2Korinto 12

Erre hunne Italeyehini jio Paulo

1Ijiara tibuo nani etadara, duadi bu obeŋ inyi iyaŋuno obo ayiji jihoŋ. Ati, alo ni ihuania ikiana erre hunne italeyehi Lamonye jihoŋ ihuo arigiai. 2Amijak ni obo olo Kristiani linyia iniafarai lidou anna alama 'to diu diu; ihuania allaŋi aŋasi 'tomon haŋuan. (Atimo ni kuyya iduoŋ nyia eram ania hode, kuyya oleyehino nyia obo ariŋ jihonyi ihuo arigiai. Hollum hama omijak.) 3-4Enyiak fe ni idas jio amijak ni jio, iyarai nyia atulo alia Paradisio. (Ati, atimo ni kuyya iduoŋ nyia eram ania hode, kuyya oleyehino nyia obo ariŋ jihonyi ihuo arigiai. Hollum hama omijak.) Diya, itayiru nyia atulo alia erre hunne ittallik etuk iramuna; erre hunne ittallik etuk tulo ikenuna. 5Tania, aremik ni itadara te eram atulo alia iko te eram hirre hunne itahutana elik ottonoŋ, buo obiaŋara te eram huan hoŋ. 6Ettallik ni irahan olobuyaŋ, alla awak ni itadara; nyio, ekiana adi ni nelahode. Ati, ettallik ni itadara, nyio, ŋadi obo atulo igigilo jio ayyu ni, buo hobeŋ igonyu erre hunne ehanio ni, kuyya itayiru ekenita hoŋ.

7Ati, isiarani nyia jihoŋ ettigemio onno omi jio, ŋadi etadara ifut jihoŋ te erre hunne italeyehini jihoŋ. Ara nyia ettigemio ania ihuo ariŋ enne ifahu Sittan idulori ittigemiere nani jio, hèlaha etadara ifut jihoŋ. 8Amojo nyia ni enyiahita hunihoi jio Lamonye jio, ijiara iduha ariŋ ania addi. 9Ati itarraŋ nyia inyi jiojio, “Oremik ayiji taji hoŋ jihoi, nyio, obolo agolon hoŋ bebe elle ilik iyye.” Amuno tibuo ni bebe te etadara hoŋ te elik ottonoŋ jio, oŋida bati agolon Kristo owon jihoŋ. 10Te neram Kristo, efotu ni nelik, emoriti, agolon manya, ettigemita iko arrohojita. Nyio, elle elik ni, ette tibuo ni golon.

Igigilo Paulo te Eram Waati Korinto

11Ara ni ihuo atulo ollo obeŋ hou! Itai irosonia nani irari ihuo nyia. Itai duo luŋa iremehina ikiana onno oyyu toni. Nyio, duadi bu ara ni atulo asai, ittallihi aati hulle itahuyete itai jio arai “elefahat” igalihini nani. 12Itahutani eduariti iko ellillihita arriai hunyia ehanio ni jihatai ta adihan jio, ara ni elefahata hode. 13Anyio riŋ ninyia ehan ni jio eluluŋi heruhok hunnomuk buo abeŋ ehan jihatai? Arari fe abiaŋan hoŋ ittigemio itai imojori eluahiti. Ajio ni jihatai hibenna awotto te epali hoŋ ania. 14Ihuania, attuba jihoŋ ilari imijuniere itai enyiahi etahunihi. Abeŋ adi ni attu imojo omuk asaŋ jihatai. Ahuattek hatai hunna awak ni, buo obiaŋara asaŋ hatai. Nyio, ittallihi iŋiayai itaŋiyo esiok hosi, ati, esiok oremehini itaŋiyo iŋiayai hosi. 15Amuno ni bebe iŋohiniere asaŋ iko ahuan hoŋ 'daŋ iluahiere itai. Alla abuor ataji hoŋ itai bebe, ijiara ti hunatai obuori nani kai?

16Iruhoto adi itai jio, abeŋ nyia ni ettigemio itai. Ati, ojio adi obo jio ageny nyia ni genyan, buo fe etirietu itai ta agesemita. 17Emumun nyia ti ni itai to obo atulo tehiji hinyia efak ni jihatai? 18Attana nyia ni Tito hételo jihatai. Efak nyia ni eruhoni ollobo ikonyi. Imumun nyia 'tadi Tito itai? Ebeŋ nyia ti hohoi egiama ta ataji abotie iko te ekoi abotie?

19Igigiloti ti itai jio, efayo hohoi ahuattek hohoi ihosiere hatai? Obeŋ! Ekiana hohoi ihuo awak Kristo hohoi ekiana ihosiere Hollum. Illarak iko haniyarak hohoi, erre 'daŋ hunne ehanio hohoi, arai eluahiti hatai. 20Abaŋ ni jio, alla afany ni dinia, obeŋi adi ehanita hatai oyiji jihoŋ; buo fe itai adi igonyuna jio obeŋi buo fe ehanita hoŋ oyiji jihatai. Abaŋ ni luŋa jio, attu adi ni irumana aŋalafa, ahaini, ajore, aluo, etarrohojo fureta waati, amuaŋa, etadara iko amanya asai asai. 21Abaŋ ni jio elle enyiak ni ittuna, ottu adi Hollum hoŋ itaŋarijonia nani ihosiere hatai. Alo adi ni iyyoo te eram waati arriai hunyia iyyauni 'to berien buo fe obeŋi idehini erre somon hunyia ihanie isi…amuno hosi erre somon iko eyyata huno asomon.

Currently Selected:

2Korinto 12: EA2003

Highlight

Copy

Compare