Ehanita Lefahat 6

Aluak Hula Hattarik

1Jio oŋitek hunia ninyia adulo eluajit heruhok ibobolororo, iloŋojitai nyia Yudei hulle ikianai 'to ekiana Grik jio Yudei hutto miji. Nyio, ojiori nyia isi jio imumunie nyia ehidahi hosi ta ahara hirre huttoloŋi. 2Ania, ette lefahat hula 'tomon harrihai, iloŋuna eruhok 'daŋ, ette jiaran jihosi, “Obeŋ obis jihohoi idehiniere ettittoyo ekiana Hollum imijiere ewahiti hunnomuk. 3Ihuania, haniyarak iko illarak hohoi, onyimuna omuk layijok hattarik tehiji hatai, hulle ifuti iko Loholio Olibo buo fe ilofioroji, oŋida ehanak isi iniafatiere egiama ania. 4Buo hohoi adi edulo amojo buo fe ettittoyo ekiana Hollum.”

5Omuno nyia eluluŋ heruhok 'daŋ ekiana lefahat ania, ette isi inyimuna Stifen linyia owon 'to iko eruk onno obolo buo fe ifut iko Loholio Olibo. Ette buo fe isi inyimuna Filipo, Prokorus, Nikanor, Timon, Parmenas, iko Nikolaus olo Antiok linyia oyito 'to berien aheruhoni Imojiti Yudei. 6Ette eluluŋ heruhok iyaru isi jio lefahat, ette isi imojo, ette iyabani ahas jihosi 'daŋ.

7Ania, ette ekiana Hollum isarrahina buo eluajit heruhok hutto Yerusalem, ette ibobolororo, buo fe ehumak arriai ette ifuotuna eruk ania.

Enefuna ono Stifen

8Ifut nyia ayiji taji iko aduaran jio Stifen, ette inyi ihanio eduariti iko ellillihita ihiji waati. 9Ati ihari nyia omuk aati hulo aaji emojit ono Aati hulla Ahohini#6:9 Aati hulla Ahohini : isi aati Yudei hunyia arai 'to apiti, ati italahuni isi ahuattek hosi kuyya ahohini nyia isi asai. (ihuo ifurani nyia aaji nyia) eram Stifen. Isi aati Yudei hinyia ofuonni 'to ta fauhien: Sirine, Alesandariya, Silisia iko Asia. Itterie nyia isi etarisa iko Stifen. 10Ati isiarak nyia Oloholio elofioro jio Stifen, ania, ninyia ikiana inyi ittallihi nyia isi itarraŋa ikonyi. 11Ania, ette isi idum omuk aati hefuahi jiaran jio, “Etayiru hohoi inyi ittarrohojio afure Mose iko ono Hollum!” 12Ihuo nyia, isusuhini nyia isi aati iko lahou buo ettiyanak ifahita. Ette isi inefuna Stifen, ette iyaru ihosiere Lokikoi Yudei. 13Attati isi iloŋuno omuk asuuti agesomok hèfuahi jiaran jiojio, “Odulo latulo olo etarrohojio afure Haji Emojit enne ittokon elibo iko efahita huno Mose. 14Etayiru nyia hohoi inyi ojio jio, itattur adi Yesu olo Nasaret Aaji Emojit enne ittokon ania, ette buo fe iloit emanyiti hunyia isio Mose jihohoi!” 15Oyohojoni nyia aati Lokikoi Yudei 'tok 'tok jio Stifen, ette isi 'daŋ igonyuna omom honyi ara ihuo ono ajilo.

Currently Selected:

Ehanita Lefahat 6: EA2003

Highlight

Copy

Compare