Yorhaq 15
15
Yeqsur-aq, Aqgaf Cirni Mae
1“Ngar-aq, aqgaf cirni nima ma. NgaqDa-aq, aqgaf yarkmr-anr lavsav-eu ghaq mae. 2Aqyawf, ngaq-anr tsoftsaf luf-eu gar nae arsiq maq siqle-eu cirni nizaq dawqtawv luf-anr deuvdzae-eu mae. Arsiq khar siqle-eu cirni nizaq deuq-anr-aq, bi siqdzaeq le-eu laer aqyawf yawmuiq-aer dawnaeq-eu mae. 3Ngaq nae nawmaf-anr ngaeqnaeq-euq dawq-euq baqda’nae, nymq-mr nawmaf shawrlar-euq mae. 4Nawmaf, ngaq-euq lafkhoer jawr-awq. Ngar khawf nawmaf-euq lafkhoer jawr ma. Cirni nizaq-aq, cirni nima-anr maq tsoftsaf nar-aq, aqyawxyawf arsiq maq siqle nya-eu lof-aer, nawmaf khawf ngaq-euq lafkhoer maqjawr nar-aq, arsiq maq siqle nya-a.
5“Ngar-aq, aqgaf cirni nima ma. Nawmaf-aq, cirni nizaq deuq mae. Ngaq-euq lafkhoer jawr-awr, ngar khawf aqyawf-euq lafkhoer jawr-eu tsawrhaq-aq, arsiq ghawqmya’ni siqle taef-a. Aqjeq mirnae aernar-aq, ngar maqjawr nar-aq, nawmaf tiqjeq-iq maq janrnya-a. 6Tsawrhaq tiq ghaq, ngaq-euq lafkhoer maqjawr nar-aq, cirni nizaq deuq-anr deuvdzae-eu lof-aer deuvdzae-eu gar yadaq-awr, nyoeq-ir kov-ir taef-a. Aqcawq ghovbymr-awr miqdzaq-anr bafanr-awr, bi puivdzaq jir-eu mae. 7Nawmaf, ngaq-euq lafkhoer jawr-awr, ngaq-euq dawq khawf nawmaf-euq lafkhoer anr-eu nar-aq, nawmaf geufmawf-eu lof-aer shar-awq, nawmaf-euq gharduq bi pyeuflar taef-a. 8Nawmaf arsiq ghawqmya’ni siqle-eu baqda’nae, ngaqDa yawshaef khanqsaer za-awr, nawmaf khawf ngaq-euq zaqlanr pyeuflar taef-a.
9“Aqda, ngaq-anr gaq-eu lof-aer, ngar khawf nawmaf-anr gaq-eu ma. Nawmaf, ngaq-euq gaq-eu jeq-euq lafkhoer jawr-awq. 10Ngar-aq, ngaqDa nae bif-euq dawqdeuq-anr mrcaw-awr, aqyawf-euq gaq-eu jeq-euq lafkhoer jawrluf-eu lof-aer, nawmaf khawf, ngaq nae bif-euq dawqdeuq-anr mrcaw nar-aq, ngaq-euq gaq-eu jeq-euq lafkhoer jawrluf-eu mae.
11“Ngaq-euq laqkhaq caer-eu jeq nawmaf-euq lafkhoer anr-awr, nawmaf laqkhaq caer-eu jeq byanlarni, ngar, nawmaf-anr dawq heudeuq aernaeq-eu ma. 12Ngar, nawmaf-anr dawq heulof-aer bif-eu ma. Ngar, nawmaf-anr gaq-eu lof-aer, nawmaf khawf tiqghaq tirghaq gaq-awq. 13Tsawrhaq tiq ghaq, yawqha-euq cawq-euq gharduq, yawqha-euq zir shirdan-eu navmaqtser huiqdzaeq-eu tsawrhaq-euq gaq-eu jeq maqjav-a. 14Ngaq nae khar biftaq-euq dawqdeuq-anr nawmaf mrcaw nar-aq, nawmaf, ngaq-euq cawq pyeuf-eu mae. 15Aqkar nar-aq, ngar, nawmaf-anr zaqkhav laer maqpar kur ma. Aqjeq mirnae aernar-aq, zaqkhav-aq, yawsanr aqjeq mrluf-eu la laer maq siqnya-a. Aerkhawf, ngar, nawmaf-anr cawq laer kur ma. Aqjeq mirnae aernar-aq, ngar, ngaqDa-anr nae kharya gaq-euq yawqjeq navluf nawmaf-anr aernaeq-eu ma. 16Nawmaf nae ngaq-anr tsergeuf-euq maqngeur-a. Nawmaf ir-awr, arsiq siqle-eu uqtaf, arsiq khoer zif-awr gmqni, ngaq nae nawmaf-anr tserdov-awr tsaqtsov-euq ma. Khoermirnae, nawmaf, ngaq-euq tsawrmyanr-anr ghoe-awr, Aqda-anr kharshar-eu jeq, aqyawf, nawmaf-anr bifnaeqlaf taef-a. 17Ngar, nawmaf-anr dawq heulof-aer bif-eu-aq, nawmaf tiqghaq tirghaq bigaq-eu gharduq ma.”
Mirtsaqzaq, Nawmaf-anr Byae-eu Mae
18“Mirtsaqzaq, nawmaf-anr byae nar-aq, nawmaf-anr maqbyae-euq minav-aer ngaq-anr byae-euq mae laer nawmaf siqnya-awq. 19Nawmaf, mirtsaq-anr taf-eu lawnmr-aq, mirtsaqzaq deuq yawqha-anr taf-eu tsawrhaq-anr gaq taef-a. Aerkhawf, nawmaf, mirtsaq-anr maqtaf-a. Khoeruqtaf, ngar, nawmaf-anr mirtsaq heu-euq lafkhoer nae tserdov-euq mirnae, mirtsaqzaq, nawmaf-anr byae-eu mae. 20‘Zaqkhav-aq, yawqha-euq yawsanr navmaqtser maq huiqdzaeq-a’ laer ngaq nae nawmaf-anr aernaeq-euq dawq-anr taqngaer. Aqyawfmaf, ngaq-anr khaeqlar khavlar nar-aq, nawmaf-anr khawf khaeqlar khavlar taef-a. Aqyawfmaf, ngaq-euq dawq-anr mrcaw nar-aq, nawmaf-euq dawq-anr khawf mrcaw taef-a. 21Aerkhawf, ngaq-euq tsawrmyanr baqda’nae, khoerdeuq dawqtawvluf, aqyawfmaf, nawmaf-anr janrlar taef-a. Aqjeq mirnae aernar-aq, aqyawfmaf, ngaq-anr khaerghae lef-euq ghaq-anr maq siqnya-a. 22Ngar maqoe-aer, aqyawf maf-anr maq maeqnaeq-euq lawnmr-aq, aqyawfmaf iqbax maqanr-ar. Aerkhawf, nymq-mr aqyawfmaf iqbax maqanr laer daeqlaefkhar maqza-a. 23Ngaq-anr byae-eu tsawrhaq-aq, ngaqDa-anr khawf byae-eu mae. 24Tsawrhaq tiqghaq nae-iq maq mrhaw-euq gardeuq, ngar, aqyawf maf-euq ghanrcae maqmr-euq lawnmr-aq, aqyawfmaf iqbax maqanr-ar. Aerkhawf, nymq-mr aqyawfmaf gar khoerdeuq-anr ya’mawr-awr, ngaq-anr khawf, ngaqDa-anr khawf byae-eu mae. 25Khoerlof-aer pyeuflar-euq-aq, aqyawf maf-euq zanrdawq-euq lafkhoer boftaq-euq dawq heudawq byanlar-euq mae,
‘Tiqjeq-iq maqngeur-eu gar, aqyawfmaf, ngaq-anr byae-eu mae.’ (Jc 35:19; 69:4)
26“Aqda jawr-eu gar nae oe-eu Cawba-eu ghaq-anr ngar, nawmaf jawr-eu gar bi’oe ma. Aqyawf-aq, Aqda-anr nae dovle-awr yawtsaq yawdawr-euq Saflar mae. Aqyawf oekeuv ngae, ngaq-euq garkawv sarkirkamq taef-a. 27Nawmaf khawf, yawbae ngae nae ngaq naeq-aer jawrluf-eu mirnae, ngaq-euq garkawv sarkirkamq taef-a.”
Currently Selected:
Yorhaq 15: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions