Math 18
18
Eeŋa Yen Dït?
(Mak 9:33-37; Luk 9:46-48)
1 #
Luk 22:24. Ë köölë guöp, ke kɔcpiööcë ke ke bɔ̈ tëde Yecu, bïk ku thiëckï an, “Eeŋa dït ë ciɛɛŋ de paannhialic?”
2Go Yecu mɛnhthiinakäŋ cɔɔl, ku tɛ̈ɛ̈u ë keyiic cil, 3#Mak 10:15; Luk 18:17. ku lueel an, “Wek yɔ̈ɔ̈k ëyic an, ‘Të kɛ̈n wek röt puk, abäk ciët mïththiaakäŋ, ke we cïï bï lɔ ë ciɛɛŋ de paannhialic. 4Yen ka, raan ëbɛ̈n raan ë rɔt tɔ koor cït man ë mɛnhthiinë, yen adït ë ciɛɛŋ de paannhial. 5Ku raan dɔm mɛnhthiin töŋ cït ëmɛnhë në rinkï, ke dɔm ɛn,
Thëm de Kërac
(Mak 9:42-48; Luk 17:1-2)
6“Ku raan bï mɛnh tök ë mïththiikë yiic tɔ loi kërac, mïth cï a gam, aduëër ŋuän tëde yen, të cï pil ë guär mac ë yeyeth, ku jɔ mou wïïr ë aluŋic. 7Amawoou ë kɔc ke piny nɔm në biäk de ka ye kɔc tɔ loi kërac! Ka ye kɔc tɔ loi kërac abïk dhil bɛ̈n, ku amawoou ë raanë raan ee këdäŋ bɛ̈ɛ̈i kë ye kɔc tɔ loi kërac!
8 #
Math 5:30. Ku na yïciin ku nɔn ee yen yïcök, na cï yï tɔ loi kërac, ke tëëmë bei, cuatë wei, luɔi bï yïn lɔ të nu pïïr, acakaa yïn ee ŋɔl ku yï cath we ciin tök, yen aŋuän tëde yïn, në luɔi bï yï cuat mɛɛc many bï dëp aɣet athɛɛr, ke yï cath we cin kaarou ku cök kaarou. 9#Math 5:29. Ku yïnyin, të cï en yï tɔ loi kërac, ke ŋuöötë bei, ku cuatë wei, luɔi bï yïn lɔ të nu pïïr, ke yï cath we nyin tök, yen aŋuän tëde yïn, në luɔi bï yï cuat ë giɛna de yic mac, ke yï cath we nyïïn kaarou.
Kääŋ de Amɛ̈l cï Määr
(Luk 15:3-7)
10Tiëŋkï röt, ke we cïï mɛnh tök ë mïththiikë yiic bï kuöc theek, wek yɔ̈ɔ̈k an, “Tuuckɛn nhial ayek wäär woi nyin ëcaŋɣɔn wäär nu paannhial.#18:10: Këcïgɔ̈ɔ̈r däŋ acï cöök 11 tääu: Wën ë Raan aa bɔ̈ ke bï kë cï määr bɛ̈n kony (tïŋ Luk 19:10). 11#Luk 19:10. Wën ë Raan aa bɔ̈ bï kë cï määr bɛ̈n kony wëi. 12Yak lueel wäkdï? Na de raan de thök kabɔt, ku mär tök ë keek roor, ke raanë cïï thök kathiërdhoŋuan ku dhoŋuan bï nyääŋ piny, ku le ë kurdït nïïm, le kë cï määr kɔɔr? 13Ku na të le yen e yök, wek yɔ̈ɔ̈k ëyic an, “Abï piɔ̈u miɛt në biäk de thɔ̈ɔ̈kë awär miɛt mit en piɔ̈u në biäk de thiërdhoŋuan ku dhoŋuan kën määr. 14Yen acït #18:14: wuöördun; në gäär däŋ wäär. Wuöörduön nu paannhial, aliu ë yepiɔ̈u luɔi bï mɛnh tök määr ë mïththiikë yiic.
Mɛnhkui ku Nɔn ee Nyankui cï Wäc
15 #
Luk 17:3. Ku na mɛnhkui, të cï en yï wäc këdäŋ,#18:15: Këcïgɔ̈ɔ̈r däŋ ade yic wäc yïn. ke yï lɔ, lɛ̈kë yen kë cï wööc tëdun waarou, të cï en yï piŋ thok, ke we ye wepiɔ̈ɔ̈th jɔ yök wekë mɛnhkui. 16#Nyöŋ 19:15. Ku të reec en yï piŋ thok, ke yï lɔ wekë raan tök ayï kɔc kaarou, ago jam lɔ gɔk ëbɛ̈n ë cäätɔɔ kaarou ayï diäk. 17Ku të reec en keek piŋ thook, ke yï lɛ̈kë ɣön ë Nhialic, ku të reec en ɣön ë Nhialic piŋ thok, ke tɔ cït jur kuc Nhialic tëde yïn ku cït raan ë athölbö tɔ kut.
Kë cï Duut ku Kë cï Dɔ̈k
18 #
Math 16:19; Jɔn 20:23. Wek yɔ̈ɔ̈k ëyic, Të de yen kë bäk duut ë piny nɔm, ke abï duut paannhial, ku të de yen kë bäk dɔ̈k ë piny nɔm ka bï dɔ̈k paannhial.
19Wek bɛ yɔ̈ɔ̈k an, “Na de kɔc kaarou ë weyiic kɔc mat kethook ë piny nɔm, në kë bïk lim, ka bï luöi keek në wäär nu paannhial. 20Ku të nu kɔc kaarou ayï diäk kɔc cï guëër në rinkï, ya ka, ë keyiic cil ëtɛ̈ɛ̈n.”
Kääŋ de Lïm cïn Kokdepiɔ̈u
21 #
Luk 17:3,4. Na wën, ke Petero bɔ̈ të nu yen, bï ku thiëëc an “Bɛ̈nydït, bï mɛnhkäi a luöi kërac raandï, ku bä pɔ̈l? Raandhorou?”
22 #
Cäk 4:24. Go Yecu yɔ̈ɔ̈k an, “Yïn cä yöök an, raandhorou, yïn yɔ̈ɔ̈k an, ee raandhorou raanthiërdhorou.” 23Yen athɔ̈ŋ ciɛɛŋ de paannhial kekë melik tök, melik kɔɔr luɔi bï en wëu kueen yiic kekë lïïmke. 24Na wën, aacï kuɛ̈n gɔl, ke lïm tök bïïyë tëde yen, raan cath ke käny dït arëët, aguum juëc ke jini. 25Ku të cïn en ke cut en, ke yöök ë bɛ̈nyde an, ‘Bï rɔt ɣaac, yen ku tiiŋde ku mïthke, ku ka cath në yen kedhie, ka bï en ke käŋ cool.’ 26Na wën, ke lïmë cuɛt rɔt piny, ku lɛ̈ŋ an, “Bɛ̈ny, pälë yïpiɔ̈u piny, käŋ kedhie abä ke cuöl yïn.” 27Go bɛ̈ny de lïmë go piɔ̈u kok kekë yen, ku jɔ pɔ̈l, pɛ̈l kanu.
28Na wën, ke lɔ biic, yen ee lïmë guöp, le ku yök raan töŋ ë wɛ̈ɛ̈tkɛn ee kek lïïm, raan cath ke känyde, käny baŋ, cït jini tök tei, go dɔm, ku min röl, lueel an, “Cuölë yɛn känydiën cath ke yïn.” 29Go raan wën ee kek lïïm ëtök go rɔt cuat piny ë yecök, ku lɛ̈ŋ an, “Pälë yïpiɔ̈u piny, käŋ kedhie abä ke cuöl yïn.” 30Go cuö gam, go lɔ ku tɛ̈ɛ̈u ë aloocic, aɣët të bï yen käny cool. 31Na wën, ke wɛ̈ɛ̈t kɔ̈k ee kek lïïm, të cï kek kë cï looi tïŋ, ke ke diu piɔ̈ɔ̈th, gokï bɛ̈n ku lëkkï bɛ̈nyden ka cï looi ëbɛ̈n. 32Na wën, aacï bɛ̈ny e cɔɔl, ke yöök an, “Yïn ee lïm racpiɔ̈u, yïn cä päl ee känydïïtë ëbɛ̈n, në biäk cï yïn a lɔ̈ŋ. 33Ku yïn, cïï piɔ̈u duëër dhil kok wekë raanduön aa wek lïïm ëtök, cït man cän piɔ̈u kok wokë yïn?’ 34Go bɛ̈nyde gɔ̈th, ku gëm kɔc ë kɔc leeŋ wëi, aɣët të bï en käŋ cool kedhie, ka kɛ̈ɛ̈ny tëde yen.”
35Yen acït kë bï wäär nu paannhial luöi week, të kɛ̈n we röt pɔ̈l wapäc ë wepiɔ̈ɔ̈th thïn, ŋɛk ë mɛnhkënë päl ka cï wööc.
Currently Selected:
Math 18: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
