Roman 5

Tsaʼnə mɨ̀nwùə̀ ɨ̀məənə̀ təəmə̀nə a mbyə̀ Nẅùə̀

1Tɨ̀tsòŋə̀, tsaʼnə pɨ ghɨ̀rə̀ mə mɨ̀nwùə̀ ɨ̀məənə̀ təəmə̀ a mbyə̀ Nẅùə̀ ntii àpyiimə̀ ntɨŋmə̀ àzəənə̀ la, pə̀ənə̀ chyə̂ nɨ àporə̀porə̀ pə̀ənə̀ pɨ Nẅùə̀ ndàŋə̀ a ndzùmə̀ Ndòʼnə̀mbyə̂ Yěsû Kristù. 2Ntii Yěsû Kristù, pə̀ənə̀ pə ndzuʼù ɨ̀shìʼnə̀ aŋunə àpòŋə̀ ntɨŋmə̀ za nɨ Nẅùə̀ à twuʼtə̀nə aŋunə pə̀ənə̀ tsaʼnə pə̀ənə̀ nùŋə̀nə ntɨŋmə̀ aŋunə ze la. Pə̀ənə̀ pə ngaʼà mbyabə̀ tsaʼnə pə̀ənə̀ ghǎ pə nɨ ɨ̀sàanə̀ amwuə nɨ̀ghaʼà nɨ Nẅùə̀ a nùŋə̀nə. 3Ka pə̀ənə̀ pə ngaʼà a wə̀ənə̀ pə ndàʼà zèrə zə̀, pə̀ənə̀ pə nkɨ mmə ngaʼà amwuə ngəʼə̀, ntiinə ngəʼə̀ ɨ̀ za ntô nɨ àẅìimə̀ ntɨŋmə̀, 4àẅìimə̀ ntɨŋmə̀ a mə ntô nɨ ngɨ̀rə̀ mɨ̀nwùə̀ mɨ̀shìʼnə̀, ngɨ̀rə̀ mɨ̀nwùə̀ mɨ̀shìʼnə̀ zèrə zə ɨ̀ tyiʼə̀ ngɨ̀rə̀ lo pə̀ənə̀ tə mbyabə̀ nkàʼnə Nẅùə̀. 5Tsaʼnə pə̀ənə̀ mənə mbyabə̀ la, mbə̀ʼə a laʼa nfɨ̀kə̀ e a wə̀ənə̀ apə̀ ntiinə Nẅùə̀ à lanə ndẅenə̀ mɨ̀ntɨŋmə̀ ɨ̀məənə̀ nɨ ɨ̀kòŋnə̀ e ndàŋə̀ a ndzùmə̀ Àzhwùə̀ nɨ à tyaŋə̀nə a wəənə̀ nɨ zèrə.

6Nkwùə̀ nɨ pə̀ənə̀ lə̀ pirə̀nə mborə̀, Kristù à lə̀ kwɨghə̀ àtwuə̀ nɨ pànə̀ nɨ mɨ̀ntɨŋmə̀ ɨ̀mobə sinə̀nə amwuə nkwùə̀ nɨ ɨ̀ lə̀ kùʼnə̀ ambo Nẅùə̀. 7A tɨ̀ŋnə̀ ambo ŋwùə̀ a nɨ kwɨghə̀ àtwuə̀ ŋònə̀ nɨ mɨ̀nwùə̀ ɨ̀me təəmə̀nə, mbaa pə tsaʼnə mbə̀ʼə ŋònə̀ ɨ̀tse à chi tàʼà a nɨ kwɨghə̀ àtwuə̀ nɨ ŋònə̀ ɨ̀shìʼnə̀. 8La Nẅùə̀ a nèrə̀ ɨ̀kòŋnə̀ e aŋunə pə̀ənə̀; amwuə nkwùə̀ nɨ pə̀ənə̀ lə̀ pirə̀nə ngàŋə ngɨ̀rə̀ ɨ̀nwùə̀ tɨ̀pòŋə̀ la, Kristù à lə̀ kwɨghə̀ àtwuə̀ nɨ pə̀ənə̀. 9Tsaʼnə à lə̀ kẅìrə̀nə àləəmə̀ e ngɨ̀rə̀ mɨ̀nwùə̀ ɨ̀məənə̀ təəmə̀ la, ǎ ka chi làŋə̀ e nɨ mbyə̀ chwarə̀ a wəənə̀ aŋunə àzaŋə̀ ntɨŋmə̀ a Nẅùə̀? 10Pə̀ənə̀ lə̀ pə ngàŋə kɨpaanə Nẅùə̀, la à lə̀ ghɨ̀rə̀ pə̀ənə̀ tyiʼə̀ pɨ̀swùə ɨ̀pe ndàŋə̀ a ndzùmə̀ nɨ̀wɨghə̀ moonə̀ e. Tɨ̀tsòŋə̀ nɨ pə̀ənə̀ tyiʼnə pɨ̀swùə ɨ̀pe, ǎ ka chi lèrə̀ e nɨ mbyə̀ nchwarə̀ a wəənə̀ ghɨ̀rə̀ pə̀ənə̀ nwuunə̀ ɨ̀shìʼnə̀ pə̀ənə̀ pɨ Kristù? 11La lə ka pə e ndàʼà ànwùə̀ ghu àtsùmə̀; pə̀ənə̀ pə ngaʼà pə̀ənə̀ pɨ Nẅùə̀ ndàŋə̀ a ndzùmə̀ Ndòʼnə̀mbyə̂ ɨ̀wə̀ənə̀ Yěsû Kristù ẅùə̀ nɨ à ghɨ̀rə̀nə pə̀ənə̀ tyiʼə̀ pɨ̀swùə pɨ Nẅùə̀ tɨ̀tsòŋə̀ wə̀ lə.

Nɨ̀wɨghə̀ ndàŋə̀ a ndzùmə̀ Adàmə̀ pobə nɨ̀chyə̂mbyə̂ ndàŋə̀ a ndzùmə̀ Kristù

12Tsaʼnə tɨ̀pòŋə̀ à tônə àtwuə̀ ɨ̀shyə̂ ghə ndàŋə̀ a ndzùmə̀ taʼà ŋwùə̀, nkɨ ndòo a nɨ̀wɨghə̀ ntô la, nɨ̀wɨghə̀ à tyiʼə̀ nsìimə̀ ndèrə̀ ambo ŋwùə̀ mɨsoŋə ntsùmə̀ ntiinə ŋwùə̀ ntsùmə̀ à ghɨ̀rə̀ mə a tɨ̀pòŋə̀. 13A tyìʼə̀ nkǔŋə nkuŋə lo tɨ̀pòŋə̀ à lə̀ pə àtwuə̀ ɨ̀shyə̂ zaʼà pɨ pòŋə̀ ŋŋâ a mbòomə, la ka pɨ̀ shaŋə̀ e a tɨ̀pòŋə̀ nnùŋə̀ alyiʼə nɨ ka mbòomə a pə e ghu. 14La a nɨ furə̀ aŋunə nkwùə̀ Adàmə̀ ngə̀ mbyàa aŋunə nkwùə̀ Mǔsî, nɨ̀wɨghə̀ à lə̀ mə mbuʼtə̀ pə̀ənə̀ tə mbyàa aŋunə pɨ̀tse pə̀ənə̀ nɨ ka tɨ̀pòŋə̀ ɨghobə à lə̀ noʼò e mbyàa amwuə ndwuumə̀ nɨ Adàmə̀ à lə̀ wɨ̀ghə̀nə ntə̌ la.

Adàmə̀ à lə̀ pə la ləgrə ŋònə̀ nɨ à lə̀ pənə ghǎ tô. 15La ka ɨ̀pwuumə̀ pə ɨpaa pə ghobə ndəŋə ndəŋə ntiinə ka àzwuumə̀ nɨ Nẅùə̀ à wa ŋŋâ àfǐfǐ a pə e tsaʼa tɨ̀pòŋə̀ Adàmə̀ wa. A tyìʼə̀ nkǔŋə nkuŋə lo pànə̀ pɨ̀noʼnə lə̀ kwɨghə̀ la ntii tɨ̀pòŋə̀ taʼà ŋònə̀ ẅèrə wə̀. La àpòŋə̀ ntɨŋmə̀ Nẅùə̀ a noʼò ntsàarə̀, tsaʼnə àzwuumə̀ nɨ à wa ŋŋâ àfǐfǐ a kɨnə mmə ndèrə̀ ambo pànə̀ pɨ̀noʼnə ndàŋə̀ a ndzùmə̀ taʼà ŋònə̀ wa nɨ à pənə Yěsû Kristù. 16Tə̀chwìi à wa a tɨ̀tɨ̀rə̀ mɨntyaŋnə mɨ Nẅùə̀ pobə tɨ̀pòŋə̀ taʼà ŋònə̀ wa ntiinə ɨ̀sàʼa Nẅùə̀ nɨ à lə̀ zùŋə̀nə a ndzùmə̀ tɨ̀pòŋə̀ taʼà ŋònə̀ wa ɨ lə̀ chyâ ngəʼə̀ aŋunə pə̀ənə̀, la mɨntyaŋnə mɨ Nẅùə̀ shìitə̀ pə ɨ̀fàntə̀ ɨ̀nwùə̀ pɨ̀noʼnə. 17A tə mbə lo nɨ̀wɨghə̀ à lə̀ làŋə̀ a ndzùmə̀ tɨ̀pòŋə̀ taʼà ŋwùə̀ mbuʼtə̀ àtwuə̀ ɨ̀shyə̂, yi pànə̀ pa nɨ Nẅùə̀ à nèrə̀nə a ghobə nɨ àpòŋə̀ ntɨŋmə̀ e yè noʼnə, ndòo a ghobə tsaʼa pànə̀ nɨ mɨ̀nwùə̀ ɨ̀mobə təəmə̀nə, mbə̀ʼə pobə tyiʼə̀ ka pə a ghobə nɨ nɨ̀chyə̂mbyə̂ puʼtə̀ àtwuə̀ ɨ̀shyə̂ zə̀ làŋə̀ a ndzùmə̀ taʼà ŋònə̀ wə̀ Yěsû Kristù lə ɨla? 18Tyìʼə̀ tsaʼnə Nẅùə̀ à chyânə ɨ̀sàʼa aŋunə pànə̀ pɨ̀tsùmə̀ ntii àfàntə̀ ànwùə̀ taʼà ŋwùə̀ la, a kɨ mbə tyìʼə̀ ndəŋə ndəŋə tsaʼnə ànwùə̀ taʼà ŋwùə̀ yè təəmə̀nə a chwarə̀ pànə̀ pɨ̀tsùmə̀ ŋŋâ a ghobə nɨ nɨ̀chyə̂mbyə̂. 19Tyìʼə̀ tsaʼnə àtɨ̀ŋnə̀ àtwuə̀ taʼà ŋwùə̀ a lə̀ ghɨ̀rə̀nə pànə̀ pɨ̀noʼnə pə ngàŋə ngɨ̀rə̀ ànwùə̀ tɨ̀pòŋə̀ la, a tyìʼə̀ ndəŋə ndəŋə lo mɨ̀nwùə̀ mɨ pànə̀ pɨ̀noʼnə ghǎ təəmə̀ a mbyə̀ Nẅùə̀ ntii taʼà ŋwùə̀. 20Mbòomə à lə̀ tô a nɨ ghɨ̀rə̀ pànə̀ zəənə̀ ɨ̀nwùə̀ tɨ̀pòŋə̀. La alyiʼə nɨ tɨ̀pòŋə̀ à noʼnə, àpòŋə̀ ntɨŋmə̀ Nẅùə̀ a kẅìʼnə̀ ndèrə̀ nɨ mbyə̀. 21Tyìʼə̀ tsaʼnə ɨ̀nwùə̀ tɨ̀pòŋə̀ lə̀ pənə mbuʼtə̀ àtwuə̀ ɨ̀shyə̂ nzhwùutə̀ pànə̀ la, àpòŋə̀ ntɨŋmə̀ Nẅùə̀ a puʼtə̀ ndàŋə̀ a ndzùmə̀ mɨ̀nwùə̀ mɨ təəmə̀nə ŋŋâ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ ndàŋə̀ a ndzùmə̀ Yěsû Kristù Ndòʼnə̀mbyə̂ ɨ̀wə̀ənə̀.

Currently Selected:

Roman 5: pny

Highlight

Copy

Compare