Matyù 27
27
Pɨ lòo a Yěsû ndèrə̀ a mbyə̀ Palètə̀
(Mrk 15.1; Luk 23.1-2; Jòn 18.28-32)
1Tsaʼnə njyə̂ ɨ̀ lə̀ laanə̀nə, pɨ̀fò màʼà Nẅùə̀ pɨ̀tsùmə̀ pobə pɨ̀lɨ̀ŋmə̂ pɨ àlaʼà lə̀ lòo àkwàŋə̀ a nɨ zhwuutə̀ a Yěsû. 2Pobə lə̀ korə̀ e ndòo e ngə̀ ŋŋâ ambo Palètə̀ nɨ à lə̀ pənə govɨnò.
Tsaʼnə Yudà à lə̀ kwɨghə̀nə
(Ɨ̀fà 1.18-19)
3Yudà, ŋònə̀ nɨ à lə̀ shwùunə̀nə a Yěsû à lə̀ pə nɨ àsòmnə̀ nkwùə̀ nɨ à lə̀ zəənə̀nə lo pɨ lə̂ ɨ̀sàʼa lo zhwuutə̀ a Yěsû. Lenəla à lə̀ kẅirə̀ nkẅuə̀ pɨ̀silbà pa mɨ̀ghumə̀ mɨntarə ambo pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà. 4À lə̀ shwəŋə̀ lo, “Ǹgɨ̀rə̀ ànwùə̀ tɨ̀pòŋə̀ a nɨ shwùunə̀ a ntsinyaŋə lo pɨ̀ zhwuutə̀.”
Pobə kẅùə̀ lo, “Zèrə za a zəənə̀ a wəə nɨ àkə? La ànwùə̀ o.”
5Lenəla, Yudà à lə̀ màʼà nkabə̀ ghu amwuə Ndâ Mɨ̀shwàʼà Nẅùə̀, ndèrə̀ ndzùŋə̀ ngə̀ ntɨ̀ŋnə̀ e àtɨ̀ghə. 6Pɨ̀fò màʼà Nẅùə̀ piinə̀ nkabə̀ ghu nshwəŋə̀ lo, “Ka mbòomə a nèrə̀ e lo pɨ̀ nyàamə̀ nkabə̀ zə̀ amwuə nkabə̀ Ndâ Mɨ̀shwàʼà Nẅùə̀, ntiinə a nkabə̀ àləəmə̀.” 7Lenəla, pobə lə̀ pyiimə̀ a nɨ lòo nkabə̀ zə̀ ndzwuunə̀ àpàbə ɨ̀shyə̂ ɨ̀mboomə̀ mɨkɨŋə a nɨ tə ntẅəŋə̀ ngàŋə nɨ̀ghaanə̀ alyiʼə ghu. 8La ɨ̀sùmə nɨ pɨ pə mbirə̀ nfuŋə̀ àpàbə ɨ̀shyə̂ ghu tə mbyàa sìnə̀ nɨ “Àpàbə ɨ̀shyə̂ Àləəmə̀.” 9Lenəla, ànwùə̀ nɨ ngàŋə̀ ntwuumə̀ Nẅùə̀ Yèrə̀myâ à lə̀ shwəŋə̀nə a lə̀ lòo alyiʼə lo, “Pobə lə̀ lòo pɨ̀silbà pɨ̀ghu mɨ̀ghumə̀ mɨntarə, nɨ lə̀ pənə nkabə̀ nɨ pànə̀ pɨ Israel lə̀ naŋə̀nə lo ɨ̀ kùʼnə̀ a nɨ zwuunə̀ e ghu, 10ntyiʼə̀ ndòo a zèrə̀ ndzwuunə̀ àpàbə ɨ̀shyə̂ ɨ̀mboomə̀ mɨkɨŋə ghu, tsaʼnə Ndòʼnə̀mbyə̂ à tiitə̀nə mə̀.”
Yěsû a mbyə̀ Palètə̀
(Mrk 15.2-5; Luk 23.3-5; Jòn 18.33-38)
11Yěsû à lə̀ təəmə̀ a mbyə̀ govɨnò pɨ̀Roman, a pyiitə̀ e lo, “Ghò la ɨ̀fò pɨ̀Jew?”
Yěsû a kẅùə̀ lo, “Wə̀ shwəŋə̀ a lenə.” 12La, nkwùə̀ nɨ pɨ̀fò màʼà Nẅùə̀ pobə pɨ̀lɨ̀ŋmə̂ pə̀ àlaʼà lə̀ chyâ nɨ ɨ̀sàʼa aŋunə ze, ka a kẅùə̀ ànwùə̀ àtse.
13Palètə̀ à lə̀ tyiʼə̀ mbyiitə̀ e lo, “Wə̀ zuʼù mɨ̀nwùə̀ mə nɨ pɨ pə nshwəŋə̀ aŋunə ghò lanə?”
14La ka Yěsû a lə̀ kẅùə̀ a taʼà ànwùə̀. Ànwùə̀ zèrə zə a lə̀ kə̀ʼnə̀ a Govɨnò ka mɨ̀zùŋə.
Pɨ pyiimə̀ a nɨ zhwuutə̀ a Yěsû
(Mrk 15.6-15; Luk 23.13-25; Jòn 18.39–19.16)
15A lə̀ pə mbòomə lo amwuə nkwùə̀ Nɨ̀ghaʼà Àlàŋə̀ Mmyàʼtə̀, govɨnò a lə̀ chyə̂ a nɨ fuukə̀ a taʼà ngàŋə̀ ɨ̀tsaŋə̀ nɨ pɨ̀Jew lə̀ pyiitə̀nə. 16A pə nkwùə̀ ghu Barabbas a pə ghu, mbə ngàŋə̀ ɨ̀tsaŋə̀ nɨ pɨ lə̀ zhyə̂nə ɨ̀shìʼnə̀. 17Tsaʼnə àpùŋə̀ pə̀ənə̀ ghu a lə̀ shwatə̀nə la, Palètə̀ à lə̀ pyiitə̀ a ghobə lo, “Nɨ̀ tàʼà lo n̂fuukə̀ a ɨ̀wə̌ ŋŋâ nɨ pɨghə; A Barabbas kə̀ a Yěsû nɨ pɨ pa nfuŋə̀ nɨ Kristù la?” 18Mbə̀ʼnə à lə̀ zhyə̂ nkǔŋə nkuŋə lo, à lə̀ ghɨ̀rə̀ àghə̀ʼnə̀ lo pobə̂ lòo a Yěsû ntô ambo ze.
19Nkwùə̀ nɨ Palètə̀ a lə̀ nwuunə̀ nɨ aŋunə aləŋə ntsoʼtə̀ ɨ̀sàʼa, ngẅùə e a lə̀ tsàa ntwuumə̀ ambo zə lo, “Kò wə̀ ghɨ̀rə̀ ànwùə̀ àtse aŋunə ntsinyaŋə wa, ntiinə à lə̀ pə nɨ ɨ̀twuʼə̀ ndzəənə̀ ngəʼə̀ mbə̀ʼə e amwuə ndzə̀əmə̀ e.”
20La pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà lə̀ ghɨ̀rə̀ lo àpùŋə̀ pə̀ənə̀ ghu â ghɨ̀rə̀ lo Palètə̀ â myàʼtə̀ pə a Barabbas nzhwuutə̀ a Yěsû.
21Govɨnò à lə̀ pyiitə̀ a ghobə lo, “M̂myàʼtə̀ a ɨ̀wə̌ amwuə pànə̀ pə pɨpaa?”
Pobə kẅùə̀ lo, “A Barabbas.”
22Palètə̀ à lə̀ pyiitə̀ ambo pobə lo, “N̂tyiʼə̀ ngɨ̀rə̀ ɨla nɨ Yěsû nɨ pɨ pa nfuŋə̀ nɨ Kristù?”
Pobə pɨ̀tsùmə̀ kẅùə̀ lo, “Kẅùumə̀ e aŋunə àtɨ̀ghə pànkə̀nə!”
23Palètə̀ a pyiitə̀ ambo pobə lo, “Ntii àkə? Ànwùə̀ tɨ̀pòŋə̀ nɨ à ghɨ̀rə̀nə a àkə?”
La pobə pɨ̀tsùmə̀ kyiinə̀ nɨ ɨ̀tɨ̀ŋnə̀ nshwəŋə̀ lo, “Kẅùumə̀ e!”
24Nkwùə̀ nɨ Palètə̀ à lə̀ zəənə̀nə lo ka àpùŋə̀ pə̀ənə̀ ghu a mə mbyiimə̀ a ghobə ànwùə̀ nɨ à wə̀ nshwəŋə̀, mɨ̀làʼà mə ntàʼà furə̀, à lə̀ lòo nchyə nsùu mbô ɨ̀me a mbyə̀ pobə, nshwəŋə̀ lo, “Ka àpô mə̀ a pə e aŋunə nɨ̀wɨghə̀ ŋònə̀ wə̀, a ɨ̀sàʼa wɨghə!”
25Pobə pɨ̀tsùmə̀ lə̀ kẅùə̀ lo, “Tyìʼə̀ àləəmə̀ e ǎ pə àtwuə̀ pəə farə ɨ̀poonə̀ ɨ̀pəə!”
26Lenəla, à lə̀ fuukə̀ a Barabbas ŋŋâ ambo pobə ntyiʼə̀ nkəʼə̀ a Yěsû ŋŋâ lo pobə̂ ghə̀ nkẅùumə̀ e aŋunə àtɨ̀ghə pànkə̀nə.
Pɨ̀soyì nyèŋə̀ a Yěsû
(Mrk 15.16-20; Jòn 19.2-3)
27Pɨ̀soyì pɨ Palètə̀ lə̀ lòo a Yěsû nkwuunə̀ amwuə ntoʼò ze, ntyiʼə̀ nfuŋə̀ a pyə̀ pɨ̀soyì pɨ̀noʼnə pɨ tô nkamnə̀ e. 28Pobə lə̀ tsoʼtə̀ ɨtsəʼə ɨ̀pe ntyiʼə̀ mmàʼà atsəʼə yè pàŋə̀nə aŋunə ze. 29Pobə lə̀ paʼà a tɨ̀làarə̀ pɨ̀fò nɨ pɨ̀kɨkobə ntuŋə̀ àtwuə̀ ze. Pobə lə̀ kɨ nchyâ àkɨ̀kàʼà àpô ze yè zɨghə̀nə, nkẅiʼtə̀ a mbyə̀ ze mmə nnyèŋə̀ e nshwəŋə̀ lo, “Nɨ̀chyə̂mbyə̂ o â sàa mbǎ ɨ̀fò pɨ̀Jew.” 30Pobə lə̀ tẅùə̀ mɨ̀tẅuə̀ aŋunə ze nkẅiirə̀ àkɨ̀kàʼà za ambo ze ndòo nkəʼə̀ àtwuə̀ ze. 31Nkwùə̀ nɨ pobə lə̀ myàanə̀nə a nɨ nyèŋə̀ e, pobə lə̀ tsoʼò atsəʼə yè pàŋə̀nə za aŋunə ze ntyiʼə̀ mmàʼà ngotə ɨtsəʼə ɨ̀pe aŋunə ze. Lenəla, ntyiʼə̀ ndòo e a nɨ ghə̀ nkẅùumə̀ aŋunə àtɨ̀ghə pànkə̀nə.
Pɨ kẅùumə̀ a Yěsû aŋunə àtɨ̀ghə pànkə̀nə
(Mrk 15.21-32; Luk 23.26-43; Jòn 19.17-27)
32Tsaʼnə pobə lə̀ pənə nfurə̀ ndèrə̀, pobə lə̀ pwùumə̀ a Shimùnə̀ ŋwùə̀ Sìrenə̀, lenəla, nkô e, ngɨ̀rə̀ a pìʼì àtɨ̀ghə pànkə̀nə ghu. 33Pobə lə̀ ghə̀ mbyàa alyiʼə nɨ pɨ pa nfuŋə̀ nɨ Golgotà, nɨ ɨ̀sùmə pənə lo, “Alyiʼə àghòʼrə àtwuə̀”. 34Nkwùə̀ nɨ pobə lə̀ pyàanə ghu, pobə lə̀ ŋâ mɨ̀lùʼù nɨ pɨ nyàamə̀nə nɨ àzwuumə̀ yè lẅùə̀nə nɨ pɨ pa nfuŋə̀ nɨ galə̀ ŋŋâ lo â nô; a zhwiʼì a mèrə ntwuunə̀ e a nɨ nô. 35Pobə lə̀ kẅùumə̀ e aŋunə àtɨ̀ghə pànkə̀nə ntyiʼə̀ ntumə̀ ɨpirə a nɨ ghàbə̀ ɨtsəʼə ɨ̀pe a tɨ̀tɨ̀rə̀ pobə, 36ndzùŋə̀ nnwuunə̀ a ɨ̀shyə̂ alyiʼə ghu a nɨ pyabə̀ e. 37Pobə lə̀ ŋwàʼnə̀ ànwùə̀ nɨ pobə lə̀ ẅìimə̀nə e aŋunə, aŋunə àpàa àtɨ̀ghə lo, “Lə̌ Yěsû Ɨ̀fò Pɨ̀Jew,” mbaanə̀ aŋunə àtɨ̀ghə pànkə̀nə àtwuə̀ ze. 38Pɨ lə̀ kɨ nkẅùumə̀ pɨ̀zə̀ərə̀ pɨpaa pobə pɨ Yěsû; taʼà a pə a pàa àpô ze yè zɨghə̀nə, taʼà a kɨ mbə a pàa àpô yè kẅàbə̀. 39Pànə̀ nɨ pɨ lə̀ pənə ndàŋə̀, lə̀ nə̀ʼə̀ ɨ̀twuə̀ ɨ̀pobə, ntyiʼə̀ nnyèŋə̀ Yěsû, 40nshwəŋə̀ lo, “Ghò wa nɨ wə̀ pənə shàʼtə̀ Ndâ Mɨ̀shwàʼà Nẅùə̀ kẅirə̀ poomə̀ aŋunə njyə̂ ɨtarə, chwarə̀ mbɨ̀ŋmə̀ o, nshwuʼə̀ aŋunə àtɨ̀ghə pànkə̀nə za, mbə̀ʼə wə̀ pəla mbə Moonə̀ Nẅùə̀!” 41Pɨ̀fò màʼà Nẅùə̀ nɨ pɨ̀nèrə̀ mbòomə nɨ pɨ̀lɨ̀ŋmə̂ pɨ àlaʼà lə̀ kɨ nnyèŋə̀ e nshwəŋə̀ lo, 42“À lə̀ mə nchwarə̀ pə̀ənə̀ la, ka à pə chwarə̀ e mbɨ̀ŋmə̀ e! Ka lə pə e ɨ̀fò pànə̀ pɨ Israel yɨ̀ghu? Â shwuʼə̀ aŋunə àtɨ̀ghə pànkə̀nə zə pəə pòŋə̀ pyiimə̀ e! 43À nùŋə̀ ntɨŋmə̀ e aŋunə Nẅùə̀, Nẅùə̀ â chwarə̀ e tɨ̀tsòŋə̀ wə̀ mbə̀ʼə a kɨ ntàʼà a nɨ chwarə̀ e, ntiinə à lə̀ shwəŋə̀ lo, ‘Ǹchyə̂ mbə Moonə̀ Nẅùə̀.’” 44Mbaa pə pɨ̀zə̀ərə̀ pa nɨ pɨ lə̀ kẅùumə̀nə a ghobə pɨ Yěsû la lə̀ kɨ ndzòomə̀ e tyìʼə̀ a lenə.
Nɨ̀wɨghə̀ Yěsû
(Mrk 15.33-41; Luk 23.44-49; Jòn 19.28-30)
45Ndzùmə ɨ̀ lə̀ sinə̀ nnàanə̀ ɨlyiʼə ɨ̀tsùmə̀, a nɨ pìʼnə̀ aŋunə pɨ̀nẅùumə̀ ntsòbə̀ ɨpaa nɨ àzhwùunə ngə̀ mbyàa aŋunə pɨ̀nẅùumə̀ pɨtarə a ndzə̀ŋə̀ nẅùumə̀. 46A lə̀ kɨ pə tsaʼa pɨ̀nẅùumə̀ pɨtarə a ndzə̀ŋə̀ nẅùumə̀, Yěsû à lə̀ kyiinə̀ nɨ ngyə̀ ntɨ̀ŋnə̀ nshwəŋə̀ lo, “Eli, Eli, lama sàbatanì?” Zhyə̀ nɨ ɨ̀sùmə ɨ̀ pənə lo, “Nẅùə̀ mə̀, Nẅùə̀ mə̀, wə̀ waʼà mə̀ mbə̀ʼə àkə?”
47Pànə̀ pɨ̀tse nɨ pɨ lə̀ təəmə̀nə alyiʼə ghu, pobə zuʼù tsaʼnə à lə̀ pənə nshwəŋnə̀, ntyiʼə̀ shwəŋə̀ lo, “À wə̀ nfuŋə̀ a Elijah.”
48Tyìʼə̀ nkwùə̀ ghu, taʼà ŋwùə̀ ɨghobə ghùtse à lə̀ kɨ̀ɨrə̀ ngə̀ mbiinə̀ a kùntsa, ntsùbə̀ a ẅèrə amwuə mɨ̀lùʼù mɨ tsəətə̀nə nfàmnə̀ aŋunə àkɨ̀kàʼà ŋŋâ ambo Yěsû lo â nô. 49La pyə̀ pànə̀ lə̀ shwəŋə̀ lo, “Myàʼtə̀ e ze nɨ ze, pə̀ənə̀ zəənə̀ lo Elijah ǎ tô chwarə̀ e lo.”
50Yěsû à lə̀ chi nkyiinə̀ nɨ ngyə̀ ntɨ̀ŋnə̀; ndzùŋə̀ nkwɨghə̀. 51Nkwùə̀ ghu, atsəʼə nɨ a lə̀ ghàbə̀nə Ndâ Mɨ̀shwàʼà Nẅùə̀ yɨ̀ ngẅùunə a Yèrusalèmə̀ a lə̀ saanə̀ ɨ̀pàa ɨpaa nfurə̀ àtwuə̀ nshwuʼə̀ mbyàa a ɨ̀sùmə. Ɨ̀shyə̂ ɨ̀ lə̀ nə̀ʼnə̀, mɨ̀ghòorə shantə̀. 52Mɨ̀shyə̀ lə̀ nyaʼkə̀, pànə̀ pɨ Nẅùə̀ nɨ pɨ kwɨghə̀ mə pə̀ʼkə̀ aŋunə nɨ̀wɨghə̀. 53Pobə lə̀ furə̀ amwuə mɨ̀shyə̀ ɨ̀mobə nkwùə̀ nɨ Yěsû à lə̀ zhwuumə̀nə a nɨ̀wɨghə̀ la ndèrə̀ amwuə mbòmpə àlaʼà ngẅùunə yɨ̀ ndaanə̀nə. Pànə̀ pɨ̀noʼnə lə̀ zəənə̀ a ghobə nkwùə̀ nɨ Yěsû à lə̀ zhwuumə̀nə a nɨ̀wɨghə̀.
54Nkwùə̀ nɨ àtwuə̀ pɨ̀soyì pobə pɨ̀soyì nɨ pobə lə̀ mənə mbyabə̀ a Yěsû lə̀ zəənə̀nə tsaʼnə ɨ̀shyə̂ ɨ̀ lə̀ mənə nə̀ʼnə̀ farə mɨ̀nwùə̀ mɨ̀tsùmə̀ nɨ mɨ lə̀ mənə nfurə̀, àkẅàrə̀ a lə̀ kwuunə̀ a ghobə. Pobə tyiʼə̀ nshwəŋə̀ lo, “A nkǔŋə nkuŋə lo ŋònə̀ wə̀ à lə̀ pə la Moonə̀ Nẅùə̀!”
55Pə̀ngyə̌ pɨ̀noʼnə nɨ pə lə̀ furə̀nə a Galìlyə̂ ntô mmə ngyèmpə̀ a Yěsû, lə̀ təəmə̀ a ndyə̌ sàa nnaŋə̀ mɨ̀nwùə̀ nɨ mɨ lə̀ mənə ngɨ̀rə̀. 56Amwuə pə̀ngyə̌ nɨ pɨ lə̀ pənə alyiʼə ghu à lə̀ pə Màriyà nɨ à lə̀ furə̀nə a Magdalà, nɨ Màriyà mǎ pɨ Jemə̀ pobə Jòsebə̀, farə mǎ pɨ ɨ̀poonə̀ pɨ Zebedì.
Pɨ tẅəŋə̀ a Yěsû
(Mrk 15.42-47; Luk 23.50-56; Jòn 19.38-42)
57Nkwùə̀ nkwə̌ ɨ̀ lə̀ kùʼù, ngàŋə̀ nkabə̀ ɨ̀tse nɨ à lə̀ furə̀nə a Àrəmàtyâ nɨ̀linə̀ ɨ̀tse pə Jòsebə̀, nkɨ mbə àzùŋə̀ ndzùmə̀ Yěsû a tô, 58ndèrə̀ ngə̀ ndoonə̀ àkwuə̀ Yěsû ambo Palètə̀. Lenəla, Palètə̀ a tyiʼə̀ nshwəŋə̀ lo, pɨ ŋâ àkwuə̀ a ghu ambo ze. 59Jòsebə̀ a lə̀ lòo àkwuə̀ ghu, ndyibə̀ amwuə atsəʼə fuə yè shwuə̀ yè ɨ̀shìʼnə̀, 60lenəla, nnùŋə̀ àkwuə̀ ghu amwuə nɨ̀shyə̀ ɨ̀tse tsɨ̀ shwuə̀ nɨ à lə̀ pyə̀nə ntsùnkə̀ nnùŋə̀ lo pɨ ghǎ ntẅəŋə̀ e amwuə; mbɨgrə̀ a maa nɨ̀ghòorə nkumnə̀ ntswùə̀ nɨ̀shyə̀ tsɨ̀ghu ndèrə̀ e. 61Màriyà nɨ à lə̀ furə̀nə a Magdalà pobə ẅùə̀ Màriyà lə̀ pə ghu nnwuunə̀ amwuə ẅùə̀ pàa mmə mbyabə̀.
Pɨ̀soyì nwuunə̀ mmə mbyabə̀ nɨ̀shyə̀
62Njyə̂ ɨ̀ lə̀ laanə̀ mbə njyə̂ àlaʼà pɨ̀Jew, pɨ̀fò màʼà Nẅùə̀ pobə pɨ̀Farìsî lèrə̀ ambo Palètə̀, 63nshwəŋə̀ lo, “Masàa, pəə pə nkẅuumə̀ lo nkwùə̀ nɨ ngàŋə̀ àfɨ̀ghə̀ wə̀ à lə̀ pirə̀nə ghù ntɨ̀ŋnə̀, à lə̀ shwəŋə̀ lo, ‘Njyə̂ ghǎ làŋə̀ ɨtarə m̂bə̀ʼkə̀ aŋunə nɨ̀wɨghə̀.’ 64Njiilo ghɨ̀rə̀ pɨ̀ pyabə̀ nɨ̀shyə̀ chyə̀ tə njyə̂ ɨtarə làŋə̀, mbə̀ʼə ɨ̀zùŋə̀ ndzùmə̀ ɨ̀pe tô nɨ ɨ̀twuʼə̀ ndzə̀ərə̀ àkwuə̀ e ntyiʼə̀ nshwəŋə̀ ambo pànə̀ lo, à zhwuumə̀ a nɨ̀wɨghə̀. Chwìrə̀ wə̀ nɨ ǎ tyiʼə̀ furə̀ a ndzùmə̀ lə a pɨ̂ ntsàarə̀.”
65Palètə̀ a shwəŋə̀ ambo pobə lo, “Nɨ̀ chyə̂ nɨ pɨ̀soyì, njiilo nɨ̀ ghɨ̀rə̀ pobə̂ pyabə̀ nɨ̀shyə̀ tsèrə tsə̀ amwuə ndwuumə̀ ɨ̀tsùmə̀.” 66Lenəla, pobə lə̀ lèrə̀ ngə̀ nchyâ àlènə̀ aŋunə nɨ̀ghòorə nɨ nɨ lə̀ pənə a ntswùə̀ nɨ̀shyə̀, ntyiʼə̀ mmyàʼtə̀ lo pɨ̀soyì mə mbyabə̀.
Currently Selected:
Matyù 27: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy