Mɛ̈t 12
12
Gɔny ji̱ Pa-ri-thii kɛ Yecu kɛ to̱l ŋuɔ̱tni ca̱ŋ lɔ̱ŋä
(Mak 2:23-28, Luk 6:1-5)
1Kä ɛn ni̱ni tɔ̱tɔ̱ cu Yecu rët kɛ rɛy ka̱a̱kni bɛɛl kɛ cäŋ lɔ̱ŋä. Kä näk buɔth ji̱ kɔaarɛ, kä cukɛ jɛ tok kɛ to̱li wuɔ̱thni bɛɛl, kä muanykɛ kɛ. 2Kä mëë ci ji̱ Pa-ri-thii ɛ nɛn, cukɛ Yecu jiök i̱, “Guic jaaku, la̱tkɛ mi /ci rɔ lot kɛ cäŋ lɔ̱ŋä.” 3Kä cuɛ kɛ jiök i̱, “/Ka̱nɛ mëë ci Dee-bid ɛ la̱t kuɛn, mëë ci buɔth ɛ näk kɛnɛ nɛy tëë tekɛ jɛ kɛɛl? 4Cuɛ wä rɛy luaak Kuɔth cuɛ juray nhiam Kuɔth cam, min /ci ro̱ŋ kɛ ɣöö derɛ jɛ cam, kɛnɛ nɛy tin jäl kɛ jɛ kɛɛl, ɛ ni bööth palä kärɔ dee jɛ cam ɔ. 5Kiɛ /ka̱nɛ jɛ kuɛn rɛy ŋuɔ̱tni Muthɛ, ɛn ɣöö kɛ cäŋ lɔ̱ŋä cu bööth palä rɛy luaak Kuɔth cäŋ lɔ̱ŋä ya̱r, kä thilɛ kɛ duer? 6Kä ɣän la̱rä jɛ yɛ, duɔ̱ɔ̱r mi di̱t ni jɛn kä luaak Kuɔth a wa̱nɛ. 7Duŋ mi ŋa̱cɛ luɔt kä mɛmɛ i̱, ‘Ɣän göörä ni kɔ̱a̱c lɔaac, a /ci mɔ a muc,’ /cia nɛy ti thil duer dee kuɛth. 8Kɛ ɣöö Gat Ran ɛ kuäär ca̱ŋ lɔ̱ŋä.”
Jak Yecu kɛ tet raam mi cɛ niŋ kä gɔaa
(Mak 3:1-6, Luk 6:6-11)
9Kä cu Yecu gua̱a̱th ɛmɔ ba̱ny piny. Cuɛ wä guäth palädiɛn. 10Kä nɛnɛ, tëë kɛ wut mi cɛ tetdɛ niŋ. Kä cukɛ jɛ thiec i̱, “Ɛ ŋuɔ̱t ɛn ɣöö ba raan jakä gɔaa kɛ cäŋ lɔ̱ŋä?” Kɛ ɣöö dee kɛ jɛ gɔany. 11Kä cu Yecu kɛ jiök i̱, “Ɛŋadun mi tekɛ rɔam kɛl mi ci pɛn rɛy jiɛw kɛ cäŋ lɔ̱ŋä, /cɛ jɛ dee ka̱m raar? 12Kä raan lenyɛ rɔam kɛ pek mi ni̱n di? Kä inɔ lotdɛ rɔ ɛn ɣöö ba mi gɔaa la̱t kɛ cäŋ lɔ̱ŋä.” 13Kä cuɛ wut jiök i̱, “Ri̱c tetdu.” Kä cu wut ɛ ri̱c, kä cuɛ cu gɔaa, kä cuɛ pa̱a̱r kɛ tet in dɔ̱ŋ. 14Kä cu ji̱ Pa-ri-thii wä raar, kä mat kɛ rɔ̱ kɛ kui̱dɛ i̱ ba jɛ näk.
Yecu ɛ läät Kuɔth mi cɛ mɛk
15Kä mëë ci Yecu mɛmɛ ŋa̱c, cuɛ jiɛɛn ɛn wi̱ni. Kä cu nɛy ti ŋuan ɛ guɔ̱ɔ̱r, kä cuɛ kɛn diaal jakä gɔw. 16Kä cuɛ kɛ gok, i̱ /ca jɛ bi jakä ŋa̱ckɛ. 17Mɛmɛ ɛ ɣöö bɛ mëë ca lar ɛ gök ni I-ca-yaa jakä thuɔ̱k i̱,
18 # 12:18-21 Ica 42:1-4. “Mɛmɛ ɛ läätdä mi cä mɛk,
nho̱o̱kdä min tɛɛth lɔcdä.
Ɣän bä Yiëëdä kuëŋ kä jɛ,
kä jɛn bɛ ji̱ Ɣɔaa la̱t cuɔ̱ɔ̱ŋ.
19Jɛn /cɛ bi gaak,
kä /cɛ bi wiee,
kä thilɛ ram mi bi jɔwdɛ
liŋ rɛy duɔ̱pni.
20Jɛn /cɛ ruɔ̱ɔ̱r mi
ca duany bi töl,
kä /cɛ mac mi wee lia̱a̱
bi yieny,
amäni mi cɛ cuɔ̱ɔ̱ŋ jakä tiäm.
21Kä kɛ ciötdɛ
bi ji̱ Ɣɔaa ŋa̱th.”
Buɔ̱m Yecu bëë kä Beel-dhi-bul
(Mak 3:20-30, Luk 11:14-23)
22Kä cua ram mi cɔr mi cɛ di̱w, mi tekɛ yiëë mi jiääk nöŋ Yecu, kä cuɛ jɛ jakä gɔaa. Kä inɔ cu ram in cɛ di̱w ruac kä cuɛ gui̱c. 23Kä cu nɛy diaal ga̱a̱c ɛlɔ̱ŋ, kä cukɛ wee i̱, “Ɛn nɛmɛ derɛ a Gat Dee-bid?” 24Kä mëë ci ji̱ Pa-ri-thii jɛ liŋ, cukɛ wee i̱, “Ɛ ni lua̱ŋ Beel-dhi-bul, kuäär kuthni tin jiäk, ɛnɔ tuk wut ɛmɛ jɛ ni kuth ti jiäk raar ɔ.” 25Kɛ ɣöö ŋäcɛ ca̱riɛn cuɛ wee i̱, “Kä röl diaal tin da̱a̱kɛ rɔ̱ bakɛ däk, kä thilɛ wec kiɛ duel mi dääk rɔɔdɛ mi bi cuɔ̱ŋ. 26Kä mi tuk Cɛy-tan rɔɔdɛ raar, cɛ rɔɔdɛ da̱a̱k kärɔa, kä bi kuäärɛ kulɛ cuɔ̱ŋ i̱di? 27Kä mi tuɔ̱kä kuth ti jiäk raar kɛ lua̱ŋ Beel-dhi-bul ɛ buɔ̱m ŋa ɛnɔ tuɔkɛ nikɛ raar ɛ gaatkun ɔ? Kɛ kui̱c ɛmɔ kɛn bikɛ a ji̱ luɔ̱kdun. 28Kä mi ɛ lua̱ŋ Yieekä Kuɔth ɛnɔ tuɔ̱kä ni kuth ti jiäk raar ɔ, ci kuäär Kuɔth ben kä yɛ. 29Kä dee raan coth dueel wutdä mi bum bum, kɛ ɣöö bɛ nyinkɛ ka̱n i̱di, mi /kenɛ wut in bum bum kɔŋ yian? Kä ɛ jɛn dëë nyinkɛ kulɛ ka̱n ɔ. 30Ram mi /ci te kɛɛl kɛ ɣä lo̱kɛ ɣä, kä ram mi /ci ɣä luäk kɛ ma̱t nath jɛn riawɛ ni naath. 31Kɛ kui̱ ɛmɔ ɣän la̱rä jɛ yɛ, dueer diaal kɛnɛ kueth ni Kuɔth ba naath pälikä thi̱n, kä ram mi kueth ni Yiëë Kuɔth /ca jɛ bi pälikä. 32Kä ram mi ruac a jiäk kɛ Gat Ran ba jɛ pälikä, kä ram mi ruac a jiäk kɛ Yiëë in Gɔaa in Rɛl Rɔ /ca jɛ bi pälikä, ɛn täämɛ kiɛ amäni cäŋ kɛl.”
Jiath kɛnɛ dɛykɛ
(Luk 6:43-45)
33“Jakɛ jiath kä gɔaa kɛnɛ dɛykɛ, kiɛ jakɛ jiath kä jiäk kɛnɛ dɛykɛ, kɛ ɣöö jiath ŋa̱ckɛ jɛ kɛ dɛykɛ. 34Yɛn dɛy thɔ̱ɔ̱li! Dërɛ ruac agɔaa i̱di, mi lapɛ ji̱ jiäkni? Kɛ ɣöö mi te lɔc ran kɛ duɔ̱ɔ̱r, lat thokdɛ jɛ. 35Kä ram mi gɔaa bɛ ti gɔw nööŋ raar rɛy cärä lɔaacdɛ mi gɔaa. Kä ram mi jiääk bɛ ti jiäk nööŋ raar rɛy cärä lɔaacdɛ mi jiääk. 36Ɣän la̱rä jɛ yɛ kɛ cäŋ luɔ̱k ba naath thiec kɛ rieetkun diaal tëë ca lat baaŋä. 37Kɛ ɣöö ba ji̱ moc cuɔ̱ɔ̱ŋ kɛ rieetku, kä ba ji̱ moc duer kɛ rieetku.”
Gör nyuuthä mi gääy naath
(Mak 8:11-12, Luk 11:29-32)
38Kä cu tha̱a̱ŋ ji̱ gɔ̱rä kɛnɛ ji̱ Pa-ri-thii jɛ jiök i̱, “Ŋi̱i̱c, görkɔ ɣöö bakɔ nyuuth nɛn kä ji̱.” 39Kä cuɛ kɛ loc i̱, “Ri̱c mi jiääk mi thil Kuoth go̱o̱ri ni nyuuth, kä thilɛ mi ba lät kä jɛ ɛ ni nyuuth go̱kä ni Jona. 40Ce̱tkɛ mëë te Jona jic rɛ̱̈c mi di̱i̱t kɛ ni̱n da̱ŋ diɔ̱k, bi Gat Ran tekɛ ni̱n da̱ŋ diɔ̱k piny. 41Kä ji̱ Ni-nɛ-be bikɛ rɔ̱ jiɛc kɛ cäŋ luɔ̱k kɛ jɛn ri̱c ɛmɛ kɛɛl, kä bikɛ jɛ moc duer kɛ ɣöö cikɛ rɔ̱ ri̱t kɛ la̱t Jona kɛ ruac Kuɔth, kä nɛnɛ, mi di̱t ni jɛn kä Jona a wa̱nɛ. 42Kä bi kuäär ciek mi bëë kui̱c cuëëc rɔ jiɛc kɛ jɛn ri̱c ɛmɛ kɛɛl, kä bɛ jɛ moc duer, kɛ ɣöö cɛ ben ni peek ɣɔaa bëë pɛl Thɔ-lo-mon ben liŋ. Kä nɛnɛ, mi di̱t ni jɛn kä Thɔ-lo-mon a wa̱nɛ.”
Luny yieekä mi jiääk jɔk
(Luk 11:24-26)
43“Mëë ci yiëë mi jiääk ben raar puɔ̱ny ran, cuɛ wä wi̱el rɛy dɔaar mi thil pi̱, go̱o̱rɛ gua̱a̱th mi derɛ lɔ̱ɔ̱ŋ thi̱n, kä thilɛ gua̱a̱th mi cɛ jek. 44Kä cu yiëë mi jiääk wee i̱, ‘Ɣän bä loc dueel ëë ba̱a̱ thi̱n.’ Kä mëë cɛ luny jɔk, cuɛ jɛ jek baaŋ a ca jɛ yiɛc, kä ca jɛ rialikä. 45Kä mëë, cɛ loc jɔk, cuɛ yiey da̱ŋ bärɔw ti jiäk ni kɛn kä jɛ nööŋ, kä cu kɛn diaal wä rɛc, kä cukɛ cieŋ thi̱n. Kä cu ta̱a̱ wutdä ɛmɔ ku jiääk ni jɛn kä ta̱a̱dɛ mëë nhiam. Kä bɛ te inɔ bä kɛ jɛn ri̱c ɛ jiääk ɛmɛ.”
Ciëŋ mani Yecu tin thuɔ̱ɔ̱k
(Mak 3:31-35, Luk 8:19-21)
46Kä min ŋotdɛ kɛ ruac kɛ naath, te man kɛnɛ dämani cuŋä raar, görkɛ ruac kɛ jɛ. 47Cu ram kɛl Yecu jiök i̱, “Nɛnɛ, muɔɔr kɛnɛ gaatmuɔɔr a cuŋä raar, görkɛ ruac kɛ ji̱.” 48Kä cuɛ ram in ruac kɛ jɛ loc i̱, “Maar ɛŋa? Kä dämaari kɛ ŋaani?” 49Kä cuɛ ji̱ kɔaarɛ nyoth kɛ tetdɛ wëë i̱, “Maar kɛnɛ dämaari ti̱n! 50Kɛ ɣöö ram mi lat ruac Gua̱a̱r in te nhial, ɛ jɛn dämaar, kä ɛ jɛn nyimaar, kä ɛ maar.”
Nuer Bible © Bible Society in South Sudan 1998,2012.