Ehanita Lefahat 22

1“Yudei hohoi, itayiriete, ijiara nani efau ahuan hoŋ to hosiere hatai!” 2Ninyia itaniŋuni isi inyi ikiana jihosi te ekiana Ebrei, ette tibuo isi ihum idua 'liŋ 'liŋ, buo Paulo ette jiaran:

3 # Ehanita 5:34-39 “Ani olo Yudei, isioi nyia ani ibore gala Tarsas atta fau Silisia. Abolorok ni Yerusalem dini aheyiyanani olo Gamaliel. Ehum nyia ni ittiyenuna efahita hohonyiok hohoi 'daŋ, buo fe amuno egiama jio Hollum to ataji hoŋ 'daŋ ihuo itai 'daŋ hulle iwanata 'to dini ahana. 4#Ehanita 8:3; 26:9-11Ettigemio nyia ni many liye, aati hulle ijifatie 'to Ekoi ana. Enefutta nyia ni aliawa iko aŋoruo 'daŋ, ette itifitana ibabus. 5Oremik ehumani elle ittokon iko Aati Okikoi Yudei itahutana jio ekiana ni elahode. Efuotu nyia ni jihosi awaragaa jio oŋida ni eyaru jio Yudei hohoi hutto Damaskos. Ania, alari ni diya inefuniere aati hia ette ni iyaŋuno isi hulle ifitai Yerusalem oŋida ofuonni ittigemio.

Iramak Paulo Aŋai Enyaluho Inyi Aheruhoni

6“To ninyia alari ni many eliahari ni Damaskos, teya teya, ninyia ara ihuo akil fanni inuok nyia obo nafaŋan tedou amaji ninyia awanari ni, 7ette ni ikuahino ifau, ette ni itayiruna ekiana ojio jihoŋ jio, ‘Saul, Saul! Nyio ittigemio iyye nani?’ 8Buo ni ette ifiyo jio, ‘Lamonye, ŋai iyye?’ Itarraŋ nyia inyi nani ojio, ‘Nani Yesu olo Nasaret elle ittigemio iyye alia.’ 9Igonyuni nyia aati hinyia edaha 'to ikoŋ afaŋan, buo obeŋi itayiruni etuk ono lia linyia ikiana 'to jihoŋ. 10Efiyo nyia ni inyi jiojio, ‘Lamonye, ehan 'tadi ni anyio?’ Buo inyi ette jiaran jihoŋ, ‘Otte, ilo Damaskos, buo diya ofuoi adi iramana jihoi erre 'daŋ hunyia ocoroni jio oŋida iyye ihanio.’ 11Abeŋ nyia ni aremik mijio, nyio, ogol nyia efaŋit nyia bebe. Ania, ette aati hinyia edaha 'to ikoŋ irihoro nani Damaskos.

12“Owon nyia obo latulo itua bore gala ania, afure honyi Ananiya. Ara nyia inyi a habaŋani Hollum ollo oniŋio Efahita hohoi. Ikianai nyia Yudei 'daŋ hulla amanyai 'to diya onno oyyu tenyi. 13Ottu nyia inyi jihoŋ, ette iwotia iger hoŋ, ette jiaran, ‘Illaŋ Saul, inyiaha mijio!’ Teya teya, ette oŋite hoŋ inyiak mijio, ette ni igonyuna inyi. 14Attati inyi jiaran jio, ‘Anyimu iyye Hollum olo hohonyiok hohoi imijaniere awahan honyi, igonyuniere Legiamani honyi labisani, buo fe itayiruniere inyi ikiana te etuk honyi. 15Nyio, ira adi iyye ahetamijanani honyi jio aati 'daŋ, iramaniere erre hunne igonyu iyye buo fe itayiru. 16Anyio enne inyiak iyye itila? Otte, ifuotu batisimo; ijiara illillari eyyata hoi addi ta amojo hoi jio Lamonye.’

Onyimuni Paulo Oŋida Ittittoyo jio Alufajak

17“Ninyia acaharu ni Yerusalem, amojo nyia ni itua Ihaji emojit enne ittokon, ette obo ariŋ ileyehino jihoŋ ihuo arigia. 18Egonyu nyia ni Lamonye ikiana jihoŋ jiojio, ‘Adahai kuak, ilo kokuak addi to Yerusalem. Nyio, obeŋi adi aati honyi iruhi ekiana hoi toni.’ 19Buo ni ette itarraŋ inyi jiojio, ‘Lamonye, omijani isi 'daŋ bebe jio, to hasik emojiti, etifitatta nyia ni buo fe abahatio aati 'daŋ hulle iruhi 'to jihoi. 20#Ehanita 7:58 Duadi bu ninyia ottohorik Stifen, asuut hoi, awon nyia ni diya buo fe eruhok attohoro honyi. Attoŋotio nyia buo fe ni aboŋojin hattok honyi.’ 21Buo Lamonye ette jiaran jihoŋ, ‘Ilo, nyio, efak adi ni iyye alamarai jio Alufajak.’ ”

22Itayirie nyia aati jio Paulo many ikenuniere inyi erre hunia; attati isi iwuwoŋita jiojio, “Ottohoro atulo alia! Obeŋ nesu osiru jihonyi!” 23Iwuwoŋitai nyia isi, ette igiguas aboŋojin hosi ta ajore, ette ikur attuduha ahide duk duk. 24Attati akumudal olo oseŋer Roma iramana oseŋer honyi oŋida iyarai Paulo ibore oseŋer. Ihum nyia inyi iramana isi oŋida abahi Paulo ittittifuniere awoyo hiram enne iwuwoŋitarik aati Yudei jihonyi. 25Buo ninyia ifiti isi inyi oŋida abahi, ette Paulo jiaran jio obo ajafit linyia owotia 'to diya, “Aŋatani soho efahita itai ibahiere atulo Roma buo hobeŋi oŋotoni jihonyi epali?”

26Ninyia itaniŋu ajafit lia eram ania, ette inyi leten jio akumudal, ette ifiyo jiojio, “Iwak iyye ihanio anyio? Ara atulo lia a holo Roma!”

27Ania, ette akumudal leten jio Paulo, ette ifiyo jio, “Iramak nani, ira iyye atulo Roma?”

Itarraŋ nyia Paulo ojio, “Aafe.”

28Buo akumudal alia ette jiaran, “Adumak nyia ni agurusi arriai irari atulo Roma.”

Buo Paulo ette itarraŋ ojio, “Buo jihoŋ, isiuni nyia ani atulo Roma.” 29Teya teya, ette aati hinyia ofuonni 'to ittifia epalita Paulo, idehina inyi; ette buo fe akumudal ibaŋi, ninyia amijak inyi jio, ara Paulo olo Roma, buo fe inyi nyia itifit Paulo.

Itiwwahie Paulo Ilokikoi Yudei

30Jio ebotie holoŋ, awak nyia akumudal alia luŋa imijana eram enne itisiahinierek Yudei Paulo. Ania, ette inyi itahouna ajiŋiri Paulo addi, ette iramana ehumak elettaha iko aati Lokikoi Yudei 'daŋ oŋida ottubanie. Attati inyi iyaŋuno Paulo, ette itawojihina ihosiere hosi.

Currently Selected:

Ehanita Lefahat 22: EA2003

Highlight

Copy

Compare