Ehanita Lefahat 27

Aleten Paulo Roma ta Ababur

1Ninyia ajiori jio ijiara hohoi efuo Ittali ta ababur, isiori nyia Paulo iko omuk aati babus ihas Julio, ajafit akatiba oseŋer Roma enne iloŋoi “Akatiba Hobu elle ittokon.” 2Edak nyia hohoi ababur ta Adramitiam. Awak nyia ababur ania leten jio aborejin gala ewojiti babur hutta Asia. To ninyia efuari hohoi ta atua hari, owon nyia Aristakos olo Tesalonika atta fau Masedonia ikohoi. 3Jio ebotie holoŋ, efany nyia hohoi Sidon. Oyyu nyia ataji Julio jio Paulo, ania, ette inyi iŋatana Paulo olo imijuno mottiarak honyi, oŋida isi oluahi inyi. 4Ninyia efuoi hohoi teya, ette hohoi ijafaru totto ŋati ful Saipras onno obiaŋari noyyami ohutari; nyio, ohutuno nyia noyyami totto hosiere ajihohoi. 5Ninyia ellaŋ hohoi aari enne ittok etteger Silisia iko Pamfilia, ette hohoi ifanyan ibore gala Mira atta fau Lisia. 6Diya, onyurak nyia ajafit alia obo ababur ninyia ottu 'to to Alesandariya buo ojio alo Ittali, ette itadahina hohoi jio ababur ania.

7Ogol nyia adaharu ania bebe, ania efuari hohoi yegeree, many efanyari hohoi iger bore gala Sinidas ihalu oŋitek arriai. Ati ta ahutuno oyyami totto hosiere hohoi, ebeŋ nyia hohoi eremik ifuatan ahosiere te ekoi ania. Ania, emanari hohoi totto ŋati ful Krit, etteger Salmone onno obiaŋari noyyami ohutari. 8Ejafaru nyia hohoi ta agolon totto iger otifor hari many efanyari hohoi jio obo amaji anna anya Ewojit Baburi Eyijo onno onyiha to bore gala Lasea.

9Etoŋo nyia hohoi diya fur many oyeyerari jihohoi ifuari ahosiere ta ababur, nyio, allaŋ nyia Noloŋ ono Etaliborio#27:9 Noloŋ ono Etaliborio : Inyi neyom ninyia iyomi to oŋitek Loloŋ hutte isidi, kuyya to oŋitek Owwas huttetteri. Oyeyer nyia adaha ta ababur to oŋitek hunia nyio, orroho nyia ediofo bebe.. Ania, ette Paulo iramana isi esariti huna: 10“Hottohulo, egigilo ni olo adi adaha hohoi ahosiere ta ababur irrohoji; nyio, ofuoi adi ittarroho erre hutto tua babur arriai buo fe ittarroho ababur. Iyaŋuno adi buo fe inyi aye.” 11Ati itayirio nyia ajafit oseŋer ekiana ono elettok babur iko ono lamonye babur, buo iha ono Paulo. 12Obeŋ nyia amaji ewojit baburi ania oyyu itoŋori ta ayafajin hacoro. Ania, awaharik aati arriai ifuari attua hari enne ittokon ta ababur. Nyio, igigiloi nyia isi jio hara heremik isi ifanyan Foniks itoŋori diya ta ayafajin hacoro. Ara nyia Foniks abore gala ewojit baburi otto fau Krit. Owon nyia inyi ihiji samal iko edoroi holoŋ, buo fe owon ihiji junub iko edoroi holoŋ#27:12 Owon nyia inyi ihiji samal iko edoroi holoŋ, buo fe owon ihiji junub iko edoroi holoŋ : kuyya owon nyia inyi ihiji samal iko eduoŋi holoŋ, buo fe owon ihiji junub iko eduoŋi holoŋ..

Addiŋilla otto Hari enne Ittokon

13Ninyia ahutuno oyyami dee totto junub, ette isi iwahan ihanio ariŋ oduo igigiloi isi, ette ipihuna ahide anyafada enne iriecierek ababur, ette ifuatan hulla ajafarai to olotifor Krit. 14Ati ojio ihalu kai, odioto nyia noyyami onno obolo anna anya 'to “Ehiji Samal iko eduoŋi holoŋ.” Ohutuno nyia tottono aful ania. 15Ninyia ittanniŋ oyyami ababur ania, ette igolon jio ababur ilari attany oloyyami; ania, ette hohoi iŋatana oyyami hotohutaru inyi. 16Ninyia ejafaru hohoi totto ŋati obo aful ollo odiha alla anya Kauda onno obiaŋari noyyami; ta agolon, eremik nyia hohoi italuahuna atogol ninyia owon 'to ibabur. 17Ipihuni nyia isi atogol ette ihanana ibabur, attati ififit ababur 'tid 'tid to omuk oofi. Abaŋi nyia isi jio hara hefuo isi isiak efuri suluŋayo teger lotifor Libia. Ania, ette isi ihouna addi amusiama onno osuliere oyyami ababur, ette iŋatana oyyami ohutaru ababur. 18Jio ebotie holoŋ, odulo nyia addiŋilla etaburaŋio ababur onno orroho bebe, ette isi ibiroro omuk erre hunyia iwwahatio ababur. 19Ojio iholoŋ etahunihi ette isi ipipuasara addi omuk egemita babur. 20Oŋitek arriai ebeŋ nyia hohoi egonyu oloŋ kuyya elelefi. Odulo nyia buo fe addiŋilla nyia ihutan onno orroho bebe. Tania, ebeŋ nyia hohoi eyihi jio italuahuno adi tulo.

21Ninyia atuhi aati oŋitek arriai obeŋi anyai obo ariŋ, ette Paulo iwotia ihosiere hosi, ette jiaran, “Hottohulo, hara nyia enne itayiriete itai eram hoŋ, ebeŋ nyia efuonni to Krit; ebeŋ duo buo fe enyurak ettarrohoja hirre iko eriafai ana. 22Ati attana ni itai, itagoloto atajia! Obeŋ adi obo tehiji hatai ojio aye, ati ababur adi hama orroho. 23Nyio, Hollum alla ara ni aholonyi, elle etahabuyo ni, oleyehino duo ajilo honyi jihoŋ duo arue; 24ette jiaran, ‘Paulo, hèbaŋ! Ilo adi iyye luŋa iwotia ihosiere Hobu elle ittokon. Buo ta ayiji Hollum jihoi, obeŋ adi obo tehiji waati hulle idahati 'to hulia ikoye ta ababur ajio aye.’ 25Tania, hottohulo, itagoloto atajia! Nyio, eyihi ni jio Hollum jio ara adi luŋa ihuo iramani duo jihoŋ. 26Ati ipoŋoni adi hohoi jio obo aful.”

27Jio arue etattomoni haŋuan, odulo nyia addiŋilla ipipoŋio hohoi ihari enne ittokon ono Adriya. Ninyia ara ihuo attiŋ harue, igigiloi nyia ayirok babur jio eliaha hohoi jio obo olotifor. 28Ania, ette isi ikem awudori hari, ette inyurana jio ara nyia ayardahien atomuana aŋuan. Ihutoni nyia isi ahosiere kai, ette inyiak ikem, ette inyurana ayardahien atomuana hunihoi. 29Abaŋi nyia isi jio ara holo ababur isiahina ahuan imoruoi, ania, ette isi ibironia anyafadaa aŋuan totto horuoŋ babur attua hari itawojiere ababur, ette imojo jio ijiara amotie hatafaŋa. 30Awahi nyia ayirok babur iluny addi to tua babur; ania, ette isi itusuronia atogol itua hari, ette itihanio ahuattek ihuo onno ofuoi isi ibironia omuk anyafadaa totto hosiere babur. 31Attati Paulo jiaran jio lajafit oseŋer iko jio oseŋer jio, “Alla abeŋi ayirok babur hulia arasai itua babur, obeŋ adi tulo italuahuno.” 32Ania, ette oseŋer hulia iŋiŋot oofi hunne iriatari atogol ania, ette iŋatana inyi hetelo.

33Ninyia iliaha amotie hanyik, ette Paulo ittana isi 'daŋ oŋida anyauni obo aŋiria; ette jiaran, “Ihuania itilati itai oŋitek 'tomon haŋuan ibiaŋata inyata obo aŋiyo. 34Attana ni itai, anyata obo aŋiyo itagoliere ahuattek hatai. Obeŋ adi riŋ iriafu obo jihatai, ara duadi bu ofitti.” 35Ninyia iken inyi ihuo nyia, ette inyi iduhuna obo emune, ette isio ahumo jio Hollum ihosiere hosi 'daŋ, ette ibeny, ette itter aŋiyo. 36Attati isi 'daŋ itagol atajia, ette buo fe 'daŋ ababo iŋiyo obo aŋiyo. 37Era nyia hohoi 'daŋ aati esiha arrihai iko atomuana hattarik helle (276#27:37 276 : Igioroni omuk egierita jio 275; buo omuk ojiori, ihuo 76.). 38Ninyia anyai isi 'daŋ many ifoŋi, ette isi ibironia emma 'daŋ itua hari jio oŋida ababur itawwaha.

Awuro Babur

39Ninyia afaŋ amotie, obeŋi nyia ayirok babur oheruni anani lotifor ania. Ati igonyuni nyia isi obo olotifor onno owon iko agul hari, ette isi igigilo iyirori ababur many jio amaji nyia, ollo oremik. 40Ania, ette isi iŋutoro addi anyafadaa etawojita babur, ette idehina isi odiori attua hari enne ittokon. Jio asaa nyia, ette isi buo fe ihouna addi oofi huno eyek hunne igurierek ababur, ette isihina amusiama otto hosiere babur oŋida noyyami ohutaru ababur ahosiere, ette hohoi ifuatan attany olotifor. 41Ati isiak nyia ababur efuri suluŋayo ette iwotia; ette osiere honyi iriata, ette igolihina 'tiŋ 'tiŋ, buo apoŋia poŋia hari ette iwuwur ehalu honyi tuny tuny.

42Iwwahuni nyia oseŋer ittohori aati babus 'daŋ, nyio, ŋadi isi oriŋari many ilotifor ette iruat. 43Ati itik nyia ajafit isi ihaniere ihuo nyia, nyio, awak nyia inyi italuahuna Paulo. Attati inyi ihum iramana hia daŋ hullo omijani 'to arriŋita, oŋida itterie alluhina itua hari, ijiara oriŋarai ilotifor, 44buo atimok inefi abauhien iko omuk eŋuanyiti babur ette ijifana. Ania, ette hohoi 'daŋ ifanyan onno oyyu ilotifor.

Currently Selected:

Ehanita Lefahat 27: EA2003

Highlight

Copy

Compare