Galasia 1

1-2Nani alia Paulo, elefahata, iko eruhok Lamonye 'daŋ hulle ewon 'to ikoŋ dini, efonyo hohoi eluluŋi heruhok 'daŋ hutto Galasia. Yesu Kristo iko Hollum Monye, linyia itubuhu 'to inyi toye, isi nyia onyimuni nani irari elefahata. Obiaŋara nyia obo atulo kuyya obo agolon tulo nyia isiarak jihoŋ egiama ania.

3Ijiara Hollum, Monye hohoi iko Yesu Kristo, Lamonye hohoi, isiarani jihatai ayiji tajia iko nelik tajia. 4Oniŋio nyia Kristo Hollum, Monye hohoi, ette iruk iyeri te eram ono eyyata hohoi, italahuniere hohoi jio elahaji onno orroho 'to ana. 5Ijiara akuatan hatawana jio Hollum 'tulaŋ 'tulaŋ! Amen.

Obeŋi Omuk Asayyo Ayijok, arari fe huna Hama

6Ellilliha ni bebe ayitoro hatai addi kokuak jio Hollum, linyia iloŋu 'to itai ta ayiji taji ono Kristo#1:6 ta ayiji taji ono Kristo : ojioi omuk egierita jio, ta ayiji taji honyi., ittata iruk omuk asayyo hunno olufaji. 7Hode, obeŋi omuk “Asayyo ayijok hunno olufaji”, ati ekiana ni ihuo nyia nyio, owoni omuk aati hulle ittigemie 'to itai, buo fe awahi itabahas asayyo ayijok huno Kristo. 8Ijiara Hollum ittigemio atulo elle ittittoyo 'to jihatai omuk asayyo hunno olufaji jio hunyia ettittoyo hohoi jihatai; duadi bu ara inyi tehiji hohoi kuyya obo ajilo ollo ottu tedou! 9#1Kor 5:6Eramak nyia hohoi jihatai eram ania berien; enyiak fe ni idas jihatai jiojio; elle ittittoyo obo atulo jihatai omuk asayyo hunno olufaji jio hunyia ifuotuna itai, ijiara Hollum ittigemio inyi! 10Awak soho ni oŋida aati omunoi ani? Obeŋ 'tuŋ! Awak ni ijiara Hollum omuno ani! Abeŋ ni awak itamunoyo aati. Alla awak duo ni, abeŋ duo ni ara a hegiamani olo Kristo.

Aŋai Ottu nyia Paulo irahan Elefahata

11Illarak iko haniyarak hoŋ, ijiara ani eramak itai jio, obeŋi asayyo hunne ettittoyo ni jihatai odetunie to hou obo atulo. 12Abeŋ nyia ni efuotu isi jio obo atulo, buo fe obo atulo nani obeŋ ittiyanak isi. Yesu Kristo, ta ahuan honyi, nyia italeyehi isi jihoŋ.

13 # Ehanita 8:3; 22:4-5; 26:9-11 Itayiruna nyia itai amanya nyia ni berien aŋai, ninyia héjifatio ni ekotia hunno omojorik Yudei Hollum. Ettigemio nyia ni bebe bebe, eluluŋ heruhok Hollum, buo fe awak bebe ituk isi. 14#Ehanita 22:3Agalik nyia ni haji hohoi arriai hulo Yudei te ekotia hunno omojorik Yudei Hollum. Ejifatio nyia ni bebe ettiyenita huno hohonyiok hohoi agalik isi 'daŋ.

15 # Ehanita 9:3-6; 22:6-10; 26:13-18 Ati hobeŋi isiuni ani, onyimu nyia Hollum nani ta ayiji taji honyi, ette iloŋuna ani igiamari jihonyi. Buo ninyia attuba jihonyi 16italeyehiniere Lonyi honyi jihoŋ jio, oŋida bati ani ettittoyo Asayyo honyi jio Alufajak, abeŋ nyia ni alo jio obo atulo isiŋiere ani. 17Abeŋ nyia buo fe ni alo Yerusalem imijuniere hia hinyia arai 'to a lefahat ahosiere jihoŋ. Ati eculak nyia ni teya teya ifau Arabia attati ni icohuno Damaskos.

18 # Ehanita 9:26-30 Ihalu aŋasi hunihoi, alo nyia ni Yerusalem, ikianari iko Petro. Etoŋo nyia ni ikonyi oŋitek 'tomon homiyet. 19Abeŋ nyia ni aruaŋanio iko lefahat hullomuk, arari fe Yakobo hama#1:19 aruaŋanio iko lefahat hullomuk, arari fe Yakobo hama : kuyya iko lefahat hullomuk; atulo linyia eruaŋanio 'to ikoŋ, inyi Yakobo hama., illa Lamonye. 20'Tuŋ omijak Hollum jio, arai erre hunne egiorok ni hunia, hode.

21Ojio teya, ette ni leten iŋacio fau Siria iko Silisia. 22Jio oŋitek hua, hobeŋi nyia eluluŋi huno eruhok Kristo hutta fau Yudea igonyuni omom hoŋ. 23Itaniŋuni nyia isi erre hunyia ikianai aati jiojio; “Atulo linyia ittigemio 'to hohoi berien, lia ihuania ittittoyo neruk ninyia awak inyi ittarroho!” 24Ania, ette isi itahabuyo Hollum toni.

Currently Selected:

Galasia 1: EA2003

Highlight

Copy

Compare