Liib 26
26
Puɔ̱th ji̱ luthä Kuɔth
(Ŋuɔ̱t 7:12-24, 28:1-14)
1“/Cuarɛ rɔ täth kuth ti jiäk kiɛ ri̱ekni kiɛ yi̱kni ti cia cuɔ̱ŋ, kä /cuarɛ rɔ moc pääm ti palɛ, kɛ ɣöö ɛ ɣän Kuoth Nhial Kuothdun. 2Tiɛtdɛ cäŋ lɔŋädä kä luɔ̱thɛ luak palädä. Ɛ ɣän Kuoth Nhial.
3“Kä mi guur yɛn ruaacnikä kä luɔ̱thɛ ŋuɔ̱tkä kä lät yɛn kɛ, 4ɣän bä yɛ ka̱m nhiaal kɛ päth kɛ, kä bi mun kuaykɛ rëp kä bi jiɛɛn ka̱a̱ni dɛykiɛn kuir. 5Bi bɛlkun do̱ny mäni gua̱th ŋër bɛɛl, kä bia kɛ ŋër amäni gua̱th pi̱thä, kä bia riäŋ kɛ mi̱th, kä bia cieŋ kɛ mal wi̱cdun. 6Kä bä piny moc kɛ mal, kä bia tɔ̱ɔ̱c muundun, a thil mi dual kɛ yɛ. Kä bä le̱y tin jiäk woc muundun, kä bɛ thil ko̱r mi bi ben kɛ wecdun. 7Kä bia ji̱ tɛ̈run joc, kä bikɛ li̱w kɛ mut nhiamdun. 8Bi nɛy da̱ŋ dhieec nɛy ti kuɔ̱r joc kä yɛ, kä bi nɛy ti kuɔ̱r nɛy ti bathdɔɔri da̱ŋ wäl joc, kɛn ji̱ tɛ̈run bikɛ li̱w kɛ mut nhiamdun. 9Ɣän bä yɛ poth bia tekɛ gaat ti ŋuan, kä bä mat ruacdä kɛ yɛ jak kä thuɔ̱k. 10Kä bia cam ni tëë ci jäny gua̱th tɔ̱wä, kä bia tëë wal woc kɛ ɣöö bia gua̱th jek kɛ kui̱ kä tin pay ciɛk. 11Ɣän bä cieŋ rɛydun, /cä bi met na̱n kɛ yɛ. 12Ɣän bä tekɛ kɛ yɛ, kä ba̱a̱ Kuothdun, kä bi yɛn a nɛɛkä. 13Ɛ ɣän Kuoth Nhial Kuothdun, mëë käm yɛ raar muun I-jëp, kɛ ɣöö /ci yɛn bia̱ ja̱a̱ŋkiɛn, kɛ ɣöö cä buɔ̱m lätni tin dɛ̈ckɛ yɛ lony kä cä yɛ jak kä jäl kɛ ciökun.”
Duäc nɛɛni ti thil luth
(Ŋuɔ̱t 28:15-68)
14“Kuɛ la ɣöö mi /ci yɛn ruacdä bi liŋ, kä /ci yɛn lueek ti diaal ɛ ti bi la̱t, 15mi /cia ciɛŋkä bi tit, kä /cia ŋuɔ̱tkä bi luɔ̱th, kä cia lueekä bi la̱t kɛn diaal, ku yɛn lɛ töl ni mat ruacdä, 16ɣän bä nɛmɛ lät kä yɛ. Ɣän bä yɛ moc kɛ da̱k, bä yɛ moc kɛ lëth pua̱ny mi yär wäŋ kä jak tëk kä bɛ̈c. Kä bia ka̱a̱kun pith kɛ kuay, kɛ ɣöö ba kɛ cam ɛ ji̱ tɛ̈run, 17kä bä waŋ lɔacdä luɔc yɛ, kä ba yɛ däk kɛ ji̱ tɛ̈run. Kä kɛn nɛy tɔ̱ ca yɛ däk tɔ̱ ba yɛ ruac ɛ kɛn, kɛ dual bia rɔ a barɛ kä thilɛ ram mi joc yɛ. 18Kä mi ŋot yɛn a /cia ruacdä liŋ, ɣän bä duäcdun rëp ni kä bärɔw, 19kä bä buɔ̱mdun jak kä thil luɔt kä bä pua̱r jak kä ce̱tnikɛ yiëth kä yɛ, kä bi piny ce̱tnikɛ päm, 20kä bi buɔ̱mdun thuk ni ka̱a̱nikun, kɛ ɣöö /ci kɛ bi ciɛk, kä ci jiɛɛn dɛykiɛn bi kuir.
21“Kä mi /cia jäl kɛ kɛ ɣä, kä /cia ruacdä liŋ, bä rëp ni duäcdun, kä bärɔw ce̱tkɛ ŋuan dueerikiɛn. 22Kä bä le̱y ti jiäk luɔny rɛydun, tin ba gaatkun näk, kä ba ɣɔ̱ɔ̱kun cam kä bi duɔth ni pëk mi tɔt kä yɛ, kä bi dupkun te baaŋ.
23“Kä kɛn duäc ɛmɛ mi bia ŋot a /cia rɔ rit ɣä, ku yɛn lɛ thɛr ni ɣä, 24inɔ bä ɣän bä yɛ thɛr bä, a bɛc bä yɛ duäc ni kä bärɔw kɛ kui̱ dueerikun. 25Kä bä yɛ nöŋ mut, mi bi yɛ thuk kɛ ɣöö cia mat ruacdan töl, kä mi bia rɔ dol rɛy wi̱i̱nikun, bä jua̱th kɛ thil wal jäk kä rɛydun. Bia cu pɛn te̱tni gua̱n tɛ̈run. 26Kä ɣän mi wa̱a̱ mi̱thdun wä ŋok, bi män da̱ŋ wäl thaal kɛ mac kɛl, kä ba mi̱ethdun luɔc yɛ kɛ tuɔ̱k, bia cam, kä /cia bi riäŋ.
27“Kä mi bia ŋot a /cia ɣä bi liŋ, a thɛr yɛn ni ɣä, 28ɣän bä yɛ thɛr kɛ gakdä bä, kɛ kui̱ dueerikun bä yɛ duäc ni kä bärɔw. 29Bia cam ni ri̱ŋ gankun, kɛnɛ ri̱ŋ nyieetkun. 30Ɣän bä gua̱th palikun däk wuɔ̱thni päämni, kä bä yi̱kni walkun thia̱y piny, kä bä pua̱nykun yuɔr pua̱nyni kuthnikun, kä bi yiëëdä yɛ cany. 31Kä bä wi̱i̱kun däk, bä lueekkun jak kä thil luɔt, kä /cä tɛth lɔacdun bi lɛ guic. 32Kä bä mundun däk, a bi ji̱ tɛ̈run tin cieŋ thi̱n ga̱a̱c kɛ däkdɛ. 33Kä bä yɛ riaw rɛy döri, kä bä mut jäk kä kɔɔrun, kä bi mundun thil raan, bi ti̱eckun a baŋ.
34“Kä bi mun lɔ̱ɔ̱ŋ kɛ ta̱a̱dɛ baaŋ, kam in ta̱yɛ muun ji̱ tɛ̈run, bi mun lɔ̱ɔ̱ lɔ̱ɔ̱ŋ. 35Min tëë baaŋ ɛn mun bɛ lɔ̱ɔ̱ŋ, lɔ̱a̱ŋ in /cia dëë ka̱m jɛ mëë cieŋ yɛn thi̱n. 36Kä kɛ kui̱ nɛɛni tin ci duɔth kä yɛ, bä dual jäk kä lo̱cnikiɛn rɛy muɔn ji̱ tɛ̈riɛn, kä bi ji̱th jiaath kɛ jak kä dual a bikɛ rɔ bar ce̱tkɛ ram bar rɔ kɛ ko̱r, kä bikɛ tëth kä thilɛ mi joc kɛ. 37Kä bi ramɔ tɛth jɔk raamɔ ce̱tkɛ mi le̱ny yɛn ni ko̱r, kä thilɛ mi joc yɛ, kä thilɛ mi te kɔɔrun, kä bia cu thil buɔ̱m mi cuŋ kɛ yɛ nhiam ji̱ tɛ̈run. 38Kä bia cu riaw rɛy röli, bä yɛ cu bath mun ji̱ tɛ̈run. 39Kä tin ci duɔth kä yɛ bikɛ riaw mun ji̱ tɛ̈riɛn kɛ kui̱ dueerikiɛn, kä kɛ kui̱ dueeri gua̱nikiɛn bikɛ riaw.
40“Kä mi ba dueerkiɛn ben lat kɛnɛ dueer gua̱nikiɛn kɛ lo̱k ëë ci kɛn ɛ lo̱k ni ɣä, kɛ thëriɛn kɛ duɔ̱pdä, 41kɛ kui̱ ɛmɔ cä kɛ thɛr kä cä kɛ nööŋ muun ji̱ tɛ̈riɛn, ɛ ni mi ci lo̱ckiɛn ti jiäk rɔ ri̱t kɛ dueerkiɛn 42inɔ bä mat ruacdä tim kamäda kɔnɛ Je-kɔb, kä bä mat ruacdä tim kamäda kɔnɛ Ay-dhɛk, kɛ ma̱t ruacdä kɔnɛ A-bɛ-ram, kä bä mun tim. 43Duundɛ ɣöö bikɛ mun ba̱ny piny, kä bɛ lɔ̱ɔ̱ŋ kam in tëë baaŋ min ci kɛ te thi̱n, kä bikɛ rɔ rit kä dueerkiɛn, kɛ ɣöö ci kɛ lueekä lo̱k, kä ci ti̱eydiɛn ciɛŋkä cany. 44A cäŋ ni mɔ ca jɛn inɔ mɔ, min ŋot kɛ muun ji̱ tɛ̈riɛn, /cä kɛ bi lo̱k kiɛ /cä kɛ bi kon ala ɣöö bäkɛ thum /cä gukdä bi däk kɛ kɛ, kɛ ɣöö ɛ ɣän Kuoth Nhial Kuothdiɛn. 45Kɛ kui̱diɛn, bä gukdä tim kamäda kɔnɛ gua̱ndɔɔŋnikiɛn, tëë ka̱mä raar rööl I-jëp waaŋ nɛɛni kɔ̱kiɛn, kɛ ɣöö bä la Kuothdiɛn. Ɛ ɣän Kuoth Nhial.”
46Ti̱ti̱ kɛ kɛn ciɛŋ kɛ lueek kɛ ŋuɔ̱t tëë ci Kuoth kɛ la̱th kamädɛ kɛnɛ ji̱ I-thɛ-rɛl wi̱i̱ Pa̱a̱m Thi-nay kɛ thok Muthɛ.
Currently Selected:
Liib 26: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
