Ɣöth 32

Kɔ̱a̱l ruath dääpä

1mëë wä naath ɛ nɛn i̱ ci Muthɛ jääny wi̱i̱ pa̱a̱m, cukɛ rɔ̱ ma̱a̱t, bäkɛ kä Ä-ron, cukɛ jɛ ben jiök i̱, “Bër, täthni kɔ kuth ti bi ja̱l nhiamda, ti ba kɔ bo̱th. Ɛn wut ɛ cɔal i̱ Muthɛ mi, mëë käm kɔ raar muun I-jëp, kueckɔ mɔ ci tuɔɔk kä jɛ mɔ.” 2Kä cu Ä-ron kɛ jiök i̱, “Yɛn ka̱mɛ tiil dääpä tɔ̱ te ji̱thni määnkun tɔ̱ raar, kɛnɛ tɔ̱ te ji̱thni gankun tɔ̱, kɛ tɔ̱ te ji̱thni nyieetkun tɔ̱, nöŋɛ kɛ ɣä.” 3Cu nɛy diaal tiil da̱a̱pni tëë te ji̱thnikiɛn ka̱m raar, cukɛ kɛ nöŋ Ä-ron. 4Cuɛ da̱a̱p käp te̱tnikiɛn, cuɛ jɛ thal, kä cuɛ jɛ la̱th guäth mi cɛ täth ala ruath, kä cuɛ ben raar ala ruath tha̱a̱k, kä cukɛ wee i̱, “Ji̱ I-thɛ-rɛl, ti̱ti̱ kɛ kɛn kuthku tëë ka̱mkɛ ji̱ raar muun I-jëp.” 5mëë wä Ä-ron ɛ nɛn inɛ, cuɛ täth nhiamdɛ, kä cuɛ ruac kɛ naath cuɛ wee i̱, “Iruun banɛ Kuoth Nhial lät kä mi̱th tɛthä lɔaac.” 6Kä cukɛ ke̱e̱r ni kɛ runwaŋ ɛlɔ̱ŋ. Cukɛ luuri ti waŋkɛ näk, kä cukɛ luuri malä no̱o̱ŋ, cu naath nyuur mi̱thkɛ, kä mäthkɛ, kä cukɛ kac nhial kɛ ra̱w.

7Kä cu Kuoth Nhial Muthɛ jiök i̱, “Wër piny ni kä kɛɛl kɛ ɣöö kɛn nɛɛku tëë no̱o̱ŋi raar muun I-jëp cikɛ ciaaŋdiɛn ya̱r. 8Niɛ guäth ɛ tɔt ɛ cikɛ rɔ̱ ku thuŋ buɔ̱k dup ëë cä guɔ̱k kɛ. Cikɛ rɔ̱ ta̱th ruath tha̱a̱k, mi la palkɛ ɛ kɛn, kä na̱a̱kɛ jɛ kä ŋɔaani, bikɛ wee i̱, ‘Yɛn ji̱ I-thɛ-rɛl, ti̱ti̱ kɛ kɛn kuthku tëë ka̱mkɛ ji̱ raar muun I-jëp.’ ” 9Kä cuɛ Muthɛ jiök i̱, “Ɣän cä nɛy ti̱ti̱ thuk kɛ guec, kɛ nɛy ti bum wuɔ̱thkiɛn ɛ tet. 10Kɛ kui̱ ɛmɔ gue̱nyni ɣä gua̱a̱th mi bä wi̱cdä car kɛ jɛ, kä ɣän bä kɛ puɔ̱k ɛ puɔ̱k, kä ji̱n puɔ̱ɔ̱nydu bä do̱r mi di̱i̱t cak kɛ ji̱.” 11Kä cu Muthɛ Kuoth Nhial Kuothdɛ läŋ, cuɛ wee i̱, “Aɣ Kuoth Nhial, ɛŋu bi waŋ lɔaacdu rɔɔdɛ re̱p kɛ nɛɛku mɔ, kɛn nɛy tëë käm ni ji̱n raar muun I-jëp, kɛ lua̱ŋ mi di̱i̱t kɛnɛ tetdu mi bum? 12Ɛŋu dëë ji̱ I-jëp ɛ laar ɔ i̱, ci Kuothdiɛn kɛ no̱o̱ŋ raar kɛ ca̱p, kɛ ɣöö bɛ kɛ ben nor wi̱i̱ pa̱a̱m kä bɛ kɛ cu puɔ̱k wi̱i̱ muɔ̱ɔ̱n? Päl waaŋ lɔaacdu mɔ di̱i̱t ɛmɔ, kä nyɔk wi̱cdu kɛ ca̱r kɛ mi jiääk ɛ dëë ben kä nɛɛku mi. 13Tim A-bɛ-ram, kä tim Ay-dhɛk kɛnɛ I-thɛ-rɛl tin la la̱a̱tku, tëë ci rɔ yac nhiamdiɛn kɛ puɔ̱nydu pa̱ny. Curi kɛ jiök i̱, ‘Ɣän bä kuaykun jak kä di̱ethkɛ rɔ̱, a bikɛ ce̱tkɛ kuɛl nhial, kä ɛn mun ɛ di̱i̱t ɛmɛ kɛɛliw cä jɛ ka̱m kuaykun, mi ba ka̱n ɛ kɛn ala duundiɛn amäni ciaŋ.’ ” 14Kä cu Kuoth Nhial wi̱cdɛ car kɛ päl kä mi jiääk in ɛ jɛn i̱ lätdɛ kä nɛɛkɛ.

15Cu Muthɛ rɔɔdɛ ri̱t, cuɛ ben piny wi̱i̱ pa̱a̱m jälɛ kɛ pääm da̱ŋ rɛw tin pat paat tin la nyin lueekni, tin ca gak kɛ gɔ̱a̱r kui̱cnikiɛn da̱ŋ rɛw diaal, kui̱c ɔ kɛnɛ kui̱c ɔ. 16Kä kɛn pääm tɔ̱tɔ̱ lät kɛ ni Kuoth inɔ. Gɔ̱a̱riɛn gɔ̱rɛ ni Kuoth puɔ̱nydɛ, ca kɛ rël jɔk päämni tɔ̱ pat paat tɔ̱tɔ̱. 17Mëë wä Jɔ-cua jɔw nath liŋ, kɛ rɔaliɛn mi di̱i̱t, cuɛ Muthɛ jiök i̱, “Ci ko̱r nyiëëny rɛy wec.” 18Kä cu Muthɛ ɛ Jiök i̱, “Nɔmɔ /ciɛ rɔal mi ce̱t joc ji̱kɛ naath, kä /ciɛ rɔal mi ce̱t juɔckɛ ni ji̱kɛ, liɛŋä ni rɔal nɛɛni ti ci wi̱cdiɛn kac kɔaŋ.” 19Kä mëë wäkɛ wec ŋäth ikä niɛ wa̱nɔ, cu Muthɛ ruath nɛn, kɛnɛ naath ti duɔ̱thkɛ bul. Cu Muthɛ kɛ̈c a bɛ rɔ̱ɔ̱th. Cuɛ kɛn pääm tin pat paat tin kɔn yuɔr piny a bikɛ töl ɛn wan ɔ thaar pa̱a̱m. 20Kä cuɛ ruath tha̱a̱k in ca täth ɛ kɛn ka̱n, kä cuɛ jɛ pɛt, kä cuɛ jɛ nor ɛ ba tup, kä cuɛ jɛ wɛ̈r pi̱i̱ni, kä cuɛ ji̱ I-thɛ-rɛl jak kä mathkɛ jɛ.

21Cu Muthɛ Ä-ron ku jiök i̱, “Ci nɛy ɛ ti ji̱ la̱t i̱di, mɔ curi kɛ buath dui̱rä mi duŋ di̱i̱t ɔ?” 22Cu Ä-ron wee i̱, “Kuäärä, a lɔcdu /cɛ weŋ ɣä, ji̱n puɔ̱nydu ŋäci nɛy ti̱ti̱ pe̱kdiɛn ɛn ɣöö kɛ ji̱ wieecni. 23Kɛ ɣöö kɛ kɛn la̱r kɛ jɛ ɣä tɔ̱ i̱, ‘Täthni kɔ kuth ti bia̱ te nhiamda, mi cak a Muthɛ ëë käm kɔ raar muun I-jëp, ci mɔ ci tuɔɔk kä jɛ mɔ wi̱cda yi̱c.’ 24Kä cua kɛ jiök i̱, ‘A ram ɔ tekɛ da̱a̱p ɔ ŋun jɛ, cukɛ kɛ cu nöŋ ɣä, cua kɛ yuɔr maac, kä cu ruath tha̱a̱k ɛmɛ cua jɛn.’ ”

25Ɛ jɛn, mëë wä Muthɛ ɛ wä nɛn i̱ ci naath ciaaŋdiɛn ya̱r kɛ ɣöö ci Ä-ron kɛ pa̱l ɣöö ya̱rkɛ ciaaŋdiɛn a cikɛ rɔ̱ cu nöŋ pöc rɛy ji̱ tɛ̈riɛn, 26cuɛ ku ben cuɔ̱ŋ ni thok rɛ̈ɛ̈k wec, kä cuɛ thi̱ec i̱, “Ɛŋa mi te kui̱c Kuɔth Nhial? Mi tëë raan a bëë kä ɣä.” Cu ji̱ Lii-bay diaal rɔ̱ ruɔ̱l jɛ. 27Cuɛ kɛ jiök i̱, “Ci Kuoth Nhial Kuoth I-thɛ-rɛl ɛ lar inɛ, ‘A ram ɔ kä yɛn diaal kän thɛpdɛ, kä wiaa rɛy wec kɛɛliw kɛ thuk diaal, kä a ram ɔ, näk däman pa̱ny, kɛ määthdɛ amäni gua̱n thie̱e̱kädɛ.’ ” 28Kä cu ji̱ Lii-bay la̱t ni min ci Muthɛ ɛ la̱r kɛ. Ɛn cäŋ ɛmɔ cua nɛy ti bathdɔɔri diɔ̱k näk rɛydiɛn. 29Kä cu Muthɛ wee i̱, “Ɛn wa̱lɛ cia rɔ̱ lëy Kuoth Nhial, kɛ kui̱ läätdädɛ, kɛ min /ken ram ɔ riɛk kɛ tëk gatdɛ kiɛ tëk gat däman, kɛ ɣöö bia puɔ̱thdɛ ŋa̱c ɛn cäŋ ɛmɛ.”

30mëë ruɔ̱n kɛ runwaŋ cu Muthɛ naath jiök i̱, “Yɛn /ciɛ duer kɛ di̱d ɛ nia̱ cia la̱t ni. Duundɛ ɣöö ɣän bä wä kä Kuoth Nhial wi̱i̱ pa̱a̱m kɛ ɣöö bä luël dueerikun kamädun kɛ jɛ wä ɣɔ̱n kɛ liep.” 31Cu Muthɛ cu loc kä Kuoth Nhial, cuɛ jɛ wä jiök i̱, “Guic ɛ, kɛn nɛy ti̱ti̱ cikɛ ji̱ lät kä ti jiäk, ca rɔ̱ ta̱th kuth dääpä ti palkɛ. 32Kä täämɛ mi lotdɛ rɔ, ɛ nɛ latdä mi kɛ Ji̱, ni kɛ ruacdu, päli kɛ dueerkiɛn, kä mi /ci lɔcdu bi luɔ̱ɔ̱c piny kɛ duerkiɛn, la̱ŋä ni ji̱, kɛkni ciötdä raar rɛy warɛgakädu min ci gɔ̱r.” 33Kä cu Kuoth Nhial ɛ jiök i̱, “Kɛ kɛn nɛy diaal tin ca ɣä duer duer, kɛn tɔ̱ bä ciöötkiɛn kɛ̈k raar rɛy warɛgakädä mɔ. 34Kä wër, ɛn täämɛ, bo̱thni naath guäth ëë cä la̱r ji̱. Nɛn ɛ, jääkdä bɛ wä nhiamdu, kä cäŋ in wa̱a̱ wä guel, bä dueerkiɛn ben nyɔk kɛ nyuth kɛ.” 35Inɔ, cu Kuoth Nhial naath jäk kä rik ti bɛc kɛ ɣöö cikɛ ruath tha̱a̱k mi ci Ä-ron ɛ täth pal.

Currently Selected:

Ɣöth 32: nusNHB

Highlight

Copy

Compare