Matyù 28
28
Yěsû a zhwuumə̀ a nɨ̀wɨghə̀
(Mrk 16.1-10; Luk 24.1-12; Jòn 20.1-10)
1Tsaʼnə njyə̂ àlaʼà pɨ̀Jew lə̀ làŋə̀nə la, a pə a ngẅùə ngẅùə amwuə ntsàambyə̀ njyə̂ amwuə ngàbə̀, Màriyà nɨ à lə̀ furə̀nə a Magdalà nɨ ẅùə̀ Màriyà lə̀ lèrə̀ àtwuə̀ nɨ̀shyə̀ lo naŋə̀ a tsèrə.
2Nkɨ wùutə̀ ɨ̀shyə̂ nə̀ʼnə̀ tyìʼə̀ nɨ ɨ̀tɨ̀ŋnə̀, angèrə̀ Ndòʼnə̀mbyə̂ a furə̀ a nɨ̀pwuurə̀ ntinə̀ nɨ̀ghòorə nɨ nɨ lə̀ pənə àtwuə̀ nɨ̀shyə̀ ntyiʼə̀ nnwuunə̀ e aŋunə tsèrə. 3Ɨ̀sɨghə̀ e ɨ lə̀ tsìinə̀ tsaʼa mbə̀ŋə̀ nɨ ɨ̀ ŋwàŋə̀nə, ɨtsəʼə ɨ̀pe tyiʼə̀ nfuə tsaʼa mɨẅuunə. 4Lenəla, pànə̀ nɨ pɨ lə̀ mənə mbyabə̀ nɨ̀shyə̀ tsɨ̀ghu lə̀ zəənə̀ e mbə nɨ àkẅàrə̀ ntyiʼə̀ ngwùrə̀, nnwùunə̀ tsaʼa ɨ̀kwuə̀ pə̀ənə̀.
5Angèrə̀ Ndòʼnə̀mbyə̂ a shwəŋə̀ ambo pə̀ngyə̌ pɨ ghu lo, “Kò nɨ̀ pô, ǹzhyə̂ lo nɨ̀ tàʼà lə Yěsû nɨ pɨ lə̀ kẅùumə̀nə la. 6Ka a pə e a nɨ̀ghə̂, a zhwuumə̀ a nɨ̀wɨghə̀ tsaʼnə a lə̀ shwəŋə̀nə la. Nɨ̀ tô, ndzəənə̀ alyiʼə nɨ a lə̀ nwuunə̀ nɨ ghu la. 7Lenəla, nɨ̀ lèrə̀ nɨ mɨ̀tɨ̀ŋnə̀ ngə̀ ntiitə̀ ɨ̀zùŋə̀ ndzùmə̀ ɨ̀pe lo, ‘À zhwuumə̀ a nɨ̀wɨghə̀, a wə̀ ndèrə̀ a mbyə̀ pɨghə amwuə àlaʼà Galìlyə̂, nɨ̀ tə ngə̀ ghu nɨ̀ zəənə̀ e.’ Nɨ̀ kẅempə̀ lo ndə̀ tiitə̀ wɨghə.”
8Lenəla pə̀ngyə̌ pɨ̀ghu lə̀ kɨ̀ɨrə̀ nɨ mɨ̀tɨ̀ŋnə̀ nfurə̀ àtwuə̀ nɨ̀shyə̀ nɨ àkẅàrə̀ la ndẅenə̀ nɨ nɨ̀ghaʼà. Pobə lə̀ tyiʼə̀ nkɨ̀ɨrə̀ lo ghə̀ tiitə̀ ɨ̀zùŋə̀ ndzùmə̀ ɨ̀pe. 9Nkɨ wùutə̀, Yěsû a tsirə̀ a ghobə, nshwəŋə̀ ambo pobə lo, “Àporə̀porə̀ â pə aŋunə pɨghə.” Pobə tyiʼə̀ ntô ambo ze ngẅìimə̀ mɨ̀kwùə̀ ɨ̀me nguʼtə̀ e, 10Yěsû a tyiʼə̀ nshwəŋə̀ ambo pobə lo, “Kò nɨ̀ pô! Nɨ̀ ghə̀ ntiitə̀ pɨlyimə ɨ̀pâ lo pobə̂ lèrə̀ àlaʼà Galìlyə̂, alyiʼə nɨ pobə̌ zəənə̀ mə̀ ghu.”
Pɨ̀soyì tiitə̀ ànwùə̀ nɨ a ghɨ̀rə̀nə
11Tsaʼnə pə̀ngyə̌ pa lə̀ mənə ndèrə̀, pɨ̀soyì pa pɨ̀tse nɨ pobə lə̀ mənə mbyabə̀ nɨ̀shyə̀ la lèrə̀ amwuə mbòmpə àlaʼà ngẅùunə, ngə̀ ntiitə̀ pɨ̀fò màʼà Nẅùə̀ nɨ ànwùə̀ za àtsùmə̀ nɨ a ghɨ̀rə̀nə. 12Nkwùə̀ nɨ pɨ̀fò màʼà Nẅùə̀ lə̀ fuŋə̀nə pɨ̀lɨ̀ŋmə̂ pɨ àlaʼà, pobə pɨ pobə lə̀ lòo àkwàŋə̀ ŋŋâ pɨ̀soyì nɨ nkabə̀ noʼnə, 13nshwəŋə̀ ambo pobə lo, “Nɨ̀ shwəŋə̀ ambo pànə̀ lo, ɨ̀zùŋə̀ ndzùmə̀ ɨ̀pe lə̀ tô nɨ ɨ̀twuʼə̀ ndzə̀ərə̀ àkwuə̀ e ndèrə̀ nɨ zèrə nkwùə̀ nɨ pəə lə̀ mənə ndyə̂. 14Govɨnò à tə zuʼù ànwùə̀ zə̀, yi pəə̌ tyiʼə̀ shwəŋnə̀ ambo ze tsùŋə̀ ntɨŋmə̀ e fuukə̀ a wɨghə amwuə ngəʼə̀.” 15Lenəla, pɨ̀soyì pɨ lə̀ nkẅiirə̀ nkabə̀ zə̀ nkɨ fàʼà tsaʼnə pɨ lə̀ tiitə̀nə a ghobə. Nɨkerə tsèrə tsə̀ sìimə̀ amwuə tɨ̀tɨ̀rə̀ pɨ̀Jew tə mbyàa sìnə̀ wə̀.
Yěsû a murə̀ a mbyə̀ ɨ̀zùŋə̀ ndzùmə̀ ɨ̀pe
(Mrk 16.14-18; Luk 24.36-49; Jòn 20.19-23; Ɨ̀fà 1.6-8)
16Ɨ̀zùŋə̀ ndzùmə̀ Yěsû pa ntsòbə̀ moʼo lə̀ lèrə̀ àtwuə̀ mbarə̀ a Galìlyə̂, alyiʼə nɨ Yěsû à lə̀ shwəŋə̀nə lo pobə̂ lèrə̀. 17Pobə lə̀ ghuʼtə̀ e nkwùə̀ nɨ pobə lə zəənə̀nə e; la pɨ̀tse pànə̀ pə nɨ mɨnkə. 18Yěsû a tô mbaatə̀ nshwəŋə̀ ambo pobə lo, “Pɨ ŋâ mə ɨ̀tɨ̀ŋnə̀ ɨ̀tsùmə̀ nɨ pənə àtwuə̀ ɨ̀shyə̂ farə a nɨ̀pwuurə̀ ambo mɨ̀ŋə̀. 19Njiilo, nɨ̀ lèrə̀ amwuə ɨ̀laʼà ɨ̀tsùmə̀ amwuə àtwuə̀ ɨ̀shyə̂ ghə ngɨ̀rə̀ ngẅàrə̀ mɨŋwùə̀ ntsùmə̀ pə ɨ̀zùŋə̀ ndzùmə̀ ɨ̀pâ, ŋŋâ a ghobə nɨ àkẅiirə̀ nchyə aŋunə nɨ̀linə̀ nɨ Tǎ pobə tsɨ̀ Moonə̀ nɨ tsɨ̀ Àzhwùə̀ Nẅùə̀. 20Nɨ̀ nèrə̀ a ghobə lo pobə̂ nùŋə̀ mɨ̀ntə̌ ma nɨ ndə̀ ŋânə ambo pɨghə la. Mbɨ pə pə̀ənə̀ nkwùə̀ ɨ̀tsùmə̀ tə pyàa nkwùə̀ nɨ àtwuə̀ ɨ̀shyə̂ a ghǎ myə̀.”
Currently Selected:
Matyù 28: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy