2 Кор. 11

11-НЭ ЕДЗЫГЪУЭ

Апостол нэпцӀхэм Паул зэратепсэлъыхьыр

1Сэ си делагъэр фигу тевгъэхуэну сыхуейт, тевгъэхуэнкӀи сыфщогугъ. 2Тхьэм къыбгъэдэкӀ ефыгъулӀэныгъэкӀэ сэ сынывофыгъулӀэ, сыт щхьэкӀэ жыпӀэмэ фэ хъыджэбз къабзэм хуэдэу лӀы закъуэу Мэссихь и пащхьэм физгъэхьэу, абы фыдэкӀуэну фыкъыхезгъэшащ. 3Ауэ блэжьым Хьэуа зи цӀэр#11:3 Хьэуа – еплъ 1 Мусэ 3:1-5, 13. хьилагъэкӀэ зэригъэпцӀам хуэдэу, фэри фи щхьэр зэӀигъыхьэу, Мэссихь щыпкъагъэу хувиӀэм фи щӀыбагъ хуэвгъэзэнкӀэ сошынэ. 4Зыгуэр фи деж къакӀуэу, Хьисэ теухуауэ хъыбару дэ фэдгъэщӀам нэмыщӀ, нэгъуэщӀ хъыбар фигъащӀэмэ, фи гуапэу ар фигу тывогъахуэ. Е Тхьэм и Псэ ЛъапӀэу фи гум илъ дгъэхъуам нэмыщӀ псэ гуэр фи гум илъ игъэхъумэ, ари фи гуапэу фигу тывогъахуэ. Е фи фӀэщ хъуа хъыбарыфӀым фӀэкӀа, нэгъуэщӀ хъыбарыфӀу жыхуиӀэр зыгуэрым фигъащӀэмэ, ари фи гуапэу фигу тывогъахуэ. 5Ауэ а апостол ину жыхуэфӀэхэм нэхърэ зыкӀи нэхъ цӀыкӀуу зыслъытэжыркъым. 6ПсэлъэнкӀэ сымыӀэзэми, щӀэныгъэкӀэ сыӀэзэщ. ЩӀэныгъэкӀэ сызэрыӀэзэр сыт и лъэныкъуэкӀи сыт щыгъуи къыфхуэзгъэнэхуащ.

7И пщӀэр къыфӀызмыхыу, Тхьэм деж къикӀ хъыбарыфӀыр фхуэсӀуатэурэ, фызгъэинын щхьэкӀэ, зызэрызгъэлъахъшэмкӀэ емыкӀу сщӀа? 8Фэ сыфхуэлэжьэн щхьэкӀэ, нэгъуэщӀ члисэ зэхуэсхэм пщӀэ къеӀысхыурэ, абыхэм ахъшэ езгъэгъэкӀуэдащ. Фи деж сыщыщыӀам, сыхуэныкъуами, хьэлъэ зыми сытехъуакъым. 9Македонием къикӀыу къэкӀуа къуэшхэм сызыхуэныкъуэр къысхуащӀащ. Хьэлъэ сызэрыфтемыхъуэным сыт и лъэныкъуэкӀи сыхэтащ икӀи сыхэтынущ. 10Мэссихь и щыпкъагъэу си гум илъымкӀэ жызоӀэ, Ахаие хэку псом исхэм ящыщу зыми си щытхъур сӀихын лъэкӀынукъым. 11Сыт апхуэдэу щӀэсщӀыр? ФӀыуэ фызмылъагъуу ара? Хьэуэ, фӀыуэ фызэрыслъагъур Тхьэм ещӀэ. 12Ауэ зэрысщӀам хуэдэу сыт щыгъуи сщӀынущ. «Паул зэрылажьэм хуэдабзэу, дэри долажьэ», жызыӀэу зыщытхъужхэр зыщытхъужыну Ӏэмал естыну сыхуейкъым.

13Апхуэдэ цӀыхухэр апостол нэпцӀхэщ, лэжьакӀуэ гъэпцӀакӀуэхэщ. Мэссихь и апостол хуэдэу, загъэӀу къудейщ. 14Ар гъэщӀэгъуэнкъым. Езы шейтӀаным нэхум и мелыӀыч хуэдэу зегъэӀу. 15Аращи, шейтӀаным хуэлажьэхэм, щыпкъагъэм хуэлажьэ хуэдэу, загъэӀумэ, ар шынагъуэкъым. Ялэжьа Ӏуэхухэм хуэфащэ кӀэух ягъуэтынущ абыхэм.

Зэрыапостолым щхьэкӀэ Паул ишэча гугъуехьхэр

16Аргуэру жызоӀэ, зэхэщӀыкӀ зимыӀэм сыхуэдэу зыми иремылъытэ. Ауэ апхуэдэу сыфлъытэмэ, зэхэщӀыкӀ зимыӀэм фызэрыхущытым хуэдэу, фыкъысхущыт, тӀэкӀу сызыщытхъужын слъэкӀын щхьэкӀэ. 17Иджы жысӀэр Зиусхьэныракъым жызэзыгъыӀэр. Сытегушхуэрэ сызыщытхъужмэ, зэхэщӀыкӀ зимыӀэм хуэдэу сопсалъэ. 18Мы дунейм и цӀыхухэм я хабзэм хуэдэу, цӀыху куэдыр зэрызыщытхъужым щхьэкӀэ сэри сызыщытхъужынущ. 19Фэ фызэрыӀущым щхьэкӀэ зэхэщӀыкӀ зимыӀэхэр фи гуапэу фигу тывогъахуэ. 20Зыгуэрым фигъэпщылӀми, е вгъэшхэну фыхигъэзыхьми, е фихъунщӀэми, е фи пащхьэм зыщигъэпагэми, е фи нэкӀум къеуэми, ари фигу тывогъахуэ. 21Си напэр сыуэ къыжысӀэн хуейщ: апхуэдэ Ӏуэхухэр тщӀэну лъэкӀыныгъэ диӀакъым.

ЦӀыху гуэр Ӏуэху гуэркӀэ зыщытхъужыну тегушхуэмэ, сэри а ӀуэхумкӀэ сызыщытхъужыну сытогушхуэ – зэхэщӀыкӀ зимыӀэм хуэдэу сопсалъэ. 22Ахэр журтхэ? Сэри сыжуртщ. Ахэр израил цӀыхухэ? Сэри сыизраил цӀыхущ. Ахэр Ибрэхьим къытехъукӀа цӀыхухэм ящыщ? Сэри сащыщщ. 23Ахэр Мэссихь хуэлажьэрэ? Абыхэм нэхърэ нэхъыбэу сыхуолажьэ – акъыл зимыӀэм хуэдэу сопсалъэ. Абыхэм нэхърэ нэхъыбэрэ сылэжьащ, нэхъыбэри лъэхъуэщым сисащ, цӀыхухэр нэхъыбэри щӀопщкӀэ къызэуащ, ажалым и гъунэгъу нэхъыбэри сыхъуащ. 24ЩӀопщ уэгъуэ плӀыщӀым зы щыщӀэу журтхэр пӀалъэ-пӀалъэкӀэ тхуэ къызэуащ. 25Тепщэныгъэ зиӀэ римхэр башкӀэ щэ къызэуащ. ЦӀыхухэм саукӀын щхьэкӀэ, мывэкӀэ зэ къызэуащ, сызэрытӀысхьа кхъухьхэм ящыщу щыр псым щӀилъэфащ, толъкъуным зы жэщрэ зы махуэрэ сыхэлъащ. 26Гъуэгум куэдрэ сытетащ. Псыхэм сащызэпрыкӀым, шынагъуэм сыхэтащ, хъунщӀакӀуэхэми сахуэзэу, си лъэпкъ щыщхэми сащӀыгъуу, хамэ лъэпкъ щыщхэми сащӀыгъуу, шынагъуэм сыхэтащ; къалэхэми сыдэсу, губгъуэ нэщӀхэми ситу, хыми сытету шынагъуэм сыхэхуащ; къуэш нэпцӀхэми сахэту, шынагъуэм сыхуэхуащ. 27Куэду сызэрылэжьам сригъэшащ, сымыжейуэ жэщ куэд згъэкӀуащ; сымэжэлӀащ, псыи сыхуэлӀащ, шхын щызмыгъуэт куэдрэ къысхуихуащ; дунейр щыщӀыӀэми, ирикъуну зыщыстӀэгъэн симыӀэу сыщытащ. 28Ӏуэху псоми нэмыщӀу, члисэ зэхуэс псоми сахуэгузэващ, махуэ къэси согузавэ. 29Хэт гурэ псэкӀэ лъэкӀыныгъэ имыӀэми, сэ абы сригъусэщ. Хэт гуэныхьым зыӀэпишэми, сэ си гур мафӀэм ис къысщохъу абы щхьэкӀэ.

30Сызыщытхъужын хъумэ, лъэкӀыныгъэ и лъэныкъуэкӀэ сызэрыгуащӀэмащӀэрщ сызэрызыщытхъужынур. 31Тхьэуэ ди Зиусхьэн Хьисэ Мэссихь и Адэу мыкӀуэдыжын щӀыхьышхуэр зейм пцӀы зэрызмыупсыр ещӀэ. 32Арет пащтыхьым хуэлажьэ Ӏэтащхьэм и цӀыхухэм саубыдын щхьэкӀэ, Дамаск къалэм и куэбжэхэр яригъэхъумащ. 33Ауэ къалэ блыным хэт щхьэгъубжэкӀэ матэм сису си ныбжьэгъухэм сыкърагъэлэлэхри, Ӏэтащхьэм сыкъыӀэщӀэкӀыжащ.#11:33 сыкъыӀэщӀэкӀыжащ – еплъ Апостол. 9:23-25.

Currently Selected:

2 Кор. 11: KbdNTGP2017

Highlight

Copy

Compare