Röm THYËRØ
THYËRØ
Wɑ̈ny-ɑ ɑ́gwëdi tyëng Römɑ̀ yi Pøøl, ɑ́gwed yi en kɑ per gwiri gen kipe wel-ɑ ówele yï tyëng-ɑ ɑ́yïëy møg-ɑ ying Römɑ̀. Gïn-ɑ ɑ́dwɑdde ceth bɑ kinni o di kɑle gwøg kì kelli tyëng-ɑ ɑ́yïëy kì kunɑni, codhe o di køny yi gen ki kedhi Ispɑniyɑ̀. Ágwëëd e nyudh-ɑ gen ki yëth-ɑ rømme bëëdi yïëyø mi Jii Mesiy, kí kër-ɑ nënne kì yij bëëdi tyëng-ɑ ɑ́yïëy. Wɑ̈nyɑni yije dɑ wöödø men-ɑ ɑ́kɑ̈lli yi Pøøl bëne.
Keny-ɑ ɑ́rume mɑ̈dhi tyëng-ɑ ɑ́yïëy kì Römɑ̀, kɑ gï köbbe kinni ceg-ɑ kwɑ̈jjø kiper gen, codhe ɑkwøbe gïn-ɑ pere ɑ́gwede wɑ̈nyɑni, kinni, “Wöndøj nyodh-ɑ kër-ɑ ódwøøg ji kö Jwøk yi Jwøk; o gï ódwøøge yïe kɑ yïëyø, kì ri cɑ̈ge gïti cöge.” (1.17)
Codhe, ɑcɑ̈gi Pøøl ki cwɑ̈ji kwøbe kinni: Dhɑnhø bëne; Yeud kí møg pɑth ki Yeud, ge di dwɑddø o ge dwøøg ri Jwøk, mɑ́ ji bënn ying-ɑ thɑ́ ciggi orøg. Ji døøg kö Jwøk kɑ yïëyi Yëso Mesiy. O bɑnge nyoodh bëëdø men-ɑ nyɑ̈n kì bɑng rëbø ki Yëso, eni bëëdø men-ɑ kɑ̈ɑ̈l yi døøg kö Jwøk.
Ngɑn-ɑ ɑ́yïëy kɑɑm gen dɑ mër ki Jwøk, o bɑ ɑpɑ̈d yi Jwøk kì yethi töjji orøg geki thøø. Kì wɑ̈th-ɑ cɑ̈gi kì ri 5-8, Pøøl kööb ɑ ri gïn-ɑ pere ɑ́muuj Ciggi Jwøk, kí tegi Wëyi Jwøk kì yij bëëdi tyëng-ɑ ɑ́yïëy. Codhe kɑ jɑl-ɑ ɑ́ör owïnnø cyee ki kwøbbi kër-ɑ rëbi Yeud geki tyëngpɑth ki Yeud kì ri møg-ɑ ɑ́gwir yi Jwøk kipe dhɑnhø bëne. Kɑ kwøbbɑni ngøle kinni i bɑnyi Yëso yi Yeud bɑ kwï møg-ɑ ɑ́gwir yi Jwøk kipe yïddi dhɑnhø bëne ki dhwɑ̈ɑ̈ng Jwøk kì ri Yëso Mesiy; o yïe dɑ yïëyø kinni Yeud koo cög Yëso obɑnyø yi gen. Kɑ Pøøl ogwëdø kì ri bëën-ɑ óbëëd yi Jii Mesiy; o men-ɑ pere teg bɑ yuu möölø men-ɑ óbëëd yi ji ki ri gen.
Møgɑni bene gïg-ɑ ɑ́kwɑny yi en gɑ yuu-ɑ göggi Jwøk yi Jii Mesiy, kí bëëdi yij pödhø geki bëëdø kì kelli ji, kí mø pyëw dhɑnhø. Wɑ̈nyɑni ɑ́ngøl yi en kɑ cigg mø bɑ møge, geki kwøbb-ɑ lenhi Jwøk.
Møg-ɑ Tyëmø
Thyërø geki gïn-ɑ köme köddi 1.1-17
Dwɑddi yielø 1.18–3.20
Yuu yïëdø men-ɑ kɑ̈ɑ̈l yï Jwøk 3.21–4.25
Bëën-ɑ Nyɑ̈n kì ri Mesiy 5.1–8.39
Isrɑil kì yij gwïni Jwøk 9.1–11.36
Bëëdi Jii Mesiy 12.1–15.13
Ngøli kwøb geki mɑ̈dhi ji 15.14–16.27
Currently Selected:
Röm THYËRØ: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.