Roma 2

Aŋocio Hollum Eram Waati

1Tania, illa, ira duo bu iyye ŋai, obeŋ obo eliet jihoi, elle iŋot iyye eram obo atulo. Nyio, ta aŋocio hoi eram honyi, iŋotok iyye epali ihuan hoi nyio, iyye aŋotoni hiram, ihanio buo fe iyye erre hunne ihanio inyi. 2Emijak jio, obis Hollum alla aŋot inyi eram waati hulle ihanie 'to erre ihuo hunia. 3Illa, igigilo iyye jio iris adi iyye aŋocio Hollum elle iŋocio iyye eram waati hulle ihanie 'to erre ihuo hunia, buo iyye ta ahuan hoi ihanio isi? 4Iyasiete ti itai abolori nyalami iko adihan buo abolori taji honyi? Ibiaŋata soho itai imijana jio, anyalam Hollum, iyaŋuniere jihatai ehara eyyata? 5Ati ta agolon hossi hatai luŋa, ifuronia itai ettigemita jihatai jio Oloŋ enne italeyehiniere Hollum ajore honyi iko aŋocio hiram onno obis 'to. 6Nyio, isiarak adi Hollum aati 'daŋ ababo edumiti hunno oremehini 'to te ehanita hosi. 7Isio adi inyi nesu onno osio 'to 'tulaŋ jio hia hullo odulori 'to ehanio onno oyyu; buo fe ottifiai akuatan, olohuo iko abiaŋan ye. 8Ati jio aati hullo onohi tajia, buo fe ihari elahode buo iruhi erre hunne ipali 'to, osehi adi Hollum jihosi ajore onno orroho 'to bebe. 9Owon adi ettigemio iko adiaha jio atulo 'daŋ eyyani: itterio do jio Yudei, attati buo fe jio Alufajak. 10Ati isiarak adi Hollum akuatan, olohuo iko nelik tajia jio hia 'daŋ hulle ihanie 'to onno oyyu: itterio do jio Yudei, attati buo fe jio Alufajak. 11Nyio, orriama aŋocio hiram Hollum jio aati 'daŋ.

12Hia 'daŋ hulle iyyauni 'to buo obeŋi owoni iko efahita Mose, iyyauni isi ette litohina obeŋi efahita; buo hia 'daŋ hulle iyyauni 'to buo owoni iko efahita, oŋoti adi eram hosi te efahita. 13Nyio, obiaŋara etayirak ifahita hullo obisi 'to to hosiere Hollum, ati hulle ihanie 'to erre hunna awahi Efahita isi hullo obisi 'to. 14Obeŋi Alufajak owoni iko Efahita; buo elle ihani isi, to ossi hosi erre hunna awahi Efahita; itahutak jio omijani isi anyio anna awahi ihanie kuyya obeŋi awahi ihanie, duadi bu obeŋi Efahita jihosi. 15Itahutani ehanita hosi hunia jio, igioronie erre hunna awahi efahita itajia hosi. Itahutani buo fe atuajin hosi hunno oye 'to jio, ara eram ania hode. Nyio, iramattai atuajin hosi hunno oye 'to jio, oyiji kuyya ipali ehanita hosi. 16Ojiori Asayyo Ayijok hunne ettittoyo ni jio, ara adi ihuo nyia jio Oloŋ anna alari Hollum iŋociere egigilita hutto hossi waati to Yesu Kristo.

Yudei iko Efahita

17Buo iyye? Ijio iyye jio, iyye olo Yudei, imanya iyye te Efahita, itadara iyye te eram Hollum; 18buo fe imijak ariŋ anna awak Hollum iyye oŋida ihanio. Ittiyenu iyye jio Efahita inyimuniere erre hunno obisi 'to. 19Ifut ihou hoi jio, ira iyye aharihoni ŋodok, buo fe ira afaŋan jio hia hullo owoni 'to idumele, 20buo fe ahettiyanani waati hullo obeŋi hossi iko atimok hirre. Ifut buo fe inyi luŋa ihou hoi jio, imijak iyye Efahita iko elahode 'daŋ. 21Ittiyenio iyye aati hullomuk…nyio ati ibeŋ iyye ittiyanaru ahuan hoi? Ittittoyo iyye jio, “Hèhoholio”…buo iyye ta ahuan hoi ihoholio? 22Ijio iyye jio, “Hèhanio erre somon”…buo iyye ta ahuan hoi ihanio erre somon? Iha iyye buo fe arrijiorita jiohin…buo iyye, ta ahuan hoi, ihoholio iyye erre hutto hasik Imojiti hunne ittaha? 23Itadara iyye ta amijana hoi Efahita Hollum — buo iyye ta ahuan hoi iyaŋuno ariri jio Hollum ta amesio hoi efahita honyi? 24Igioroni Ibuk Hollum jio, “Ittarrohojie Alufajak afure Hollum te eram hatai, Yudei.” 25Elle iniŋiete itai efahita, itasiruno adi aboso hatai; buo elle imesiete itai efahita, orriama inyi ihuo elle ibiaŋata itai ibosoti. 26Buo alla aniŋio atulo ollo obeŋ 'to oboso erre hunno ojiori efahita, obeŋ 'tadi Hollum ihianak inyi ihuo alla aboso? 27Tania, oŋotoni adi Alufajak epali jihatai, Yudei. Nyio, oniŋie isi efahita duadi bu obeŋi isi obosoi, buo itai imesiete efahita duadi bu igioronie isi jihatai buo fe itai ibosoti. 28Obiaŋara aboso itihan atulo aholo Yudei hode, nyio, ittallik aboso ono ahuan ihanana atulo aholo Yudei hode. 29Ati atulo Yudei hode, inyi atulo alla ara 'to aholo Yudei ta atua honyi. Inyi atulo elle italibori atua honyi. Ara etaliborio tua egiama ono Oloholio Hollum, buo obiaŋara egiama ono efahita hunne igioroni. Ifuotu atulo alla ara 'to ihuo nyia etahabuyo jio Hollum buo obiaŋara jio aati.

Currently Selected:

Roma 2: EA2003

Highlight

Copy

Compare