Rom 8

Pïïr në Wëi

1Yen ka, acïn gääk be nu ë kɔc yiëth kɔc nu ë Kërtho Yecuyic, kek kɔc cie tɔ̈u ë täu de guöp, ayek tɔ̈u ë täu de wëi. 2Ku löŋ de Wëi ke pïïr, löŋ nu ë Kërtho Yecuyic, acï a luöny bei në löŋ de kërac kekë thuɔɔu. 3Kë cï löŋ dhal ë luɔi, në kɔ̈c kɔ̈ɔ̈c en në baŋ de guöp, acïï Nhialic ŋiëc looi, wään tooc en Wënde guöp, ke cath ke guöp cït guöp deyic kërac, ku aa tuuc në baŋ de kërac, ago kërɛɛc nu ë guöpic gɔ̈k. 4Luɔi bï kë lueel löŋ aa tiiŋic ë woyiic, wok kɔc cie tɔ̈u ë täu de guöp, wok ee tɔ̈u ë täu de Wëi. 5Kɔc ee tɔ̈u ë täu de guöp ayek ka ke guöp tak, ku kɔc ee täu ë täu de Wëi ayek ka ke wëi tak. 6Täŋ ee raan ka ke guöp tak yen aye thuɔɔu, ku täŋ ee raan ka ke Wëi tak yen aye pïïr ku ye mät. 7Ë luɔi de yen ater kekë Nhialic, yen täŋ ee raan ka ke guöp tak, ku acïï këde löŋ de Nhialic ee piŋ, ku acie lëu ë pïŋ ayadäŋ. 8Yen ka, kɔc ee tɔ̈u ë täu de guöp acïkï Nhialic duëër tɔ mitpiɔ̈u.

9Ku week, wek cie tɔ̈u ë täu de guöp, ee täu de wëi yen täu wek, të rëërë Wëi ke Nhialic ë weyiic ëyic. Ku na de raan nu raan cïï cath ke Wëi ke Kërtho, ka cie këde. 10Ku të nu Kërtho ë weyiic, ke guöp ë thou në baŋ de kërac, ku pïïr Wëi në baŋ de piathëpiɔ̈u. 11#1 Kor 3:16. Ku të rëërë Wëi ë weyiic, ke Wëi ke Raan wään cï Yecu jat nhial ë kɔc cï thou yiic, të rëër kek ë weyiic, ke Raan cï Kërtho jat nhial ë kɔc cï thou yiic, yen abï week tɔ pïïr gup gup de yiic thuɔɔu, në riɛl ë Wëikɛn ee rëër ë weyiic.

12Yen ka, wek mïthëkɔckuɔ, luɔi bï wok ka ke guöp aa looi, acïï nu ë woyiic, 13ku të ya wek ka ke guöp looi, ke we bï thou, ku të ya wek luɔi de guöp yiëkic thuɔɔu në riɛl ë Wëi, ke we bï pïïr. 14Kɔc ëbɛ̈n kɔc ee thel ë Wëi ke Nhialic, kek aye wɛ̈ɛ̈t ke Nhialic. 15#Gal 4:5-7. #Mak 14:36; Gal 4:6. Wek kënë bɛ gäm piɔ̈n ë lïïm, piɔ̈n ë riɔ̈ɔ̈c, wek cï gäm piɔ̈n ë mïth cï muk, piɔ̈n ë wo tɔ cöt an, “Abba! Wääda!’ 16Wëidït gup kek aye jam në piɔ̈ɔ̈thkuɔ ëtök, alëkkï wook nɔn ee wok mïth ke Nhialic. 17Ku tën ee wok mïth, ke wo bï käŋ lɔ̈ɔ̈k lak, wok ee mïth bï ka ke Nhialic lɔ̈ɔ̈k lak, ku löökku käŋ rɔm ë Kërtho ëtök, na yok käŋ guum në yen ëtök, ke wo bï gäm dhuëëŋ ëtök.

Dhuëëŋ Wadäŋ

18Cöök cä kueen ë yapiɔ̈u ka an, Karac yok guum ënɔɔnë, acïnkï naamden, acïkï duëërë kiëët ë dhuëëŋ bï dap nyuöth wook. 19Ka cï cak ëbɛ̈n ayek käŋ ŋɔ̈ɔ̈th arëët, atitkï kööl ë tïc bï wɛ̈ɛ̈t ke Nhialic tïc. 20#Cäk 3:17-19. Ku ka cï cak ëbɛ̈n acï ke tääu ë ɣɔ̈ric cök, acie këde piɔ̈nden etök, ku ë këde piɔ̈n ë Raan ɣɔn tɛ̈ɛ̈u keek ë käŋ cök, në ŋäth bï kek e ŋɔ̈ɔ̈th, 21an, bï ka cï cak luöny bei ë lïïmic, lïïm ë dhiap de käŋ, agokï aa cath ë këde yenhden në cäth ë mïth ke Nhialic cath ë dhuëëŋ. 22Ku ka cï cak ëbɛ̈n aŋicku nɔn keŋ kek ëtök ku remë kegup acït man ë tiiŋ kɔɔr dhiëth aɣet cï ënɔɔnë. 23#2 Kor 5:2-4. Ku acie keek kapäc, ee wook aya, wok kɔc cath në Wëi, biäk cï kɔn gäm wook, wok gup, wok ee keŋ ë woyiic, wok ee muŋ bï wo muk tiit,#8:23: Këcïgäär däŋ acïnic bïï wo tɔ ye mïthke ku. yen aye wɛ̈ɛ̈r bï wo wɛ̈ɛ̈r gup bei. 24Wo cï kony wëi në aŋäth ŋäthku. Ku kë cï raan tïŋ acie tɔ ye aŋäth. Kë cï raan tïŋ eeŋö duëërë ye bɛ ŋɔ̈ɔ̈th? 25Ku na ŋäthku ka kënku tïŋ, yen abuk aa tiit në piɔ̈n lir.

26Ku Wëidït ee wo kony aya në kɔ̈c kɔ̈ɔ̈c wok, lɔ̈ŋ bï wok lɔ̈ŋ apiɛth akucku, ku Wëidït guöp yen aye lɔ̈ŋ në biäkda në keŋ cïï duëërë lueel. 27Ku Raan ë kɔc woi piɔ̈ɔ̈th thïn ee piɔ̈n ë Wëidït ŋic, täu tɔ̈u en, luɔi ee yen lɔ̈ŋ në biäk de kɔc ɣerpiɔ̈ɔ̈th në këde piɔ̈n ë Nhialic.

28Cöök ŋicku kï, an, Këriëëc ëbɛ̈n ee mat ëtök, bï kɔc nhiaar Nhialic bɛ̈n luöi këpiɛth,#8:28: në këriëëcic ëbɛ̈n Nhialic ee lui në këpiɛth në kɔc nhiaar en; këcïgɔ̈ɔ̈r däŋ ade yic këriëëc ëbɛ̈n ee lui apiɛth në baŋ de kɔc nhiaar Nhialic. kɔc cï cɔɔl ë këde piɔ̈nde. 29Ku kɔc wään cï kɔn ŋic tueŋ, kek aa kɔn lɔc ë yen, bï ke tɔ kït gup në Wënde, luɔi bï en aa kɛ̈ɛ̈i ë mïth juëc yiic mïth ke Wun. 30Ku kɔc ɣɔn cï kɔn lɔc, kek aye ke cɔɔl ë yen, ku kɔc cï cɔɔl ë yen, kek aye ke tɔ piɛthpiɔ̈ɔ̈th ë yen, ku kɔc cï tɔ piɛthpiɔ̈ɔ̈th, kek aye ke gäm dhuëëŋ ë yen.

Nhiëër ë Nhialic ë Kërtho Yic

31Buk ŋö jɔ lueel në këde kake? Të mɛtë Nhialic ke wook, ke eeŋa bï dɛ ater ke wook? 32Yen Nhialic, Raan wään kën Wënde pëën, Wënde guöp, ku acï e yiɛ̈n Raan thuɔɔu ë biäkda wook wodhie, ee kaŋö cïï en wo bï miɔɔc ë käŋ kedhie aya në yen ëtök ë dhuëëŋ? 33Eeŋa bï kɔc cïï Nhialic ke lɔc lɔ gaany? Ee Nhialic yen aye Raan ë keek tɔ cïn yiëth gääk! 34Eeŋa bï wo yiëk yiëth gääk? Ee Kërtho raan wään cï thou, yeka, aŋuän bï wok e lueel, an, raan cï bɛ jat nhial, raan nu ë baŋ cuëny de Nhialic, yen aye raan ee lɔ̈ŋ në biäkda aya. 35Eeŋa bï wo pääk në nhiëër ë Kërtho? Bï ë këril gumku lëu, ayï kërɛɛc dhal wook, ayï yöŋ, ayï cɔk, ayï ciën cïn wokɔ̈ɔ̈th lupɔɔ, ayï riɔ̈ɔ̈c, ayï tɔŋ, de töŋ bï e lëu ë keyiic? 36#Diɛt 44:22. Acït man cï e gɔ̈ɔ̈r an:

“Në biäkdu wok ee nɔ̈k ë akööl ëbɛ̈n,

Wo cï tɔ ye thök bï tɛm röt.”

37Acie yen, ku në kakë yiic kedhie wok ee jööt ee tɔŋ tiaam arëët në riɛl ë raan cï wo nhiaar. 38Cöök ŋiɛc ë yapiɔ̈u arëët kï an, Thuɔɔu, ayï pïïr, ayï tuuc bɔ̈ nhial, ayï bäny, ayï riɛl, ayï ka ke ënɔɔnë, ayï ka bï nu wadäŋ, 39ayï bɛ̈ɛ̈r bɛ̈ɛ̈rë käŋ, ayï tëthuth, ayï të de yen däŋ cï cak, acïn tök ee kakë yiic töŋ bï pɛ̈ɛ̈k lëu, pɛ̈ɛ̈k bï en wo pääk në nhiëër ë Nhialic, nhiëër nu ë Kërtho Yecu Bɛ̈nydïïtda yic.

Currently Selected:

Rom 8: dip-JPB

Highlight

Copy