Math 22
22
Kääŋ de Dhuëëŋ de Thiëëk
(Mak 14:15-24)
1Go Yecu bɛ̈ɛ̈r, ku be jam në kääŋ, lueel an, 2“Ciɛɛŋ de paannhial, acït melik tök, melik cï thiëŋ de wënde lueel, 3go lïïmke tooc lek kɔc cɔɔl kɔc cï kɔn lɛ̈k thiëëk, gokï rɛɛc bɛ̈n. 4Na wën, ke be lïïm kɔ̈k tooc, lueel an, “Lɛ̈kkï kɔc cï kɔn lɛ̈k thiëëk an, ‘Tiëŋkï, yɛn ë këcamdït guik, miöörkï ku ɣɔ̈kkiën cuai kɔ̈k acï ke nɔ̈k, ku käŋ acïk thök kedhie, bäkï ë thiëëkic!’ 5Gokï lueel an, “Eeŋöda thïn, ku jëlkï, lɔ tök domde, ku lɔ tök tëdɛn ë ɣööc, 6go kɔc cï döŋ gokï lïïmke dɔm, ku kurkï keek, ku näkkï keek. 7Na wën, acï melik e piŋ, ke göth, go remdɛn ë tɔŋ tooc, lek kɔc ee kɔc nɔ̈kë nɔ̈k, ku nyop pänydɛndït ë mac. 8Na wën, ke yöök lïïmke an, “Thiëëk acï guik, ku kɔc wään cï lɛ̈k cïï röŋ ë bɛ̈n bï kek bɛ̈n. 9Yen la wek ë kuɛɛr dït yiic, ku kɔc bäk yök ëbɛ̈n, jakï ke cɔɔl ë thiëëkic. 10Agokï lɔ biic kek lïïmke, lekï ë kuɛɛr dït yiic, agokï kɔc kut kɔc cïk yök kedhie, kɔc rac ayï kɔc piɛth, go thiëëk jɔ thiäŋ ke kamaan.
11Na wën, acï melik bɛ̈n ɣöt bï kamaan bɛ̈n tïŋ, ke tïŋ raan ëtɛ̈ɛ̈n raan kën lupɔ de thiëëk tääu ë yekɔ̈u, 12go thiëëc an, “Mäth, eeŋö bï yïn eenë, ke yï cïn lupɔ de thiëëk?” Go lɔ lik. 13#Math 8:12; 25:30; Luk 13:28. Na wën, ke melik yöök lïïmke an, “Duötkï cök ku yecin, ku jatkï, cuatkï tëcol biic ya, dhiëëu abï nu ëtɛ̈ɛ̈n kekë ŋëny de lec.”’
14Kɔc cï cɔɔl ajuëckï, ku kɔc cï lɔc alikï.
Thiëc në Biäk de kun de Athölbö
(Mak 12:13-17; Luk 20:20-26)
15Go Parithai jäl lek löŋ kiëët kapäc ë luɔi bï kek ë deep ë jamic. 16Gokï kɔckɛn ë piööcë tuöc en, në kɔc ke Ɣerod ëtök, agokï lueel an, “Bɛ̈ny de wëët, yïn ŋicku nɔn ee yïn yic, ku nɔn ee yïn kɔc wɛ̈ɛ̈t në kueer ë Nhialic ë yic, ku acïn raan bï yïn riɔ̈ɔ̈c ë yen, yïn cïï kɔc ë woi gup biic. 17Yen lëk yïn wook, ke luel ë yïpiɔ̈u. Cï päl wook nɔn bï wok Kaithar aa kuöt athölbö, ku cie yen?”
18Go Yecu rac de kepiɔ̈ɔ̈th ŋic, go lueel an, “Eeŋö thɛm wek ɛn, wek kɔc de yäc aguk? 19Nyuöthkï yen wënh ye athölbö kut.”
Gokï wënh cɔl denariɔn bɛ̈ɛ̈i yïnkï yen. 20Go keek thiëëc an, “Raan cï gɔ̈ɔ̈rë eeŋa, ku jam cï gɔ̈ɔ̈r ee këde ŋa?”
21Gokï bɛ̈ɛ̈r an, “Ee Kaithar.”
Go ke yɔ̈ɔ̈k an, “Yak Kaithar yiɛ̈n ka ke Kaithar, ku yak Nhialic yiɛ̈n ka ke Nhialic.”
22Na wën, aa cïk e piŋ, ke ke gäi, ku pälkï, ku jëlkï.
Thiëc në Biäk de Jönërɔt ë Thuɔɔuwic
(Mak 12:18-27; Luk 20:27-40)
23 #
Luɔi 23:8. Ë kööl manë guöp, ke Thadokai ke ke bɔ̈ të nu yen, kɔc ë ye lueel an, acïn jön bï kɔc röt jɔt nu, gokï thiëëc, 24#Nyöŋ 25:5. an, “Bɛ̈ny de wëët, acï Mothe lueel an, të thouwë raan, ke cïn mïth, ke mɛnhkënë abï tiiŋde lɔ̈ɔ̈k thiaak, go mɛnhkënë dhiëëth nɔm. 25Ku ënɔɔnë, mïth kadhorou aake nu ë woyiic, wɛ̈ɛ̈t ke raan tök, na wën, ke wën dït thiëk, ku jɔ thou, ke cïn meth, go tik nyäŋ mänhë. 26Ayï wën lɔ ë yecök aya, ayï wën ee kek diäk aya, aɣët wën ee kek dhorou, acïk thou kedhie, ke ke cïn mïth. 27Na wën, ke tik löök thou aya ë kecök ciëën kedhie. 28Ku ënɔɔnë, ëkööl ë jönërɔt ë kɔc, ke tiiŋë bï aa tiiŋ de raanou ë keyiic kadhorou? Acï aa këden kedhie.”
29Go Yecu pɔ̈k nɔm keek an, “Acäk wööc, në kuny kuöc wek kacïgɔ̈ɔ̈r, ku kuöckï riɛldïït ë Nhialic aya. 30Ë kööl ë jönërɔt ë kɔc, kɔc acïkï ye thiëëk, ku cïï ke ye thiaak, ayek ciët tuuc ke Nhialic paannhial. 31Ku në këde jön bï kɔc cï thou röt jɔt, kɛ̈nkï jam kueen jam cï lɛ̈k week, ë Nhialic an, 32#Bɛ̈n 3:6. “Yɛn ee Nhialic de Abraɣam, ku ya Nhialic de Yithaak, ku ya Nhialic de Jakop? Nhialic acie Nhialic de kɔc cï thou, ee Nhialic de kɔc pïïr.”
33Na wën, acï kuut ke kɔc e piŋ, ke ke gäi në wëëtde.
Löŋdït
(Mak 12:28-34; Luk 10:25-28)
34Na wën, aacï Parithai e piŋ nɔn cï en Thadokai tɔ mim, ke ke kut kenïïm. 35Go raan tök ë keek, ee bɛ̈ny de löŋ, go thiëc käŋ, them en en an, 36“Bɛ̈ny de wëët, cöök dïït ë löŋic ee cöökou?”
37 #
Nyöŋ 6:5. Go Yecu yɔ̈ɔ̈k an, “Nhiaar Bɛ̈nydït Nhialicdu në piɔ̈ndu ëbɛ̈n, ku në wëiku ëbɛ̈n, ku në nɔmdu ëbɛ̈n. 38Cöök tueŋ ka, cöök dïït ë löŋ. 39#Leb 19:18. Ku kë lɔ ë yecök acït en an, ‘Nhiaar raan rɛ̈ɛ̈r ke yïn cït man nhiɛɛr yïn rɔt.’ 40#Luk 10:25-28. Lööŋ ëbɛ̈n kekë tït anöökkï ë cökkë kaarou kɔ̈ɔ̈th.”
Thiëc në Biäk de Kërtho
(Mak 12:25; Luk 20:41)
41Na wën, aacï Parithai kenïïm kut, ke ke thiëëc Yecu keek, 42an, “Eeŋö yak lueel në biäk de Kërtho? Ee wën ë ŋa?”
Gokï lueel an, “Ee wën ë Debid.”
43Go Yecu ke thiëëc an, “Ka eeŋö ye Debid ye tɔ ye ‘Bɛ̈nydït’ në riɛl ë Wëidït? Go Debid lueel an,
44 #
Diɛt 110:1. “Bɛ̈nydït acï Bɛ̈nydiëndït yɔ̈ɔ̈k an,
‘Rɛ̈ɛ̈rë ë ciin cuënydï,
Aɣët të bän kɔc dɛ wek ater tɔ ye kë bï yïn yïcök aa dhɔ̈ɔ̈r.’
45Ku ënɔɔnë, të ye Debid ye tɔ ye ‘Bɛ̈nydït,’ ka eeŋö duëër ë Kërtho aa wën de Debid?”
46Ku acïn raan cï këde Yecu bɛ̈n lëu ë bëër, ku gɔl ëkööl manë guöp lee tueŋ acïn raan cï ye bɛ thiëc käŋ.
Currently Selected:
Math 22: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
