Kuɛ̈n 34
34
Akɛɛth ke ee pinyë
1Go Bɛ̈nydït Mothe gäm, 2ë wël bɔ̈ yë bïï ke lɛ̈k, kɔc ke Yithriɛl an, “Wek lɔ Kanaan, piny gäm week, akɛɛth ke pinydun abïk tɔ̈u alë. 3Akendun tɔ̈u në biäk të lɔ wöuwicë abïï ɣet ciëën të lɔ jɔ̈ɔ̈r de Dhin, në aken de Edom nɔm. Ku abï rɔt gɔl në biäk lɔ aköl amiäk ciëën të lɔ wöuwic në Wɛ̈ɛ̈r de Amilɔ thar. 4Ëtɛ̈ɛ̈n abï ŋoot ke lɔ wöuwic të lɔ Akrabim jɔ tëëk ke cuuth le jɔ̈ɔ̈r de Dhin ɣeet wöuwic ya cït Kadec Barniya. Ku cök të lɔ rut ke thɛ̈ny aköl athɛ̈i të lɔ Ɣadhar Addar, ku ŋoot ke lɔ të cɔl Adhemon. 5Të bï yen rɔt lɔ yal në wak nu ë aken de Rip nɔm, ku jɔ lɔ guut në Wɛ̈ɛ̈rdïït ɣer kɔ̈u.
6Ku akenduön nu të lɔ aköl athɛ̈i abï aa Wɛ̈ɛ̈rdïït ɣer.
7Akenduön tɔ̈u në biäk të lɔ rut, abï tëëk në Wɛ̈ɛ̈rdïït ɣer yɔu lee në kuur de Ɣor. 8Ku ëtɛ̈ɛ̈n abï jɔ ɣet ë kueer de Ɣamath. Ku jɔ cuuth ke lɔ Dhedad, 9Ku le Dhipiron, ku jɔ lɔ guut në Ɣadhar Enan.
10Aken tɔ̈u në biäk të lɔ bɛ̈n akɔ̈l thok, abï tëëk në Ɣadhar Enan yɔu lee Cepam. 11Ëtɛ̈ɛ̈n abï rɔt cɔ̈k në biäk të lɔ wöuwic gut të lɔ Ɣarbel, në biäk të lɔ aköl amiäk de Ayin. Ku ŋoot ke cök të lɔ aköl amiäk në kuriic në Baar ë Galili yɔu 12ku ëtɛ̈ɛ̈n cök wöuwic ke kuany wɛ̈ɛ̈r de Jordan kɔ̈u ke lɔ Wɛ̈ɛ̈r de Amilɔ. “Kakë kek aye akɛɛth kaŋuan ke pinydun. 13#Kuɛ̈n 26:52-56. #Joc 14:1-5. Go Mothe lɛ̈k kɔc ke Yithriɛl an, “Yen piny bäk nööm kï në deeny de gɛk, yen piny cïï Bɛ̈nydït gäm dhiëën kadhoŋuan ku dhiën biäk. 14Dhiën de Ruben ku Gad, ku biäk de dhiën de Manatha të lɔ aköl amiäk, acïk piinyken nööm, ku tekkï keek athöŋ ë ɣöötken thook. 15Ku dhiëën kaarou ku dhiën biäk acïk pinyden nööm të lɔ aköl amiäk de wɛ̈ɛ̈r de Jordan, tuööm nɔm kekë Jeriko.
Bɛ̈ny nu riɛl de piny në ke cin
16Go Bɛ̈nydït lɛ̈k Mothe 17an, “Eleyadhar bɛ̈ny de ka ke Nhialic ku Jocua wën ë Nun abïk piny tɛ̈k kɔc. 18Bä bɛ̈ny tök aa nööm në dhiën thook kedhie bïk keek kuɔny në tëŋ de piny. 19-28Kakë ayek rin ke kɔc cï Bɛ̈nydït lɔc bïk aa bäny:
| Dhiën | Bɛ̈ny |
|---|---|
| Juda | Kalep wën ë Jepuna |
| Thimion | Celumiel wën ë Amiɣud |
| Benjamin | Elidad wën ë Kithlon |
| Dan | Buki wën ë Jogli |
| Manatha | Ɣaniel wën ë Epod |
| Eparaim | Kemiɛl wën ë Cipatan |
| Dhebulun | Elidhapan wën ë Parnak |
| Yithakar | Paltiɛl wën ë Adhan |
| Acer | Aɣiɣud wën ë Celomi |
| Naptali | Pedaɣel wën ë Amiɣud |
29Kakë ayek kɔc cïï Bɛ̈nydït ke gäm luɔi bïk käŋ tɛ̈k kɔc ke Yithriɛl piny de Kanaan.
Currently Selected:
Kuɛ̈n 34: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
