Marko 7

Ettiyenita huno Hohonyiok

(Mat 15:1-9)

1Ofuonni nyia omuk Farisei iko ettiyanak ifahita to Yerusalem, ette ittubanio jio Yesu. 2Igonyuni nyia isi omuk lejifak Yesu oŋiye aŋiria hobeŋi ihumi ifinia. Obeŋi nyia lejifak hulia ihumi illilla ahas hosi ihuo awahi Farisei.

3(Nyio, obeŋi nyia Farisei iko Yudei hullomuk 'daŋ, oremehini iŋiyo buo isi hobeŋi ihumi ifinia ahas hosi ihuo ojiori ettiyenita huno hohonyiok hosi. 4Ittallihi nyia isi iŋiyo erre 'daŋ hunne iyaŋunie isi to suk hobeŋi illillai#7:4: erre 'daŋ hunne iyaŋunie isi to suk hobeŋi illillai : kuyya ittallihini nyia isi iŋiyo obo ariŋ acohunie isi to suk many ofiniarik isi do.. Ijifatie nyia buo fe isi ettiyenita hunnomuk arriai hunyia ifuotuni isi, ihuo ewosio miolohien, ellillayo mocio iko arranyi.#7:4: Ofonihini omuk egierita jiojio, iko aŋerefi.)

5Ania, ette Farisei iko ettiyanak ifahita ifiyo Yesu jiojio, “Nyio omesie lejifak hoi ettiyenita hohonyiok hohoi? Nyio oŋiye isi ta ahas hunne iboti?”

6Attati Yesu itarraŋ isi ojio, “Itai etihanak huattek hulo! Ottenu nyiadi Isaya to ninyia ikianari inyi eram Hollum tetai jiojio,

‘Ojio Hollum jio, itahabuye aati hulo ani te etuhe hosi,

buo atajia hosi luŋa alamaji jihoŋ.

7Itahabuye isi ani obojiai,

nyio, ittiyenie isi efahita waati ihuo anna arai efahita hoŋ!’

8“Idehina itai efahita Hollum buo igottiette ettiyenita waati.”

9Ette Yesu inyiak jiaran jihosi jio, “Igigiloti itai jio ibisata itai te edehina hatai efahita Hollum buo igolihina kok kok jio ettiyenita hatai! 10#Ajiŋuna 20:12; 21:17; Ehumak 20:9; Edasita 5:16Nyio, iramak nyia Mose jio, ‘Abaŋa monyohoi iko honyohoi,’ buo ‘Atulo elle ittarrohojio 'to afure monyonyi, kuyya ono honyonyi, ijiara luŋa ottohori inyi.’ 11Ihuania, owoni omuk hulatai iko omuk asaŋ iluahiere monyie hosi kuyya honyie hosi. Ati oliai isi jio, ‘Arai isi Korban’, (onno ojio 'to jio, arai isi ahuno Hollum). 12Tania, ittiyeniete itai jio, oŋida aŋatani isi obeŋi oluahierek monyie kuyya honyie hosi. 13Te ekoi ania, itapuahi ettiyenita hunne ittiyeniete itai jio aati eram Hollum. Owoni buo fe erre arriai ihuo hunia hunne ihaniete itai.”

Erre hunne Itiboti 'to Atulo

(Mat 15:10-20)

14Attati Yesu inyiak iloŋuna eluluŋ waati, ette jiaran jihosi jio, “Itai 'daŋ, itayiriete jihoŋ buo fe omijana jio, 15obiaŋara ariŋ onno ojiŋa 'to totto hutuk tulo itibot inyi, ati ariŋ onno ojiŋu 'to totua tulo itibot inyi. 16[Itayiriete, alla awoni ayyaha jihatai]#7:16 Obeŋ ekori ana jio omuk egierita (imija Marko 4:23)..”

17Ninyia abusaru inyi eluluŋ waati ette ijiŋana itua haji, ifiye nyia lejifak honyi inyi oŋida iramak awoyo hiram ono etarriamai ania. 18Buo inyi ette itarraŋ isi jiojio, “Ibiaŋata buo fe itai imijana ihuo aati hullomuk? Ibiaŋata itai imijana jio obeŋi erre hunno ojiŋari 'to attua tulo itiboti inyi. 19Nyio, obeŋ inyi ojiŋak itua taji honyi, ati ojiŋak inyi itua hohe honyi, ette iculuna addi to huan.” (Ta ajiaran honyi erre hunia, itahutak inyi jio oyiji amat 'daŋ iŋiyere.)

20Attati inyi jiaran jio, “Erre hunno ojiŋuni 'to totua tulo, isi itiboti inyi. 21Nyio, to tua iko to taji tulo ofuonni egigilita hunno orrohoji hunne iyarai 'to inyi ihaniere erre ihuo; erre somon, ahoho, attohoro tulo, aroto, 22adaya, arrohojita, enyobio, asilara, ahaini, etarrohojo fureta waati, etadara, iko abiaŋan hou. 23Ofuonni erre hunno orrohoji 'to hunia 'daŋ to tua tulo, ette itibot inyi.”

Eruk ono obo Aŋotte

(Mat 15:21-28)

24Teya odioto nyia Yesu ette leten jio aŋati fau etteger borejin gala Taya iko Sidon, ette ijiŋana itua haji buo fe obeŋ awak obo atulo omijak jio awon inyi diya, ati ittallik nyia inyi idima. 25Owon nyia obo aŋotte diya ninyia owon ŋarri honyi iko aminiaŋati. Teya teya, ninyia itayiru inyi awanan Yesu, ette inyi ittuna, ette irigoŋo ihosiere honyi; 26ette ittana Yesu oŋida ifuha aminiaŋati ania addi jio ŋarri honyi. Ara nyia aŋotte ania ahono Grik, ta ŋati Fonisia atta fau Siria. 27Ati itarraŋ nyia Yesu inyi jio, “Hétanyata do aduri, nyio, obeŋ oyyu iruoŋoniere aŋiyo duri jio aŋohe.”

28Buo aŋotte ania ette itarraŋ ojio, “Aafe Lettok, ara duadi bu aŋohe hutto woyo 'teremeja, ihuhuroi buo fe isi ebenyiti ŋiria hunno oddoddouni 'to jio aduri.”

29Ania, ette Yesu jiaran jihonyi jio, “Te etarraŋi hoi ania otto icaharu haŋ. Irumak adi iyye aminiaŋati nyia alo addi jio ŋarri hoi!”

30Attati aŋotte ania leten haŋ, ette inyurana ŋarri honyi ofer iŋeref buo aminiaŋati nyia luŋa alo addi jihonyi.

Itaŋida Yesu obo Olottuho buo fe Ittallik Ikiana

31Attati Yesu icaharu addi ta ŋati etteger Taya, ette leten totto Sidon iko totto ŋati Aborejin Gala Huna 'Tomon many itafar enne ittokon ono Galilea. 32Otto omuk aati iyaŋuno jihonyi obo olottuho buo fe ittallik ikiana, ette ittana Yesu oŋida iyabak ahas honyi jio olottuho alia. 33Ania, ette Yesu iyaru inyi iger te iluluŋ, ette ittironia afiala honyi iyyaha atulo alia, ette imitana amilak, ette ittir aŋadief honyi. 34Attati Yesu ibonno ahide idou, ette iyiri hau, ette jiaran jihonyi, “Efata,” onno ojio 'to jio, “Aŋati!”

35Teya teya, ette ayyaha atulo alia iŋa, buo fe aŋadief honyi ette iwalaha ette inyi ikiana onno oyyu. 36Attati Yesu ihum iramana aati jio, hèlaha isi iramani eram ania jio obo atulo. Ati elle ihum inyi iramana isi ihuo nyia, inyiahi tibuo isi itisarrahina eram ania. 37Buo aati 'daŋ hunyia itayiruni 'to eram ania ette illilliha bebe ette jiaran, “Ihanio inyi erre 'daŋ onno oyyu! Ara duadi bu attuhok, itayirie; buo fe aati hulle iriatai aŋadiafa, ikianai!”

Currently Selected:

Marko 7: EA2003

Highlight

Compare

Copy