Ɣöth 35

Ŋuɔ̱t ca̱ŋ lɔ̱ŋä

1Täämɛ cu Muthɛ ji̱ dolä I-thɛ-rɛl diaal cɔal guäth kɛl, cuɛ kɛ jiök i̱, “Tin ci Kuoth Nhial kɛ lar i̱ bia la̱t ti̱n, 2bia lät la̱t kɛ ni̱n bäkɛl, kä kɛ bärɔw ni̱ni bia tekɛ cäŋ lɔ̱ŋä, ala cäŋ mi rɛl rɔ kä Kuoth Nhial. Ram ɔ wä la̱t wä la̱t ɔ ɛn cäŋ ɛmɔ ɔ duundɛ ni ɣöö ba näk. 3Yɛn /cia mac bi dɔp gua̱thni ciɛŋädun diaal kɛ cäŋ lɔ̱ŋä.”

Luuri kɛmɛkä ro̱mä mi rɛl rɔ

(Ɣöth 25:1-9)

4Cu Muthɛ ji̱ dolä I-thɛ-rɛl diaal jiök i̱, “Nɛmɛ ɛ min lar Kuoth Nhial jɛ, 5muɔcɛ rɔ̱ muc ti bia ka̱m Kuoth Nhial nyinäkun. Ram ɔ gɔaa lɔcdɛ mɔ, a jɛ no̱o̱ŋ muc Kuoth Nhial, ala da̱a̱p, kɛ ciek in bo̱r, kɛ ciɛk in yian, 6kɛ bi̱i̱ mi tekɛ biɛl mi yie̱l, kɛ mi mɛr, kɛnɛ mi do̱l kɛ bi̱i̱ mi ca mɛn agɔaa, kɛ bi̱i̱ mi̱em böwni, 7kɛ tuacni rue̱e̱thni de̱e̱t rɔɔmni ti thiääŋ, kɛ tuacni böwni, kɛ jiath thëëp. 8Kɛ liɛɛth lɛmbärä, kɛ wal ti kuɔ̱r kuɔ̱ɔ̱r kɛ kui̱ liɛth yi̱rä kɛnɛ kui̱ wal tin la waŋkɛ wi̱i̱ yi̱kä, 9kɛ guiy ti ca̱a̱r, kɛ guiy kɔ̱kiɛn kɛ kui̱ biey gɔ̱rä ran, kɛnɛ kui̱ biey kath.

Ŋuɔ̱t luaak ro̱mä

(Ɣöth 39:32-43)

10“Kä a wutni diaal tin lua̱ŋkɛ la̱t rɛydun bëë, bikɛ tin diaal tin ci Kuoth Nhial kɛ lar ben la̱t, due̱l ro̱mä, 11kɛmɛ ro̱mä kɛnɛ kuum wecdɛ, kɛ go̱o̱nikɛ, kɛnɛ cuɔ̱ɔ̱ŋkɛ, kɛ bëërkɛ, kɛ thieerkɛ, kɛnɛ thärkɛ tin löckɛ, 12kɛ thanduk kɛnɛ jiɛnkɛ tin kapkɛ ni jɛ, kɛ kuum wecdɛ, kɛ ge̱e̱lɛ, 13kɛ tharbët kɛnɛ jiɛnkɛ tin la kapkɛ jɛ, amäni kuakɛ diaal, kɛ mi̱eth in rɛl rɔ in ka̱mkɛ Kuoth Nhial, 14ŋääp lɛmbärä kɛ kui̱ maac kɛ kuak kɛ diaal, kɛ lɛmbärädɛ kɛɛl kɛnɛ liɛɛthdɛ. 15Kɛ yi̱k wal tin la waŋkɛ, kɛ thieerkɛ, kɛ liɛɛth yi̱rä, kɛnɛ wäl in kur kur min la waŋkɛ, kɛnɛ bi̱i̱ thi̱ek duëël ro̱mä, 16kɛ yi̱k wäŋä luuri, kɛɛl kɛ yieethdɛ min ca tak ce̱tkɛ cambak, kɛ ciɛk in yian, kɛ jiɛnkɛ tin la kapkɛ jɛ, kɛ kuakɛ diaal, kɛ thak la̱k, kɛnɛ tharɛ, 17kɛ bieyni kal, kɛ thieerkɛ, kɛnɛ thärkɛ, kɛ bi̱i̱ thuɔk kal, 18kɛ löc duëël kɛ löc kal kɛnɛ de̱pkɛ, 19kɛ bieyni tin ca tak agɔaa kɛ kui̱ la̱t guäth in rɛl rɔ, bieyni kuoothä ti ɣɛ̈lkɛ rɔ̱ kɛ kui̱ bööth palä ni Ä-ron, kɛnɛ bieyni kuoothä ti gɔw ti ɣɛ̈lkɛ rɔ̱ kɛ kui̱ gankɛ, kɛ kui̱ la̱tdiɛn ala bööth palä.”

No̱o̱ŋ luuri nath

20Cu ji̱ dolä I-thɛ-rɛl diaal ku jiɛn nhiam Muthɛ. 21Cukɛ ben kɛn nɛy diaal tëë ci lo̱ckiɛn tɔ̱tɔ̱ nhɔk kɛnɛ nɛy diaal tëë ci lo̱ckiɛn rɔ̱ jiɛ̈c cuɔ̱ŋ, kä cukɛ muc Kuɔth Nhial no̱o̱ŋ, ba kɛ ben lät ni lät duëël ro̱mä kɛnɛ lät palikɛ diaal, amäni bieyni kuoothä tin ɣɛ̈lkɛ rɔ̱. 22Cu nɛy diaal ku ben, wutni kɛnɛ män, kɛn diaal tëë ci lɔcdiɛn ɛ nhɔk i̱ bikɛ muɔ̱c. Cukɛ ti diaal no̱o̱ŋ tiil ji̱thni, kɛ tiil yiɛtni, kɛ ciik te̱tni, kɛ ti diaal tin ca täth kɛ da̱a̱p, cuɛ kɛ no̱o̱ŋ, cu nɛy diaal muc dääpä ka̱m Kuoth Nhial. 23Kä nɛy diaal tëë ca rɔ̱ je̱k, cukɛ biɛl biey mi yie̱l no̱o̱ŋ kɛnɛ mi mɛr kɛ mi do̱l, kɛ bieyni ti ca mɛn, kɛ mi̱em böwni, kɛnɛ tuacni rɔɔmni ti thiääŋ, kiɛ tuacni böwni kiɛ duäl, cukɛ kɛ no̱o̱ŋ. 24Nɛy diaal tëë thöpkɛ muc cikä in bo̱r kiɛ ciɛk in yian, cukɛ kɛ no̱o̱ŋ ala muc Kuoth Nhial, kä nɛy diaal tëë ca rɔ̱ je̱k cukɛ jiath thëëp mi lot rɔ rɛy la̱t no̱o̱ŋ. 25Kä män diaal tëë ta̱a̱k ŋɔaani, cukɛ tëë cikɛn kɛ tak biɛl, mi yie̱l kɛnɛ mi mɛr, kɛ mi do̱l no̱o̱ŋ, amäni bieyni ti ca lathdiɛn mɛn agɔaa. 26Män diaal tëë ci la̱t ɛmɔ wä lɔɔcdiɛn cukɛ mi̱em böwni tak. 27Cu bööth guiy ti ca̱a̱r no̱o̱ŋ kɛnɛ guiy kɔ̱kiɛn kɛ kui̱ jämni biey gɔ̱rä ran kɛnɛ bi̱i̱ kath, 28kɛ wal tin kuɔ̱r kuɔ̱ɔ̱r, kɛnɛ liɛɛth lɛmbärä amäni liɛɛth yi̱rä kɛ kui̱ wal tin la ŋuäny kur tin la waŋkɛ wi̱i̱ yi̱kä. 29Wutni diaal kɛnɛ män diaal kä ji̱ I-thɛ-rɛl tin ci lɔcdiɛn wä thi̱n i̱ bikɛ ŋɔak no̱o̱ŋ kɛ kui̱ la̱t ëë ci Kuoth Nhial ɛ lar kɛ thok Muthɛ i̱ ba la̱t, cukɛ kɛ nöŋ Kuoth Nhial ala muc ti ŋuɔ̱nkɛ kɛ lɔcdiɛn.

Ta̱a̱th duëël ro̱mä

(Ɣöth 31:1-11)

30Täämɛ cu Muthɛ ji̱ I-thɛ-rɛl jiök i̱, “Nɛ̈nɛ jɛ, ci Kuoth Nhial Be-dha-lel gat Uri min la gat Ɣur raan döör Juda cɔl ni cio̱tdä. 31Kä cuɛ jɛ thiäŋ kɛ Yiëë Kuɔth, cɛ jɛ ka̱m pɛl, kɛ ŋäc kɛnɛ tiit kä ŋɔaani, kɛnɛ ca̱a̱p kuurä. 32Kɛ ɣöö bɛ ca̱a̱p kuurä la̱t kɛ la̱t dääpä kɛnɛ ciɛk in bo̱r, kɛ ciɛk in yian, 33kɛ wuɔ̱ɔ̱k guiiyni kɛ wuɔ̱r dɔ̱a̱kni, kɛ ŋa̱t jiɛn amäni ca̱a̱p kuurä la̱t ɛmɔ kɛɛliw. 34Kä Cɛ jɛ moc lua̱ŋ kɛɛl kɛnɛ Ɔ-li-yab gat A-ɣi-tha-mak raan döör Dan, kɛ ɣöö bikɛ naath ŋi̱eec kɛ ca̱a̱p be̱e̱lä. 35Cɛ kɛ thiäŋ kɛ lua̱ŋ la̱t kuurä lätni diaal tin la̱tkɛ ɛ kuɔ̱ɔ̱r ce̱tkɛ tin la la̱tkɛ ɛ kuɔ̱ɔ̱r tin ŋa̱a̱tkɛ jiɛn, kɛ ca̱a̱p ta̱th, kiɛ ta̱a̱k bieyni tin ja̱mkɛ bieyni kɛ ta̱k te̱tni, kɛ biɛl mi yie̱l kɛnɛ mi mɛr kɛ mi do̱l, kɛ ta̱k in ca lath bieydɛ mɛn agɔaa, kiɛ ta̱k in la kuur ɛ a tak ni bieyni kɛ makanɛ, kɛ la̱t in la la̱tkɛ lät nath diaal kiɛ ca̱a̱p kuurä inɔ.

Currently Selected:

Ɣöth 35: nusNHB

Highlight

Copy

Compare