Yorhaq 17
17
Yeqsur-euq Guiqlanq Shardawq
1Yeqsur dawq heudeuq ngaeqghaq-awr, mq paw ghawrleur-awr heulof-aer aer-eu mae: “Aqda-or! Aryamq keuvlar-euq ngar-a. Zaqyo-euq baqda’nae nawr yawshaef khanqsaer za’ni, nawq-euq Zaqyo-anr yawshaef khanqsaer biza naeqlaf-awq. 2Nawr, tsawrhaq dawqtawv luf-euq khoertav-euq aryaq aqyawf-anr biftaq-euq lof-aer, aqyawf-anr khar a’naeq taq-euq tsawrhaq dawqtawv luf-anr, aqyawf mqmaq maqbyav yarzir daef-eu jeq bifnaeq nya-eu mae. 3Nawr, tiq ghaq taef-aer aqdir aqmar Miqyaer pyeuf-awr, Yeqsur Kali-aq, nawq nae khaerghae lef-euq mae laer siqnya-eu khoer-aq, mqmaq maqbyav yarzir daef-eu jeq pyeuf-eu mae. 4Ngar, nawq nae ngaq-anr bimr-euq gar-anr mrluiv-awr, ngar, mirtsaq-euq khoertav nawq-euq yawshaef khanqsaer dovlarni mr-euq ma. 5Aqda-or! Mirtsaq maqbae-euq minav-aer, ngar, nawq naeq-aer jawr ngae jav-euq yawshaef khanqsaer khoer, nymq-mr nawq naeq-aer tiqkawv lof-aer yawshaef khanqsaer biza naeqlaf-awq.
6“Mirtsaq-euq khoertav nae nawr, ngaq-anr bifnaeq laf-euq tsawrhaq-anr, ngar, nawq-euq tsawrmyanr byacaevni bisiq-euq ma. Aqyawfmaf, nawq-euq tsawrhaq pyeuf-awr, nawq nae ngaq-anr bifnaeq laf-euq mae. Aqyawfmaf khawf nawq-euq dawq-anr mrcaw-euq mae. 7Nawq nae ngaq-anr kharbif-euq yawqjeq navluf, nawr jawr-eu gar nae oe-euq taef mae laer nymq-mr aqyawfmaf siqnya-eu mae. 8Aqjeq mirnae aernar-aq, nawq nae ngaq-anr bifnaeq laf-euq dawq, ngar, aqyawf maf-anr bif-awr, aqyawfmaf khawf dawq khoerdeuq-anr hageuf-euq mae. Khoeruqtaf, ngar, nawr jawr-eu gar nae oe-euq ngar-a laer aqyawfmaf siqduq-awr, nawq nae ngaq-anr khaerghae lef-euq ngar-a laer khawf aqyawfmaf jan-eu mae.
9“Ngar, mirtsaqzaq-euq gharduq sharluf-eu maqngeur. Aerkhawf, nawq nae ngaq-anr bifnaeq laf-euq tsawrhaq deuq-aq, nawq-euq tsawrhaq mirnae, ngar, aqyawf maf-euq gharduq guiqlanq sharluf-eu ma. 10Ngaq-euq dawqtawvluf nawq-euq mae. Nawq-euq dawqtawvluf khawf ngaq-euq ma. Heudeuq-euq baqda’nae ngar yawshaef khanqsaer za-euq ma. 11Nymq-mr nae nar-aq, ngar, mirtsaq-euq khoertav maqpar jawrni nawr jawr-eu gar ghoflar ma. Aerkhawf, aqyawf maf-aq, mirtsaq-euq khoertav yajawr-eu mae. Shawr-eu Aqda-or! Arnyaf lof-aer aqyawfmaf khawf nuima tiqsiq taef-aer taqnya larni, nawq-euq tsawrmyanr-anr ghoe-awr, nawq nae ngaq-anr bifnaeq laf-euq tsawrhaq deuq-anr bosav naeq-awq. 12Ngar, aqyawfmaf naeq-aer mirtsaq-euq khoertav jawrluf ngae, nawq-euq tsawrmyanr-euq uqmov, ngar, aqyawf maf-anr bosav-euq ma. Nawq nae ngaq-anr bifnaeq laf-euq tsawrhaq deuq-anr ngar bosav-awr, lavcawv-eu ghaq-euq zaq maqngeur nar-aq, aqyawfmaf tiqghaq-iq maqbyov-ir-aq. Heu-aq, Yaerbof-euq lafkhoer boftaq-euq lof-aer bi byanlar-eu gharduq mae.
13“Aerkhawf, nymq-mr ngar, nawr jawr-eu gar ghoflar ma. Ngaq-euq laqkhaq caer-eu jeq aqyawf maf-euq lafkhoer byanlarni, mirtsaq-euq khoertav jawr ngae, ngar dawq heudeuq aernaeq-euq ma. 14Ngar, aqyawf maf-anr nawq-euq dawq bif-euq ma. Ngar, mirtsaq-anr maqtaf-eu lof-aer, aqyawfmaf khawf mirtsaq-anr maqtaf-eu mirnae, mirtsaqzaq, aqyawf maf-anr byae-eu mae. 15Mirtsaq-euq khoertav nae aqyawf maf-anr sheuqdov ghae-awq laer ngar, nawq-anr shar-eu maqngeur. Aerkhawf, aqyawfmaf, yawdoer ghaq-anr nae yabuq-ir ni hawpir naeq-awq laer shar-eu ma. 16Ngar-aq, mirtsaq-euq maqngeur-eu lof-aer durni, aqyawfmaf khawf mirtsaq-euq maqngeur-a. 17Nawq-euq yawtsaq yawdawr nae aqyawf maf-anr lavshawr naeq-awq. Nawq-euq dawq-aq, yawtsaq yawdawr mae. 18Nawq nae ngaq-anr mirtsaq-euq khoertav khaerghae lef-euq lof-aer, ngar khawf aqyawf maf-anr mirtsaq-euq khoertav khaerghae-euq ma. 19Aqyawfmaf yawtsaq yawdawr nae bi lavshawrni, aqyawf maf-euq gharduq, ngar, yawqhar yawqha lavshawr-euq ma.
20“Ngar, tsawrhaq heudeuq-euq gharduq taef-aer maqngeurni, aqyawf maf-euq dawq-euq baqda’nae, aqkar ngaq-anr janlar-eu tsawrhaq deuq-euq gharduq khawf guiqlanq shar-eu ma. 21Nawq nae ngaq-anr khaerghae lef-euq ngar-a laer mirtsaqzaq janlarni, Aqda-or! Nawr, ngaq-euq lafkhoer jawr-awr, ngar, nawq-euq lafkhoer jawr-eu lof-aer, aqyawfmaf dawqtawvluf nuima tiqsiq taef-aer taqnya larni, aqyawfmaf, arnyaf-euq lafkhoer bijawr-awq. 22Aqyawfmaf, arnyaf lof-aer, nuima tiqsiq taef-aer taqnya larni, nawq nae ngaq-anr biza-euq yawshaef khanqsaer khoer, ngar, aqyawf maf-anr biza-euq ma. 23Ngar, aqyawf maf-euq lafkhoer jawr-awr, nawr, ngaq-euq lafkhoer jawr-eu mirnae, aqyawfmaf nuima taf-awr gm-eu byanlar taef-a. Khoerngae, nawq nae ngaq-anr khaerghae lef-awr, nawr, ngaq-anr gaq-eu lof-aer, aqyawf maf-anr khawf gaq-eu ngar-a laer, mirtsaqzaq siqnyalar taef-a.
24“Aqda-or! Mirtsaq maqbae-euq minav-aer nawr, ngaq-anr gaqluf-eu mirnae, nawq nae ngaq-anr bifnaeq laf-euq yawshaef khanqsaer khoer-anr aqyawfmaf ya’mawrni, nawq nae ngaq-anr bifnaeq laf-euq tsawrhaq-anr ngar kharjawr-eu gar aqyawfmaf khawf bi jawrmawf mir-a.
25Tsaq-awr dawr-eu Aqda-or! Mirtsaqzaq, nawq-anr maq siqnya-eu khawf, ngar, nawq-anr siqnya ma. Nawq nae ngaq-anr khaerghae lef-euq mae laer tsawrhaq heudeuq siqnya-eu mae. 26Nawq nae ngaq-anr gaqnaeq laf-euq, gaq-eu jeq khoer, aqyawf maf-euq lafkhoer anr-awr, ngar khawf aqyawf maf-euq lafkhoer yajawrni, ngar, aqyawf maf-anr nawq-euq tsawrmyanr dzawrmaeqnaeq dzeur-euq khawf, pardzawr maeqnaeq le siq.”
Currently Selected:
Yorhaq 17: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions