Kuen 8
8
Kap lɛmbärni nhial
1Täämɛ cu Kuoth Nhial ruac kɛ Muthɛ, 2jio̱k ni Ä-ron i̱, “Mi wëë lɛmbärni wä kap nhial, a lɛmbärni bärɔw pɛt nhiam cuuŋ lɛmbärä.” 3Cu Ä-ron ɛ la̱t, cuɛ lɛmbärni kap nhial wi̱i̱ cuuŋ lɛmbärä pɛtkɛ, ce̱tnikɛ mëë ci Kuoth Nhial ɛ la̱r Muthɛ. 4Täämɛ cuɛ cua̱ jɛn duɔ̱ɔ̱p in cua lät ni cuuŋ lɛmbärä, cua jɛ täth kɛ dey kɛ da̱a̱p. Cua jɛ duäc kɛ dey ni pinydɛ amäni gaaknikɛ, ce̱tnikɛ ta̱a̱ in ci Kuoth Nhial ɛ nyuɔ̱th Muthɛ, cuɛ cuuŋ lɛmbärä täth kɛ jɛ.
Lëy ji̱ Lii-bay
5Cu Kuoth Nhial Muthɛ jiök i̱, 6“Lɛy ni ji̱ Lii-bay rɛy ji̱ I-thɛ-rɛl, kä lak kɛ. 7Lätni nɛmɛ kä kɛ, kɛ ɣöö bikɛ lak. Ki̱th nikɛ pi̱ luel, kä akɛ muɔ̱tkɛ pua̱nykiɛn, akɛ lak kɛ bieynikiɛn kä akɛ puaak. 8Kä akɛ muɔckɛ rɔ̱ ruath tha̱a̱k kɛnɛ muc bɛɛl kɛ nup mi ko̱k ko̱k mi ca lia̱a̱p kɛ liɛth, kä bi ruath tha̱a̱k mi dɔ̱ŋ ka̱n ala muc dui̱rä. 9Kä bi ji̱ Lii-bay cu nööŋ nhiam kɛmɛkä ro̱mä. Kä bi ji̱ I-thɛ-rɛl diaal dol. 10Mi wëë ji̱ Lii-bay naŋ nhiam Kuɔth Nhial, a ji̱ I-thɛ-rɛl la̱thkɛ tetkiɛn wuɔ̱thkiɛn. 11Kä bi Ä-ron ji̱ Lii-bay lëy Kuɔth Nhial ala muc mi rɛl rɔ kä ji̱ I-thɛ-rɛl, kɛ ɣöö bi la̱tdiɛn a lät Kuɔth Nhial. 12Inɔ bi ji̱ Lii-bay thääk cu buk, kä bi thäk kɛl thöp ala muc dui̱rä, kä min dɔ̱ŋ ba muc mi wa̱ŋkɛ Kuoth Nhial, kä bi ji̱ Lii-bay cu luɛl. 13Kä bi Lii-bay ben nhiam Ä-ron kɛnɛ gaatkɛ, kä bikɛ kɛ cu lëy Kuoth Nhial ala muc ti rɛl kɛ rɔ.
14“Kɛ jɛn duɔ̱p ɛmɔ lɛy ji̱ Lii-bay rɛy ji̱ I-thɛ-rɛl, kä bi ji̱ Lii-bay a nyinkä. 15Kɛ kɔr kä mɔmɔ bi ji̱ Lii-bay lät wä la̱t rɛy kɛmɛkä ro̱mä mi ci kɛ lak kä ci kɛ thöp ala muc ti ŋuan. 16Kɛ ɣöö kɛn diaal ca kɛ ka̱mä rɛy ji̱ I-thɛ-rɛl kɛ gua̱a̱th ke̱yni diaal tin dapkɛ kɛ nhiam kä ji̱ I-thɛ-rɛl diaal, cä kɛ ka̱n ala nyinkä. 17Kɛ ɣöö key diaal rɛy ji̱ I-thɛ-rɛl kɛ nyinkä, key nath kiɛ le̱y, kɛ cäŋ ëë na̱kä key diaal rööl I-jëp cua̱ kɛ lëy rɔ. 18Kä cä ji̱ Lii-bay ka̱n kɛ gua̱a̱th keyni ji̱ I-thɛ-rɛl diaal. 19Kä cä ji̱ Lii-bay thöp Ä-ron Kɛnɛ gaatkɛ ala muc rɛy ji̱ I-thɛ-rɛl, kɛ ɣöö ba ji̱ I-thɛ-rɛl lätikä rɛy kɛmɛkä ro̱mä, kɛnɛ ɣöö ba ji̱ I-thɛ-rɛl luɛl, kä dërɛ cu thil juey mi te rɛy ji̱ I-thɛ-rɛl mi ci ji̱ I-thɛ-rɛl ben thieekä luaak Kuɔth.”
20Cu Muthɛ kɛnɛ Ä-ron kɛ duɔl ji̱ I-thɛ-rɛl diaal ji̱ Lii-bay lɛy ce̱tnikɛ mëë ci Kuoth Nhial ɛ la̱r Muthɛ. 21Cu ji̱ Lii-bay rɔ lak kä dueerkiɛn, kä cua bieynikiɛn lak kä cu Ä-ron kɛ thöp Kuoth ala muc ti ŋuaaŋ, cu Ä-ron kɛ luɛl kɛ la̱kdiɛn. 22Kɛ kɔrɛ cu ji̱ Lii-bay wä wa lätkiɛn la̱t rɛy kɛmɛkä ro̱mä nhiam Ä-ron kɛnɛ gaatkɛ, cukɛ ji̱ Lii-bay lɛy ce̱tnikɛ mëë ci Kuoth Nhial ɛ la̱r Muthɛ.
Pek la̱t ji̱ Lii-bay
23Cu Kuoth Nhial Muthɛ jiök i̱, 24“Nɛmɛ ɛ jɛn la̱t ji̱ Lii-bay, a känɛ ni kä nɛy tin tekɛ run ti jiɛɛn da̱ŋ rɛw wi̱cdɛ dhieec a wä nhial kä bikɛ ben lät kɛ la̱t rɛy kɛmɛkä ro̱mä. 25Kä nɛy tin ci runkiɛn cop kä jiɛɛn dhieec bikɛ la̱t rɛy kɛmɛkä päl, 26ɛ ni ɣöö bikɛ gaatmani luäk kɛ riali lätni ikä rɛy kɛmɛkä ro̱mä. Duundɛ ɣöö thilɛ la̱t mi ba la̱t, inɔ bi ji̱ Lii-bay nyuɔ̱th lätkiɛn.”
Currently Selected:
Kuen 8: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
