Tuk 49

Puɔth Je-kɔb kɛ gaatkɛ

1Täämɛ cu Je-kɔb gaatkɛ cu ciöl rɔ kä cuɛ wee i̱, “Ruɔlɛ rɔ̱ guäth kɛl kɛ ɣöö bä yɛ ben la̱t tin ba yɛ jek ni̱ni tɔ̱ bëë tɔ̱.

2Nyuɔ̱ɔ̱rɛ bua̱ni kä liɛŋɛ min bä

la̱t yɛ,

lö gaatkä, liɛŋɛ ruacdä.

3“Rɛ-u-ben, ɛ ji̱n kɛ̱̈ɛ̱̈dä pa̱ny

min la nyuth ŋuɛɛtädä,

kä jio̱l kuayni kä tieey dapädä.

Di̱t ni luthdu rɛy gankä,

kä di̱t ni buɔ̱mdu rɛydiɛn.

4Ci ji̱n a lɛny lɛny ce̱tkɛ

pi̱ nyɔac, /ci rɔ bi nyɔk

kɛ di̱t rɛy gankä,

kɛ ɣöö ci män guur ka̱n,

kä inɔ, ci thil luth

kɛ kölkä.

5Cim-on kɛnɛ Lii-bay

ciaaŋdiɛn kɛl.

Kɛn jakɛ kuak lätnikiɛn

kä yio̱w na̱k nath.

6Ɣän /cä ciɛŋ lo̱cnikiɛn bi nyuak

kɛɛl kɛ kɛ,

kiɛ dëë yiëëdä mat

kɛɛl kɛ kɛ,

kɛ ɣöö na̱kɛ naath mi ci

ŋɛ̈ɛ̈nydiɛn ka̱p,

kä muɔckɛ thääkiɛn buɔ̱ɔ̱t

kɛ kui̱ ŋarä.

7Ca kɛ bit kɛ kui̱ ŋɛnynikiɛn

ti jiäk.

Kä bä kɛ da̱k piny rɛy

gan I-thɛ-rɛl.

8“Juda, bi gaatmuɔɔri ji̱ liak,

bi tetdu teni ŋuääk ji̱ tɛ̈ru,

kä bi gaat guur ji̱ goŋ.

9Juda ce̱t ta̱a̱dɛ kɛ lony

mi luny jɔk käk,

mi lɔ̱ŋ tɔ̱ɔ̱cä.

Ɛŋa mi nhɔk kër ɛ ni̱n?

10/Ci kɛɛt kuäärä bi luɛ̈ɛ̈r

tetädɛ,

kiɛ tetdä kuaynikɛ,

amäni mi wä gua̱ndɛ ben,

kä bi döör diaal jɛ cu luɔ̱th.

11Jɛn bɛ muulɛ yian kaarä jiaath

in gɔaa ni jɛn,

kä bɛ bieynikɛ lak kɛ kɔaŋ

dɛɛni wal.

12Bi nyinkɛ tiɛth ɛ cuät

kɛ ma̱th kɔŋä,

kä bi lɛckɛ buɔy ɛpak

kɛ ma̱th caak.

13“Dhɛ-bu-lun bɛ cieŋ ni

taŋ yiëër.

Bi dhɔrɛ a gua̱a̱th

yi̱enä babuuri,

kä bi ke̱y dhɔaarɛ räth

ni Dhi-don.

14“Yi-tha-kar ɛ ni kɛnɛ muul

mi tɔ̱ɔ̱c ɛ cuat kamä kɔamni

nyuurä gua̱ndɛ.

15Kä mi wëë gua̱a̱th nyuurä

mi gɔaa jek,

inɔ bɛ ka̱p kä ti thiɛk

cu nhɔk,

kä bɛ cu la kuany.

16“Daan bɛ nɛɛkɛ ruac ala do̱r

kɛl rɛy dööri gan I-thɛ-rɛl.

17Jɛn bi ta̱a̱dɛ ce̱tkɛ thɔ̱l mi päth

naath duɔ̱pni,

mi käc jio̱o̱k tuɔ̱ruɔ̱k ciökni,

a ba ji̱kiɛn cu yuɔr

nikɛ jɔak.

18“Guɛcä ni cäŋ in bi kään ni ɣä,

lö Kuoth Nhial.

19“Gad ba jɛ la makɛ piny ɛ ma̱a̱c,

kä jɛn bɛ kɛ joc kɛ jɔak.

20“Mun A-cɛr bi mi̱thkɛ lim,

kä luɔtkɛ rɔ̱ kɛ mi̱th kua̱ri.

21“Nap-ta-li ɛ ni kɛnɛ nac kɛwä

mi jääl ɣɔw,

mi die̱e̱th ni dɛy

ti puath puaath.

22“Jo-thɛp ce̱tdɛ kɛ jiath

mi läk läk mi ci piith

gekä lo̱o̱lä,

kä ci karkɛ läk puɔ̱ɔ̱ny kal.

23Ci ji̱ tɛ̈rɛ jɛ moc riɛk,

kä cikɛ jɛ yiɛth kä ca̱a̱r

kɛ kui̱n kui̱n,

a görkɛ ni dhi̱el ɛ.

24Kä kui̱n kui̱ndɛ /ke̱nɛ me̱t

bath piny,

kä /ke̱nɛ tetdɛ lath,

kɛ ɣöö ca jɛ luäk kɛ lua̱ŋ bumä

Kuɔth Je-kɔb,

min mɔ yiëën de̱e̱t in la gääŋ

gan I-thɛ-rɛl.

25Jɛn Kuoth in le̱ny buɔ̱mdɛ

ti diaal,

in la Kuoth guur min

la guic ji̱ kä poth ji̱,

kɛ puɔ̱th mi bëë ni puɔ̱rä kɛnɛ puɔ̱th

pi̱i̱ni mi päl raar ni piny i̱,

puɔ̱th di̱ethä gan

ti puɔl pua̱nykiɛn.

26Jɛn puɔ̱th in käm guur ɛ ji̱

le̱e̱nyɛ puɔ̱th ëë ci

guurdɔɔŋni ɛ ka̱m jɛ,

kä räthɛ gua̱thni diaal.

A puɔ̱th ɛmɛ tekɛ Jo-thɛp,

jɛn ram in ca lɛ̈y go̱lä

rɛy ganmani.

27“Ben-ya-min ɛ ni kɛnɛ yak

mi dar dar,

mi cam min cɛ kak bakä,

kä dääkɛ naath kä tin cɛ

ma̱a̱c konyä ca̱ŋ.”

28Tɔ̱tɔ̱ diaal kɛ kɛn döör gan I-thɛ-rɛl da̱ŋ wäl rɛw, kä tɔ̱tɔ̱ kɛ kɛn rieet tëë ci gua̱ndiɛn kɛ la̱t kɛ mëë mocɛ ramɔ rieet puthä tin luɔtkɛ rɔ̱ kɛ jɛ.

Lia̱a̱ Je-kɔb kɛnɛ kuɔ̱nydɛ

29Kɛ kɔr kä tɔ̱tɔ̱ cu Je-kɔb kɛ la̱t rieet ti̱ti̱, wëë i̱, “Ci thia̱k ni ɣöö bä li̱w, mi wa̱a̱ wä li̱w kuɛɛ ri̱i̱ŋdä naŋ kä wiaa kuɔnyɛ jɛ gekä gua̱a̱dɔɔŋni rɛy kɔ̱a̱k in te muun in te kakä Ɛp-rɔn raan Ɣɛ̈th. 30Jɛn kɔa̱a̱k in te kä Mak-pe-la gekä Ma-mɛ-ri kä Kɛ-naan, muun ëë ci A-bɛ-ram ɛ kɔk kä Ɛp-rɔn ala gua̱a̱th kunyä. 31Jɛn gua̱a̱th ëë ca A-bɛ-ram kɛnɛ ciekdɛ ni Thara kony thi̱n, kä gua̱a̱th ëë ca Ay-dhɛk kɛnɛ ciekdɛ ni Rɛ-bɛ-ka kony thi̱n. Cä Leya lɛni kony ɛn wani bä. 32Ɛn kak kɛnɛ kɔa̱a̱kdɛ min te rɛydɛ, kɔakɛ kɛ kä ji̱ Ɣɛ̈th.”

33Mëë ci Je-kɔb gaatkɛ thuk kɛ lät rieet tɔ̱tɔ̱, cuɛ rɔ can kölikɛ. Inɔ cuɛ cu muɔn kä cuɛ cua̱ lia̱a̱dɛ.

Currently Selected:

Tuk 49: nusNHB

Highlight

Copy

Compare