Kuen 7
7
Muc bööthni
1Kɛ cäŋ ëë ci Muthɛ thuɔ̱k kɛ la̱t kɛmɛkä, kä yi̱i̱rɛ jɛ kä lɛyɛ kuakɛ diaal, kä yi̱rɛ yi̱k kɛnɛ lëy kuaknikɛ diaal. 2Cu bööth thuk duëli ji̱ I-thɛ-rɛl tëë te nhiam nɛɛni tëë kuɛnkɛ, 3muckiɛn nööŋ nhiam Kuɔth Nhial, thurbiɛɛli bäkɛl ti ca kum kɛ thääk da̱ŋ wäl rɛw, te bööth da̱ŋ rɛw kɛ thurbil, kä te ramɔ kɛ thäk, ti ba ben thöp nhiam kɛmɛkä ro̱mä. 4Ɛ jɛn cu Kuoth Nhial Muthɛ jiök i̱, 5“Nhɔk kɛn ti̱ti̱ kä kɛ, kɛ ɣöö ba kɛ lät la̱t kɛmɛkä ro̱mä, kä käm nikɛ ji̱ Lii-bay, kä ramɔ nikɛ la̱tdɛ.” 6Cu Muthɛ thurbiɛɛli ka̱n kɛnɛ thääk, kä cuɛ kɛ ka̱m ji̱ Lii-bay. 7Cuɛ thurbiɛɛli rɛw kɛ thääk ŋuaan ka̱m gaat Ger-con, kɛ pek lätnikiɛn. 8Kä cuɛ thurbiɛɛli da̱ŋ ŋuaan kɛnɛ thääk bädäk ka̱m gaat Mɛ-ra-ri, kɛ pek lätnikiɛn, tekɛ kɔɔr I-ta-mar gat Ä-ron bo̱o̱th palä. 9Kä thilɛ mi cɛ ka̱m gaat Kɛ-ɣath, kɛ ɣöö la̱tdiɛn ɛ ka̱p kuakni kä tin rɛl gɔɔydiɛn rɔ. 10Kä cu bööth muc thöp kɛ cäŋ yi̱rä yi̱kä kɛnɛ lëydɛ, cukɛ muckiɛn thöp nhiam yi̱kä. 11Cu Kuoth Nhial Muthɛ jiök i̱, “Akɛ thöp kɛ muckiɛn, ram ɔ kɛ cäŋdɛ kɛ kui̱ leyä yi̱kä.”
12Kä ram ëë thöp mucdɛ kɛ nhiam ɛ Na-con gat A-mi-na-dab kä Juda. 13Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thiäŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 14Kɛ liɛɛr dääpä mi kɔakɛ kɛ yio̱w da̱ŋ wäl kä thiäŋɛ kɛ wäl in kɔp. 15Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 16Thäk dɛ̈ɛ̈l böwä kɛl ala muc dui̱rä. 17Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Na-con gat A-mi-na-dab.
18Kɛ cäŋ in rɛwdɛ ba Nɛ-tan-el gat Dhu-ar, bo̱o̱th dhɔaar Yi-tha-kar, 19cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 20Kɛ liɛɛr dääpä mi kɔakɛ kɛ yio̱w da̱ŋ wäl thi̱eŋɛ kɛ wäl in kɔp. 21Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi gur kɛl, ala muc mi waŋkɛ. 22Thäk dɛ̈ɛ̈l böwä kɛl ala muc dui̱rä. 23Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Nɛ-tan-el gat Dhu-ar.
24Kɛ cäŋ in diɔ̱ɔ̱kdiɛn ba Ɛli-ab gat Ɣe-lon bo̱o̱th dhɔaar Dhɛ-bu-lun. 25Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 26Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 27Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 28Thäk dɛ̈ɛ̈l böwä kɛl ala muc dui̱rä. 29Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ɛli-ab gat Ɣe-lon.
30Kɛ cäŋ in ŋuaandiɛn ba Ɛli-dhur gat Cɛ-de-ur, bo̱o̱th dhɔaar Rɛ-u-ben. 31Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 32Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp, 33kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi gur kɛl, ala muc mi waŋkɛ. 34Thäk dɛ̈ɛ̈l böwä kɛl ala muc dui̱rä. 35Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ɛli-dhur gat Cɛ-de-ur.
36Kɛ cäŋ in dhieecdiɛn ba Cɛ-lu-mi-el gat Dhu-ri-ca-day bo̱o̱th dhɔaar Cim-on. 37Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 38Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 39Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 40Thäk dɛ̈ɛ̈l böwä kɛl ala muc dui̱rä. 41Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Cɛ-lu-mi-el gat Dhu-ri-ca-day.
42Kɛ cäŋ in bäkɛliɛn ba Ɛl-ya-thap gat Dɛ-u-el bo̱o̱th dhɔaar Gad. 43Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 44Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 45Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 46Thäk dɛ̈ɛ̈l böwä kɛl ala muc dui̱rä. 47Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ɛl-ya-thap gat Dɛ-u-el. 48Kɛ cäŋ in bärɔwdiɛn ba Ɛli-cama gat A-mi-ɣud bo̱o̱th dhɔaar Ɛ-pa-rim, 49cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 50Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 51Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 52Thäk dɛ̈ɛ̈l böwä kɛl ala muc dui̱rä. 53Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ɛli-cama gat A-mi-ɣud.
54Kɛ cäŋ in bädäkdiɛn ba Gam-li-el gat Pɛ-daa-dhur, bo̱o̱th dhɔaar Ma-na-thɛ. 55Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋkɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl, 56kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 57Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 58Thäk dɛ̈ɛ̈l böwä kɛl ala muc dui̱rä. 59Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Gam-li-el gat Pɛ-daa-dhur.
60Kɛ cäŋ in bäŋuandiɛn ba Ä-bi-dan gat Gid-oni bo̱o̱th dhɔaar Ben-ya-min. 61Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 62Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 63Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 64Thäk dɛ̈ɛ̈l böwä kɛl ala muc dui̱rä. 65Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ä-bi-dan gat Gid-oni.
66Kɛ cäŋ in wäliɛn ba A-ɣi-ɛ-dhɛr gat A-mi-ca-day bo̱o̱th dhɔaar Daan. 67Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 68Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 69Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 70Thäk dɛ̈ɛ̈l böwä kɛl ala muc dui̱rä. 71Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc A-ɣi-ɛ-dhɛr gat A-mi-ca-day.
72Kɛ cäŋ in wäl kɛliɛn ba Pag-i-el gat Ɔk-ran bo̱o̱th dhɔaar A-cɛr. 73Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 74Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 75Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 76Thäk dɛ̈ɛ̈l böwä kɛl ala muc dui̱rä. 77Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Pag-i-el gat Ɔk-ran.
78Kɛ cäŋ in wäl rɛwdiɛn ba Ä-ɣi-ra gat E-nan bo̱o̱th dhɔaar Nap-ta-li. 79Cu mucdɛ a tuɔ̱k cikä min bo̱r kɛl mi kɔakɛ kɛ yio̱w ti kuɔ̱r kɛl wi̱cdɛ jiɛɛn da̱ŋ diɔ̱k, kɛ thak cikä min bo̱r mi kɔakɛ kɛ yio̱w ti jiɛɛn bärɔw, ce̱tnikɛ kök luaak Kuɔth, kɛn da̱ŋ rɛw thi̱eŋ kɛ kɛ nup mi ko̱k ko̱k kä ca lia̱a̱p kɛ liɛth ala muc bɛɛl. 80Kɛ liɛɛr dääpä mi kɔakɛ kɛ yio̱w da̱ŋ wäl kä thi̱eŋɛ kɛ wäl in kɔp. 81Kɛ ruath tha̱a̱k kɛl, dɛl kɛl, ruath dɛ̈ɛ̈l kɛl mi waŋkɛ. 82Thäk dɛ̈ɛ̈l böwä kɛl ala muc dui̱rä. 83Kä bi muc malä a thääk da̱ŋ rɛw, rɔɔm da̱ŋ dhieec, thääk deet böwni da̱ŋ dhieec, rueeth deet da̱ŋ dhieec ti gur kɛli. Ti̱ti̱ cukɛ a kɛn muc Ä-ɣi-ra gat E-nan.
84Nɛmɛ ɛ jɛn muc leyä yi̱kä kɛ cäŋ in yierkɛ jɛ ɛ bööth I-thɛ-rɛl, took cikä min bo̱r da̱ŋ wäl rɛw, thääk cikä min bo̱r da̱ŋ wäl rɛw, kɛ lieeri da̱ŋ wäl rɛw, 85te tuɔ̱k cikä min bo̱r kɛl kɛ yio̱w ti kuɔ̱r kɛl wi̱cdɛ jiɛɛn diɔ̱k, kä te thak cikä min bo̱r kɛl kɛ yio̱w ti jiɛɛn bärɔw. Kä kuak cikä min bo̱r diaal tekɛ kɛ yio̱w ti bathdɔɔri rɛw wi̱cdɛ kur ŋuaan ce̱tkɛ pek ko̱kä luaak Kuɔth. 86Kä lieeri dääpä da̱ŋ wäl rɛw a thi̱eŋ kɛ wäl in kɔp kɔp, te kɛl kɛ yio̱w da̱ŋ wäl ce̱tnikɛ yio̱w luaak Kuɔth, kɛn lieeri dääpä diaal tekɛ yio̱w ti kuɔ̱r wi̱cdɛ jiɛɛn da̱ŋ rɛw. 87Kä muc ɣɔ̱ɔ̱k diaal tin waŋkɛ, kɛ thääk da̱ŋ wäl rɛw, rɔɔm da̱ŋ wäl rɛw, rueeth deet da̱ŋ wäl rɛw ti gur kɛli kɛɛl kɛ muc bɛɛlkiɛn, kɛ thääk deet böwni da̱ŋ wäl rɛw ala muc dui̱r. 88Kä muc ɣɔ̱ɔ̱k diaal kɛ kui̱ malä, kɛ thääk ti jiɛɛn da̱ŋ rɛw wi̱cdɛ ŋuaan, rɔɔm ti jiɛɛn bäkɛl, thääk deet böwni ti jiɛɛn bäkɛl, rueeth deet ti gur kɛli ti jiɛɛn bäkɛl. Kɛ nyin leyä yi̱kä, kɛ kɔr kä min ca yi̱r.
89Kä mëë ci Muthɛ wä rɛy kɛmɛkä ro̱mä kɛ ɣöö bɛ ruac kɛ Kuoth Nhial, cuɛ jɔw liŋ ruacɛ kɛ jɛ kam kä ti ce̱tkɛ jaak da̱ŋ rɛw nhial geelä min te wi̱i̱ thandukä matdä ruac, cuɛ ruac kɛ jɛ.
Currently Selected:
Kuen 7: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
