Kuen 19
19
Pi̱ la̱k nath
1Täämɛ cu Kuoth Nhial Muthɛ kɛnɛ Ä-ron jiök i̱, 2“Nɛmɛ ɛ jɛn ciaŋ ŋuɔ̱tni in lar Kuoth Nhial ɛ. Jio̱kni ji̱ I-thɛ-rɛl a ji̱ nöŋkɛ nac mi lual mi thil diw, kä ka̱n met la̱a̱t. 3Kä bi jɛ thöp Ɛl-a-dhar bo̱o̱th palä, kä ba jɛ naŋ jɔk wec kä a jɛ na̱kɛ nhiamdɛ. 4Kä ɛ bo̱o̱th palä ni Ɛl-a-dhar kän riɛmdɛ kɛ yiatdɛ, kä bɛ jɛ kiɛth thok kɛmɛkä ro̱mä kɛ Kuoth Nhial nikä bärɔw. 5Kä a nac waŋkɛ ko̱lɛ, kɛ riɛmdɛ, kɛnɛ wawdɛ nhiam Ɛl-a-dhar. 6Kä bi bo̱o̱th palä jiath thëëp, kɛnɛ ithop, kɛ lath mi dɛ̈ɛ̈r ka̱n, kä bɛ kɛ yuɔr maac in wankɛ naac. 7Kä bi bo̱o̱th palä bieynikɛ lak, kä bɛ puaak, kä kɛ kɔrɛ bɛ cu ben wi̱c. Kä bɛ jiäk ɛn bo̱o̱th palä amäni thiaŋ. 8Kä ram in waaŋ nac bɛ bieynikɛ lak kä bɛ puaak, bɛ jiääk amäni thiaŋ. 9Kä bi ram mi gɔaa ŋɛ̈th maac naac rol, kä bɛ jɛ la̱th guäth mi gɔaa jɔk wec. Kä ba jɛ tɔ̱w kɛ kui̱ dolä ji̱ I-thɛ-rɛl kɛ kui̱ pi̱i̱ni la̱k, kɛ kui̱ wucä dui̱rä. 10Kä ram in rol ŋɛ̈th maac naac bɛ bieynikɛ lak, kä bɛ jiäk amäni thiaŋ. Kä nɛmɛ ba ŋut mi do̱raar kä ji̱ I-thɛ-rɛl, kɛnɛ nɛy tin cieŋ rɛydiɛn.”
Thiëp kä mi ci li̱w
11Kä ramɔ bi ri̱ŋ kä mi ci li̱w thiap ɔ, bɛ jiääk kɛ ni̱n bärɔw. 12Kä bɛ rɔ puɔk kɛ diɔ̱ɔ̱k ni̱ni kɛnɛ bärɔw ni̱ni, kä bɛ cu gɔaa. Kä mi /kenɛ rɔ puɔk kɛ diɔ̱ɔ̱k ni̱ni kɛnɛ bärɔw ni̱ni, /cɛ bi gɔaa. 13Kä ramɔ bi puɔ̱ny raam mi ci li̱w thiap ɔ, kä /kenɛ rɔ puɔk cɛ kɛmɛkä ro̱mä kɛ Kuoth Nhial ya̱r. Ɛn ram ɛmɔ ba tuɔ̱k raar rɛy I-thɛ-rɛl. Kɛ ɣöö /ka̱nɛ kith kɛ pi̱ la̱k, /cɛ bi gɔaa, ŋot jiääkdɛ thi̱n.
14“Kä nɛmɛ ɛ ŋuɔ̱t kɛ kui̱ raam mi bi li̱w rɛy kɛmɛkä. Kä ramɔ ci ben rɛy kɛmɛkä mɔ kɛnɛ ram ɔ te rɛy kɛmɛkä mɔ, /cikɛ bi gɔaa kɛ ni̱n bärɔw. 15Kä pekdɛ ro̱o̱m duɔ̱ɔ̱rä mi te ɣo̱o̱ŋä mi thil kuum, cɛ jiäk. 16Kä ramɔ bi puɔ̱ny raam mi ca näk thɛp thiap ɔ kɛ rɛy dɔaar ɔ, kiɛ mi ci li̱w, kiɛ cɔ̱a̱ ran, kiɛ wi̱c muɔ̱n, bɛ jiäk kä ni̱n bärɔw. 17Kä kɛ kui̱ jiääkä, bikɛ ŋɛ̈th ka̱n kä ŋɛ̈th mucä la̱k dui̱rä min ca waŋ, kä ba jɛ la̱th rɛy cukä pi̱i̱ni ti tekɛ löny. 18Kä bi ram mi gɔaa jiath ithop ka̱n kä bɛ jɛ cua̱th rɛy pi̱i̱ni, kä bɛ jɛ kiɛth rɛy kɛmɛkä kɛnɛ rɛy kuakni diaal, kɛnɛ ramɔ te wi̱ni mɔ, kɛ jɛn ram in ci cɔ̱a̱, kiɛ ram mi ca näk, kiɛ ci li̱w, kiɛ wi̱c muɔ̱ɔ̱n raam mi ci li̱w thiap. 19Kä ɛn ram in gɔaa bɛ ram min jiääk kith kɛ diɔ̱ɔ̱k ni̱ni kɛnɛ bärɔw ni̱ni. Kɛ bärɔw ni̱ni bɛ jɛ jak kä gɔaa, kä bɛ bieynikɛ cu lak kä bɛ rɔ puɔk, kɛ thiaŋ bɛ cu gɔaa.
20“Kä ɛn ram in /ci gɔaa, kä /kenɛ rɔ jak kä gɔaa, ɛn raamɔ ba jɛ tuɔ̱k raar rɛy dolä, kɛ ɣöö cɛ kɛmɛkä ro̱mä kɛ Kuoth Nhial ya̱r. Kä /ka̱n pi̱ la̱k kiɛth puɔ̱nydɛ, cɛ jiääk. 21Kä nɛmɛ ba ŋut kɛ kui̱ nɛɛni ti̱ti̱. Ram in kith pi̱w la̱k bɛ bieynikɛ lak. Kä ramɔ bi pi̱w la̱k thiap ɔ, bɛ jiääk amäni thiaŋ. 22Kä mɔ ca thiap ɔ ɛ ram mi jiääk bɛ jiääk bä. Kä ramɔ bi jɛ thiap ɔ bɛ jiääk amäni thiaŋ.”
Currently Selected:
Kuen 19: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
