Lormav 4
4
Aqbyaqhaq Jan-eu
1Tox-aer mar-iq, shiqshaq paw aqdui-euq aqda yawdzanr Aqbyaqhaq nae povmawr-euq garkawv heu-anr aqdui aqjox-aer aer nmr-mq? 2Mr-awr shar-eu baqda’nae Aqbyaqhaq tsaq-awr dawr-eu tsawrhaq pyeuflar-euq lawnmr-aq, aqyawf nuima huiqkhar za taef-a. Aerkhawf, Miqyaer-euq maeqshi aqyawf nuima huiqkhar maqza-a. 3Yaerbof-euq lafkhoer aqjox-aer aertaq-euq la?
“Aqbyaqhaq, Miqyaer-anr jan-euq mae. Jan-eu khoer baqda’nae, Miqyaer, aqyawf-anr tsaq-awr dawr-eu tsawrhaq mae laer sawxnaeq-euq mae.” (Adb 15:6)
4Gar mr-eu tsawrhaq ghaqgarpoeq za-euq khoer-aq, lafsawq za-euq laer maqsawx-aer, mrpoeq za-euq laer sawx-eu mae. 5Aerkhawf, jan-eu tsawrhaq-anr tsaq-awr dawr-eu tsawrhaq mae laer Miqyaer sawx-eu mae. Aqyawf nae mr-awr shar-euq mirnae maqngeur-aer, iqbaxzaq-anr mrshawr nya-eu ghaq-anr jan-eu mirnae mae. 6Heukawv-anr tafler-awr nae Daqbir aer-eu, Tsawrhaq tiq ghaq mr-awr shar-euq gar maqtaf-aer, Miqyaer, aqyawf-anr tsaq-awr dawr-eu tsawrhaq laer sawxnaeq nar-aq, guiqlanq huiq-eu mae.
7 “Yawqha-euq iqbax bi daeqkaq-awr, Zanrdawq-anr leur-eu jeq mr-euq khawf, Iqbax bipyaeq-euq tsawrhaq-aq, guiqlanq huiq-eu mae.
8 Sanqpaq Miqyaer nae iqbax maq sawxnaeq-euq tsawrhaq-aq, guiqlanq huiq-eu mae.” (Jc 32:1-2)
9Bawkhov maeqdzaq yaeq-eu tsawrhaq taef-aer guiqlanq heu za-eu la lor? Bawkhov maeqdzaq maqyaeq-eu tsawrhaq khawf za-eu maqngeur-a laq?
Aqbyaqhaq jan-eu mirnae, Miqyaer, aqyawf-anr tsaq-awr dawr-eu tsawrhaq laer sawxnaeq-euq mae laer aqdui aer-eu ma. (Adb 15:6)
10Aqyawf-anr tsaq-awr dawr-eu tsawrhaq laer aqmyan sawxnaeq-euq la? Aqyawf bawkhov maeqdzaq yaeqghaq-awr nae-a lor? Maqngeur nar-aq, bawkhov maeqdzaq maqyaeq-euq minav-aer la laq? Bawkhov maeqdzaq yaeqghaq-awr nae maqngeur-a, maqyaeq-euq minav-aer sawxnaeq-euq mae. 11Aqyawf jan-eu mirnae, bawkhov maeqdzaq maqyaeq-euq minav-aer, tsaq-awr dawr-eu tsawrhaq pyeuflar-euq mae. Aqyawf tsaq-awr dawr-eu tsawrhaq pyeuflar-euq mae laer bi mawrlar-eu gharduq, tsaqtsov-eu tiqjeq lof-aer bawkhov maeqdzaq yaeq-euq mae. Bawkhov maeqdzaq maqyaeq-euq khawf jan-eu mirnae, tsaq-awr dawr-eu tsawrhaq pyeuflar-euq mae laer sawxnaeq taq-euq tsawrhaq dawqtawv luf-euq aqda yawdzanr khawf pyeuf-eu mae. 12Khoeruqtaf, bawkhov maeqdzaq yaeq-euq tsawrhaq-euq aqda yawdzanr khawf pyeuf-eu mae. Aqyawf maf-aq, bawkhov maeqdzaq yaeq-euq taef-aer maqngeur-aer, aqdui-euq aqda Aqbyaqhaq bawkhov maeqdzaq maqyaeq-euq minav-aer, jan-eu lof-aer jan-awr, aqyawf-euq aqkuir paeqzar maeqnan cantae-eu tsawrhaq mae.
Jan-eu Mirnae Dawqma Sarjax Za-euq
13Miqyaer, Aqbyaqhaq hawr-eu aqyawf-euq aryoeq-anr mirtsaq heu dawqtawvluf za’ni jeqbir of-eu tsawrhaq bipyeuf ma laer sarjax dzaqtaq-euq mae. Khoer-aq, zanrdawq-euq baqda’nae maqngeur-eu, jan-eu jeq-anr taf-eu tsaq-awr dawr-eu jeq-euq baqda’nae za-eu mae. 14Zanrdawq-anr ghoe-eu tsawrhaq jeqbir of-eu tsawrhaq pyeuf nar-aq, jan-eu jeq-aq, tiqjeq-iq gardanr maqtsoeq-aer, sarjax dzaqtaq-euq khoer khawf yawqngaef pyeuf-ir taef-a. 15Aqjeq mirnae aernar-aq, zanrdawq-aq, Miqyaer nuima paer-eu jeq bi keuvle-eu mae. Aerkhawf, zanrdawq maqjav-eu gar-aq, mrbanq-eu jeq khawf maqjav-a.
16Khoermirnae, jan-eu baqda’nae jeqbir za-eu mae. Jan-eu lafkhoer sarjax aertaq-euq lof-aer aryoeq dawqtawvluf za’nya-eu khoer-aq, guiqlanq yawdzanr baqda’nae nga laer bi dovlar-eu gharduq mae. Zanrdawq-anr ghoe-eu tsawrhaq taef-aer sarjax za-eu maqngeur-aer, aqdui dawqtawv luf-euq aqda yawdzanr Aqbyaqhaq jan-eu lof-aer kharjan-eu tsawrhaq yawqghaq navluf za-eu mae. 17Aqbyaqhaq janluf-eu Miqyaer-aq, shir-euq tsawrhaq-anr daef-eu jeq bifnya-eu uqtaf, maqjav-eu jeq-anr kur-awr bi javlar nya-eu Miqyaer mae. Miqyaer khoerghaq-euq maeqshi, Aqbyaqhaq-aq, aqdui yawqghaq navluf-euq aqda yawdzanr pyeuflar-euq mae. Khoer-aq,
“Ngar, nawq-anr mirkhanq-euq tsawrjeuq ghawqmya jeuq-euq aqda yawdzanr bi pyeuflar ma,” (Adb 17:5)
laer Yaerbof-euq lafkhoer boftaq-euq lof-aer mae. 18Aqbyaqhaq-aq, noeqtmq-eu jeq maqjav-eu khawf, noeqtmq-eu lafkhoer jan-euq mae. Khoermirnae, Miqyaer nae aertaq-euq lof-aer, mirkhanq-euq tsawrjeuq ghawqmya jeuq-euq aqda yawdzanr pyeuflar-euq mae.
“Nawq-euq zaqdeuq uvdeuq khoerlof-aer pyeuflar taef-a,” (Adb 17:5; 15:5)
laer Miqyaer, aqyawf-anr aernaeq-euq mae.
19 Saqlar, zaq jawrle-eu aryamq dzeur-euq garkawv hawr-eu, aqyawf 100 khof aerghaqni khawvlar-euq mirnae, aqyawf-euq mawrdo shir-euq lof-aer dur-eu garkawv maq sharnoeq-aer, jan-eu paw ghaqbyaev maqbyaev-aq. 20Miqyaer nae aernaeq-euq sarjax-anr noeqtsov taq-awr, maqjan-aer nuima povpov lavlav-aer maqghae-eu uqtaf, jan-eu paw ghaq khavlar-awr, Miqyaer-anr ciqhuiq ciqmanr-euq mae. 21Sarjax aertaq-euq lof-aer Miqyaer mrnya mae laer aqyawf zifdanni janduq taq-euq mae. 22Khoermirnae, Miqyaer,
“Aqyawf-anr tsaq-awr dawr-eu tsawrhaq laer sawxnaeq-euq mae.” (Adb 15:6)
23Aqyawf-anr tsaq-awr dawr-eu tsawrhaq laer sawxnaeq-euq mae laer aer-eu dawq heudawq-aq, aqyawf-euq gharduq taef-aer boftaq-euq maqngeur-a. 24Aqdui-euq gharduq khawf boftaq-euq mae. Aqdui-euq Sanqpaq Yeqsur-anr shir-euq gar nae bi ghofdaef lar-euq Miqyaer-anr aqdui jan nar-aq, aqdui-anr khawf tsaq-awr dawr-eu tsawrhaq laer aqyawf sawxnaeqlaf taef-a. 25Aqdui mrbanq lavlaeq-euq baqda’nae, Yeqsur, aqcawq-euq aqlaf-euq lafkhoer bi a’naeq-euq mae. Aqdui tsaq-awr dawr-eu tsawrhaq pyeuflarni aqyawf ghofdaef lar-euq mae.
2018 ©
Bibles International ®
The Bible Society of Baptist Mid-Missions