1 Мусэ 23
23
Сарэ зэрылӀамрэ зэрыщӀалъхьэжамрэ
1Сарэ къигъэщӀащ илъэсищэрэ тӀощӀрэ блырэ: ар и кӀыхьагъщ Сарэ и гъащӀэм. 2ИтӀанэ щылӀащ Сарэ Кириат-Арбэ, иджы ХэвронкӀэ зэджэм, Ханаан щӀыналъэм щыӀэм. Арати, къэкӀуащ Ибрэхьим Сарэ папщӀэ пыхьэну, ар игъеину.
3Ибрэхьим лӀам и хьэдэм къыщхьэщыкӀыжри, яжриӀащ хет#23:3 Хет цӀыхухэр – хиттит цӀыхухэр арщ. цӀыхухэм мыпхуэдэу:
4– Сэ хамэу икӀи хэхэсу сыфхэсщ, къызэфт фи щӀыпӀэм щыщ сысейуэ, кхъэлэгъунэ щысщӀу, си лӀар си нэхэм япэӀэщӀэу щыщӀэслъхьэжыну.
5Хет цӀыхухэм жэуап къратурэ, Ибрэхьим къыжраӀащ:
6– КъыдэдаӀуэт, ди зиусхьэн; уэ Тхьэм пщыуэ укъытхигъэсщ; ди лӀахэр здыщӀэтлъхьэж щӀыпӀэхэм ящыщу нэхъыфӀ дыдэм щыщӀэлъхьэж уи лӀар; дэ тщыщу зыми къыппиубыдынукъым уи лӀар здыщӀэплъхьэжыну щӀыпӀэр.
7Ибрэхьим къэтэджри щхьэщэ яхуищӀащ хет цӀыхухэм, а щӀыналъэм и лъэпкъым. 8Абыхэм епсалъэри, яжриӀащ:
– Си лӀар зэрыщӀэслъхьэжынумкӀэ фыарэзыуэ щытмэ, сэ фыкъызэдаӀуи, фысхуелъэӀу Цохар и къуэ Ефрон, 9Махпелэ бгъуэнщӀагъыу абы и губгъуэ кӀапэм деж щыӀэр сысейуэ, си лӀар щыщӀэслъхьэжыну уасэ хуэфащэкӀэ фи деж къыщызитыну.
10Езы Ефрон яхэст хет цӀыхухэм; арати, жэуап къритащ хет цӀыхуу Ефрон Ибрэхьимым, хет цӀыхуу къалэ куэбжэм къыдыхьа псоми зэхахыу, мыр жиӀэри:
11– Хьэуэ, си зиусхьэн, къызэдаӀуэ сэ: сэ узот уэ губгъуэри, абы щыщ бгъуэнщӀагъри, тыгъэу узот си лъэпкъэгъухэм я пащхьэм ситу, щӀэлъхьэж уи лӀар.
12Ибрэхьим щхьэщэ хуищӀащ а щӀыналъэм и цӀыхухэм.
13ИтӀанэ а щӀыналъэм и цӀыхухэм зэхахыу, Ефрон жриӀащ:
– УкъызэдаӀуэмэ, сэ узот губгъуэм папщӀэ дыжьын: нысӀых, сэри щыщӀэслъхьэжынщ абдежым си лӀар.
14Ефрон Ибрэхьим жэуап къритыжащ:
15– Си зиусхьэн! КъызэдаӀуэ сэ: щӀыгум и уасэр дыжьын ахъшэ щиплӀщ; си дежкӀи уи дежкӀи ар сыт? ЩӀэлъхьэж уи лӀар.
16Ибрэхьим арэзы техъуащ Ефрон жиӀам; икӀи хуишэчащ Ибрэхьим Ефроным дыжьыныр, хет цӀыхухэм зэхахыу уасэу абы жыхуиӀам хуэдиз, дыжьын ахъшэ щиплӀ, сатуущӀэхэм я деж щызекӀуэм хуэдэ.
17Арати, хъуащ Ефрон и губгъуэу Махпелэм щыӀэр, Мамрэ пэщылъыр, губгъуэри абы щыщ бгъуэнщӀагъри, губгъуэм ит жыг псори, абы ихъуреягъкӀэ и гъунапкъэхэм къриубыдэу 18Ибрэхьим и щӀапӀэ, хет цӀыхуу а къалэ куэбжэм дыхьэ псоми ялъагъуу.
19Абы и ужькӀэ Ибрэхьим щыщӀилъхьэжащ Сарэ, езым и фызыр, Махпелэ деж щыӀэ губгъуэм и бгъуэнщӀагъым, иджы ХэвронкӀэ зэджэ Мамрэ пэщылъу, Ханаан щӀыналъэм. 20Апхуэдэу къылъысащ Ибрэхьим хет цӀыхухэм къабгъэдэкӀыу губгъуэри абы щыщ бгъуэнщӀагъри, езым ейуэ, хьэдэхэр щыщӀилъхьэжын папщӀэ.
Currently Selected:
1 Мусэ 23: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
