Math 20
20
Kɔc Lui Domic
1Ciɛɛŋ de paannhial athöŋ ke raan ee bɛ̈ny de baai, raan cï riɛɛl biic miäk ëtɛ̈ɛ̈n, le kɔc kɔɔr, kɔc bï luui ë wëu ë domde yic, dom ë tim cɔl enap. 2Na wën, aacï wëu giim kekë kɔc lui an, “Kööl tök ke raan abï dɛ denariɔn tök, (yen acït gïrïïc kadiäk), ke ke tɔ lɔ domic. 3Go bɛ lɔ biic të cït thaar kadiäk aköl, ku tïŋ kɔc kɔ̈k akɛ̈ɛ̈ckï ë thuuk thok, ke ke cïn nïïm luɔi, 4go ke yɔ̈ɔ̈k an, “Lakï domic ayadäŋ ke we bä miɔɔc në kapiɛth. Gokï lɔ. 5Na wën, ke be lɔ biic të cït thaar kadhetem aköl, ayï të cït thaar kadhetem, ku jɔ looi ke cït kën awën. 6Na ɣɔn thëën, të cït thaar kathiëër ku tök aköl, ke lɔ biic, le ku yök kɔc kɔ̈k akɛ̈ɛ̈ckï ke ke cïn nïïm luɔi, go ke thiëëc an, ‘Eeŋö kääc wek eenë ëcaŋawën, ke we cïn nïïm luɔi?’ 7Gokï bɛ̈ɛ̈r an, “Ee luɔi cïn en raan cï wo tɔ lui wëu. Go ke yɔ̈ɔ̈k an, “Lakï domic week, ke we bï miɔɔc ë këpiɛth.
8 #
Leb 19:13; Nyöŋ 24:15. Na wën, acï akɔ̈l lɔ piny, ke bɛ̈ny de dom yöök wukilde an, ‘Cɔl kɔc lui, ku gämë keek ariöpden, abä gɔl në kɔc ë bɔ̈ ciëën, le guööt ë kɔc ë bɔ̈ tueŋ.’ 9Na wën, ke kɔc ë ke bɔ̈, kɔc wën ë cak luɔi të cït thaar kathiëër ku tök, ku jɔ ke gäm denariɔn tök raan ëbɛ̈n. 10Na wën, ke kɔc ë kɔn lɔ ë luɔi yic ke ke bɔ̈, ayek lueel ë kepiɔ̈ɔ̈th an, bïï ke miɔɔc në kë wär këde kɔc awën, go ke gäm denariɔn tök tei raan ëbɛ̈n. 11Na wën, acïk kaken nööm, ke ke dok ë ke yäc në bɛ̈ny de baai. 12Luelkï an, ‘Kɔc ë bɔ̈ ciëën aake lui ë thaar tök tei, ku acï ke kiëët ë wook, wok kɔc cï akɔ̈l guum, ayï tuöc de piny!’ 13Go bɛ̈ɛ̈r, yöök raan tök ë keek an, ‘Mäth, yïn kɛ̈n cam, ë wo kën jam giim wën në këde denariɔn tök? 14Nöm këdu, ku lɔ, yɛn de piɔ̈u luɔi bän raan ë bɔ̈ ciëën miɔɔc, acït man miaac ɛn yïn aya. 15Kënë päl ɛn nɔn bän kë nu ë yapiɔ̈u looi në kakï? Ku cï tiɛɛl yï dɔm, në baŋ de piath ë yɛn piɔ̈u?”’
16 #
Math 19:30; Mak 10:31; Luk 13:30. Yen tëde ka, kɔc ë bɔ̈ ciëën abïk wɛɛn tueŋ, ku wëën kɔc ë bɔ̈ tueŋ ciëën. Kɔc cï cɔɔl ajuëckï, ku kɔc cï lɔc alikï.
Yecu Ajam në Jam de Diäk ë Biäk ë Thonde
(Mak 10:32-34; Luk 18:31-34)
17Na wën, aa ciɛth ke lɔ Jeruthalem, ke Yecu cɔl kɔcpiööcë kathiëër ku rou, ku yöök keek an, 18“Tiëŋkï, wo lɔ Jeruthalem, ku Wën ë Raan abï nyiën bänydït ke ka ke Nhialic ku kɔc ee löŋ gɔ̈ɔ̈r. Ku abïk yiëk yeth gääk, ke bïï nɔ̈k, 19ku yïnkï Juöör lek geet, ku lek dui ë waat, ku lek piäät ë tim cï rïïu nɔm kɔ̈u, ku ëkööl ee kek diäk abï rɔt bɛ jɔt.”
Thiëc de Man Wɛ̈ɛ̈t ke Dhebedayo
(Mak 10:35-45)
20Na wën, ke man wɛ̈ɛ̈t ke Dhebedayo bɔ̈ të nu yen kekë wɛ̈ɛ̈tke, bïï ku tuk emiɔl ë yenɔm, ade kë kɔɔr tëde yen.
21Ago thiëëc an, “Eeŋö kɔɔr?”
Go lueel an, “Tɔ wɛ̈ɛ̈tkiënë kaarou rëër ë ciɛɛŋdu yic, tök ë baŋ cuënydu, ku tök ë baŋ camdu.”
22Go bɛ̈ɛ̈r an, “Wek kuc ke liɛpkï. Duɛ̈ɛ̈rkï dek lëu ë bïny bän dek ë ye, ku duɛ̈ɛ̈rkï baptith lëu baptinh bï a baptith?”
Gokï bɛ̈ɛ̈r an, “Aduëërku lëu.”
23Go ke yɔ̈ɔ̈k an, “We bï dek ë bïnydï në yic, ku we bï baptith ë baptinh cï a baptith, ku rëër ë baŋ cuënydï ku baŋ camdï acie këdiën bä yiɛ̈n kɔc, ee këde kɔc cïï wäär kɔn lueel an, bï aa këden.”
24Na wën, acï kɔc kathiëër e piŋ, ke ke diu piɔ̈ɔ̈th ë wɛ̈ɛ̈tkë kaarou. 25#Luk 22:25,26. Go Yecu ke cɔɔl të nu yen kedhie, ku lueel an, “We ŋic bänydït ke Juöör, ayek kɔckɛn cieŋ ë ciɛɛŋ ril, ayï kɔckɛn dït, ayek keek cieŋ. 26#Math 23:11; Mak 9:35; Luk 22:26. Ku acïï bï tɔ̈u aya në weyiic: ku raan ëbɛ̈n raan kɔɔr luɔi bï en dït ë weyiic, ë tɔ rɔt ë raan ë kakun looi, 27ku raan ëbɛ̈n raan kɔɔr luɔi bï en lɔ tueŋ ë weyiic, ë tɔ rɔt ë lïmdun, 28cït man ë Wën ë Raan, aa cïï bɔ̈ luɔi bï yen aa luöi käŋ, ee luɔi bï en ka ke kɔc aa looi, yen aa bï yen, ku luɔi bï en wëike gam ë wëër bï en kɔc juëc wɛ̈ɛ̈r bei.”
Yecu Atɔ Cöör Kaarou Dem
(Mak 10:46-52; Luk 18:35-43)
29Na wën, aa jëlkï ë Jeriko, ke kuany cök ë kut dïït ë kɔc. 30Ku de cöör kaarou rɛ̈ɛ̈r ë kueer këc, na wën, acïk e piŋ nɔn tëëkë Yecu kueer, ke ke cöt an, “Tɔ yïpiɔ̈u kok we wook, yïn Bɛ̈nydït, wën ë Debid!”
31Ago ke jɔ̈ɔ̈ny ë kut ë kɔc an, miɛmkï, agokï cööt awär cɔ̈t awën, luelkï an, “Tɔ yïpiɔ̈u kok we wook, yïn Bɛ̈nydït, wën ë Debid!”
32Go Yecu keek thiëëc an, “Eeŋö kaarkï kë bä luöi week?”
33Gokï lueel an, “Bɛ̈nydït, ë luɔi bï yïn wo liep nyïïn!”
34Go Yecu piɔ̈u kok kekë keek, ku jɛk kenyïïn, agokï dap yïn ënɔnthiinë, ku kuanykï cök.
Currently Selected:
Math 20: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
