1 Мусэ 4
4
Къаин и къуэш Хьэбэл зэриукӀар
1Ӏэдэм екӀуэлӀащ Хьэуа, и фызым, ар лъэщыджэ хъури, Къаин къилъхуащ. ИтӀанэ жиӀащ:
– Згъуэтащ сэ лӀы, Зиусхьэным къыбгъэдэкӀыу.
2ИтӀанэ къилъхуащ абы и къуэш Хьэбэл.
Хьэбэл мэлыхъуэт, Къаин мэкъумэш ищӀэрт.
3Зэман дэкӀауэ, Къаин Зиусхьэным хуихьащ щӀыгу къэкӀыгъэхэм ящыщ тыгъэ. 4Хьэбэли ихьащ и хъушэм щыщу щыпэлъхухэр, абыхэм я щэдагъэм щыщи. НэфӀкӀэ къеплъащ Зиусхьэныр Хьэбэли абы и тыгъэми, 5ауэ Къаини абы и тыгъэми къеплъакъым. Къаин ар икъукӀэ и жагъуэ хъуащ, и нэгури зэхэуащ.
6Зиусхьэным къыжриӀащ Къаиным:
– Сыт уи жагъуэ щӀэхъуар? Сыт уи нэгури щӀызэхэуар?
7ФӀы пщӀэмэ, уи щхьэр пӀэтыркъэ?
АтӀэ фӀы умыщӀэмэ,
гуэныхьым бжэщхьэӀум зыщеущэху;
абы узыӀэпешэ,
ауэ уэ абы текӀуэ.
8Къаин епсэлъащ Хьэбэл, и къуэшым.
Ахэр губгъуэм иту, Къаиныр пэуващ Хьэбэл, и къуэшым, икӀи ар иукӀащ.
9– Дэнэ щыӀэ Хьэбэл, уи къуэшыр? – жриӀащ Зиусхьэным Къаин.
– СщӀэркъым, – жиӀащ абы, – сэ си къуэшым срихъумакӀуэ?
10– Сыт уэ пщӀар? – жиӀащ Зиусхьэным, – уи къуэшым илъ бгъэжащ, къыщӀоӀукӀ абы и гуӀэ макъэр щӀы щӀагъым. 11Уэ нэлат къыптехуащ иджы. Уи къуэшым илъу уи ӀэкӀэ бгъэжар ищтэну зи жьэр зэтезых щӀыгум зыри къыпхухэкӀынукъым. 12ЩӀым утелэжьыхьми, абы дяпэкӀэ зэгуэри къыуитыжынукъым и гуащӀэр; уэ ухъунущ егъэзыпӀэншэ, хапӀэншэу щӀылъэм къыщызыджэдыхь.
13Абдежым жриӀащ Къаин Зиусхьэным:
– Си тезырыр нэхъ инщ сэ сшэчыфынум нэхърэ.
14Аращи, Уэ иджы сытыбоху щӀылъэм,
Уи нэгуми зыщӀэзмыгъэхуэну зызогъэпщкӀу,
сыхъунущ сэ егъэзыпӀэншэ икӀи щӀылъэм къыщызыджэ
дыхь;
къысхуэзэ дэтхэнэми сиукӀынущ.
15– Уэ хэт уиукӀми, – къыжриӀащ абы Зиусхьэным, – абы блэнейрэ уи лъыр езгъэпшыныжынущ.
Зиусхьэным тридзащ Къаиным дамыгъэ, къыхуэзэм ар къимыукӀын щхьэкӀэ.
16Къаин Зиусхьэным и пащхьэм икӀыжри Нод щӀыналъэм итӀысхьащ – Ӏэдэн уикӀмэ, къуэкӀыпӀэмкӀэ щыӀэм.
Къаин къытехъукӀахэр – Лэмэх деж нэс
17Къаин екӀуэлӀащ и фызым, ар лъэщыджэ хъури, Хъанох къилъхуащ. Къаин иухуащ къалэ; къалэм фӀищащ езым и къуэм и цӀэр: Хъанох. 18Хъанох къыхуэхъуащ къуэ – Ӏирад; Ӏирадым къыхуэхъуащ Мэхъуаел; Мэхъуаел къыхуэхъуащ Матушаел; Матушаел къыхуэхъуащ Лэмэх. 19Лэмэх къишащ фызитӀ; зым и цӀэр Ӏадэт, етӀуанэм и цӀэр Цыллэт. 20Ӏадэ къилъхуащ Ябэл: ар я адэжщ шэтырхэм щӀэсу хъушэхэр зиӀэхэм. 21Абы и къуэшым и цӀэт Иубэл; ар я адэжщ пхъэ пшынэ еуэхэмрэ бжьамий епщэхэмрэ. 22Цыллэ къилъхуащ Тубал-Къаин. Ар гъуаплъэмрэ гъущӀымрэ Ӏэмэпсымэ псори къыхэзыщӀыкӀ гъукӀэт. Тубэл-Къаин и шыпхъущ НаӀамэ.
23ЯжриӀащ Лэмэх и фызхэм:
– Ӏадэрэ Цыллэрэ! ФыкъедаӀуэ си макъым;
Лэмэх и фызхэ! Си псалъэхэр зэхэфх.
Сэ лӀыр сыукӀынщ, абы уӀэгъэ сищӀмэ,
щӀалэми сыукӀынщ, уӀэгъэ сищӀмэ,
щӀали – си уӀэгъэм щхьэкӀэ.
24Къаин зыукӀым блэнейрэ лъы ипшыныжынумэ,
сэ сызыукӀым блэнейурэ блыщӀкӀэ ипшыныжынущ.
Ӏэдэм къытехъукӀахэр – Нухь деж нэс
25Ӏэдэм аргуэру екӀуэлӀащ и фызым, абы къуэ къилъхури, фӀищащ цӀэуэ: Щэт; «сыт щхьэкӀэ жыпӀэмэ, – жиӀэрт абы – Тхьэм къызитащ нэгъуэщӀ щӀалэ, Къаин иукӀа Хьэбэл и пӀэкӀэ». 26Щэт къыхуалъхуащ къуэ, абы цӀэуэ фӀищащ Енощ;
Абы къыщегъэжьауэ цӀыхухэм щӀадзащ Зиусхьэным елъэӀуу.
Currently Selected:
1 Мусэ 4: KbdNTGP2017
Highlight
Share
Copy
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017