Ɣöth 7

1Kä cu Kuoth Nhial jɛ jiök i̱, “Guic ɛ, ɣän ci jak kä ce̱tkɛ Kuoth kä Pɛro. Bä dämuɔɔr ni Ä-ron ku lɛ jak kä ce̱tkɛ thokdu. 2Bi ti diaal ti cä guɔ̱k ji̱ lat, kä bi dämuɔɔr ni Ä-ron ruac ku la gäm Pɛro i̱ bɛ ji̱ I-thɛ-rɛl jak kä wëë raar muundɛ. 3Kä ɣän bä lɔc Pɛro jak kä bum kɛ ɣöö bä nyuuthni kɛnɛ lätkä ti ga̱ykɛ naath re̱p ro̱o̱l I-jëp. 4Kä /ci Pɛro ruacdun bi liŋ. Kä ɣän bä ji̱ I-jëp yi̱ek piny kɛ tetdä, ɣän bä bun nɛɛnikä ni ji̱ I-thɛ-rɛl no̱o̱ŋ raar muun I-jëp kɛ luk mi di̱i̱t. 5Bi ji̱ I-jëp ɛ ku lɛ ŋa̱c i̱ ɛ ɣän Kuoth Nhial mi wa̱a̱ tetdä riɛny kä kɛ, kä bä ji̱ I-thɛ-rɛl ka̱m raar rɛydiɛn.” 6Cu Muthɛ kɛnɛ Ä-ron la̱t niɛ nɔ. Cukɛ jɛ la̱t ni kɛ jɛn duɔ̱ɔ̱p in ci Kuoth Nhial jɛ la̱r kɛ. 7Täämɛ kɛ gua̱a̱th ëë ruac Muthɛ kɛnɛ Ä-ron kɛ Pɛro, Muthɛ ɛn wan ɔ runkɛ jiɛn bädäk, kä te Ä-ron kɛ jiɛn bädäk wi̱cdɛ diɔ̱k.

Kɛɛt Ä-ron mi locrɔ Thɔ̱l

8Ɛn wa̱nɔ, cu Kuoth Nhial Muthɛ kɛnɛ Ä-ron jiök i̱, 9“Mi wä Pɛro ruac kɛ yɛ i̱ nyuɔ̱thɛ ɣä buɔ̱mdun kɛ la̱t mi gääy naath, ji̱n Muthɛ ku Ä-ron jiök i̱, ‘Käni kɛɛtdu mi go̱o̱ŋ ɛmɛ kä yori jɛ piny nhiam Pɛro kɛ ɣöö bɛ rɔɔdɛ loc thɔ̱l.’ ” 10Cu Muthɛ kɛnɛ Ä-ron cu wä kä Pɛro, cukɛ wä lät ni kɛ jɛn pe̱k in ci Kuoth Nhial jɛ la̱t kɛ. Cu Ä-ron kɛɛtdɛ min go̱o̱ŋ indaan yuɔr piny nhiam Pɛro kɛnɛ la̱a̱tkɛ, cuɛ rɔɔdɛ loc ni thɔ̱l. 11Cu Pɛro nɛɛkɛ tin pɛl pɛɛl kɛnɛ ti̱tkɛ cɔl. Kä cu ti̱t ji̱ I-jëp ɛ la̱t inɔ bä kɛ ca̱a̱p ti̱i̱tädiɛn. 12Cu kɛn diaal kɛtnikiɛn tin göŋni yuɔr piny, cukɛ rɔ̱ looc ni thɔ̱ɔ̱l, kä cu kɛɛt Ä-ron in go̱o̱ŋ kɛtnikiɛn roc. 13Kä cu Pɛro wi̱cdɛ buɔ̱m. /Kenɛ ruacdiɛn liŋ ni kɛ mëë ci Kuoth Nhial jɛ kɔŋ lar.

Rik tëë ci pɛ̈ɛ̈n kä I-jëp

1. Riɛk Riɛm

14Cu Kuoth Nhial Muthɛ jiök i̱, “Ci lɔc Pɛro buɔ̱m, lo̱kɛ ɣöö jiɛy naath. 15Kua wä kä Pɛro kɛ runwaŋ gua̱a̱th in la wä kɛ jɛ thok yiëër, käni jɛn kɛɛt ëë ci rɔɔdɛ looc thɔ̱l, wiaa liɛpɛ Pɛro cuŋä wi̱i̱ kiɛɛr. 16Jio̱kni jɛ i̱, ‘Ci Kuoth Nhial Kuoth ji̱ Ɣi-bɛ-ru ɣä jäk kä ji̱, A nɛɛkä wa ɣä pal rɛy dɔaar. Kä ŋotdi ci ruacdɛ liŋ. 17Täämɛ, biɛ ŋa̱c i̱ ɛ ɣän Kuoth Nhial kɛ nɛmɛ, nɛn ɛ, ɣän bä pi̱ tɔ̱ te kiir tɔ̱ yɔ̱t kɛ kɛɛt ɛ te te̱tädä mi, kä bi pi̱ rɔ̱ looc ni riɛm. 18Bi rɛc tɔ̱ te kiir tɔ̱ li̱w. Bi kir cu ŋuɔ̱th, kä bi ji̱ I-jëp ma̱th pi̱i̱ni kiɛɛr cany.’ ”

19Cu Kuoth Nhial Muthɛ ku jiök i̱, “Jio̱kni Ä-ron i̱, ‘Käni kɛɛtdu kä rinyni jɛ wi̱i̱ pi̱i̱ni ji̱ I-jëp, wi̱i̱ yiëri, wi̱i̱ liɛli kä wi̱i̱ puɔ̱li, kɛnɛ bar kɛ wa̱a̱t amäni gua̱th pi̱i̱nikiɛn diaal. Bikɛ la riɛm kɛn diaal. Bi mun I-jëp kɛɛliw a riɛm, amäni dha̱a̱ri pi̱i̱ni kɛnɛ thääk pi̱i̱ni diaal.’ ”

20Cu Muthɛ kɛnɛ Ä-ron la̱t ni min ca guɔ̱k kɛ ɛ Kuoth Nhial nhiam Pɛro kɛnɛ nhiam nɛɛnikɛ, cuɛ kɛɛt kap nhial, cuɛ pi̱ kiɛɛr yɔ̱t, kä cukɛ a riɛm. 21Cu rɛc kiɛɛr li̱w. Cu yi̱er ŋuɔ̱th ɛlɔ̱ŋ, cu ji̱ I-jëp thil gua̱a̱th mi jëkɛ pi̱ ma̱th thi̱n. Cu pi̱ rööl I-jëp kɛɛliw a riɛm. 22Kä cu ti̱t I-jëp mi ce̱tkɛ nɔmɔ ni la̱t kɛ ca̱a̱pkiɛn. Kä cu wi̱c Pɛro ŋot ni buɔ̱m, /kenɛ Muthɛ kɛnɛ Ä-ron ruacdiɛn liŋ, ni kɛ pe̱k ëë ci Kuoth Nhial jɛ lar. 23Cu Pɛro rɔɔdɛ woc nhiamdiɛn cuɛ loc due̱e̱l kuäärädɛ, /kenɛ nɔmɔ gul la̱th lɔɔcdɛ. 24Cu ji̱ I-jëp diaal wa̱a̱t tɛt gekä kiɛɛr kɛ kui̱ pi̱i̱ni ti mathkɛ. 25Cu ni̱n bärɔw thuuk kɛ kɔr gua̱th ëë ci Kuoth Nhial pi̱ kiɛr looc ni riɛm.

Currently Selected:

Ɣöth 7: nusNHB

Highlight

Copy

Compare