Kwɑrr 20
20
Cɑ́yi Pëëmø
1Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 2“Köbbí tyëng Isrɑil kinni, wɑ̈d Isrɑil wɑlɑ̀ ngɑnpɑth men-ɑ bëëdø kì kelli wun men mëggi nyige Mölek, ceg ki nɑ̈gø, bɑ̈lli ki tuggi kïttì yi teedø bëne, o thøwe. 3Ngɑn mëggi nyige Mölek, kɑ Kemi kwërɑ ywëdhe, kɑ nyingɑ bwöle, ngɑ̈jɑ lugɑ’ en, o pɑ cigi mïdhø yi yɑn ɑ́ dhɑnhø ɑ́kyel kì kelli jiɑ këti. 4De keløg e ówøy yi teedø kɑ ocögø gø pɑ nɑ̈g yi gen, 5ngɑ̈jɑ lugɑ’ ngɑnɑni geki tyëng-ɑ ɑ́rudi bɑnge bënn, kɑ ge kedh-ɑ be mɑlli Mölek. Ge pɑ cigi mïdhø yi yɑn gɑ jiɑ këti.
6“Keløg e dɑ ngɑn kedhi yï ɑjwøgø be pëjjø ki yɑdh, ngɑ̈jɑ lugɑ’ en, o pɑ cigi mïdhø yi yɑn ɑ́ dhɑnhø ɑ́kyel kì kelli jiɑ këti. 7Bëëd wun wu bɑ ɑkwër, mɑ́ bene yɑn Jwøøg wun, Jwøng-ɑ Ácwɑ̈ɑ̈j. 8Mïdhu ciggɑ, mɑ́ bene yɑn Jwøng-ɑ Ácwɑ̈ɑ̈j, o bɑ yɑn ɑ kwër wun.”
9 #
Kedhø 21.17; Mt 15.4; Mk 7.10 Kɑ Jwøng-ɑ Ácwɑ̈ɑ̈j omuujø ki cigg møg kinni, “Nɑ̈ɑ̈g ngɑn yɑny wïye wɑlɑ̀ meye, ɑ́yɑny-ɑ wïye wɑlɑ̀ meye, óthøw ki cyënne.
10 #
Kedhø 20.14; Kwɑrr 18.20; Jølø 5.18 “Keløg dhɑnhø kedh-ɑ ri cï wɑ̈d Isrɑil, nɑ̈ɑ̈g jɑlɑni geki ngɑndhɑjø ryeet. 11#Kwɑrr 18.8; Jølø 22.30; 27.20 Ngɑn buddi ki ɑ́kyel kì kelli mɑ̈nni wïye, wïye ɑ́yɑ̈r en, nɑ̈g geki ngɑnɑni ryeet. Ge óthøw ki cyënni gen. 12#Kwɑrr 18.15 Keløg dhɑnhø kwɑre, cï wɑ̈de oniin yi en, nɑ̈ɑ̈g gen ryeet. Ge ɑ́tir-ɑ orøg, o ge óthøw ki cyënni gen. 13#Kwɑrr 18.22 Keløg jɑlø oniin yi jɑlø megø, ge ɑ́gwøg-ɑ gïjø me mɑɑn yi Jwøk, nɑ̈ɑ̈g gen ryeet. Ge óthøw ki cyënni gen. 14#Kwɑrr 18.17; Jølø 27.23 Ngɑn-ɑ ónywøøm ngɑndhɑjø kömi nyɑre, o ge göög gen ki mɑ̈nne ryeet, rɑ̈ɑ̈b jɑlɑni geki tyëngɑni ryeet ki mɑc, o ge thøw gen kipe ɑyɑ̈r men-ɑ ɑ́gwøg yi gen, gïn ni menɑni ko wöl ki gwøgø kì kelli wun. 15#Kedhø 22.19; Kwɑrr 18.23; Jølø 27.21 Ke di ngɑn niin lɑ̈y, nɑ̈ɑ̈g ngɑnɑni geki lɑ̈yɑni ryeet. 16Keløg ngɑndhɑjø ree wëgge’ niin yi lɑ̈y, nɑ̈gu ngɑnɑni geki lɑ̈yɑni ryeet, ge óthøw ki cyënni gen.
17 #
Kwɑrr 18.9; Jølø 27.22 “Keløg dhɑnhø nywøm-ɑ nyimen wɑlɑ̀ nyiwɑ̈n, yɑ̈ɑ̈r gen kì bøli ji kɑ ge cyeed wɑ̈yi gen. Ngɑn-ɑ óniin nyimen cyɑ̈dhe ki cyënne. 18#Kwɑrr 18.19 Keløg jɑlø óbuddø ki dhɑjø me ceg kwër ki dwɑ̈ye, cyeed gen wɑ̈yi gen kì kelli ji, mɑ́ ngɑnɑni ɑ́buddi ki en e ywëdhø, ree dɑ remø.
19 #
Kwɑrr 18.12-14
“Keløg dhɑnhø niin-ɑ wønye nyimï wïye, wɑlɑ̀ mɑɑy gen nyimï meye, ge ɑ́tir-ɑ orøg, cɑɑy gen ryeet. 20Keløg dhɑnhø niin-ɑ cï ómï wïye, wïye nuti wøør en, cɑɑy nyelɑni geki ngɑnɑni ryeet, ge ócyɑ̈dhi ki orøøg gen, o ge ceg-ɑ thøø ki wɑ̈thi gen. 21#Kwɑrr 18.16 Keløg dhɑnhø kwɑny-ɑ cï ómen, ge ceg-ɑ thøø ki wɑ̈thi gen geki ngɑnɑni. Ágwøg-ɑ gïjø me ywëdhø, kɑ ómen lɑre.”
22Jwøng-ɑ Ácwɑ̈ɑ̈j okööbø kinni, “Mïdhu kwöngɑ geki ciggɑ, o wu ócög wu pɑ bɑny yi piny Kɑnɑɑn, piny-ɑ yije kïdhɑ wun. 23Wu ko ngöyi ki bëëdi tyëng-ɑ bëëdø kì kunɑni, jurrɑni cyeedɑ’ wɑ̈g kɑ per kinni o wu kïdhɑ pinyɑni. Yɑ køm-ɑ ngwøggø yi gïg-ɑ gøggi yi gen. 24De pinyɑni, ɑ yije mulli yi cɑg geki møøw kïc, piny kɑ̈r ɑ́mëggɑ wun ɑ́ mi wun. O mëggɑ’ wun ceth. Bene yɑn Jwøøg wun, Jwøng-ɑ Ácwɑ̈ɑ̈j, ɑ ɑ́yieny wun kì kelli jurrì. 25Kì bɑng menɑni, lɑ̈yy geki winy møg-ɑ ywëdhø ko cɑm wun. Wu ko cyɑ̈ɑ̈m ki lɑ̈yy geki winy møg-ɑ ywëdhø. Ge ɑ́kwøbɑ kinni ge ywëdhø, o ke cɑm wu gen, wu ceg-ɑ ywëdhø. 26Bëëd wun wu bɑ ɑkwër wun ɑ́ møgɑ, mɑ́ yɑn, yɑ Jwøng-ɑ Ácwɑ̈ɑ̈j, yɑ bɑ kwërø, kɑ wu yïëënyɑ wɑ̈g kì kelli jurrì kipe kinni o wu bëëd wun, wun ɑ́ møgɑ.
27“Nɑ̈ɑ̈g ngɑn-ɑ ree di yɑdh, ying-ɑ́ jɑlø wɑlɑ̀ dhɑjø, bɑ̈lli gen ki tuggi kïttì o ge thøw gen, ge óthøw ki cyënni gen.”
Currently Selected:
Kwɑrr 20: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
