Maqkuv 14
14
Yeqsur-anr Saef-eu Laer Jawq-eu
Mt 26:1-5; Lk 22:1-2; Yh 11:45-53
1Baqsaqkaq yawbui bui-eu hawr-eu daeqtseq maqdawv-euq kaqmur yawbui bui-eu aryamq maq keuvlar-euq nyiq nan ca ngae, pirma aqyuif deuq hawr-eu zanr maeq-eu deuq jaqmyawf maershuir-euq lafkhoer aqjox-aer ghae-awr nae, Yeqsur-anr nyaef-awr saefdzae nya-eu paq nga laer jawqluf-eu mae. 2Aqyawfmaf aer-eu, “Yawbui builuf ngae, aqyawf-anr maq nyaefnya nga siq. Khoerlof-aer janr nar-aq, tsawrhaq armaf deuq luiqgha lar-eu gar yaguv nga.”
Yeqsur-anr Tsir Yawsaw Shaevdav-euq
Mt 26:6-13; Yh 12:1-8
3Khoerngae, Yeqsur, Beqtaqnir pu-anr jawr-eu coiqdoi narhaw-euq Sirmoq-euq nymr-anr hawqjawq jawqluf ngae, zaqmiq aqbur tiq ghaq arpoeq zawr khav-eu tsir yawsaw danq-eu lopyur martsaf tiq tsaf ciqlaf-euq mae. Aqyawf martsaf khoertsaf daepav-awr, tsir yawsaw khoer Yeqsur-euq uqduq-anr shaevdav-euq mae. 4Aerkhawf, khoergar jawr-eu tsawrhaq tiqghaqnav nuikhanr maqshir-aer zaqmiq aqbur khoerghaq-anr daeq-eu, “Aqjeq mirnae tsir yawsaw teu, tox-aer lavcawv-eu le? 5Tsir yawsaw teu anq lawnmr-aq, pyur 300 byav#14:5 Tiq byav Heu-aq, tsawrhaq tiq ghaq, tiq nan mr-euq ghaqgarpoeq mae. dzaeqni anqza-awr, shaqzaq zanqzaq-anr bifnaeq nya-eu beu.” Aqyawfmaf, aqyawf-anr yawkhav-aer ngaeqcoeq naeq-eu mae. 6Khoerngae, Yeqsur heulof-aer aernaeq-euq mae: “Aqyawf-euq navni bijav-awq! Nawmaf, aqjeq ghae-eu aqyawf-anr lavbanq-eu le? Aqyawf, ngaq-anr yawmuiq tiqjeq janrnaeq laf-euq mae. 7Aqjeq mirnae aernar-aq, shaqzaq zanqzaq deuq, nawmaf naeq-aer aqmyanluf jawr taef-a. Nawmaf janrmawf nar-aq, aqgeu ngae khawf aqyawf maf-anr yawmuiq jeq janrnaeqnya taef-a. Aerkhawf, ngar, nawmaf naeq-aer aqmyanluf jawr-eu maqngeur. 8Aqyawf-aq, aqyawf khar ghaenya-eu lof-aer janr-euq mae. Ngaq-anr duqpanq-eu gharduq, maq duqpanq-euq minav-aer, aqyawf, ngaq-euq mawrdo-anr tsir yawsaw shaevdav naeqlaf-euq mae. 9Ngar, nawmaf-anr aqdirma-aer aernaeq nyar, mirtsaq doeni guiqlanqdawq heu khar maeqkeuv-ir gar, zaqmiq aqbur heughaq nae mr-euq garkawv heu khawf maeqnaeq-awr, aqyawf-anr noeqkeuv taef-a.”
Yurdav, Yeqsur-anr Anqdzaq-euq
Mt 26:14-16; Lk 22:3-6
10Khoerngae, ghaqkhaer 12 ghaq-euq lafkhoer keuq-eu Yurdav Irsaqgaqliqoq-aq, pirma aqyuif deuq-anr Yeqsur anqdzaq-eu laer aqyawfmaf jawr-eu gar le-euq mae. 11Aqyawfmaf yagaq ngae laqkhaqcaer duidui-awr, aqyawf-anr pyur bif ma laer aertsaev naeq-euq mae. Khoernar-aq, Yeqsur, aqyawf maf-euq aqlaf-anr a’naeq-eu aqmyan yaeflar-eu nga laer aqyawf jawqluf-eu mae.
Baqsaqkaq Dzaqbyawr Dzaqtaf-euq
Mt 26:17-25; Lk 22:7-13; Yh 13:1-30
12Daeqtseq maqdawv-euq kaqmur yawbui ardanqbae ngae nan-aq, Baqsaqkaq yawrzaq lawrnaeq-eu nan mae. Aqyawf-euq zaqlanr deuq, Yeqsur-anr narhaq-eu, “Baqsaqkaq dzaqbyawr dzaqnya’ni, nawr, nga’maf-anr nawq-euq gharduq aqgeugar bi laeqhmq-ir mawf-eu nya?” 13Khoerngae, Yeqsur, aqyawf-euq zaqlanr nyiq ghaq-anr heulof-aer aernaeq-awr khaerghae-euq mae: “Nawnyaf, meuq-anr urler ngae, ircuf oeqlanq baf-awr can-eu zaqyo aqli tiq ghaq-anr ya tanqpuq taef-a. Nawnyaf, aqyawf-euq maeqnan cantae ghae-awq. 14Aqyawf aqgeu nymr-anr ur-ir-eu maqkaq, nawnyaf, nymrsanr ghaq-anr heulof-aer aernaeq-awq, ‘Saqlaq aernyar-eu, “Ngar, ngaq-euq zaqlanr deuq naeq-aer Baqsaqkaq dzaqbyawr dzaqnya’ni, daqyan-euq kuvlawv aqgeugar jav-eu la?” ’ 15Khoerngae, aqyawf, nawnyaf-anr laftav tiv-anr jav-eu yawmuiq-aer lavluiv-awr lavsav taq-euq kuvlawv lawvma tiq lawv-anr, sheuqhaw naeqlaf taef-a. Nawnyaf khoergar aqdui maf-euq gharduq laeqhmq taq-awq.” 16Zaqlanr khoer nyiq ghaq dov-ir-awr, meuq-anr ur-ir ngae, yawqjeq navluf Yeqsur nae aernaeq-euq lof-aer jav-eu gar ya’mawr-euq mae. Khoernar-aq, aqyawfnyaf Baqsaqkaq dzaqbyawr laeqhmq-euq mae.
17Khoernar-aq, uqcif cifle ngae, Yeqsur hawr-eu ghaqkhaer 12 ghaq oe-euq mae. 18Aqyawfmaf hawqjawq jawq-awr dzaqluf ngae, Yeqsur aernaeq-eu, “Ngar, nawmaf-anr aqdirma-aer aernaeq nyar, nawmaf-euq lafkhoer ngaq naeq-aer tiqgar dzaqluf-eu tiq ghaq, ngaq-anr anqdzaq taef-a.” 19Aqyawfmaf noeqshaq duidui-eu lafkhoer, tiqghaq sair tiqghaq, aqyawf-anr narhaq-eu, “Ngar-a lor? Ngar-a laq?” 20Yeqsur, aqyawf maf-anr heulof-aer aerkhof naeq-euq mae, “Zaqlanr 12 ghaq-euq lafkhoer ngaq naeq-aer khmqmaq tiq khmq-anr laefdzaq luf-eu khoerghaq mae. 21Tsawrhaq-euq Zaqyo-aq, Yaerbof-euq lafkhoer aqyawf-euq garkawv boftaq-euq lof-aer ya ghofler-eu mae. Aerkhawf, Tsawrhaq-euq Zaqyo-anr anqdzaq-euq ghaq-aq, ghawqshar shaq-aer ya ghaesaef taef-a. Heughaq-aq, maq daefle-euq lawnmr-aq, aqyawf-euq gharduq muiqdzaeq-eu mae.”
Sanqpaq-euq Cifhawq Dzaqbyawr
Mt 26:26-30; Lk 22:14-20; 1Glt 11:23-26
22Aqyawfmaf cifhawq dzaqluf ngae, Yeqsur, kaqmur yur-awr, Miqyaer-euq guiqlanq-anr jaceuq-euq mae. Khoernar-aq, kaqmur ngawqpyaeq-awr, zaqlanr deuq-anr bifnaeq-awr aer-eu, “Heu-aq, ngaq-euq mawrdo ma. Yur-awr dzaq-awq.” 23Khoernar-aq, aqyawf, khmqmaq ciq-awr, Miqyaer-euq guiqlanq-anr par jaceuq-euq mae. Khoernar-aq, aqyawf, aqyawf maf-anr ciqnaeq-awr, aqyawfmaf yawqghaq navluf dawr-euq mae. 24Khoerngae, Yeqsur heulof-aer aer-eu mae, “Heu-aq, dawqma sarjax yawshuif-anr taf-eu ngaq-euq shiq ma. Tsawrhaq ghawqmya ni-euq gharduq bi yoerle-eu ma. 25Ngar, nawmaf-anr aqdirma-aer aernaeq nyar, Miqyaer uvlanr-eu jeq-euq lafkhoer, aqgaf dzaruir yawshuif yadawr-eu arnan maq keuvlar-eu siq khoer-aq, ngar, aqgaf arsiq-euq dzaruir maqpar dawr ma.” 26Aqyawfmaf jaceuq-eu dawqcar carghaq-euq nar-aq, dov-ir-awr Saqloq gawqjawq paw le-euq mae.
Beqtuvluv, Yeqsur-anr Maqsiq Laer Pyaer Taef-a
Mt 26:31-35; Lk 22:31-34; Yh 13:36-38
27Khoerngae, Yeqsur, aqyawf maf-anr heulof-aer aernaeq-euq mae, “Nymrcif nawmaf yawqghaq navluf ngaq-euq baqda’nae sanqtiftif taef-a. Aqjeq mirnae aernar-aq, Yaerbof-euq lafkhoer heulof-aer boftaq-euq mae,
‘Ngar, yawr bo-eu ghaq-anr diq ngae, yawrdeuq caevbyavjir taef-a.’ (Zkl 13:7)
28“Aerkhawf, ngar ghofdaef lar-euq nar-aq, nawmaf-euq maeqhu nae Gaqliqlaer mirkhanq-anr le ma.”
29Khoerngae, Beqtuvluv, aqyawf-anr aernaeq-eu, “Aqcawq yawqghaq navluf sanqtiftif jir-euq khawf, ngar-aq, sanqtif maqtif.” 30Yeqsur, Beqtuvluv-anr aernaeq-eu, “Ngar, nawq-anr aqdirma-aer aernaeq nyar, iqnan, nymrcif yapoer nyiq tanq maq doerlar-euq minav-aer, nawr, ngaq-anr maq siqnya nya laer smq pov keuvni pyaer taef-a.” 31Khoerngae, Beqtuvluv yawkhav-aer mrdeur-awr Yeqsur-anr aernaeq-eu, “Ngar, nawq naeq-aer tiqkawv lof-aer yashir khawf, ngar, nawq-anr maq siqnya nya laer tiqjox-iq maqpyaer.” Zaqlanr nuideuq khawf khoerlof-aer aer-eu mae.
Geqseqmaqnir-euq Lafkhoer Guiqlanq Shar-euq
Mt 26:36-46; Lk 22:39-46
32Khoernar-aq, aqyawfmaf, Geqseqmaqnir laer kur-eu tsanr-anr oekeuv-euq mae. Yeqsur, zaqlanr deuq-anr aernaeq-eu, “Ngar guiqlanq sharler-eu yawkaq-anr heugar nuirtawq-awq.” 33Khoernar-aq, Yeqsur, Beqtuvluv, Yaqkov hawr-eu Yorhaq-anr sheuq-awr le-euq mae. Khoerngae, aqyawf nuima tiqpawf-iq maqsar-aer noeqshaq duidui-awr, 34aqyawf maf-anr aernaeq-eu, “Ngaq-euq nuima saflar noeqshaq-eu shir shaw-iq mir-a, nawmaf heugar yawbeur beur-aer jawrtawq-awq.” 35Khoernar-aq, aqyawf maeqhu paw uicuiv par lejiv-awr, mirtsa awbyav-awr nae, ghaenya nar-aq, aryamq khoer aqyawf-anr nae bidzeur-ir laf laer guiqlanq shar-euq mae. 36Aqyawf aer-eu, “Aqba, Aqda-or! Nawr yawqjeq navluf janrnya-eu mae. Khmqmaq heu, ngaq-anr nae ciqdzae naeqlaf-awq. Aerkhawf, ngar nuima tsaq-eu lof-aer taqbi pyeuf, nawr nuima tsaq-eu lof-aer bipyeuf law.”
37Aqyawf ghoflar ngae, aqyawfmaf yufkhav taq-euq gar ya’mawr-awr, Beqtuvluv-anr heulof-aer aernaeq-euq mae, “Sirmoq-or! Nawr yufkhav luf-eu le lor? Naqliq tiq laf taef-aer khawf yawbeur beur-aer maq jawrcoer nya laq? 38Nawmaf murjur jurlar-eu gar maqya tawvlerni, yawbeur beur-aer guiqlanq sharshar-aer jawr-awq. Nawmaf mrmawf-eu nuima saflar keuv-eu khawf, shiqshaq paw-aq, ghaqbyaev byaev-eu nga.” 39Aqyawf parir-awr, aqyawf tiqdawq parshar-euq mae. 40Khoernar-aq, aqyawf ghoflar ngae, zaqlanr deuq myavnuiv maq byaedir coer-eu mirnae yufkhav taq-euq gar parya mawr-euq mae. Aqyawfmaf, aqyawf-anr aqjox-aer ya aerkhof naeq-eu laer maq siqnya-a. 41Aqyawf smq pov tiqpov ghoflar ngae, aqyawf maf-anr heulof-aer aernaeq-euq mae, “Nymq-mr keuvni nawmaf yufkhav yufkhav-aer ghaqnaq naqluf-eu le siq lor? Ghaq-ar, Tsawrhaq-euq Zaqyo, iqbaxzaq-euq aqlaf-euq lafkhoer yabi a’naeq-eu aryamq keuvlar-euq ngar-a. 42Tur-awq, le kar-eur. Hawsher-eq, ngaq-anr anqdzaq-eu ghaq oekeuv-euq ngar-a!”
Yeqsur-anr Nyaef-euq
Mt 26:47-56; Lk 22:47-53; Yh 18:3-12
43Yeqsur khoerlof-aer aernaeq luf-eu nyiqpav-aer, ghaqkhaer 12 ghaq-euq lafkhoer keuq-eu Yurdav laer kur-eu ghaq oekeuv-euq mae. Micaer hawr-eu darkawq sheuluf-eu tsawrhaq baqmaf khawf aqyawf naeq-aer oeluf-eu mae. Pirma aqyuif deuq, zanr maeq-eu deuq hawr-eu aqyuif aqtsu deuq nae aqyawf maf-anr khaerghae lef-euq mae. 44Yeqsur-anr anqdzaq-euq khoerghaq, tsawrhaq khoerdeuq-anr bisiqni heulof-aer aernaeq taq-euq mae, “Ngar maeqsaw aqgeu ghaq-anr saw nar-aq, khoerghaq mae de-eq, nawmaf, aqyawf-anr nyaef-awr, yawmuiq-aer tsanr ghae-awq.” 45Yurdav oekeuv-euq naeq-aer Yeqsur jawr-eu gar ir-awr, “Saqlaq-or! Saqlaq-or” laer kur-awr, aqyawf-anr maeqsaw saw-euq mae. 46Khoerngae, aqyawfmaf, Yeqsur-anr nyaef-awr nyaeftaeq taq-euq mae.
47Gardzer paw yawfluf-eu tsawrhaq deuq-euq lafkhoer nae tiq ghaq, micaer ghawrdov-awr, pirma yawhuiq ghaq-euq kuirlaf zaqkhav-anr coerghae-awr nae, aqyawf-euq naqpaf tiq pyawq coertsaev-euq mae. 48Khoerngae, Yeqsur, aqyawf maf-anr heulof-aer aernaeq-euq mae, “Nawmaf tanrjoe-anr nyaef-ir-eu lof-aer, micaer hawr-eu darkawq sheu-awr ngaq-anr nyaefle-euq le lor? 49Ngar yawqnan navluf, uqduq tanqnymr nymrma-euq lafkhoer maeqnaeq tsovnaeqluf ngae, nawmaf jawrluf-eu mae. Aerkhawf, nawmaf, ngaq-anr maqnyaef-a. Heulof-aer pyeuflar-euq-aq, Yaerbof-euq lafkhoer boftaq-euq lof-aer byanlar-euq ngar-a.” 50Khoerngae, zaqlanr dawqtawvluf, aqyawf-anr byaerdzae yaf-awr caevbyov jir-euq mae.
51Khoerngae, aqli zaqguq tiq ghaq, arbui tiq kanr taef-aer tsanrkaq-awr, Yeqsur-euq maeqnan cantae luf-eu mae. Tsawrhaq khoerdeuq, aqyawf-anr nyaef ngae, 52aqyawf arbui khoerkanr pyaeqdzae yaf-awr, nermyawvni caev-euq mae.
Khavma Armur, Yeqsur-anr Yarkhaq Dar-euq
Mt 26:57-68; Lk 22:54-55,63-71; Yh 18:13-14,19-24
53Khoernar-aq, tsawrhaq khoerdeuq, Yeqsur-anr pirma yawhuiq ghaq jawr-eu gar sheuqghae-euq mae. Pirma aqyuif deuq, aqyuif aqtsu deuq hawr-eu zanr maeq-eu deuq dawqtawvluf lartaq-awr khoergar uiqluf-eu mae. 54Khoerngae, Beqtuvluv-aq, pirma yawhuiq ghaq-euq povka-anr keuvni, Yeqsur-euq maeqnan uicuiv garmanr kaq-eu gar cantae luf-eu mae. Khoernar-aq, lofpir-eu kuirlaf deuq naeq-aer nuir-ir-awr miqdzaq-anr yawgav lmrluf-eu mae.
55Pirma aqyuif deuq hawr-eu khavma armur murlan-aer, Yeqsur yashirni, aqyawf-euq khoertav iqbax taq-eu tsawrhaq pov-euq khawf maq povmawr nya-a. 56Aqjeq mirnae aernar-aq, tsawrhaq ghawqmya ghaq aqyawf-euq garkawv maqtsaq maqdawr-eu sarkir kamq-eu khawf, aqyawfmaf kamq-eu khoer beugar-eu mae. 57Khoerngae, tsawrhaq tiqpavnav deuq turlar-awr, aqyawf-euq garkawv maqngeur-eu jeq sarkir kamqkamq-aer iqbax taq-eu, 58“Aqyawf heulof-aer aer-eu gar nga’maf yagaq-euq ma, ‘Ngar, aqlaf nae tsovtaq-euq uqduq tanqnymr nymrma heu-anr pyavdzae-awr, aqlaf nae tsov-euq maqngeur-eu uqduq tanqnymr nymrma yawqnymryawq, smq nan-euq lafkhoer tsovpar ma.’ ” 59Aqyawfmaf khoerlof-aer kamq-eu khawf, aqyawfmaf kamq-eu khoer beugar-eu mae.
60Khoerngae, pirma yawhuiq ghaq, aqyawf maf-euq ghanrcae turlar-awr, Yeqsur-anr narhaq-eu, “Tsawrhaq heudeuq, nawq-euq khoertav iqbax taqtaq-aer sarkir kamq-eu gar, nawr tiqjeq-iq maq aerkhof naeq-eu le lor?” 61Aerkhawf, Yeqsur tiqdawq-iq maq aerkhof-aer ciqcurni jawr-eu mae. Pirma yawhuiq ghaq, aqyawf-anr par narhaq-eu, “Nawr, Guiqlanq huiq-eu ghaq-euq Zaqyo, Kali laer kur-eu ghaq ma lor?” 62Khoerngae, Yeqsur aer-eu, “Ngar ngeur ma.
Tsawrhaq-euq Zaqyo Baoq-euq armar paw nuirluf-eu gar maqaer, (Jc 110:1)
mqtav-euq mqdmr-anr dziq-awr zafka le-eu gar maqaer, nawmaf ya’mawr taef-a.” (Dyl 7:13)
63Khoerngae, pirma yawhuiq ghaq, aqyawf-euq maeqtsoeq gheupyaeq-awr aer-eu, “Aqduimaf, aqjeq ghae-eu tsawrkaq parpov-eu? 64Aqyawf, Miqyaer-anr yaeqbawq saerlu-aer aer-eu gar nawmaf ya gaqghaq-euq mae. Nawmaf aqjox-aer noeq-eu nya?” Khoerngae, aqyawfmaf dawqtawvluf, aqyawf shir-eu tsaq mae laer Yeqsur-anr yarkhaq dar-euq mae.
65Khoernar-aq, tsawrhaq tiqpavnav deuq, Yeqsur-anr duqkhaq khashaeq-awr, aqyawf-euq myavpyawq-anr kafkaq-awr terter-aer aer-eu, “Nawr, Miqyaer gharduq ngaeqdan sher-eq!” Khoernar-aq, lofpir-eu kuirlaf#14:65 Lofpir-eu kuirlaf Heu-aq, uqduq tanqmymr nymrma-anr lofpir-eu pirma-euq kuirlaf deuq-anr aer-eu mae. deuq khawf, aqyawf-anr gheulaf-awr, aqyawf-euq myavpyawq-anr taev-euq mae.
Beqtuvluv, Yeqsur-anr Maqsiq Laer Pyaer-euq
Mt 26:69-75; Lk 22:56-62; Yh 18:15-18,25-27
66Beqtuvluv lafov paw jav-eu povka-anr jawrluf ngae, pirma yawhuiq ghaq-euq kuirlaf zaqkhav aqbur tiq ghaq oe-awr, 67Beqtuvluv yawgav lmrluf-eu gar mawr-awr, aqyawf-anr hawtsov taq-awr nae aer-eu, “Nawr khawf aqmyanmyan Naqzaqlaer tsawrhaq Yeqsur naeq-aer jawr-eu ghaq ngar-a.” 68Aerkhawf, Beqtuvluv pyaer-eu, “Ngar maqsiq, nawr aer-eu dawq teu, ngaq-anr maq ghovshawlar nya.” Khoernar-aq, aqyawf, lanrkhaeq paw ir-euq mae. Khoerngae, yapoer tiq tanq doerlar-euq mae. 69Khoerngae, kuirlaf zaqkhav aqbur khoerghaq, Beqtuvluv-anr parmawr-awr, dawqpae yawfluf-eu deuq-anr aernaeq-eu, “Teughaq-aq, aqyawf maf-euq armur-euq lafkhoer keuq-eu tiq ghaq mae.” 70Aerkhawf, Beqtuvluv maqngeur laer tiq pov parpyaer-euq mae. Tiqkhaeq parkar-ir-euq nar-aq, khoergar yawfluf-eu deuq, Beqtuvluv-anr aernaeq-eu, “Nawr-aq, aqdir aqmar aqyawf maf-euq armur-euq lafkhoer keuq-eu tiq ghaq ngar-a! Aqjeq mirnae aernar-aq, nawr khawf Gaqliqlaer tsawrhaq nga laer dawq ngaeq-eu gar nae siqlar-eu beu.” 71Khoerngae, Beqtuvluv yawqhar yawqha yaqkhaer yaqyaq-aer kamq-eu, “Nawmaf aer-eu heughaq-anr ngar maq siqnya nya.” 72Beqtuvluv khoerlof-aer aerghaq-euq naeq-aer, yapoer nyiq tanq tiqtanq doerdov laf-euq mae. Khoerngae, Yeqsur nae aqyawf-anr aernaeq-euq dawq khoerdawq-anr aqyawf noeqdov lar-euq mae, “Yapoer nyiq tanq maq doerlar-euq minav-aer, nawr, ngaq-anr maq siqnya nya laer smq pov keuvni pyaer taef-a.” Beqtuvluv garkawv khoer-anr sharnoeq-awr yawkhav-aer ngoer-euq mae.
Currently Selected:
Maqkuv 14: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
