Liib 23

Ni̱n ŋarä lɔ̱ŋä ji̱ I-thɛ-rɛl

1Cu Kuoth ruac kɛ Muthɛ, 2i̱ jiök ni ji̱ I-thɛ-rɛl i̱, “Ti̱ti̱ kɛ kɛn ni̱n ŋarä lɔ̱ŋä Kuɔth tin ca lat, kɛn ni̱n ŋarä lɔŋädä kɛn ti̱n. 3Ta̱yɛ kɛ ni̱n bäkɛl ti bia lät thi̱n, bärɔw ni̱ni ɛ cäŋ lɔŋä, ɛ cäŋ dolä palä. Thilɛ la̱t mi ba la̱t thi̱n, ɛ cäŋ lɔŋä Kuɔth gua̱a̱th ciɛŋädun.”

Cäŋ bälä kɛnɛ juray mi thil thuɔp

(Kuen 28:16-25)

4“Ti̱ti̱ kɛ kɛn ni̱n mi̱eth ti̱mä Kuɔth, duɔl palä, min bia cɔl kɛ cäŋ in ca rialikä kɛ kui̱diɛn. 5Kɛ thiaŋ, kɛ cäŋ kä wäl ŋuaan kä pay in jio̱liɛn ɛ cäŋ bälä Kuɔth. 6Kɛ cäŋ kä wäl dhieec kä pay ɛmɔ, ɛ cäŋ mi̱eth mi thil thuɔp, kɛ ni̱n bärɔw bia cam ni mi̱th ti thil thuɔp. 7Kɛ cäŋ in nhiamdiɛn bia rɔ dol kɛ pal, thilɛ la̱t mi bia la̱t. 8Bia Kuoth Nhial thöp muc ti waaŋ kɛ ni̱n bärɔw. Kɛ cäŋ in bärɔwdiɛn bia rɔ dol kɛ pal, kä thilɛ la̱t mi bia la̱t.”

Dɛy tin nhiam

9Kä cu Kuoth Nhial ruac kɛ Muthɛ, 10jiök ni ji̱ I-thɛ-rɛl i̱, “Mi wiaa ben muun in cä ka̱m yɛ kä cia bɛl kɛ ŋɛ̈r, nöŋɛ bööth palä yien kä wuɔ̱th bɛɛlkun tin nhiam, 11bɛ yien ɛmɔ ben ŋuëŋ Kuoth Nhial, dɔ̱ɔ̱ dëë yɛn nhök jek. Kä kɛ bakdɛ kɛ kɔr ca̱ŋ lɔŋä bi bööth palä jɛ ben ŋuaŋ. 12Kɛ cäŋ in ŋuaŋi ni yien, bi ruath ro̱mä mi gur kɛl mi thil diw thöp Kuoth Nhial ala muc mi waŋ. 13Bi dhieec dhieecni nuɔ̱p mi kök kök mi ca lia̱p kɛ liɛɛth thöp kɛ jɛ kɛɛl, mi ba wa̱ŋ Kuoth Nhial, ala ŋuäny mi gɔaa. Kɛ muc mi mathkɛ mi bia̱ ŋuaan ŋuaani thëm kɔaŋ. 14/Cia juray kɛnɛ wac mi ca bul kiɛ tithɛ bi cam mäni mi ci cäŋdɛ ben, kä amäni mi ci muc Kuɔthdu nööŋ. Ba jɛ titni ciaŋ rɛy ri̱cniku diaal tɔ̱ bi ben tɔ̱ gua̱th tɔ̱ bi ciëŋ thi̱n ɔ.”

Ŋar juɔkni ŋër bɛɛl

(Kuen 28:26-31)

15“Kuɛn juɔkni da̱ŋ bärɔw tok ɛ nikɛ cäŋ ëë guur ni cäŋ lɔŋä, cäŋ ëë tho̱pi ni muc ŋueŋä wuɔ̱thni bɛɛlku. 16Kuɛnɛ ni̱n ti jiɛɛn dhieec kɛ cäŋ in guur ni juɔkni da̱ŋ bärɔw. Ɛ jɛn bi muc bɛɛl tin pay ciɛk cu thöp Kuoth Nhial. 17Rɛy duëlikun bi ram ɔ jurayni da̱ŋ rɛw nööŋ ti ba ben ŋuaŋ, kä la̱tkɛ kɛ kɛ ŋuaan ŋuaani tookni nupä mi kök kök kä ba kɛ bul ɛ ca kɛ moc thuɔp, ala muc Kuɔth kä bɛl tin nhiam. 18Kä bi dɛy deet da̱ŋ bärɔw ti gur kɛli ti thil diw thöp kɛ kɛ mi̱th, kɛ ruath tha̱a̱k kɛl, kɛ thääk deet rɛw. Bikɛ la muc ti wa̱ŋkɛ Kuoth Nhial, kɛ kɛ muc bɛɛlkiɛn kɛ muc kɔaŋdiɛn, ɛn muc in waŋkɛ, ɛ ŋuäny mi gɔaa kä Kuoth. 19Bi thäk dɛ̈ɛ̈l böwä thöp ala muc dui̱rä, kɛ rueeth rɔmä da̱ŋ rɛw ti gur kɛli ala muc malä. 20Kä bi bööth palä kɛ ŋuaŋ kɛ kɛ mi̱th bɛɛl tin nhiam ala muc mi ŋuaŋ nhiam Kuɔth, kɛ kɛ rueeth rɔmä da̱ŋ rɛw. Bikɛ la ti gɔw kä Kuoth kɛ kui̱ bööthä palä. 21Kä ɛn cäŋ ɛ mɔ cɔalɛ duɔl palä, kä thilɛ la̱t mi bia la̱t, ɛn nɛmɛ ba tit ɛ kuaykun diaal rɛy ri̱cni tɔ̱ bi ben tɔ.

22“Kä mi wä yɛn ka̱a̱kun wä ŋɛ̈r, /cuarɛ kɛ ŋɛ̈r mäni gëëkiɛn, kä /cuarɛ ruecni nyɔk kɛ ŋër, ba̱nyɛ kɛ nɛy tin can kɛnɛ rööl. Ɛ ɣän Kuoth Nhial Kuothdu.”

Cäŋ ŋarä tuk runä

(Kuen 29:1-6)

23Kä cu Kuoth Nhial ruac kɛ Muthɛ, 24jiök ni ji̱ I-thɛ-rɛl i̱, “Kɛ cäŋ in jio̱liɛn kä pay in bärɔwdiɛn, ba cäŋ lɔŋä mi ca poth mi tiɛmɛ ni kaaŋ, cäŋ dolä mi gɔaa. 25Thilɛ la̱t mi bia la̱t. Kä bia muc mi waŋkɛ thöp Kuoth Nhial.”

Cäŋ Luel

(Kuen 29:7-11)

26Kä cu Kuoth Nhial Muthɛ jiök, 27“Cäŋ kä wäl kä pay bärɔw ɛmɛ ɛ cäŋ luel, ba gua̱th kɛ duɔlun in gɔaa, kä bia rɔ jay kä thöpɛ muc ti wa̱a̱ŋkɛ Kuoth Nhial. 28Kä thilɛ la̱t mi bia la̱t kɛn cäŋ ɛmɔ, kɛ ɣöö ɛ cäŋ luel, min ba luɛɛlni yɛ nhiam Kuɔth Nhial Kuothdun. 29Kä ram mi wä tey a /cɛ rɔ jay ɛn cäŋ ɔ ba jɛ tuɔ̱k raar rɛy nɛɛnikɛ. 30Kä ram mi wä la̱t wä la̱t ɛn cäŋ ɛmɔ, ɛn ram ɛmɔ bä jɛ tuɔ̱k raar rɛy nɛɛnikɛ. 31Thilɛ la̱t mi bia la̱t. Ɛ ŋuɔ̱t kä kuayku diaal gua̱th ciɛŋädiɛn. 32Bɛ la cäŋ lɔŋädun, mi bia rɔ jay thi̱n. Kɛ thiaŋ kɛ cäŋ kä bäŋuan kä pay bärɔw, kɛn thiaŋɔ amäni cäŋ in dɔ̱diɛn kɛ thiaŋ bia tit, ɛ cäŋ lɔŋädun.”

Cäŋ ŋarä bi̱lɛkä

(Kuen 29:12-40)

33Kä cu Kuoth Nhial ruac kɛ Muthɛ, 34jiök ni ji̱ I-thɛ-rɛl i̱, “Kɛ cäŋ kä wäl dhieec kä pay bärɔw ɛ jɛn cäŋ in ba tok ni ti̱em bilɛni kɛ ni̱n bärɔw. 35Kä cäŋ in jio̱liɛn ɛ cäŋ dolä, thilɛ la̱t mi bia la̱t. 36Kɛ ni̱n bärɔw bia muc ti waaŋ thöp Kuoth Nhial. Kɛ bädäk ni̱ni bia duɔl in gɔaa cɔl kä bia muc mi waŋ thöp Kuoth Nhial, ɛ cäŋ dolä palä. Thilɛ la̱t mi bia̱ la̱t.

37“Ti̱ti̱ kɛ ni̱n ti̱mä tin ca mɛk ɛ Kuoth Nhial, min bia cɔl i̱ cäŋ dolä palä, min thöpkɛ Kuoth Nhial muc mi̱eth, tin waŋkɛ kɛnɛ muc bɛɛl, luuri kɛnɛ muc kɔaŋ, bi mɔ tekɛ cäŋdɛ. 38Kɛ ti bia mat mucni ca̱ŋ lɔŋä Kuɔth Nhial, kɛ cäŋ mucniku, cäŋ in tho̱pi ni luuriku diaal, kɛnɛ muc tɛthkä lɔacdu diaal, tin tho̱pi Kuoth Nhial.

39“Kɛ cäŋ kä wäl dhieec kä pay bärɔw, mi wiaa bɛl kakä wä ŋɛ̈r, bia muc ti̱mä Kuɔth la̱t kɛ ni̱n bärɔw, kɛ cäŋ in jio̱liɛn ba cäŋ lɔŋä, kä kɛ bädäk ni̱ni ba cäŋ lɔŋä bä. 40Kä kɛ cäŋ in jio̱liɛn bia dɛy jiɛɛn tin gɔw ni kɛn ka̱n, kar thɔ̱w kathuɔ̱m. Kɛ kar kan, kɛ tɔaar. Kä bia ŋar kɛ ni̱n bärɔw nhiam Kuɔth Nhial Kuothdun. 41Kä bi yɛn a lät ɛn cäŋ ti̱mä Kuɔth ɛmɛ kä bärɔw kɛ ruɔ̱n. Ɛ ŋuɔ̱t kä kuaykun diaal, bi yɛn a lät kɛ pay bärɔw. 42Bia ciɛŋ ni bilɛni kɛ ni̱n bärɔw, kɛn gaat I-thɛ-rɛl diaal. 43Ɛ ba ŋa̱c ɛ kuaykun diaal i̱ cä ji̱ I-thɛ-rɛl jak kä cieŋ rɛy bilɛni mi ka̱mä kɛ raar muun I-jëp. Ɛ ɣän Kuoth Nhial Kuothdun.”

44Kɛn duɔ̱p ɛmɔ cu Muthɛ ji̱ I-thɛ-rɛl la̱r ni̱n ti̱mä ŋarä Kuɔth Nhial.

Currently Selected:

Liib 23: nusNHB

Highlight

Copy

Compare