1Korinto 3

Egiamak Hollum

1Illarak iko haniyarak hoŋ, hode, ettallik nyia ni ikiana jihatai ihuo enne ekianari ni jio aati hullo owoni 'to iko Oloholio. Ati ekiana nyia ni jihatai ihuo elle irata nyia itai a hulo afau ana, ihuo odolio jio eruk Kristiani. 2#Ebrei 5:12-13Etamacio nyia ni itai nalee, buo abeŋ etaŋiyo itai aŋiria; nyio, hèbiaŋata nyia itai iremehina aŋiyo. Duadi bu ihuania, hèbiaŋata itai iremehina iŋiyo; 3nyio, hémanyati itai ihuo aati afau ana. Ollo howon ahaini iko aŋalafa ihiji hatai, obeŋ ti ania itahutak arahan hatai a hulo afau ana, buo fe imanyati te emanyiti afau ana? 4#1Kor 1:12Alla ajio obo jio, “Ara ni a holo Paulo,” buo obo ojio jio, “Ara ni a holo Apolo,”…ibiaŋata ti itai ihaniete ihuo aati afau ana?

5Ŋai buo Apolo? Ŋai buo Paulo? Era hohoi a hegiamak Hollum ijiai, hinyia eyaŋuno 'to jihatai neruk. Ehanio hohoi 'daŋ ababo egemita hunyia isiarak Lamonye jihohoi. 6Edulak ni aŋerio, buo Apolo ijalak aari, ati Hollum, itaboloru inyi. 7Tania Hollum fe elle itaboloru 'to inyi ayyani, inyi alla agalik 'to, ati obiaŋara lia elle idulak 'to iko elle ijijalak 'to aari. 8Orriamari atulo elle idulak 'to iko elle ijalak 'to aari. Ifuotuni adi isi 'daŋ ababo edumiti hunno oremehini te egemita hosi 'daŋ ababo. 9Era hohoi a hegiamak arabotie hulo Hollum, buo itai irata a mana honyi.

Irata itai buo fe a haji Hollum. 10Te esiorio ninyia isiarak Hollum jihoŋ, ehuhumak nyia ni etawoji haji ihuo atulo ollo omijak 'to aduho bebe; buo obo atulo hama ette iduhonia aaji ihide honyi. Ati, ihumata 'daŋ ababo imijio iduhoti itai aŋai. 11Obeŋ obo atulo inyiak ihuhum obo etawoji, arari fe ninyia ihuhumak Hollum; inyi Yesu Kristo. 12Oduhok adi obo aaji ihide etawoji ania ta ayyel, kuyya ta abilata aboŋ, kuyya ta amoruoi hunno opipiahi, kuyya te neyek kuyya ejuti kuyya ta abahala. 13Oleyo adi ayiji ono egemita waati 'daŋ ababo Iholoŋ ono Aŋocio Hiram. Nyio, jio Noloŋ nyia, okemi adi egemita waati 'daŋ ababo te neema. Okem adi neema egemita hunia ette itahutana ayiji hosi. 14Alla afitok eema ariŋ ninyia oduhoni ihide etawoji ania, ifuotu adi aduhoni honyi esiori. 15Ati alla atuk eema ariŋ onno oduhok obo, olitohi adi ariŋ nyia; buo italahuni atulo lia ihuo atulo elle irisu 'to totua hima.

16 # 1Kor 6:19; 2Kor 6:16 Itimoti soho itai jio irata itai a haji Hollum, buo fe Oloholio honyi amanya jihatai? 17Elle ittarroho obo aaji Hollum, itamuhi adi Hollum inyi. Olibo aaji Hollum, buo itai luŋa irata ahaji nyia.

18Hèlaha obo atulo inyobio ahuan honyi. Elle igigilo obo jihatai jio elofioro inyi jio aati hula afau ana, ijiara inyi imannaŋa do, oŋida bati inyi ilofioro. 19Nyio, ara elofioro ono afau ana emannaŋa to hosiere Hollum. Ihuo igioroni ibuk Hollum jio, “Inefutta Hollum alofiorojok te egenyiti hosi.” 20Buo fe inyiak jiaran jio, “Omijak Lamonye jio arai egigilita lofiorojok a hirre asai.” 21Tania, hèlaha obo atulo itadara te erre hunno oremehini aati ihanio; nyio, arai erre 'daŋ a hunatai: 22duadi bu Paulo, kuyya Apolo, kuyya Petro, kuyya afau ana, kuyya nesu, kuyya naye, kuyya ihuania, kuyya moi, arai isi 'daŋ a hunatai; 23buo itai irata a hulo Kristo, buo Kristo ara a holo Hollum.

Currently Selected:

1Korinto 3: EA2003

Highlight

Copy

Compare