Dhek 10
10
Bɛ̈nydït Athɛn Luääk
1Liɛpkï Bɛ̈nydït në deŋ yaak. Ee Bɛ̈nydït yen ee luät ke deŋ bɛ̈ɛ̈i, ku tɔ deŋ tueny, go këriëëc de raan ëbɛ̈n luɔk domic. 2#Math 9:36; Mak 6:34. Kɔc aye yiëth ke math, ku törë tït keek lueth. Ayek nyuöth ë lueth, ku bïïkï kɔc piɔ̈ɔ̈th në ɣäär yiic. Ka kɔc acïk yiëëm cï thök cï määr. Ayɔŋ keek në biäk cïn kek nïïm bɛ̈ny.
3Aye Bɛ̈nydït lueel an, ‘Yɛn ë piɔ̈u diu arëët wökë tïït, yɛn bï bäny luöi këtuc. Kɔc ke Juda ayek kɔckï ku abä keek tiit në yɛn Bɛ̈nydït de rɛm guöpdï. Abä ke tɔ cït jöŋgöör amiɔ̈l në kööl ë tɔŋ. 4Bäny ke luk, ku bäny ke tɔŋ, ku bäny ke wut abïk aa bɛ̈n bei në kɔc ke Juda yiic.#10:4: Në kɔc...yiic; nɔn Ee kɔc ee kɔc yɔŋ bäny ke baai, bäny ke kɔc, ku bäny ke rem de tɔŋ, abïk jäl kedhie në Juda. 5Kɔc ke Juda abïk aa tiam cït man ë rem de tɔŋ, ku dumkï kɔckɛn ke ater piny ë tiɔɔm de kuɛɛr yiic. Abïk rem de tɔŋ ë jöŋgöör aa tiaam, në baŋ tɔ̈u ë Bɛ̈nydït ke keek.
6“Yɛn bï baai de Juda tɔ ril,
ku luäk baai de Yithriɛl.
Yɛn bï piɔ̈u kok wo keek,
ku bɛ̈ɛ̈i keek ciëën baai kedhie.
Abïk ciët ka kɛ̈n ke kɔn rɛɛc taitai.
Ee yɛn ee Bɛ̈nydït Nhialicden, ka lɔ̈ŋden abä piëŋ keek.
7Kɔc ke Eparaim abïk riɛl cït rem de tɔŋ,
ku abïk piɔ̈ɔ̈th miɛt cït kɔc ë dek mɔ̈u.
Kuatden abïk ee kënë tïŋ ku mitkï piɔ̈ɔ̈th,
ku leckï Bɛ̈nydït në kepiɔ̈ɔ̈th në biäk de kë cï looi.
8Acï Bɛ̈nydït lueel an,
“Yɛn bï kɔckï cɔɔl ku mat keyiic tëtök.
Abä keek luäk bei ë yic,
ku ta keek kɛɛr arëët cït man ɣɔn tueŋ.
9Na cakaa nɔn cän ke thiäi ë juööriic,
abïk Yɛn tak ke ke mec ëtɛ̈ɛ̈n.
Abïk pïïr në mïthken ëtök,
ku abïk kenïïm bɛ puɔ̈k wunden kedhie.
10Abä keek bɛ̈ɛ̈i ciëën Rip ku määt keyiic në Athiriya,
ku bä ke tɔ piäät Giliyad kekë Lebanɔn ayadäŋ,
ka piny ëbɛ̈n abï thiäŋ kekë kɔc.
11Wadäŋ të teem wɛ̈ɛ̈r de katuc,
yɛn bï apiöök yupic, yɛn Bɛ̈nydït,
ku Kiir abï dëu taitai.
Lɛc de Athiriya abï kuɔɔr piny,
ku nyiɛɛi yë riɛl de Rip.
12Kɔckï abä keek tɔ ril,
Abïk Yɛn aa gam thök, ku dhuëŋkï ya rin.
Acïï Bɛ̈nydït Lueel.
Currently Selected:
Dhek 10: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
