Yakobo 2

Asario te Eram Igigia

1Illarak iko haniyarak hoŋ, te eruk hatai jio Lamonye hohoi, Yesu Kristo, Lamonye olo nakuatan, hègigiati. 2Alla attu obo asamani ittubit hatai, elle iyyafatio ayyel iko aboŋojin hunne ilamani, buo fe obo olociaŋ ottu elle iyyafatio aboŋojin hunno oguguasai, 3ittata ibaŋi atulo elle iyyafatio 'to aboŋojin hunne ilamani 'to, ittata jiaran jihonyi, “Itoŋoi jio etoŋi enne ilaman 'to ana,” buo ijiatta jio olociaŋ jio, “Owotiai diya, kuyya itoŋoi ifau iger hejek hoŋ;” 4tania, itahutak ania jio igigiati itai, buo fe ipalata ta aŋocio hatai eram waati hullomuk ta atajia hunno orrohoji 'to.

5Illarak iko haniyarak hoŋ, ihumata itayirio! Onyimu nyia Hollum alociaŋak afau ana, isiaraniere jihosi neruk onno obolo, buo fe ifuotuniere olobie ninyia ocorok inyi ahono hia 'daŋ, hulle itabuori atajia hosi jihonyi. 6Ati iyasiete itai alociaŋak. Obiaŋara soho asamak hullo ottehie 'to itai, buo fe oyatattai itai ilokikoi? 7Obiaŋara soho ahuattek hosi hulle ittarrohojie 'to afure Lamonye hatai?

8Ihaniete adi itai onno oyyu, elle iniŋiete itai efahi ono Olobie enne igioroni ibuk Hollum jio, “Itabuara ataji jio onyihari hoi ihuo onno obuarari inyi ahuan hoi.” 9Buo elle igigiati itai aati, iyyauna itai; aŋotoni buo fe efahita jihatai epali ta amesio hatai isi. 10Lia, ollo omesio 'to efahi abotie jio efahita, itahutak jio omesio inyi efahita 'daŋ. 11Nyio, lia, linyia ojio 'to jio, “Hèhanio erre somon,” inyi buo fe ollo ojio 'to jio, “Hèttoho.” Elle ibeŋ iyye ihanio erre somon, buo ira a hattohoni, ira iyye a hamiosoni ifahita. 12Tania, ikianati buo fe ihaniete ihuo aati hullo ofuoi iŋot eram hosi te efahita hunne iyaŋunie 'to ahohino. 13Nyio, iholoŋ ono aŋocio hiram, obeŋ adi Hollum omehino jio lia, ollo obeŋ 'to omehino jio aati hullomuk; ati agalik amehino, aŋocio hiram.

Neruk iko Ehanita

14Illarak iko haniyarak hoŋ, anyio yiji 'tadi onno onyurak obo alatai alla ajio inyi jio awon inyi iko neruk, buo ehanita honyi obeŋi itahutani neruk honyi ania? Oremik 'tadi neruk honyi ania italahuna inyi? 15Alla abeŋ aboŋo kuyya aŋiyo jio obo ella kuyya aniye, 16anyio yiji 'tadi enne inyurak iyye elle ijio iyye jihonyi jio, “Ilo onno oyyu, itanaha ahuan, orumak aŋiyo onno obolo,” buo ibeŋ isiarak jihonyi eluahiti hunna awak inyi? 17Ihuo nyia buo fe, ara eruk ariŋ asai, alla abeŋ inyi owon iko ehanita hunno oyiji 'to.

18Ati ojio adi obo jio, “Iwon iyye iko neruk, buo ni awon iko ehanita ayijok.” Etarraŋ adi ni inyi jio, “Itahutak ani neruk hoi onno obeŋ 'to owon iko ehanita ayijok. Etahutak adi ni iyye neruk hoŋ te ehanio onno oyyu.” 19Iruk iyye jio owon Hollum abotie ijiai? Oyyu! Iruhi buo fe aminiaŋa eram ania…ette ikikiro ta abaŋi. 20Obeŋ hou! Iwak iyye oŋida itahutani jihoi jio, ara eruk ariŋ asai#2:20 ara eruk ariŋ asai : ojiori omuk egierita oye eruk. alla abeŋ owon iko ehanita hunno oyiji 'to? 21Aŋai nyia soho itabisani hohonyi hohoi Abramo to hosiere Hollum? Itabisani nyia inyi te ehanita honyi, to ninyia isiaraniere inyi lonyi honyi Isako ehumi ihide ititiek. 22Ikeja! Igiamai nyia eruk iko ehanita honyi arabotie. Tania, attuba eruk honyi te ehanita honyi. 23Tania, itasirunie luŋa ekenita hutto buk Hollum hunno ojiori 'to jio, “Iruk nyia Abramo Hollum, ania, ihiananiere Hollum inyi a habisani.” Ania, arari Abramo a motte Hollum. 24Igonyuna itai! Etabisanio to hosiere Hollum te ehanita, buo obiaŋara te eruk ijiai.

25Ara nyia buo fe ihuo nyia jio Rahab, nesomo. Itabisani nyia inyi to hosiere Hollum te ehanita honyi, ninyia ifuotuniere inyi asiri hulo Israele, ette italunyara isi to obo ekoi hama.

26Tania, ihuo onno oyeri atulo alla abeŋ oloholio jihonyi; ihuo nyia buo fe, alla abeŋ neruk owon iko ehanita ayijok, ara inyi ihuo ariŋ anna aye.

Currently Selected:

Yakobo 2: EA2003

Highlight

Copy

Compare