Roma 7

Eyiyenuna jio Eram Yama

1Illarak iko haniyarak hoŋ, hode, imijana itai eram anna ajio ni ekiana; nyio, imijana itai 'daŋ efahita. Ogottierek efahita atulo buo inyi hesu. 2Ike imijata aŋotte, ojiori efahita oŋida inyi luŋa arasa jio habi honyi buo habi hesu. Buo alla aye habi, obeŋi efahita inyiahi itihotio inyi idehiniere habi. 3Tania, alla awoni inyi iko obo alle, buo habi hesu, ara adi inyi aharotoni. Ati alla aye habi, ahohino inyi jio efahita hunia, buo fe obeŋ iyyau, elle inyiak inyi iwanan iko obo alle. 4Illarak iko haniyarak hoŋ, ara buo fe inyi ihuo nyia jihatai. Alla ara te eram Ifahita, iyeti nyia itai nyio, irata itai aŋati huan Kristo. Ihuania irata itai a hulonyi, inyi linyia itubuhuni toye jio oŋida bati ehanio egiama Hollum onno oyyu. 5Ninyia hemanya ihuo aati, itadeti nyia Efahita awahan iyyauna ihuattek hohoi, enne iyaŋuno 'to naye jihohoi. 6Ati ihuania, ehouno addi jio Efahita; nyio, era nyia ahayaak jio efahita, hunyia ifitani 'to hohoi. Tania, ebeŋ enyiak igiama te ekoi eberien ono efahita hunyia igioroni. Ati egiama te ekoi aŋejuk ono Oloholio.

Efahita iko Eyyau

7Eremik 'tadi jiaran jio owon eyyau jio Efahita? Obeŋ 'tuŋ! Nyio, Efahita nyia itamijanani nani eram ono eyyau. Alla abeŋi nyia Efahita ojiori jio, “Hèwak asaŋ huno lobo,” atimo duo ni jio orroho adaya saŋ waati. 8Ati arumak eyyau ekoi jio efahita, itadeciere awoi iwahiti 'daŋ hunna abeŋ ni asiru idayari. Nyio, alla abeŋi duo efahita, ara duo eyyau ihuo ariŋ anna aye. 9Esu nyia ni ninyia hatimo ni efahita. Buo ninyia amijak ni efahita, ette buo fe eyyau isu, 10ette ni iye. Inyiahi tibuo efahita hunyia ojiori oŋida iyaŋunie nesu, itabahasuno naye jihoŋ. 11Nyio, te efahita, orumak eyyau ekoi inyobiere buo fe ittohori nani.

12Tania, olibori Efahita, buo fe erre hunno ojiori isi olibori, buo fe obisi, buo fe oyiji. 13Itahutak ati ania jio, ayiji nyia iyaŋuno jihoŋ naye? Obeŋ 'tuŋ! Eyyau nyia iyaŋuno jihoŋ naye, ta attuna honyi tottolo erre ayijok jio, oŋida bati italeyehini ahode hode honyi. Tania, itahutani atibuo efahita jio orroho eyyau bebe agalik 'daŋ.

Afere otto Tuajin Waati

14Emijak jio arai Efahita te eram loholio, ati ara ni atulo ijiai, elle itinyiaŋani apit jio eyyau. 15#Gal 5:17Abeŋ ni amijak anyio enne ehanio ni; nyio, abeŋ ni ehanio ariŋ anna awak ni ihanio, ati ehanio ni ariŋ onno obeŋ atua hoŋ awak. 16Elle ehanio ni ariŋ onno obeŋ atua hoŋ awak, itahutak fe inyi jio eruk ni jio, obisi Efahita. 17Tania, obiaŋara nani luŋa ehanio erre hunia; ati eyyau otto tua hoŋ inyi luŋa ihanio erre hunia. 18Amijak ni jio obeŋ obo ayiji owon jihoŋ; ihuan hoŋ anna ara 'to atulo. Awak duo bu atua hoŋ ihanio onno oyyu, ettallik ni ihanio ihuo nyia. 19Nyio, abeŋ ni ehanio erre ayijok hunna awak ni; ati ehanio ni erre arrohojak hunna abeŋ ni awak. 20Elle ehanio ni erre hunna abeŋ ni awak, itahutak ania jio obiaŋara nani luŋa elle ehanio 'to erre hunia, ati eyyau otto tua hoŋ luŋa ihanio isi.

21Tania, anyurak ni jio agolik ekoi ania jihoŋ. Alla awak ni ihanio onno oyyu, buo ni fe anyimu ehanio onno orroho. 22Iyaŋunie efahita Hollum amuno onno obolo itaji hoŋ. 23Ati egonyu ni obo efahi hama itua hoŋ onno orriomonie iko obo onno owon 'to ihou hoŋ. Efahi ania, enne ihanak 'to ani, atulo babus jio efahi ono neyyau onno owon 'to itua hoŋ. 24Eii, arrohoji ottonoŋ! Ŋai adi nani etaluahu jio ahuan ana, enne iyaŋuno 'to ana naye jihoŋ? 25Humo jio Hollum to Yesu Kristo, Lamonye hohoi!

Tania, te egigilo hoŋ, ejifatio ni efahita Hollum; buo te erre hunna awak atua hoŋ, ejifatio ni efahi enne iyaru 'to ani iyyau.

Currently Selected:

Roma 7: EA2003

Highlight

Copy

Compare