Roma 12

Amanya te Egiama jio Hollum

1Ihuania, illarak iko haniyarak hoŋ, ta abolori ono amehino Hollum jihohoi, attana ni itai; isiatta ahuattek hatai jio Hollum ihuo esiorita hunne isui, hunno olibori, hunno omuno Hollum. Nyio, etahabuyo ania hode enne iremehina itai isiarana jio Hollum. 2Hèmohina jio emanyiti huno afau ana, ati ijiara Hollum iloit atajia hatai te esiarana honyi jihatai egigilita aŋejuho. Tania, iremehina adi itai imijana erre hunna awak inyi…erre hunno oyiji, hunno omuno inyi buo fe ottubai.

3Ta ayiji enne isiarak Hollum jihoŋ, eramak ni itai 'daŋ ababo jio: Hètallaŋara akafio huattek hatai. Ati, igigiloti onno oyyu, oŋototo eram hatai 'daŋ ababo ihuo oremik inyi jio eruk enne isiarak Hollum jihatai. 4#1Kor 12:12Ewon iko aŋacio huattek arriai hunno olufaji, buo fe egemita hosi 'daŋ olufaji. 5Ihuo nyia buo fe, duadi bu eluaja, era ahuan abotie te enoso iko Kristo. Enosonio arabotie ihuo aŋacio hunno olufaji 'to huno ahuan abotie. 6#1Kor 12:4-11Tania, hégiamatti esiorita hohoi huna gele gele hunia, ihuo ojio ayiji taji enne isiarak Hollum jihohoi. Elle isiori jio obo esiorio ono ettittoyo sayyo Hollum, ijiara inyi ihanio ihuo nyia, ihuo ojio eruk honyi. 7Elle isiori jio obo esiorio ono egiama, ijiara luŋa inyi igiama bebe; elle isiori jio obo esiorio ono ettiyenio, ijiara luŋa inyi ittiyenio; 8elle isiori jio obo esiorio ono etagolio waati hullomuk, ijiara luŋa ihanio ihuo nyia. Lia, ollo oluahio 'to aati hullomuk te erre huttononyi, ijiara luŋa oluak te emorot. Lia, alla ara 'to elettok, ijiara luŋa igiama onno oyyu. Ijiara buo fe olobijo tua, héhaniehe luŋa ihuo nyia ta amuno.

9Ijiara abuaran tajia hatai hétera luŋa hode. Oliwatti erre arrohojak; ogolihina jio ayijok. 10Ijiara abuaran taji hatawana ihiji hatai ihuo Kristiani. Abaŋata ahuattek hatai ta amuno. 11Igiamati bebe, hèboyojoto. Igiamati jio Lamonye ta atajia hatai 'daŋ. 12Ijiara eyihina hatai odulo itamunoyo itai, odihuna ettigemita hatai, oduloro amojo. 13Aharata asaŋ hatai iko Kristiani hullo obeŋi hirre. Ifuotuna atamonok ihaŋitek hatai.

14 # Mat 5:44; Luk 6:28 Omojonia ayiji jio hia hulle ittigemie 'to itai…ayiji buo obiaŋara epit. 15Omunoti iko hia hullo omunoi 'to, ijiriŋati buo fe iko hia hulle ijiriŋai 'to. 16Amanyati onno oyyu iko aati 'daŋ, hètadarati, ati orriahati iko afiahajak#12:16 ati orriahati iko afiahajak : kuyya iruhoto egemita hunno ofiahaji 'to.. Hègigiloti jio ilofiorojoto itai igalihina aati hullomuk.

17Elle ihan obo onno orroho jihatai, hènienuna inyi ta arrohoji. Ihaniete erre hunno oyiji 'to 'daŋ to hosiere waati. 18Okiamata etoŋo te nelik tajia iko aati 'daŋ ihuo iremehina itai. 19Illarak iko haniyarak hoŋ, hènionoti, ati ijiara ajore Hollum inienu. Nyio, ojio Abuk Hollum jio, “Ojio Lamonye, enienu adi ni hia 'daŋ hulle ihanie 'to onno orroho jio aati hoŋ.” 20Ati, ihuo ojio Abuk Hollum jio, “Alla aniama amiottononi hoi, isiarak jihonyi aŋiyo; elle iboto inyi, isiarak jihonyi aari. Elle ihanio iyye ihuo nyia, itanyahi adi iyye inyi ariri.” 21Hèlaha arrohoji agalik itai, ati agalihina arrohoji te ehanio hirre ayijok.

Currently Selected:

Roma 12: EA2003

Highlight

Copy

Compare