Dhek 2

Nyuuth de Wïn ë Thëm

1Na wën, aa jat a nyin nhial, ke ya tïŋ raan akääc në yanɔm tueŋ ke muk wïn ë thëm në yecin. 2Guɔ luɔp an, “Lɔ ënou?

3Go puk nɔm an, “Yɛn lɔ Jeruthalem them në bɛ̈ɛ̈r bɛ̈ɛ̈r en kɔ̈u, ayï dït de yeyic.

Na wën, ke ya tïŋ tunynhial wën jam ke yɛn ke jäl, ku bïï ë tunynhial däŋ rɔ̈m ke yen.

4Ku lëk en an, “Kɔt, lɔ lɛ̈kë ee wën dhuŋ muk wïn ë thëm an, Jeruthalem abï yïk cït man ë bɛ̈i, ka acïn kal bï yïk, ku abï thiäŋ ke kɔc juëc arëët, ku ɣɔ̈k juëc. 5Ku yɛn guöpdï, yɛn abï ya kal ë mac, kë bï ye gël. Ku ee yɛn abï ya dhuëëŋdɛn tɔ̈u yeyic thïn. Yen kë cï Bɛ̈nydït lueel ka.

Kɔc cï Peec Acöölë ke Baai

6Go Bɛ̈nydït cööt an, “Katkï, bäkï. Kualkï röt piny lɔ të lɔ rut. Në biäk cän we thiäi piny në aguuk ke pinynɔm kaŋuan yiic. 7Kual rɔt Babilonia, Bäkï Dhiɔn ë Jeruthalem. 8Kë cï Bɛ̈nydït de rɛm lueel kï.

Të ɣɔn cï yen ɛn dhuëëŋ guöp,#2:8: Ɣeberuu acï wël kɔ̈k tääu, ku kë lueel acie yökic. ku juöör cï kɔcke peec la lɛ̈k keek an, “Raan lɔ we jak, ka ë nyin cooldï jakic. 9Yɛn bï yaciin yɔ̈k keek, ka abï lïïmken ke peec. Yen abä wek en jɔ ŋic nɔn cï Bɛ̈nydït de rɛm ɛn tooc ë yic.

10Ku lueel ë Bɛ̈nydït an, “Kiëtkï në miɛtëpiɔ̈u arëët, nyan de Dhiɔn. Yɛn bɔ̈ bä bɛ̈n rëër në weyiic!

11Ku ëtɛ̈ɛ̈n, juöör juëc ëbɛ̈n abïk bɛ̈n tëde Bɛ̈nydït, ku tɔkï röt ee kɔckï ku Yɛn bï bɛ̈n rëër në weyiic, ka abäk jɔ ŋic ëgɔk nɔn cï Bɛ̈nydït de rɛm yɛn tuöc week ë yic. 12Ku Juda abï bɛ aa këde Bɛ̈nydït në pinydɛn ɣeric. Ku abï Jeruthalem bɛ lɔc.

13Raan ëbɛ̈n ë lɔ dïu në Bɛ̈nydït nɔm, Bɛ̈nydït ë rɔt jɔt tëdɛn ɣeric rëër en thïn.

Currently Selected:

Dhek 2: dip-JPB

Highlight

Copy