Bel 1
1
Dɑniel geki Ókwërri Bel
1Kì bɑng thøwi Rɑ̈dh Astiyɑges, ɑkwɑɑny lɑwe yi Körec jɑl Pɑres. 2Dɑniel ɑ́bëëd ɑ́ jɑl tøg buri Körec, o ge mër ki mendwøng, o men-ɑ́ Dɑniel ɑ́bëëd pere teeg cɑrø kì yï rɑ̈dh kibøli teen-ɑ kyeelø.
3 #
Dɑn 6.16-24
#
Icɑ 46.1; Jer 51.44 Tyëng Bɑbïl yï gen ɑ́dɑ ngïji jwøg me cwøl ɑ́ Bel. Bel nyi mëgg-ɑ røthøl miy ɑ́bïdɑ̈g mø møng-ɑ búr, kí dyëg pyɑ̈r ɑ́ngwen, kí røthøl miy ɑ́ngwen mø møgi oløg, yethi cyɑ̈ng bënn. 4Rɑ̈dh Körec ɑ́bëëd e yïëyø kinni Bel bɑ jwøg, kɑ nyi kedh-ɑ be mɑllii yethi cyɑ̈ng bënn. De Dɑniel ɑ́mɑll-ɑ Jwøge kì wɑ̈ye.
5Kɑ Dɑniel pyëj cyɑ̈ng ɑ́kyel yi rɑ̈dh kinni, “Ede Bel ɑ pɑ nyi mɑllii yi yïn?”
Alöggi Dɑniel kinni, “Ngïji men-ɑ ɑ́gwøg yi dhɑnhø ki cinge pɑ nyi mɑlli yi yɑn. Yɑ nyi mɑll-ɑ Jwøng-ɑ nëënø kete, ɑ bɑ Jwøng-ɑ ɑ́cwɑ̈j mɑl kí piny, o bɑ wïi ji bënn.”
6Kɑ pyëj yi rɑ̈dh kinni, “O yï nuti yïëyø kinni jwøøg wøn Bel onëënø kidyër? Nuti liidh yïn eni cɑm-ɑ cɑme geki mɑnh-ɑ mɑdhe yethi cyɑ̈ng?”
7Kɑ Dɑniel óngedhø, ɑkööbe kinni, “Rií ko wëggí wënyø wuö, jwøng-ɑ cwølli yi wun ɑ́ Bel, bɑ lɑ̈bø, o köme ómwønø ki ngyënyø dilɑl, nuti pɑ̈nyi cɑm ki gïïpiny, wɑlɑ̀ nuti pɑ̈nyi mɑdh kinni tek.”
8Kɑ rɑ̈dh mɑg yi liny, ɑcwööle ókwërri Bel gɑ pyɑ̈r ɑ́bïryew, kɑ gï pyëje kinni, “Köbbu yɑn ɑ́ men ɑ nyi cɑm gïncɑm men bëne? Nyudhu yɑn kinni bɑ Bel ɑ nyi cɑm gïgɑni ceth, ke pɑ kööb wun, wu ceg-ɑ thøø. O keny-ɑ ónyodhu en kinni bɑ Bel ɑ nyi cɑm gen, Dɑniel ceg-ɑ thøø kipe kɑ̀ bwöle Bel.” 9Kɑ møgɑni yïëy yi Dɑniel. 10Ókwërrɑni kwɑnni gen bɑ pyɑ̈r ɑ́bïryew, o men-ɑ́ mɑ̈nni gen kí nyigi gen pɑ kwøb.
11Codhe, ɑkedhi teenɑni kengi Bel geki rɑ̈dh, ɑköbbi rɑ̈dh yi ókwërrɑni kinni, “Wiy wø kedhi wøn wɑ̈g kɑ gïncɑm cïb wïj tɑrɑbedhɑ̀, kɑ møgi oløg tool. Keny-ɑ ókedh, kɑ dhø kengø dij, kɑ kitim mi rɑ̈dh thɑɑny ree. 12Keny-ɑ ódwöög kì mwøl, kɑ jɑmmɑni bënn yuud yi yïn ge nuti cɑmø yi Bel, wø ócuggø nɑ̈gø yi yïn. De keløg gï cɑɑm en, Dɑniel ceg-ɑ thøø kipe kɑ ɑ́wɑ̈dhe wøn ki cɑɑg piny.”
13Ókwër ɑ́bëëd pëthi gen pɑ lïngø, mɑ́ ge rum kony ki ɑmög me töngi thɑ tɑrɑbedhɑ̀ kì yij kengø, men yije nyi kedhi gen kengɑni kì wɑ̈r be cɑmi jɑmmi jwödhø møg-ɑ nyi thɑ̈lli Bel.
14Keny-ɑ ɑ́kedh ókwër, kɑ gïncɑm mi Bel kɑ̈l yi rɑ̈dh. Codhe, kɑ Dɑniel jøge köbbe kinni kɑ̈ni gen ki búr, kɑ gø pør gen yij kengø bëne. Bɑ rɑ̈dh kete ɑ ɑ́lidh búrɑni. Codhe, ɑkedhi gen wɑ̈g bënn, kɑ dhø kengø dij, kɑ thɑny ki kitim rɑ̈dh. Kɑ ge ókedhø.
15Kɑ ókwër obëënø kì wɑ̈r geki mɑ̈nni gen kí nyigi gen, kɑ gïgcɑmm cɑm gen, kɑ møgi oløg mɑdh gen, ni kenyi göög gen ceth.
16Dhuki kɑ rɑ̈dh møøl-ɑ kengø geki Dɑniel. 17Apëjji rɑ̈dh kinni, “Dɑniel, kitim ótorø?”
Kɑ Dɑniel ólöggø kinni, “Nuti torø wuö.”
18Keny-ɑ ɑ́yieeb dhø kengø ceth, kɑ wïj tɑrɑbedhɑ̀ lidh e wɑ̈dh-ɑ bëëdø yi rɑ̈dh, ɑryeere kinni, “Yïn ɑ Bel, yï dwøng! Yï bɑ jwøg kidyër!”
19Kɑ Dɑniel óngedhø, ɑköbbe rɑ̈dh kinni, “Cungí, kɑ yï lïdhí, ɑ́ pɑ̈ɑ̈ltyelli møg ɑ nënni ɑgɑk?”
20Kɑ rɑ̈dh ólöggø kinni, “Yɑ nenn-ɑ pɑ̈ɑ̈ltyelli cwøw, kí mɑ̈nn geki othønhø.” 21Kɑ pyëw rɑ̈dh órënyø ki mendwøng, ɑkööbe kinni i mɑɑg ókwërrɑni geki mɑ̈nni gen kí nyigi gen bënn, kɑ ge muujii. Kɑ rɑ̈dh nyudhi gen ɑmöng-ɑ nyi kedhi gen yij kengø kì wɑ̈r yethi cyɑ̈ng be cɑmi gïgcɑmm-ɑ nyi cïb wïj tɑrɑbedhɑ̀. 22Codhe, ɑkööb rɑ̈dh kinni i nɑ̈ɑ̈g gen ge bënn. Kɑ ngïji Bel mëgge Dɑniel, kɑ tørri yi Dɑniel, ɑcøøre kengɑni piny.
Nɑ̈gi Nɑ̈ɑ̈ynyɑng yi Dɑniel
23Ádɑ Nɑ̈ɑ̈ynyɑng me dwøng dwøng, mɑ ɑ́mɑlli ɑ́ jwøg yi tyëng Bɑbïl. 24Kɑ Dɑniel köbbi cyɑ̈ng ɑ́kyel yi rɑ̈dh kinni, “Jwøk men pɑ nëënø? Liidh, onëënø o ceg-ɑ cɑm, o nyii mɑ̈ɑ̈dhø. Mɑɑl!”
25Alöggi Dɑniel kinni, “Yɑ nyi mɑll-ɑ Wɑ̈ɑ Jwøgɑ. Bene en ɑ bɑ Jwøng-ɑ nëënø kete. 26Nɑ̈ɑ̈ynyɑng-ɑ kømmi yi wun ɑ́ jwøg ɑnɑn, ócuggø nɑ̈gø yi yɑn, e cingɑ bong pilø wɑlɑ̀ lodh, keløg yï oyïëyø.”
Kɑ rɑ̈dh okööbø kinni, “Yɑ ɑ́yïëy.”
27Codhe, ɑkɑ̈bbi Dɑniel ki dök kí dwɑ̈lø kí yëyy. Gï ɑ́kwɑnye gï nøg, kɑ gï thɑle kì kej ɑ́kyel, kɑ Nɑ̈ɑ̈ynyɑngɑni cɑɑme ki gøn. Kɑ Nɑ̈ɑ̈ynyɑngɑni okwödø, kɑ ópyëdø. Kɑ Dɑniel okööbø kinni, “Bene gïn-ɑ mɑlli yi wun, wu tyëng Bɑbïl?”
28Keny-ɑ ɑ́lïngi gïn-ɑ ɑ́cwöb yi tyëng Bɑbïl, ɑtug gen ki yɑy. Kɑ ge kedh-ɑ yï rɑ̈dh pëthi gen rijjø, ge óryeerø kinni, “Rɑ̈dh ɑ́göög ki ngeti Yeud. Ákwøng-ɑ Bel ki tørrø, ɑnɑ̈ɑ̈ge ókwër, o ɑnɑn Nɑ̈ɑ̈ynyɑngee ɑ́nɑ̈ɑ̈ge!” 29Akedhi gen yï rɑ̈dh, kɑ ge okööbø ce mëggi gen Dɑniel; ge ɑ́kööb kinni, “Keløg yï óbɑ̈nyi, yï ónɑ̈g yi wøn wuki tyëng gølí bënn.”
30Keny-ɑ ɑ́lïdhi rɑ̈dh kinni kwøbbi gen teeg, ɑmuuje Dɑniel. 31Kɑ Dɑniel leeng yij bur me pɑ̈ng yi ngurrì, kɑ obëëdø kì kenyɑni ki cyɑ̈ng ɑ́bïkyel. 32Ádɑ ngurrì ɑ́bïryew kì yij bur menɑni, o ge ɑ́bëëd ge nyi mëgg-ɑ ji ɑ́ryew kí órömm ɑ́ryew møg cɑm yi gen yethi cyɑ̈ng. De ge nuti thödhø ki gïncɑm ki cyɑ̈ng ɑ́bïkyel møgɑni, kipe kinni o Dɑniel cɑm yi gen ceth, mɑ́ ri gen ódi kɑ̈j.
Yieli Dɑniel kì Yij Buur Ngurrì
33Kì bøli kenyɑni, jɑltöng Abɑkuk ɑ́ying-ɑ Yeudiyɑ̀. Tɑ̈ɑ̈dø ki rïngø, kɑ köme pudde ki ópùn, ɑ́ men muuje jøg mø kɑ̈jø ki byel kì pwödhø. 34Aköbbii yi wëywöni Wë kinni, “Kɑ̈l gïncɑmɑni, muuj Dɑniel. Dɑniel ying-ɑ Bɑbïl kì yij buur ngurrì.”
35Alöggi Abɑkuk kinni, “Wuö, yɑ nuti pɑ̈nyi kedhi Bɑbïl, o keny-ɑ di buur ngurrì kwïj yi yɑn.”
36 #
Idhki 8.3
Codhe ɑmɑɑg jɑltöngɑni yi wëywöni Wë ki yëyye, kɑ gø gwɑɑre Bɑbïl, kɑ gø cïbe tøg buur ngurrì. 37Kɑ Abɑkuk ócwöddø kinni, “Dɑniel! Dɑniel! Yï ɑ́ödi yi Jwøk ki gïncɑm. En ɑnɑn kwɑɑny.”
38Keny-ɑ ɑ́lïngi cwɑggi Abɑkuk yi Dɑniel, ɑpwøje Jwøk kinni, “Jwøk yɑ ɑ́pɑr yi yïn, mɑ́ tyëng-ɑ mɑɑr yïn pɑ nyi wiy yi yïn piny.” 39Adhwödhe kɑ gïncɑmɑni cɑme, de Abɑkuk ɑ́dwøøg pödhi gen yi wëywöni Jwøk kì bøli kenyɑni ceth.
40Akedhi rɑ̈dh be ywøgi Dɑniel wïj buur ngurrì, kì bïryeew cyɑ̈ng. Keny-ɑ ɑ́wɑ̈dhe kunɑni, kɑ lïïdh-ɑ yij burɑni, ɑlidhe Dɑniel e obëëdø kì piny. 41Kɑ rɑ̈dh óryeerø kinni, “Wuö, Jwøøg Dɑniel, dwøng ɑ́ yïn! Yï ketí ɑ bɑ Jwøk.” 42Codhe, ɑmïïd Dɑniel wɑ̈g, kɑ tyëng-ɑ ɑ́dwɑddi nɑ̈gi Dɑniel leeng yije. Kɑ ge cɑm yi ngurrì kì bøli kenyɑni ceth, e rɑ̈dh onëënø.
Currently Selected:
Bel 1: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.