Ehanita Lefahat 20

Aleten Paulo Masedonia iko Akaya

1Ninyia atuho ehosok, ette Paulo ittubana eruhok amaji abotie, ette itagol atajia hosi, ette ifonyana isi, ette leten Masedonia. 2Olo nyia inyi totto ŋacio afau ania, buo itagoloro atajia heruhok te esiŋita arriai. Attati inyi ittuna Akaya, 3ette itoŋo diya ayafajin hunihoi. Ninyia ajio inyi alo Siria, itayiru nyia inyi jio iwwahuni omuk Yudei ittohoro inyi. Ania, odiotori to hou honyi icahari totto Masedonia. 4Ofuoi nyia isi iko aati hulo; Sopata lonyi Piros to Berea, Aristakos iko Sikundos hulo Tesalonika, Gayos to Derbe, Tikikos iko Trofimos hulo Asia, buo Timoteyo. 5Ofuoi nyia isi ahosiere, ette itila hohoi ibore gala Trowas. 6Buo hohoi ette ifuatan to Filipi ta ababur ihalu neyom ono emune onno obeŋ lobou. Ihalu oŋitek miyet, ette hohoi ittubanio ikosi Trowas. Etoŋo nyia hohoi diya esabit abotie.

Ecuŋi Leten Paulo Trowas

7Nyia kekai to oloŋ Itilleji#20:7 Itilleji : kuyya Dominika., ettubanio nyia hohoi iŋiyere aŋiyo ono Lamonye. Ania, ette Paulo ikiana jio aati, ette iduloro ekiana many arari attiŋ harue. Nyio, awak nyia inyi leten ebotie holoŋ. 8Owulori nyia allomohien arriai itua haji otto amara ninyia ettubari hohoi. 9Owon nyia obo anyarhaluti diya, afure honyi Yutikos. Itoŋo nyia inyi isubak. Buo ninyia odulori Paulo ekiana, ijeŋita nyia anyarhaluti alia bebe bebe, ette ijotoro, ette ikuahuno to haji etahunihi otto hide many ifau. Ninyia akafi isi inyi, onyurani nyia isi inyi aye. 10Ati isuru nyia Paulo ifau, ette irrafa jihonyi, ette ifouna inyi, ette jiaran, “Hèlafuhoti, hesu inyi!” 11Attati idahan ahide amara, ette ibeny emune, ette iŋiyo iko eruhok hullomuk, ette iyaba ikosi many afaŋari amotie, ette leten. 12Iyarai nyia isi anyarhaluti lia haŋ elle isu, buo atajia hosi ette ilik bebe wauu.

Aleten Paulo to Trowas Many Miletos

13Eculak nyia hohoi ahosiere many ibabur, ette hohoi ifuatan tenyi Asos, amaji ninyia efuari hohoi ikafari Paulo. Nyio, iramaru nyia inyi hohoi ihaniere ihuo nyia, buo inyi olo diya te eejek. 14Ninyia eruaŋanio inyi ikohoi Asos, ette hohoi ikafaru inyi ta ababur, ette hohoi icul Mitalin. 15Teya, ette hohoi ifuatan many iger Kiyos ebotie holoŋ. Buo ihalu oloŋ abotie, ette hohoi ifanyan Samos; buo jio oloŋ onnobo ette hohoi ifanyan Miletos. 16Odioto nyia to hou Paulo igaluniere Efeso, nyio, obeŋ nyia inyi awak illiŋia ifau Asia fur. Awak nyia inyi iruharu Yerusalem, kuyya bati alla aremik inyi ifanyan diya to oloŋ Pentakoste.

Ikiana Paulo jio Lahou hutte Efeso

17Ifak nyia Paulo eram jio lahou heruhok hutto Efeso, buo inyi howon Miletos jio oŋida isi arraŋi inyi. 18Ninyia afuonni isi, ette inyi jiaran jihosi, “Many tetteri holoŋ ninyia afanyari ni ifau Asia, imijana itai etoŋo nyia ni aŋai ihiji hatai. 19To oŋitek huno ettigemita hunyia ofuonni 'to jihoŋ ta awahan Yudei ittohoro nani, egiama nyia ni jio Lamonye ta anyalami 'daŋ iko te eyyoo. 20To ninyia ettittoyere ni buo fe ettiyenio ihiji waati iko ihaŋitek hatai, imijana itai jio, abeŋ nyia ni edimak obo ariŋ onno oremik 'to iluak itai. 21Ta agolon, asar nyia ni Yudei arabotie iko Alufajak jio oŋida obusani eyyata hosi, hotoyituniehe jio Hollum, buo fe oŋida iruhi jio Yesu, Lamonye hohoi. 22Ihuania, alo ni Yerusalem ihuo iramak nani Loholio Olibo. Ati abeŋ ni amijak anyio onno olo 'to iduoŋ jihoŋ diya. 23Ati asario nani Loholio Olibo jio, alo adi ni irumana efita iko ettigemita jio aborejin gala 'daŋ ababo. Ariŋ alia ijiai alla amijak ni. 24#2Tim 4:7Ati jihoŋ, ara nesu hoŋ ariŋ asai. Ariŋ anna awak ni ijiai, inyi atuhonia egiama ninyia isiarak Yesu, Lamonye, jihoŋ. Egiama ania, inyi ettittoyo jio aati Asayyo Ayijok huno ayiji taji Hollum.

25“Ihuania amijak ni jio, obeŋ adi obo jihatai 'daŋ hunyia eluttari ni buo ettiyenio eram ono Nolobie Hollum, inyiak igonyuna omom hoŋ. 26Tania, ehum ni ahana iramana jihatai jio, alla alitohi obo alatai to hosiere Hollum, obiaŋara eram hoŋ nyia. 27Nyio, abeŋ nyia ni amuanak obo ariŋ to ninyia ettiyeniere ni itai erre 'daŋ hunna awak Hollum. 28Tania, ihumata irriria ahuattek hatai iko eluluŋ kioro 'daŋ enne ihanak Loholio Olibo ihas hatai. Irata a heyyahak hulo eluluŋ heruhok Hollum#20:28 Hollum : igioroni omuk egierita jio, Lamonye. hunyia iduhu inyi a hulonyi to nooto Lonyi honyi#20:28 to nooto Lonyi honyi : kuyya, ta naye Lonyi honyi anna ara 'to ehumi; kuyya. 29Amijak ni jio alla alo ni, ofuonni adi elewoo tehiji hatai hullo orrohoji bebe. Obeŋi adi ofitoni akioro hunia. 30Ofuonni adi oŋitek hunne ikianarik adi omuk aati tehiji hatai erre hunne ipali 'to jio, oŋida eruhok ijifatie ehalu hosi. 31Ihumata ti mijio buo fe igiluna jio, te eyyoo, adulo nyia ni oŋitek 'daŋ asario itai 'daŋ ababo, to oloŋ iko ta arue, aŋasi hunihoi.

32“Ihuania, esiarak ni itai ihas Hollum iko jio asayyo huno ayiji taji honyi. Isi oremihini itaboloruna itai, buo fe isiori jihatai emuniti hunno owoni 'to jio Hollum ahuno aati honyi 'daŋ. 33Abeŋ nyia ni adaya abilata aboŋ, kuyya ayyel, kuyya aboŋo obo atulo. 34Imijana itai ta ahuattek hatai jio, egemu nyia ni erre 'daŋ hunna awak ni iko hunna awahi mottiarak hoŋ, ta ahas hoŋ huna. 35Te erre 'daŋ, etahutak nyia ni itai jio, ta apulo bebe, ijiara luŋa eluak aati hullo obolo ettigemio jihosi, buo egilutta ekenita huno Yesu Lamonye, ninyia ojiari inyi jio, ‘Obolo amuno te esiarana hirre agalik te efuotuna.’ ”

36Ninyia atuhok Paulo ekiana, ette inyi irigoŋi ikosi ifau, ette imojo. 37Itihitai nyia eyyoo to hoŋite hosi 'daŋ to ninyia imosoyerek isi Paulo buo fe ifonyie inyi ta ahucio 'yaha. 38Odiahai nyia atajia hosi bebe te eram ninyia ojiari inyi jio obeŋi adi isi inyiahi igonyuna omom honyi. Ania, ette isi inyiamana inyi ibabur.

Currently Selected:

Ehanita Lefahat 20: EA2003

Highlight

Copy

Compare