Liib 2
2
Muc bɛɛl
1“Mi wä raan mucdɛ wä nööŋ nhiam Kuɔth Nhial ala muc bɛɛl, bamuc bɛɛl ti gɔw kä bɛ jɛ kɔn ɣɔ̱l ala nup, kä bɛ jɛ wuɔ̱c liɛɛth kɛnɛ wal ti kuɔ̱r kuɔ̱ɔ̱r. 2Kä a nöŋɛ gaat Ä-ron tin la bööth palä, kä bi bööth palä min lät la̱t tëtdɛ thiäŋ kä nup ɛmɔ kɛnɛ liɛɛthdɛ amäni wälɛ kɛɛliw, kä bɛ jɛ waŋ wi̱i̱ yi̱kä, kä bä muc tiɛm kɛ ɣöö ca kɔn wa̱ŋ Kuoth Nhial. Kä ɛn miɛl mi̱eth ɛmɛ ba ŋuäny mi gɔaa mi tɛth lɔc Kuoth Nhial. 3Kä ɛn duɔth mucä bɛɛl ɛmɔ ɛ duŋ bööthni palä, kä rɛl gɔɔydɛ rɔ kɛ ɣöö ɛ duɔth kä min ca wa̱ŋ Kuoth Nhial.
4“Kä mi wec nööŋ ni muc nuɔ̱p mi ca bul, bɛ la nup mi gɔaa mi /ka̱n läny kɛ thuɔp, kä ca lia̱a̱p kɛ liɛɛth, kiɛ pat patni ti ca wi̱cdiɛn caw kɛ liɛɛth. 5Kä mi wä mucdu a pat pat mi ca thal kɛ thac, ala nup mi kök kök mi ca lia̱a̱p kɛ liɛɛth /kä thilɛ jɛ thuɔp. 6Puny ni jɛ kä wucni jɛ liɛɛth ala muc nuɔ̱p. 7Kä mi mucdu ɛ pat pat mi ca thal kɛ thak, ala nup mi gɔaa mi ca moc kɛ liɛɛth. 8Bi jɛ nööŋ ɛn muc bɛɛl ɛ mɔ ala duŋ Kuɔth Nhial. Kä bi jɛ ka̱m bööth palä min bi jɛ wä naŋ wi̱i̱ yi̱kä. 9Kä bi bööth palä tha̱a̱ŋ mucä mɔmɔ ka̱n, kä bɛ jɛ waŋ wi̱i̱ yi̱kä a tiimɛ jɛ i̱ ɛ mi ca kɔn ka̱m Kuoth Nhial kɛ lidɛ, kä ɛn miɛl mi̱eth ɛ waŋ ɛmɛ, ba mi tɛth lɔc Kuɔth Nhial. 10Kä ɛn tha̱a̱ŋ mucä min ci duɔth, ba duŋ Ä-ron kɛnɛ gaatkɛ. Ɛ mi rɛl gɔɔydɛ rɔ, kɛ ɣöö ɛ duɔth mi̱th mi ca ka̱m Kuoth Nhial.
11“Kä a thil muc bɛɛl mi nöŋɛ Kuoth Nhial mi bamoc thuɔp, kɛ ɣöö thilɛ thuɔp kiɛ liɛɛth tuar mi ba wa̱ŋ Kuoth Nhial ala muc. 12Kä mi bi mucdu a ke̱y bɛɛlku bikɛ nööŋ nhiam Kuɔth Nhial, duundɛ ni ɣöö /ca kɛ bi waŋ wi̱i̱ yi̱kä kɛ kui̱ ŋuänyä mi kurkur. 13Kä bi muc bɛɛlku diaal moc kɛ kadɛ, kɛ ɣöö kadɛ mɔmɔ ɛ jɛn mat, kamädun yɛnɛ Kuoth, kä bi mucku diaal dhil tekɛ kadɛ.
14“Mi wä mucdu kɛ kuoth Nhial a muc keyni bɛɛlku, tho̱pni muaanykiɛn kiɛ mi̱eth mi gua̱r. 15Kä biɛ moc liɛɛth Ɔ-lip kä bi wal tin ŋuäny kur mat thi̱n. 16Kä bi bööth palä tha̱a̱ŋ mi̱eth ɛ mɔ waŋ, kɛ kɛ liɛɛth amäni wäl in ŋuäny kur, ala mi tiɛm, ɛ mi̱eth mi ca ka̱m Kuoth Nhial.”
Currently Selected:
Liib 2: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
