Röm 9
9
Nɛɛ Kuɔth tin cɛ mɛk
1Ɣän latdä ni thuɔ̱k rɛy Kritho. /Ci ɣän kac ni kac. Ŋäc lɔaacdä nyothɛ jɛ ɛn ɣöö ɛ thuɔ̱k rɛy Yieekä in Gɔaa in Rɛl Rɔ, 2ɣän ta̱a̱ kɛ jiath lɔaac mi di̱i̱t ɛlɔ̱ŋ kɛnɛ bɛ̈c lɔaac mi /ci thuk. 3Kɛ ɣöö dee ŋua̱n ni ɣöö ɣän puɔ̱nydä ca ɣä kuɛth, kä ca ɣä ŋuɔ̱k jɔ̱ɔ̱r kä Kritho kɛ kui̱ dämaari tin maar kɛ ɣä kɛ ri̱ŋ. 4Kɛ kɛn ji̱ I-thɛ-rɛl, gaat Kuɔth tin cɛ mɛk, kä cɛ kɛ nyuɔ̱th buaydɛ, kä cɛ mat ruac lat kɛ kɛ, kä cɛ kɛ ka̱m ŋuɔ̱t, kɛ pal in thuɔ̱k, amäni tin ci Kuoth kɛ lar, 5kä kɛ kuay gua̱ndɔɔŋni kɔn tin di̱t, kä kɛ ciaaŋ ri̱eŋ bä Mɛ-thia kä kɛ, min te wi̱i̱ kä ti diaal. A puɔ̱th tekɛ Kuoth amäni cäŋ kɛl. Inɔnɔ.
6Ɣän /cä lat ni ɣöö /ken ruac Kuɔth cop guäthdɛ. Ɛ ɣöö /cikɛ gaat I-thɛ-rɛl la di̱eel gan I-thɛ-rɛl ɔ. 7Kä /cikɛ kuay A-bɛ-ram la di̱eel gan A-bɛ-ram, kɛ ɣöö ci Kuoth wee i̱, “Bi kuay tin cä la̱r ji̱ ben kä Ay-dhɛk.”#9:7 Tuk 21:12, 18:10. 8Ɛn nɛmɛ lotdɛ ni ɣöö /cikɛ gaat ri̱eŋ kɛn tɔ̱ la gaat Kuɔth tɔ̱, kɛ gaat tin ci Kuoth kɛ lar kɛ kɛn la kuay tɔ̱. 9Kɛ ɣöö mɛmɛ ɛ jɛn min ca lar i̱, “Ithaar cɔ̱tänɛ bä luny jɔk kä bi Thara tekɛ gat.” 10Kä /ciɛ jɛn kärɔa. Ci mi ce̱tkɛ jɛ tuɔɔk, cɛ tuɔɔk kä Rɛ-bɛ-ka kɛ gaatkɛ da̱ŋ rɛw tin gua̱ndiɛn kɛl ni Ay-dhɛk gua̱ndɔɔŋdan. 11A cäŋɛ ni mëë ŋotkɛ a /ka̱nkɛ ni dap, kiɛ thilɛ mi ca ni la̱t, mi gɔaa kiɛ mi jiääk (kɛ ɣöö bi luɔt kuëny Kuɔth wee wä, 12kä a /ci mɔ a lät, duundɛ ɣöö kɛ ciötdɛ kɛ kɛ), cuɛ Rɛ-bɛ-ka jiök i̱,#9:12 Tuk 25:23. “Bi gat in di̱i̱t gat in tɔt lätikä.” 13Ce̱tkɛ min ca gɔ̱r i̱,#9:13 Mɛ̈l 1:2-3.
“Cä Je-kɔb nhɔk,
kä cä E-thɔ lo̱k.”
14Banɛ ŋu mi dɔ̱ŋ kulɛ lar? Ɛ ɣöö /ci Kuoth lät ni cuŋ? /Cɛ dee a jɛn! 15Kɛ ɣöö cɛ jɛ la̱r Muthɛ i̱,#9:15 Ɣöth 33:19.
“Bä tekɛ kɔ̱a̱c lɔaac kɛ ramɔ
bä tekɛ kɔ̱a̱c lɔaac kɛ jɛ mɔ,
kä bä tekɛ gɔɔy lɔaac kɛ ram
bä tekɛ gɔɔy lɔaac kɛ jɛ mɔ.”
16Kä bɛ te nɔ a /ci mɔ a min go̱o̱r raan ɛ kiɛ min lätdɛ, duundɛ ɣöö ɛ kɔ̱a̱c lɔaac Kuɔth. 17Kɛ ɣöö ci Ruac Kuɔth in Rɛl Rɔ Pɛro jiök i̱,#9:17 Ɣöth 9:16. “Cä ji̱ kap nhial kɛ luɔt mi nyoth buɔ̱mdä kä ji̱, kɛ ɣöö ba ciötdä lat rɛy ɣɔaa kɛɛliw.” 18Kɛ ɣöö inɔ, tekɛ kɔ̱a̱c lɔaac kɛ ram in ci nhɔk ni kɔ̱a̱c lɔaac, kä jakɛ lɔcdɛ kä bum kɛ ram in ci nhɔk ni buɔ̱m lɔaac.
Gak Kuɔth kɛnɛ kɔ̱a̱c lɔaacdɛ
19Bi yɛn ɣä jiök i̱, “Ɛŋu ŋot Kuoth kɛ mi jekɛ duer ɔ? Kä ɛŋa dee car Kuɔth rut ɔ?” 20Kä ɛ ji̱n ŋa, a deri raan ŋaknɔm ŋak kɛ Kuoth? Dee duɔ̱ɔ̱r mi ca täth ram min täth jɛ thiec i̱,#9:20 Ica 29:16. “Ɛŋu mɔ ci ɣä la̱t inɔ mɔ?” 21/Ci tääth dha̱a̱ri tekɛ cuɔ̱ɔ̱ŋ kɛ mun, kɛ ɣöö derɛ dhaar mi tekɛ maan kɛnɛ dhaar mi jiääk täth kɛ ŋuɔ̱l muɔ̱ɔ̱nɔ kɛlɔ?#9:21 Yir 18:6. 22Kä ɛ jɛn duɔ̱ɔ̱p in lät kɛ Kuoth ɛn nɔmɔ. Jɛn nyoothɛ ni gakdɛ kä jakɛ ni buɔ̱mdɛ kä ba ŋa̱c. Kä jɛn cɛ nɛy tin jakɛ jɛ kä gak rut, tëë ca rialikä kɛ kui̱ däkä. 23Kä jɛn bä go̱o̱rɛ ni ɣöö bɛ buaydɛ nyoth, buaydɛ min cɛ wuɔ̱c kɔn nɛy tin la ji̱ kɔ̱cä lɔaacdɛ, kɔn nɛy tin cɛ rialikä kɛ ɣöö banɛ buaydɛ jek. 24Kɛ ɣöö kɛ kɔn nɛy tin cɛ cɔl, /ciɛ ji̱ Juudh kärɔ̱, amäni Jur bä. 25Kä nɛmɛ ɛ min cɛ lar kä bok go̱kä ni Ɣocä i̱,#9:25 Ɣocä 1:10, 2:23.
“Tin /ci a nɛɛkä bä kɛ cɔl i̱,
‘Nɛɛkä.’
Kä min /ka̱n nhɔk, bä jɛ cɔl i̱,
‘Min nhɔakä.’ ”
26“Kä niɛ guäth in ca kɛ
jiök thi̱n i̱,#9:26 Ɣocä 1:10.
‘/Ci yɛn a nɛɛkä,’
Ɛn wi̱ni bakɛ cɔli,
‘Gaat Kuɔth in tëk.’ ”
27Kä cu I-ca-yaa wak kɛ kui̱ ji̱ I-thɛ-rɛl,#9:27 Ica 10:22-23. “Cäŋ ce̱t gaat I-thɛ-rɛl kɛ liɛt bar, ba kän ni tha̱a̱ŋdiɛn ti tɔt, 28kɛ ɣöö bi Kuäär ni Kuoth lukdɛ ŋok wi̱i̱ muɔ̱ɔ̱n kɛ buɔ̱m kɛ pɛ̈th.” 29Kä ce̱tkɛ mëë ci I-ca-yaa jɛ lat i̱,#9:29 Ica 1:9.
“Mi /ken Kuäär in la Ruey Ɣɔaa
kɔn ba̱ny kuay,
dënɛ ce̱tkɛ Thɔ-dɔm,
kä jakɛ kɔn
kä ce̱tkɛ Go-mo-ra.”
Thuk ti gɔw kɛ nyin ji̱ I-thɛ-rɛl bä
30Ɛŋu mi banɛ kulɛ lar? Kä ca nɛy tin /ci tɔ̱ a ji̱ Juudh kä /ken rɔ̱ moc cuɔ̱ɔ̱ŋ kɛɛl kɛ Kuoth cakɛ moc cuɔ̱ɔ̱ŋ kɛ ŋa̱thdiɛn, 31kä ji̱ I-thɛ-rɛl tin ca rɔ̱ moc cuɔ̱ɔ̱ŋ kɛɛl kɛ Kuoth kɛ guuridiɛn kɛ ŋut, /ken kɛn ŋut luäŋ kɛ guur. 32Ɛŋu? Ɛ ɣöö /ken kɛn ɛ do̱t rɛy ŋäthä, kä cikɛ ŋäth ni lätkiɛn. Cukɛ kɔa̱a̱th kɔ̱thikä wi̱i̱ pa̱a̱m kɔa̱a̱thni, 33ce̱tkɛ min ca gɔ̱r i̱,#9:33 Ica 28:16.
“Nɛ̈nɛ jɛ, ɣän kuëŋä päm
kä Dha-yɔn,
mi bi naath jakä kɔ̱a̱thkɛ
kɔ̱thikä,
ɛ päm mi bi kɛ jakä tɛth.
Kä ram ɔ bi jɛ ŋäthɔ
/ca jɛ bi jakä po̱c.”
Currently Selected:
Röm 9: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
