1 Kòlitiyàns 12

Fo te Yohnà Yulena fo

1Wana noma, mu khɨŋa chin na ghàn hi khə gha kum fo te a Yohnà Yulena fo ha ghɨta. 2Ghàn khə na, à ndùku mô te ghàn baha mô teka ghàn bimi, ghɨ lehe ghàn, lyê yênà nì ghàn ha mosòmù, mu jîsà wi. 3A ni gha ye a mu khɨŋa na ghàn hi khə na wùt wi hi jìs sûlè Jisòs, Yohnà Fùyènà tihe wut àtɨ̂n. Wùt wi hi jìs na, “Jisòs mò Bâba,” a bu kə na Yohnà Yulena tihe lò wûn.

4Nki tu fo tu dô kə ni, biyani a fo kə Yohnà Fùyènà mɨ ghɨ̂n à mòk. 5Nki tu fèt tu dô kə ni, biyani ghɨ fêtà kə ha Bâba Jisòs mu wùna. 6Lum tu fèt tù dô kə ni, biyani Yènfù chwûtè lum tù jɨ̀m ha ghɨt à jɨ̀m a mô kə Yènfù mòk 7Yènfù fo Yohnà wuna nâbi ha nde na ghɨ hi gâmtè wûn na wù hi nè fêtì kə ha ghɨt à jɨ̀m a jûŋ 8Yohnà mɨ ghɨ̂n à mòk yênà ha wùt wùlè, ghɨ ni na wù hi jîsà nì tofu, ghɨ yen ha wùt wùlè ghɨ ni na wù hi khə hi fòktè gha ghe a ghɨ chwute ha wûn. 9Yohnà mɨ ghɨ̂n à mòk yênà ha wùt lè, ghɨ ni na bimi yi wuni hi tâ, ghɨ yen ha wùt lè, ghɨ fo jyaka na wù hi chwuka yaftu ghɨ̂tù. 10Yohnà mɨ ghɨ̂n kə à mòk yênà ha wùt lè, ghɨ ni na wù hi fêtà fêt tu kana tu, ghɨ yen ha wùt lè, ghɨ fo a jyak na wù hi fôktè gha ma ghɨ lo ha Yènfù. Ghɨ yen ha wùt lè, ghɨ ni na wù hi khə hanɨ̂ŋ, ye a yì mò atɨ̂n à gha afa a ghɨ lo ha Yohnà Yulena nì ghe a ghɨ lo ha yohnù wule. Yohnà atɨna yen ha wùt lè, ghɨ ni na wù hi khə jîs tù teka wù yiki ha wùt, ghɨ yen ha wùt lè, ghɨ ni na wù hi ywo khɨle jîs tu tɨntu, fôktè gha ye a tu jîsà. 11Gha mɨ ghɨ̂n nâ à jɨ̀m nè kə Yohnà mɨ ghɨ̂n à mòk. Ghɨ fo nâbi yìni nki yi fo, nâbi ha nde, kə te ghɨ kôŋà.

12Ghàhnà khə na wunu wûtù mò kə wù mòk biyani kəta wu bâh, wu dô kə ni. Bâh wùnu mu wuna chîntè mô kə wu wùn afân wù mòk. Yi ni mò kəbi ni ha Klistù. 13Ghàhnà tì kahi hì mô kə ha wùn wù mòk wu tuk afa ghàhnà fye mòlû a Yohnà Yulena, makə à ndùku mô ni, ghàhnà mô ghɨt a Jûs, makə ghàhnà mô wu tûm, makə ghàhnà mô wu kwôs ha wùt, makə ghàhnà mô a ghàhnà sù ngɨŋ. Yènfù tì fo Yohnà mɨ ghɨ̂n à mòk, kə ha ghàhnà à jɨ̀m.

14Wunu mò ni kəta wijə kə bâh à mòk, wu kəta bâh wu dô kə ni. 15Wula ki jîs na, “Mu wijə bâh a wùna beka mu wijə a wô,” ma yìna tê nè jə̀ na kə ghɨ hi fê mô bâh à wùna. 16Tûŋlana ki jîs kəbi ya na, “Mu wijə bâh à wùna beka mu wijə yi sê,” ma yìna tê nè jə̀ na kə ghɨ hi fê mô bâh à wùna. 17Wun wù jɨ̀m shìki mô kə yi sê, ma wu hi ywo yàni gha? Wun wù jɨ̀m shìki mô kə a tûŋlu, ma wu hi lɨ̂mtè yàni shyə agha? 18Wun wu wûtù mò ni ma Yènfù ti lem na nâbi ghɨ̀ni bâhà hi mô kə wu lum afa a fu kôŋà atɨ̂n. 19Bâh mu wuna hì chîntè mô kə bâh à mòk, ma wunu hi mô nâ afa? 20Yi mô na, bâh wù wùnu mò kə nâ hidù biyani, wunu mô kə wù mòk.

21Se wi hi jìs ha wo na, “Wò kəta wijə fêtì ha mu,” ma to wijə hi jìs ha wula na, “Wò kəta wijə fêtì ha mu.” 22Bâh wù wùn we a ghɨ yena na wu tòkà ta wi, ni bɨlà mò we a wu bu, ma wùt kpu. 23Ghàhnà ni bɨlà tôknè nì bâh wù wùn we a ghàhnà yena na wu tôkà kokne wi, we a wu bênà nì wumînì mò we a ghɨ fate tôknè nì wunu, 24chyâ nâ te ghɨ tôknè nì bâh we a wu jwôfà. Biyani Yènfù fate wunu wu lum afa ghɨ kokhe bâh we a ghàhnà yena na wu tòkà kəta wi fêtì. 25Yi mô ni shyəma wunu hi mô kə ha shyə̀ à mòk, nâbi ghɨ̀ni bâh à wùna hi tôknè nì ale. 26Bâh a wùna à mòk shìki kəta ngə̂k, ma bâh wù wùnu wù jɨ̀m hi chîntè mô kə a ngə̂k. Ghɨ shìki hì bəmhe bâh à wùna à mòk, ma bâh wù wùnu wù jɨ̀m hi saŋle kə yi saŋlî.

27Ghàn à jɨ̀m mò ni chîntè mô wu wun wu Klistù, nâbi nde a ghàn a fùtɨ̂n mô bâh à mòk atɨ̂n. 28A mô a ndâ Fùyèn ma Yènfù ti jyâhì ghɨta lem tu fêt a tu nkì a tu a nkì. Fu ti lem ghɨta ashyə̂, a mô ghɨt a tuma, a kûmtè, a sù fòktì. Yi bàm atɨ̂n lem chichàsu, fî lem kəbi ghɨt ghe a ghɨ nê gha a kanana, fî lem ghɨ le na ghɨ hi chwuka ghɨta, nì ghe a ghɨ gâmtè ale. Fu ti lem ghɨta na ghɨ hi tihe ghɨta, lem ghɨ le na ghɨ hi khə jîs tu letu, teka wùt yiki ghɨna. 29Ghàn tà yen jə na à wijə ghɨt à jɨ̀m à mò ghɨt a tuma agha? À wijə ghɨt à jɨ̀m a ghɨ mô à sù fòktì makə sù chichà. A nê wijə ghɨt à jɨ̀m gha a kanana. 30A kəta wijə ghɨt à jɨ̀m, fo hi tè chwuk à ghɨ̂t. A kəta wijə ghɨt à jɨ̀m fo hi tè jìs tu jîs teka ghɨ yiki ghɨna, a kəta wijə ghɨna à jɨ̀m fo hi tè khə gha ye a ghɨ jîsà a tu jìs afân. 31Ghàn hi nô hi khɨle fo te a tu kəta fêt yi chiki. Mu chwùtè wu lum ha ghàn chîn, wu jwôfà kpenê.

Currently Selected:

1 Kòlitiyàns 12: bmv

Highlight

Copy

Compare