lyi yi luŋ hì chìnà buka kə yi bûk, ma wùt tê ywo khɨlî. 8Wùt we a wù buka ngə̀m hi fòktì na woŋi ye yi bênà ki fâŋ hi buk a jûŋ, ma ghɨ khɨli yàni hi fate wu wun a yi wòŋ agha? 9Yi boŋa mô kəbi ni ha ghàn. Ghàn shìki jîsà jîs tu lôtù, ghɨ ywo khɨle wi, ma wùt tê khɨlî na ghàn jìsà na ghə agha? Yi shìki mô ni, ma gha ghe a ghàn jìsà ma ghɨ hi chyàlà kə te a fûf. 10Jîs tù dò kə ni a mbyî, ghɨta mô ghe ghɨ ywo nâbi yìni. 11Mu shìki ywo khɨle wi jîs yi wûtì, ma mu hi mô wut à tûm ha wùt mu we, wu mô wut à tûm ha mu. 12Mu jìsà na, te ghàn lùmà hi khɨte fotu Yohnà Yulena ni, ghàn momhi nâ nì jyaka hi fèt nì te tu gâmtè hi ləmhe a ndâ a Fùyèn. 13Yi ni chwùtè na wùt we a wù khə hi jìs jîs tu lôtù kəta hi jə̀m na Yohnà fo kpenhi jyaka, ma wù khɨli hi fòktè banhe gha ghe a wù jìsà. 14Mu shìki jə̂m yi jìs yi lô, ma yi hi chwûtè na mu jə̀mà a mu yohnà hamok, biyani kwâktì mi fêtà wi. 15Yi shìki mô ni, ma mu ni nâbi ghə? Yohnà a ma kəta hi tè jə̀m, kwâktì mi boŋa jə̂mà, yohnà a ma ghɨ yema njàŋ, kwâktì mi boŋa yemâ. 16Ghàn shìki jə̂m fo àyòŋnà, a jə̂mà kə a yohnà, wùt we a wù tà yikî jə̂, nê gbi yàni hi tòkà gha tɨni hi jìs na, “Àmèn” teka wù ywo khɨli gha ghe a ghàn ye hì jə̂mà, fo àyòŋnà atɨ̂n agha? 17Jə̂m yani hi fo àyòŋnà ha Yènfù làhi tè jwòf, biyani ma yi tê gàmtè jə wùt lè nâ hakoh.

18Mu fo àyòŋnà ha Yènfù te mu khə hi jìs jîs tu lôtù chyâ ghàn nâ à jɨ̀m. 19Biyani mu shihi jìs a ndâ Fùyèn, ma mu hi kôŋà hi jìs kə gha à tân na ghɨta ywo khɨli ma yike gha chyâ shyəma mu jis gha kam ìwûm ma mu jis a jìs tu lôtù, ghɨta bu hi yû.

20Kə ghàn hi kwâktè ni te mwəlà, a wana noma, ghàn hi bɨlà mô kə mwəlà ha be biyani kwâktè gha te ghɨt a kpenana. 21Ghɨ ti nyak a ŋwàklù yi Sak na:

“Mu Bâba jìsà na, Mu bè nêlò,

ma tumu hi fôktè tum à mì ha ghɨt ghɨ̂n.

Mu bè nêlò,

ma ghɨ jis ha ghɨna yi jis yi tumi.

Ghɨ bè nê kəbi ni,

ma ghɨna tunhi na ghɨ ywo wi gha ye a mu jìsa.”

22Yi chwùtè na, jîs tu lôtù mò chwena ha ghɨt ghe a ghɨ baha mô teka ghɨ bimi, a bu ha ghɨt ghe a ghɨ ti bimî. Fo ye a yi mô hi tè fòktè gha ma ghɨ lo ha Yènfù mò chwena ha ghɨt a bimena, a bu ha ghɨt ghe a ghɨ baha mô teka ghɨ bimi.

23Yi ni chwùtè na, ghàn à jɨ̀m ki yûŋtì a ndâ Fùyèn, nâbi nde hi jîsà kə yi jîs yi lô, ghɨt ghe a ghɨ baha mô teka ghɨ bimi, lyi bên, makə a ghɨt a benana, ma ghɨna tê jìs na ghàn jyakalò. 24Biyani ghàn à jɨ̀m shìki fôktè tum ma yì lo ha Yènfù, ghɨt ghe a ghɨ baha mô teka ghɨ bimi lyi ben yu lò makə à lyi ben ghɨt a benana, ma tum àtɨ̂n ni, ma ghɨna bimi nâ ha ghɨna sù ngɨŋ ma ghɨ ni ma ghɨna yen à khɨli gha ghɨna be, ma gha ghe a ghɨna ywo fê sak ghɨna 25ma ghɨ fihi gha a letena ghe a ghɨ mô a ghɨna təm, ma ghɨna ngumte a chyə̂ ma ghɨ hi kokhe Yènfù jîsà na, “Yènfù mò kə nâ a ghàhnà fùtɨ̂n hamok.”

Ghàn hi fate nê gha a ndâ Fùyèn

26Ghàhnà mò hi jìs nâ na ghə a wana noma? Ghɨ làhi jìs na, ghàn yûŋtì nâbi wùni yu, wùt hì kəta njàŋ hi yêm, wùlè kəta yi gha hi yikî, wùlè kəta yi gha te Yènfù chwùte banhe ha wûn, wùlè kəta yi gha hi jìs yi jìs yi lô, wùlè mô hi fòktè gha ghe a ghɨ jîsà yi jìs afû. Ghàn hi nê gha mɨ ghɨ̂n à jɨ̀m kə hi gàmtè ghɨt a bimena. 27Ghɨta shìki mô hi jìs yi jìs yi lô, ghɨ jis kə hi tàn à bà makə à tât. Ghɨ shihi jìs, ghɨ de wùt wù mòk jis kə ni mihì lò, wùt lè fòktì gha ye a wù jìsà shyəma wùt lè fê jis shyəma ghɨ ywo à khɨli gha ghe a ghɨna jìsà. 28Wùt shìki bu hi fòkte gha ye a ghɨ jîsà, ghɨna china moŋ, nâbi nde wu hi jîsà kə ha ngɨŋ à wûn, fê jîsà kə ha Yènfù. 29Fòktì se a su jîsà, su jis kə sù bà makə sù tât. Ghɨna jis, ghɨt ale kahi chyâhì gha ye a ghɨna jìsa. 30Fòktì yîmì hi jìs yi ghâ, Yènfù fo tum yì fê ha wùt lè, fòktè àtɨ̂n chinalò shyəma wùt àtɨ̂n boŋà jis. 31Nâ ghàn à jɨ̀m làhi tè fòktè tum ma yì lo ha Yènfù, wu yu afa wùt mòk jìsà, china shyəma wùt lè fê jis shyəma ghɨta yiki gha atɨ̂n ma fê khɨti təm a ta. 32Ghɨt ghe a ghɨ kəta fo hi tè fòktè tum ma yì lo ha Yènfù kəta hi tè fate khə hi khɨte tum àtɨ̂n. 33Beka Yènfù kòŋà wi na ghɨta hi chînà nê yi nî gha. Fu khɨŋa na ghɨta hi chyə nì yutìnì. Yi mô kə ni a chìntisu ghɨt a Fùyènà nâbi afa. 34Ywena hì mô a chìnti, kə ghɨ hi jîsà beka ghɨ tà fo jə jyaka na ghɨna hi jîsà. Ghɨna kəta hi tè mò kə lɨmànà sah à yi sak kə te Saki jìsà. 35Wùt ha tɨ̂n shìki kôŋ hi tè khə yi ghâ, wu buf ha lɨm à wûn a ndâ, beka à mô yi gha yi wumeni ha wùt wù ywên hi tè jìs a ndâ Fùyèn.

36Gha yi Fùyènì mò teka yi yime ha ghàn! Yi baha ben kə ha ghàn. 37Wùt shìki kwâktì na yi mò fòktì makə wù kəta Yohnà Yulena, ma wù hi khə na gha ye a mu jìsà ha ghàn mò ma à jis Bâba. 38Wùt tê lye gha yina ha yi ghâ, ma Yènfù boŋà mana wûn.

39Ghàn hi nô lê nâ nì jyaka, a wan a noma, hi tè fòktì tum ye a yì lo ha Yènfù. Kə ghàn hi tunhi na kə ghɨta hi jîsà jîs tu lôtù a ndâ Fùyèn. 40Biyani, ghàn shihi nè nâbi ghə, ghàn hi nê kə wu lum wu jûŋù, fê nê kə yi ghəl.

Currently Selected:

1 Kòlitiyàns 14: bmv

Highlight

Copy

Compare