Math 16

Kɔc Akɔɔrkï Gök

(Mak 8:11-13; Luk 12:54-56)

1 # Math 12:38; Luk 11:16. Na wën, ke Parithai bɔ̈ kekë Thadokai, bïk bɛ̈n them, akɔɔrkï gök bï bɛ̈n nhial. 2Go pɔ̈k nɔm keek an, “Të cï akɔ̈l thëi, ka yak lueel an, ‘Piny abï piath, tënhial acï thiɛth.’ 3Na miäk, ka yak lueel an, ‘Deŋ ajöt ëköölë, tënhial acï thiɛth ku ariëël anu.’ Wek kɔc de yäc aguk, we ŋic nhial woi yic aguɔkï piny ŋic täu bï en tɔ̈u, ku ŋïny bä wek täu de run ŋic adhal week!#16:3: Këcïgɔ̈ɔ̈r däŋ acïnic wël ke Yecu në cök 2-3. 4#Math 12:39; Luk 11:29. Rem racpiɔ̈u rem ë diëër lei kɔɔr akɔɔr gök, ku acïn gök bï nyuöth en, ee këde tiët Jona tei.”

Go ke nyääŋ piny, ku jël.

Luɔu de Parithai ku Thadokai

(Mak 8:14-21)

5Na wën, aacï kɔckɛn ë piööcë ɣet lɔŋtui, ke ke cï kuïn cï pam ruööi. 6#Luk 12:1. Go Yecu ke yɔ̈ɔ̈k an, “Yak röt tiit ë luɔu de Parithai kekë Thadokai. 7Gokï teer kapäc, ku luelkï an, “Ee luɔi kën wok kuïn bɛ̈ɛ̈i, en aa lueel en en.”

8Na wën, aacï Yecu ye ŋic ke ke yöök an, “Wek kɔc dɛk ë gäm, eeŋö tɛɛrkï wapäc, ë luɔi cïn en kuïn cäk bɛ̈ɛ̈i? 9#Math 14:17-21. Kɛ̈nkï käŋ guɔ ŋic, ku kɛ̈nkï wenïïm tak në kuïn cï pam kadhïc kekë agum de kɔc kadhïc, ku diööny kadï cäk kuany? 10#Math 15:34-38. Ayï kuïn cï pam kadhorou kekë agum de kɔc kaŋuan, ku diööny kadï cäk kuany? 11Eeŋö cä wek e ŋic, nɔn cïï en ee këde kuïn en ë lɛ̈k ɛn e week an, “Bäk röt tiit ë luɔu de Parithai kekë Thadokai!”

12Na wën, ke jɔkï ŋic nɔn ë cïï en ke yöök an, bïk röt tiit në luɔu de kuïn, ee wëët en ë lueel, wëët de Parithai kekë Thadokai.

Jam de Petero ë Biäk de Yecu

(Mak 8:27-30; Luk 9:18-21)

13Na wën, acï Yecu bɛ̈n piny de Kaitharia Pilipi, ke thiëc kɔckɛn ë piööcë an, “Ye kɔc lueel an, ya ŋa, yɛn Wën ë Raan?”

14 # Math 14:1,2; Mak 6:14,15; Luk 9:7,8. Gokï lueel an, “Në kɔc kɔ̈k an, Jɔn Baptith, ku në kɔ̈k an, Elija, ku në kɔ̈k, an, Jeremia, ku nɔn ee yen raan töŋ de tït.” 15Go ke thiëëc an, “Ku na week, yak lueel an, ya ŋa?”

16 # Jɔn 6:68,69. Go Thimon Petero bɛ̈ɛ̈r an, “Yïn ee Kërtho, Wën ë Nhialic pïïr.”

17Go Yecu bɛ̈ɛ̈r, yöök, an, “Thieithieei, yïn Thimon Bar-Jona, acie raan cath kekë rïïŋ ku riɛm en ë nyuth yïn ee kënë ee Wäär nu paannhial. 18Ku yïn yɔ̈ɔ̈k, yïn Petero, yïn ee kuur, ku yɛn bï ɣön ë Nhialicdï yïk ee kuurë nɔm, ku acïn riɛl ë paan ë thuɔɔu bï yen tiaam. 19#Math 18:18; Jɔn 20:23. Ku yïn bä gäm mukthɛ̈ɛ̈r ke Ciɛɛŋ de paannhial, ku kë bä duut ë piny nɔm, abï tɔ̈u ke cï duut paannhial, ku kë bä lony ë piny nɔm, abï tɔ̈u ke cï lony paannhial, käŋ kedhie.

20Go kɔckɛn ë piööcë lom thook, ke cïkï bï lɛ̈k raan däŋ nɔn ee yen Kërtho.

Yecu Ajam në Biäk de Nuande ku Thonde

(Mak 8:31–9:1; Luk 9:22-27)

21Ëköölë acï Yecu kɔckɛn ë piööcë gɔl ë nyuuth luɔi bï en dhil jäl le Jeruthalem, ku luɔi bï en kajuëc guum tëde röördït ku bänydït ke ka ke Nhialic, ku kɔc ë löŋ gɔ̈ɔ̈r, ku bï nɔ̈k abï thou, ku bï rɔt bɛ jɔt ëkööl ee kek diäk.

22Na wën, ke Petero dɔm Bɛ̈ny cin, go jɔ jɔ̈ɔ̈ny an, “Acie yen, Bɛ̈nydït, yïn cïï kënë bï yök anandu.”

23Go rɔt puk, ku yöök Petero an, “Waanë rɔt ë yakɔ̈u ciëën, Catan, yɛn cï piɔ̈u rac wokë yïn, yïn kën yïpiɔ̈u tuöm ka ke Nhialic, ee ka ke kɔc tei.”

24 # Math 10:38; Luk 14:27. Na wën, ke Yecu yöök kɔckɛn ë piööcë an, “Na de raan de piɔ̈u luɔi bï en a kuany cök, ke nyäŋ rɔt, ku jɔt timdɛn cï rïïu nɔm, ku biɔɔth a cök. 25#Math 10:39; Luk 17:33; Jɔn 12:25. Raan ëbɛ̈n raan kɔɔr luɔi bï en wëike kony, ka bï ke mɔ̈ɔ̈r, ku raan ëbɛ̈n raan mär wëike në biäkdï, ka bï ke yök. 26Të ciɛmë raan piny nɔm ëbɛ̈n, ku mɛ̈ɛ̈r wëike, ke piathde akou? Bï raan ŋö gam wɛɛr en wëike? 27#Math 25:31; Diɛt 62:12; Rom 2:6. Wën ë Raan abï bɛ̈n në dhuëëŋ de Wun kekë tuuckɛn nu nhial, ago raan riɔp ëbɛ̈n në kë rɔ̈ŋ në luɔide. 28Wek yɔ̈ɔ̈k ëyic an, “Ade kɔc kɔ̈k kääc ëtënë, kɔc cïï thuɔɔu bï thiëëp, të ŋoot kek ke kën Wën ë Raan tïŋ abɔ̈ ë ciɛɛŋdeyic.

Currently Selected:

Math 16: dip-JPB

Highlight

Copy