Liib 25

Bärɔw runi

(Ŋuɔ̱t 15:1-11)

1Cu Kuoth Nhial ruac kɛ Muthɛ wi̱i̱ Pa̱a̱m Thi-nay, 2jiök ni ji̱ I-thɛ-rɛl i̱, “Mi wiaa ben muun ëë cä ka̱m yɛ, kɛ run bärɔw ba päl ala duŋ Kuɔth ɛ /ca pith. 3Kɛ run bäkɛl bia ka̱a̱kun pith, kä kɛ run bäkɛl bi ŋɔa̱a̱rkun ciɛk kä bia kɛ ŋɛ̈r. 4Duundɛ ɣöö kɛ bärɔw runi ba ruɔ̱n lɔŋä muɔn, ɛ ruɔ̱n mi ca lëy Kuoth Nhial, cu ka̱a̱ku pith kä cu ŋɔa̱a̱rku ji̱thkiɛn ŋok. 5Kä /cia tin ciɛk kä rɔ bi ŋɛ̈r ka̱a̱nikun, kä /cia ŋɔa̱a̱r tin /ka̱n ji̱thkiɛn ŋuɔ̱k bi mat, ba ruɔ̱n lɔŋä muɔ̱n. 6A cäŋ /ka̱n mun pith ɛn runä mɔ mɔ bia tekɛ mi camɛ, kɛ kui̱dun kɛ ja̱a̱ŋkun wutni kɛnɛ män kɛ nɛy tin kɔakɛ kɛ tin cieŋ rɛydun. 7Kɛ kui̱ ɣɔ̱ɔ̱ku kɛnɛ le̱y dɔaar tin cieŋ muundun, kɛn ti diaal tin bi ciɛk bikɛn a mi̱th.”

Ruɔ̱n lucä ŋɔaani gua̱th ni kiɛn

8“Kä bia gua̱th bärɔw kuɛnkä run bärɔw, kɛ ɣöö bikɛn a run ti jiɛɛn ŋuaan wi̱cdɛ bä ŋuan. 9Kä bi jɔw kaaŋä jäk kä raar kɛ cäŋ kä wäl kä pay bärɔw, kɛ cäŋ luel bia kaaŋ Kuoth rɛy cieeŋnikun diaal. 10Kä bia ruɔ̱n in jiɛɛn dhieecdiɛn jak kä ruɔ̱n mi gɔaa, kä bi yɛn tin diaal tin ciaŋkɛ mun lony, ba tɛth lɔaac kä yɛ, mi wa ram ɔ wä luɔc nyinäkɛ, kä bi ram ɔ loc dhɔɔrɛ. 11Bi ruɔ̱n in jiɛɛn dhieecdiɛn a ruɔ̱n tɛthkä lɔacdun, ɛn runä mɔ /cia bi pi̱eth, kä /cia tin ci ciɛk kä rɔ bi ŋɛ̈r, kä /cia ŋɔa̱a̱r dɛykiɛn bi mat. 12Kɛ ɣöö ɛ ruɔ̱n lucä ŋɔaani jɔk. Ba mi gɔaa kä yɛ, bia cam ni min ciɛk rɛy ka̱a̱ni.

13“Kɛn ruɔ̱n lucä ŋɔaani jɔk bi ram ɔ loc kä nyinkɛ. 14A mi tëë kɛ mi ci kök gua̱n thiekädu kiɛ ci duɔ̱ɔ̱r kɔk kä jɛ, /cuarɛ gak kɛ rɔ. 15Kɛ run tin guɔɔr kɛ ruɔ̱n lucä ŋɔaani gua̱th ni kiɛn, bi duɔ̱ɔ̱r kɔk kä gua̱n thieekädu, kä kɛ run tin piɛth kɛ ni bɛl, bɛ jɛ kök ji̱. 16Mi ŋuan run bi kökdɛ rëp, kä mi kuiy run bi kökdɛ kuɛ̈ɛ̈, kök kɛ jɛ ji̱ kɛ run pithä bɛɛl. 17/Cuarɛ gak kam ni kun, dualɛ kɛ Kuothdun. Kɛ ɣöö ɛ ɣän Kuoth Nhial Kuothdun.”

Rik bärɔw runi

18“Kɛ ɣöö nɔ bia lat ni ciɛŋkä, kä bia lueekä tit kä bia kɛ la̱t, bia cu cieŋ muun kɛ mal. 19Bi mun dɛykɛ kuir, kä bia ria̱ŋ kɛ mi̱ethkɛ, kä bia cieŋ thi̱n kɛ mal. 20Kä mi wi̱i̱ jɛ wä lar i̱, ‘Ɛŋu mi banɛ cam kɛ run bärɔw, mi /canɛ bi pi̱eth kiɛ /canɛ bɛl bi dol rɛy ka̱a̱ni kɔn?’ 21Ɣän Kuoth bä puɔ̱thdä ka̱m yɛ rɛy runi da̱ŋ bäkɛl, bi mun ciɛk kɛ bɛl kɛ run diɔ̱k. 22Mi wiaa pi̱eth kɛ bädäk runi, bia cam ni bɛl tëë wal, amäni mi ci bɛl bäŋuan runi ciɛk, bia bɛl tëë thaar kulɛ cam. 23Kä /ca mun bi met kɔak, kɛ ɣöö mun ɛ duŋdä, kä kɛ ɣöö kɛ yɛn ja̱a̱l ti cieŋ kɛ ɣä kɛɛl. 24Kä mun min mɔ duŋdu, bi jɛ tit i̱ tëë kɛ gua̱ndɛ.

25“Kä mi dämuɔɔr ɛ can kä cɛ tha̱a̱ŋ nyinäkɛ kɔak, ji̱n gua̱n thiekädɛ bi nyin dämuɔɔr ben kök jɛ. 26Kä mi thilɛ ram mi kök ɛ jɛ, mi /cɛ tekɛ ŋɔak bɛ nyɔk kɛ kök. 27Kä a guic run tëë cɛ kɔk ni jɛ kä bɛ yio̱w ti kɔ̱ŋ yuɔ̱r ram ëë cɛ kök jɛ, kä bɛ cu loc kuakni kɛ. 28Kä mi thilɛ duɔ̱p mi /cɛ jek kɛ ɣöö derɛ nyɔk kɛ kök, bi min cɛ kɔak te tetdä raam min ci jɛ kɔk amäni ruɔ̱n in luɔckɛ ni ŋɔak gua̱th ni kiɛn. Kɛn ruɔ̱n ɛmɔ ba luɔcɛ, kä bɛ cu loc rɛy nyinäkɛ.

29“Mi ci raan duel thuɔp kɔak rɛy rɛ̈ɛ̈k, dërɛ jɛ luɔ̱c jɔk kɛ kɔr runä mi kɔkɛ ni jɛ, kɛ kɔr runä kɛl, tëë cuɔ̱ŋ kɛ ɣöö derɛ jɛ luɔc jɔk. 30Kä mi /kenɛ jɛ luɔc jɔk kɛ kɔr runä, ɛn duel thuɔp ɛ mɔ ba duŋ raam min ci jɛ kɔk, rɛy kuay nikɛ, /ca jɛ bi lony runä min luɔckɛ ni ŋɔak gua̱th ni kiɛn. 31Duundɛ ɣöö duel tin ka̱n la̱t kɛ thop duel rɛy cieŋ ce̱tkɛ kɛ ka̱a̱k wec, dëë kɛ lony, ba kɛ lony runä tɛthkä lɔaac. 32Inɔ bä bi ji̱ Lii-bay tekɛ cuɔ̱ŋ kɛ luuc duëlikiɛn jɔk, ti̱ec tin te rɛ̈ɛ̈kdiɛn. 33Kä mi ci raan Lii-bay duel kɔak kä cɛ jɛ luäŋ kɛ luuc jɔk, ɛn duel ɛ cɛ kɔak ɔ rɛy rɛ̈ɛ̈kdiɛn ba luɔ̱c jɔk runä tɛthkä lɔaac, kɛ ɣöö duel tin te rɛy wec ji̱ Lii-bay, kɛ ti̱eckiɛn rɛy ji̱ I-thɛ-rɛl. 34Kä muɔn tin te rɛy wecdiɛn ca kɛ bi kɔak, kɛ ɣöö ɛ di̱el muɔndiɛn.”

Ŋua̱l mi ka̱mkɛ can

35“Kä mi dämuɔɔr cia̱ can ɔ, kä cɛ rɔ luäŋ ce̱tkɛ ji̱, lät ni jɛ, ce̱tkɛ ram mi guä kiɛ ram mi cieŋ kɛ kɛ ji̱. 36Cu duɔ̱ɔ̱r kän kä jɛ kiɛ cuɛ mac, duali kɛ Kuothdu, kɛ ɣöö bi dämuɔɔr cieŋ kɛ ji̱ kɛɛl. 37/Cu jɛ ŋuäl yio̱o̱ku kɛ bikɛ rëp, kä /cu jɛ käm mi̱ethdu kɛ bi duɔ̱ɔ̱r jek thi̱n. 38Ɛ ɣän Kuoth Nhial Kuothdu, mëë käm yɛ raar muun I-jëp kä käm yɛ mun Kɛ-naan, kɛ ɣöö ba̱a̱ Kuothdun.”

Luɔ̱ny ja̱a̱ŋni

39“Kä mi ci dämuɔɔr ɛ can gekädu, kä cɛ rɔ kök ji̱, /cu jɛ jak kä lät ce̱tkɛ läät. 40Bɛ tekɛ kɛ ji̱ ce̱tkɛ ram kɔki ni jɛ kiɛ cieŋ kɛ ji̱ kɛɛl. Bɛ lät kɛ kɛ ji̱ mäni ruɔ̱n tɛthkä lɔaac. 41Ɛnɔ bɛ cu jiɛɛn kä ji̱, jɛn kɛnɛ gaatkɛ, bɛ cu loc dhɔrɛ, wi̱i̱ panɔmä gua̱n bɛ loc thi̱n. 42Kɛ ɣöö kɛ ja̱a̱ŋ Kuɔth Nhial, tëë kämɛ raar rööl I-jëp, ca kɛ bi kɔk ala ja̱a̱ŋ. 43Kä /cu jɛ ruac kɛ ko̱r, luthni Kuothdu. 44Kä ja̱a̱ŋku tɔ̱ tëë ji̱ tɔ̱ wutni kiɛ män, deri ja̱ŋ wutdä kiɛ ciek kɔk kä nɛy tɔ̱ te thieekädu tɔ. 45Deri kɔk kɛ ja̱ŋ rɛy nɛɛni tɔ̱ guä tɔ̱ cieŋ kɛ ji̱ kɛ tɔ̱ kɛ ji̱ dho̱rikiɛn tɔ̱ tekɛ kɛ ji̱ tɔ, tɔ̱ dapkɛ muundu tɔ, dëë cukɛ a nyinku. 46Deri kɛ ba̱ny gaatku, ala nyinkiɛn ti do̱raar, deri kɛ lɛl ala ja̱a̱ŋ, kä ci gaat muɔr ni ji̱ I-thɛ-rɛl bi ruac, kɛl kɛ̈ɛ̈li, kɛ buɔ̱m.

47“Mi ɛ ram mi guä kiɛ ram min cieŋ kɛ yɛ ci riäŋ ɔ, kä ci dämuɔɔr ɛ can kä cɛ rɔ kök ram mi guä kiɛ ram min cieŋ kɛ yɛ, kiɛ raan dhɔaar nɛɛni ti guä. 48Dëë nyɔk kɛ mi kɔak kɛ jɛ, dëë ram kɛl kä gaat man ɛ nyɔk kɛ kök, 49kiɛ gua̱nlendɛ kiɛ gat waydɛ derɛ jɛ kɔk, kiɛ ram kɛl kä ji̱ dhɔaariɛn, kiɛ mi cɛ tëë ŋɔak derɛ rɔ kɔk kä rɔaadɛ. 50Kä bɛ ruac kɛ ram mi ci jɛ kɔk nikɛ ruɔ̱n ëë kɔkɛ ni rɔ amäni ruɔ̱n tɛthkä lɔaac, bɛ pëk yio̱o̱ni tin kɔkɛ ni rɔ a pëk runi, kɛ ruɔ̱n ëë tëë jɛ kä ram ëë kɔk jɛ bɛ thöp ala pëk raam mi läät. 51Mi ŋot run kɛ ŋuan, ce̱tkɛ min ci kɛn ɛ lat bɛ yio̱w tëë ca kɔk ni jɛ thöp ala yio̱w ti lonyɛ ni rɔ. 52Kä mi ci run kuɛ̈ɛ̈ a ci thia̱k ni ruɔ̱n lucä ŋɔaani gua̱th ni kiɛn, bɛ ruac kɛ ram ëë kɔk jɛ, kɛ pëk runi te ci lät kɛ jɛ bɛ kɛ thöp ala ti luɛlɛ ni rɔ. 53Kä mi ɛ ja̱ŋ mi lät ruɔ̱n kɛ ruɔ̱n bɛ tekɛ jɛ kɛɛl, a /cɛ ruac kɛ buɔ̱m nhiamdu. 54Kä mi /kenɛ rɔ luɛl kɛn dup ɛ tɔ, ba lony runä lucä ŋɔaani gua̱th ni kiɛn, jɛn kɛnɛ gaatkɛ kɛɛl. 55Kɛ ɣöö ji̱ I-thɛ-rɛl kɛ ja̱a̱ŋ kä, kɛ ja̱a̱ŋ kä tëë ka̱mä raar rööl I-jëp. Ɛ ɣän Kuoth Nhial Kuothdun.”

Currently Selected:

Liib 25: nusNHB

Highlight

Copy

Compare